Kwagagĩria Ũtungata Witũ—Kuonia Andũ atĩ nĩ Tũrameciria

Ũndũ Ũcio nĩ wa Bata Nĩkĩ? Jesu nĩ onanagia atĩ nĩ eeciragia andũ marĩ o mũndũ kĩũmbe, na nĩ aakenagio nĩo. Kwa ngerekano, hĩndĩ ĩmwe nĩ onire mũndũ ũmwe ũtaaiguaga, na nĩguo amũhonie, aamũtwarire keheri-inĩ handũ hataarĩ na andũ aingĩ, hihi nĩ tondũ Jesu nĩ onire mũndũ ũcio ta aiguaga thoni. (Mar. 7:31-35) Ningĩ nĩ onanirie nĩ areciria arutwo ake na njĩra ya kwaga kũmahe ũhoro mũingĩ ũrĩa matangĩahotire kũnyita. (Joh. 16:12) Jesu nĩ onanagia atĩ nĩ eeciragia andũ, o na arĩ igũrũ. (2 Tim. 4:17) Tũrĩ arũmĩrĩri a Kristo, nĩ twagĩrĩirũo kwĩgerekania nake. (1 Pet. 2:21; 1 Joh. 3:16, 18) Nĩ tũrĩgĩaga na moimĩrĩro mega ũtungata-inĩ, angĩkorũo nĩ tũrĩonanagia nĩ tũreciria mũndũ ũrĩa twakora, tũkona maũndũ marĩa mamũkoniĩ, maũndũ marĩa mamũkenagia, na marĩa arũmbũyagia makĩria. Nĩ arĩendaga mũno gũtũthikĩrĩria ona muoroto witũ to kũmũtwarĩra ndũmĩrĩri tu na kũmũtigĩra mabuku, no nĩ tũreciria ũhoro wake arĩ mũndũ kĩũmbe.

Ũrĩa Tũngĩka:

Wĩhaarĩrie wega. Aria na njĩra ya ũrata, ũhooreire, na ũrĩ mũcanjamũku.
Rora maũndũ wega. Hihi he ũndũ ũronania nĩ arĩ ciana? nĩ endete kũrĩma kana akenda kũiga nyamũ? kana hihi atĩ ũcio nĩ mũndũ wa ndini? No ũgerie kwambĩrĩria ndeereti yaku na maũndũ marĩa wona makoniĩ mwene nyũmba.
Mũrie mawoni make, na ũthikĩrĩrie na kinyi ũtekũmũtinatinia akĩaria. Mũrore akĩaria nĩguo amenye nĩ ũramũthikĩrĩria. Mũcokerie ngatho nĩ ũndũ wa maũndũ marĩa aaria na ũmũgathĩrĩrie kuuma ngoro. Wĩtheme ngarari.
Geria kũgarũrĩra. Angĩkorũo nĩ kwagĩrĩire, garũra ũndũ ũrĩa ũkũhaarĩirie na warĩrĩrie ũrĩa ũrahutia mwene nyũmba. Ũcio no ũkorũo ũrĩ ũndũ mũhũthũ gũkĩra ũrĩa ũngĩĩciria, tondũ nĩ tũkoragwo na trakti, broshua, na ngathĩti iria ikoragwo ciarĩrĩirie maũndũ maingĩ. Angĩkorũo wamũceerera ihinda rĩrĩa rĩtagĩrĩire, hihi rĩrĩa arĩ na mĩhangʼo mĩingĩ, mwĩre nĩ wona e na mĩhangʼo na warie nake na njĩra nguhĩ.

Geria Gwĩka ũũ Mweri-inĩ Ũyũ:

Gĩai na mahinda ma kwĩmenyeria, hĩndĩ ya ũthathaiya wa famĩlĩ kana hihi mũrĩ ũtungata-inĩ, ũrĩa mũhunjia agĩrĩirũo nĩ kũgarũrĩra ũndũ ũrĩa ekũhunjagia nĩguo arĩrĩrie ũndũ ũrĩa mwene nyũmba agweta.
Mĩcemanio-inĩ ĩmwe ya gũthiĩ kũhunjia, mũrũ wa Ithe witũ ũrĩa ũratongoria no aarĩrĩrie kana onanie njĩra iria tũngĩonania nacio atĩ nĩ tũreciria andũ.