‘Paulo nĩ Aacokeirie Ngai Ngatho na Akĩgĩa na Ũmĩrĩru’

Rĩrĩa kĩũngano kĩa Roma kĩaiguire atĩ Paulo nĩ aroka, ariũ a Ithe witũ maigana ũna maathiire rũgendo rwa kilomita 64 kũmũtũnga. Paulo aahutirio atĩa nĩ gĩĩko kĩu kĩao kĩa wendo? ‘Aamona, aacokeirie Ngai ngatho na akĩgĩa na ũmĩrĩru.’ (Atũ 28:15) O na gũtuĩka Paulo nĩ ooĩkaine nĩ ũndũ wa ũrĩa eekĩraga ngoro ciũngano iria aaceeragĩra, ihinda-inĩ rĩu oohetwo nĩwe waiguire ekĩrũo ngoro.—2Ko 13:10.

Ũmũthĩ arori a mũthiũrũrũko nĩ maceeragĩra ciũngano nĩgetha mekĩre aarĩ na ariũ a Ithe witũ ngoro. Rĩmwe o nao nĩ maiguaga manogete, magatangĩka, na magakua ngoro o ta ndungata iria ingĩ cia Ngai. Nĩ atĩa ũngĩka hĩndĩ ya iceera rĩa mũrori wa mũthiũrũrũko hamwe na mũtumia wake nĩgetha ũmateithie kũgĩa na ũmĩrĩru na ‘mwĩkĩrane ngoro?’—Ro 1:11, 12.

• 

  Thiĩ mũcemanio-inĩ wa ũtungata. Mũrori wa mũthiũrũrũko nĩ ekĩragwo ngoro mũno rĩrĩa ahunjia merutanĩria biũ nĩgetha magunĩke kiumia-inĩ kĩu kĩa mwanya. (1The 1:2, 3; 2:20) Tuĩka painia wa gũteithĩrĩria mweri-inĩ ũcio. Hihi no ũbange mũhunjie nake kana mũtumia wake, kana mũthiĩ na ũmwe wao mũkĩĩruta Bibilia na mũrutwo waku? Nĩ makenagĩra kũhunjia na ahunjia ngũrani, nginya arĩa marambĩrĩirie kũhunjia ica ikuhĩ kana arĩa matarĩ na ũmenyeru mũnene.

• 

  Manyite ũgeni. Hihi no ũmahe gwa gũikara kana ũmanyite ũgeni mũrĩanĩre hamwe? Ũndũ ũcio nĩ wonagia mũrori wa mũthiũrũrũko na mũtumia wake atĩ nĩ ũmendete. Matiĩrĩgagĩrĩra maũndũ manene. —Lu 10:38-42.

• 

  Thikĩrĩria na ũrũmĩrĩre ũtongoria na ũtaaro wake. Mũrori wa mũthiũrũrũko nĩ atũteithagia na njĩra ya wendo kuona ũrĩa tũngĩagagĩria ũtungata witũ harĩ Jehova. Rĩmwe o na no atũrũnge na njĩra nditũ. (1Ko 5:1-5) Nĩ akenaga rĩrĩa twenyihia na twathĩka.—Ahi 13:17.

• 

  Macokerie ngatho. Ĩra mũrori wa mũthiũrũrũko na mũtumia wake ũrĩa ũgunĩkĩte nĩ ũndũ wa kĩyo kĩao. No ũmeere na kanua kana ũmandĩkĩre ndũmĩrĩri kana kandi.—Kol 3:15.