Ngai Agaga Gũcokia Mahoya Mothe Nĩkĩ?
Jehova Ngai, o we Ithe witũ wa igũrũ, nĩ akoragwo ehaarĩirie gũthikĩrĩria mahoya maitũ ma kuuma ngoro. No nĩ kũrĩ maũndũ mangĩtũma age gũcokia mahoya maitũ. Maũndũ macio nĩ marĩkũ na nĩ atĩa twagĩrĩirũo kũririkana rĩrĩa tũrahoya? Reke tuone maũndũ mamwe Bibilia yugĩte.
“Rĩrĩa ũkũhoya ndũgacokagĩre maũndũ o marĩa marĩa.”—Mathayo 6:7.
Jehova ndendaga tũcokere maũndũ o marĩa marĩa tũkĩmũhoya kana gũthoma mahoya ibuku-inĩ. Handũ ha ũguo, endaga tũmũhoe kuuma ngoro. Ũngĩigua atĩa angĩkorũo mũrata waku acokagĩra maũndũ o marĩa marĩa hĩndĩ ciothe mũkĩaria? Ndũngĩkena. Arata a ma maragia moimĩranĩtie ngoro. Hĩndĩ ĩrĩa twahũthĩra ciugo citũ tũkĩhoya Ithe witũ wa igũrũ, tuonanagia atĩ nĩ mũrata witũ.
“Rĩrĩa mwahoya mũtiheagwo tondũ mũhoyaga mũrĩ na muoroto mũũru.” —Jakubu 4:3.
Hatarĩ nganja Ngai ndangĩcokia mahoya maitũ angĩkorũo nĩ arona maũndũ marĩa tũramũhoya ti mega na matitwagĩrĩire. Kwa ngerekano-rĩ, mũndũ angĩkorũo agĩũtha gĩũthi ta gĩa kamarĩ na ahoe Ngai amũteithie nĩguo acinde mbeca-rĩ, hihi Jehova no acokie mahoya ta macio? Nĩ atwĩrĩte wega atĩ twĩtheme gũkorokera indo, na tũtikehokage Ngai ya mũnyaka. (Isaia 65:11; Luka 12:15) Hatarĩ nganja Jehova ndangĩcokia mahoya ta macio. Nĩguo Ngai acokie mahoya maitũ nĩ twagĩrĩirũo gũtigĩrĩra atĩ maũndũ marĩa tũrahoya nĩ maringaine na marĩa atwĩrĩte thĩinĩ wa Bibilia.
“Mũndũ ũrĩa ũregaga gũthikĩrĩria watho—o na mahoya make nĩ kĩndũ kĩrĩ magigi.”—Thimo 28:9.
Mahinda-inĩ ma Bibilia, Ngai nĩ aaregaga gũthikĩrĩria mahoya ma andũ arĩa maareganaga na mawatho make ma ũthingu. (Isaia 1:15, 16) Ngai ndacenjetie. (Malaki 3:6) Angĩkorũo nĩ tũrenda Ngai athikĩrĩrie mahoya maitũ, no mũhaka twĩke ũrĩa wothe tũngĩhota nĩguo twathĩkĩre mawatho make. No rĩrĩ, ĩ angĩkorũo nĩ twekĩte maũndũ matagĩrĩire tene? Hihi ũguo nĩ kuuga atĩ Jehova ndarĩ hĩndĩ agatũthikĩrĩria? Aca! Tũngĩĩrira na twĩrutanĩrie kũmũkenia, Jehova nĩ arĩtuohagĩra.—Atũmwo 3:19.