Kwagagĩria Ũtungata Witũ​—Andĩka Arĩa Makenio nĩ Ndũmĩrĩri

“Wĩmenyagĩrĩre wee mwene, na ũmenyagĩrĩre ũrutani ũrĩa ũrutanaga.” (1 Tim. 4:16) Ũtaaro ũcio ũrĩa mũtũmwo Paulo aandĩkĩire Timotheo wonanagia atĩ, o na angĩkorũo no hĩndĩ tũrambĩrĩirie kũhunjia kana twambĩrĩirie tene, nĩ twagĩrĩirũo gũthiĩ na mbere kwagagĩria ũtungata witũ. Nĩguo tũhote gwĩka ũguo, nĩ kũrĩkoragwo na gĩcunjĩ thĩinĩ wa Ũtungata Witũ wa Ũthamaki kĩrĩa kĩrĩkoragwo na kĩongo “Kwagagĩria Ũtungata Witũ.” O gĩcunjĩ nĩ kĩrĩaragĩrĩria ũndũ ũmwe wa bata na gĩkonania maũndũ marĩa tũngĩka nĩguo tũũkũrie. Mweri-inĩ ũrĩa ũndũ mũna warĩrĩrio, ahunjia othe marekĩrũo ngoro maũhũthagĩre. Mweri ũcio wathira, nĩ kũrĩkoragwo na gĩcunjĩ thĩinĩ wa Mũcemanio wa Ũtungata kĩrĩa kĩrĩtũheaga mweke wa kũgweta ũrĩa tũragunĩkire nĩ ũndũ wa kũhũthĩra ũndũ ũcio. Mweri-nĩ ũyũ tũrekĩrũo ngoro twandĩkage arĩa makenio nĩ ndũmĩrĩri.

Ũndũ Ũcio nĩ wa Bata Nĩkĩ? Nĩguo tũhingie ũtungata witũ, harĩ ũndũ twagĩrĩirũo nĩ gwĩka makĩria ma kũhunjia tu. No mũhaka tũcokagĩre arĩa monanĩtie kwenda ũhoro mwega na tũmarute, na njĩra ĩyo tũgaitĩrĩria maĩ mbeũ cia ũhoro mwega iria tũhandĩte. (Mat. 28:19, 20; 1 Kor. 3:6-9) Nĩguo twĩke ũguo, twagĩrĩirũo gũcaria mũndũ ũrĩa woonanirie kwenda ũhoro mwega, twarĩrĩrie nake maũndũ marĩa atangĩkagĩra, na tũtwarithie na mbere ndeereti ĩrĩa twarĩ nayo hĩndĩ ĩyo ĩngĩ. Nĩ ũndũ ũcio, rĩrĩa twacemania na mũndũ wonania kwenda ndũmĩrĩri ya Bibilia, harĩ bata kwandĩka ũhoro wake.

Ũrĩa Ũngĩka Ũguo:

• Tigĩrĩra atĩ thĩinĩ wa mũhuko waku wa kũhunjia ũrĩ na handũ ha kwandĩka arĩa monania kwenda ũhoro mwega. Tigĩrĩra atĩ maũndũ marĩa wandĩkĩte marĩ na kĩhaarĩro kĩega na marĩ na ũhoro wa ica ikuhĩ ũrĩa ũmenyete wĩgiĩ mũndũ ũrĩa ũcokagĩra. Andĩka ũhoro wa mũndũ ũrĩa wonania kwenda ũhoro o na ihenya warĩkia kwaria nake.

• Andĩka ũhoro wĩgiĩ mwene nyũmba, rĩĩtwa rĩake, na maũndũ ta andĩrĩthi, namba ya thimũ, kana andĩrĩthi ciake cia imĩrũ. Nĩ maũndũ marĩkũ wamenya mamwĩgiĩ na megiĩ famĩlĩ yake?

• Andĩka maũndũ marĩa mwarĩrĩria. Nĩ maandĩko marĩkũ mwathoma? Nĩ maũndũ marĩkũ wamenya megiĩ wĩtĩkio wake? Wamũtigĩra ibuku rĩrĩkũ? Andĩka mũthenya, tarĩki, na thaa iria ũkũmũcereire.

• Andĩka maũndũ marĩa ũbangĩte gũgeeka hĩndĩ ĩyo ĩngĩ wacoka. Mwabanga gũkaarĩrĩria ũndũ ũrĩkũ na wamwĩra ũgaacoka rĩ?

• Hingo ciothe wacoka andĩka maũndũ merũ makonainie na iceera rĩu. Hatirĩ mahĩtia o na ũngĩandĩka ũhoro mũingĩ gũkĩra ũrĩa ũngĩbatara.

Geria Gwĩka ũũ Mweri-inĩ Ũyũ:

• Ũkĩandĩka ũhoro wĩgiĩ mũndũ wonania kwenda ũhoro mwega, ĩra arĩa mũrahunjia nao maũndũ marĩa ũrandĩka.