Bibilia nĩ Ĩtũheaga Ũtaaro wa Kwĩhokeka

Tũtingĩkorũo na ma atĩ matua maitũ megiĩ mĩtugo no makorũo na maumĩrĩro mega angĩkorũo tũramatua tũkĩrũmĩrĩra mawoni maitũ kana ma andũ arĩa angĩ. Bibilia nĩ ĩguũragia gĩtũmi kĩa ũndũ ũcio. Ningĩ nĩ ĩtũheaga motaaro ma kwĩhokeka marĩa mangĩtũteithia gũkorũo na ũtũũro ũrĩ na gĩkeno na kũigua tũiganĩire.

NĨ TŨBATARAGA ŨTAARO UUMĨTE KŨRĨ NGAI

Thĩinĩ wa Bibilia, Jehovaa nĩ onanĩtie atĩ endaga andũ macaragie ũtaaro wake, no ti gwĩtongoria o ene. (Jeremia 10:23) Nĩkĩo aheanĩte ithimi cia mĩtugo iria ikoragwo thĩinĩ wa Bibilia. Nĩ endete andũ na nĩ endaga gũtũteithia nĩguo tũtigatue matua moru marĩa mangĩtũtuurithia kana matũme twĩritũhĩrie ũtũũro. (Gũcokerithia Maathani 5:29; 1 Johana 4:8) Makĩria ma ũguo, tondũ nĩwe Mũũmbi witũ, nĩ arĩ ũũgĩ na ũmenyo mũingĩ na kwoguo no ahote gũtũhe ũtaaro ũrĩa mwega biũ. (Thaburi 100:3; 104:24) O na kũrĩ ũguo, Ngai ndatindĩkagĩrĩria andũ gũtũũra kũringana na ithimi ciake.

Jehova nĩ aaheire mũthuri na mũtumia wa mbere, Adamu na Hawa, kĩrĩa gĩothe maabataraga nĩguo makorũo na gĩkeno. (Kĩambĩrĩria 1:28, 29; 2:8, 15) Ningĩ nĩ aamaheire ũtongoria mũhũthũ ũrĩa eendaga maathĩkagĩre. No Ngai nĩ aarekire methuurĩre o ene kana nĩ mekũrũmĩrĩra ũtongoria ũcio kana matikũũrũmĩrĩra. (Kĩambĩrĩria 2:9, 16, 17) Ũndũ wa kĩeha nĩ atĩ, Adamu na Hawa maathuurire gũtũũra kũringana na ithimi ciao ene handũ ha kũrũmĩrĩra ithimi cia Ngai. (Kĩambĩrĩria 3:6) Maumĩrĩro makoretwo marĩ marĩkũ? Hihi andũ nĩ makoretwo na gĩkeno nĩ ũndũ wa gwĩka maũndũ marĩa o ene marona magĩrĩire? Aca. Historĩ nĩ yonanĩtie atĩ kwaga kũrũmĩrĩra ithimi cia Ngai gũtirehaga thayũ na gĩkeno gĩa gũtũũra.—Kohelethu 8:9.

Bibilia nĩ ĩtũheaga motaaro marĩa tũbataraga nĩguo tũhote gũtua matua ma ũũgĩ megiĩ mĩtugo, gũtekũmakania kũrĩa tuumĩte. (2 Timotheo 3:16, 17; rora gathandũkũ ka, “Ibuku Rĩandĩkĩirũo Andũ Othe.”) Reke tuone ũrĩa Bibilia ĩkaga ũguo.

Wĩrute makĩria kĩrĩa gĩtũmaga Bibilia ĩĩtwo “kiugo kĩa Ngai.”—1 Athesalonike 2:13. Wĩrorere video ya Mũtungi wa Bibilia Nũũ? thĩinĩ wa jw.org/ki.

KĨRĨA GĨTŨMAGA ANDŨ AMWE MAGE GŨTINDANĨRA NA BIBILIA

Andũ amwe maugaga atĩ Bibilia ndĩngĩkorũo na ũtaaro mwega wĩgiĩ mĩtugo. Amwe maheanaga itũmi ta ici.

Ũrĩa maugaga: “Bibilia nĩ ĩĩhĩngĩcaga.”

Ũrĩa kũrĩ: Mĩhari ĩmwe no yoneke ta ĩtaratwarana na mĩhari ĩngĩ ya Bibilia. No tũngĩthuthuria ũhoro ũrĩa ũthiũrũrũkĩirie mĩhari ĩyo, ihinda rĩrĩa waandĩkirũo, njĩra ĩrĩa mwandĩki ataarĩirie ũhoro ũcio nayo, na maũndũ mangĩ, no tuone atĩ ndĩkoragwo ĩkĩĩhĩngĩca.

Nĩguo wone ngerekano imwe cia ũndũ ũcio, thoma gĩcunjĩ kĩrĩ na kĩongo, “Je, Biblia Inajipinga Yenyewe?” thĩinĩ wa jw.org/sw.

Ũrĩa maugaga: “Andũ arĩa maugaga atĩ marũmagĩrĩra Bibilia nĩ mekaga maũndũ moru, kwoguo no mũhaka akorũo ndĩkoragwo na ũtaaro mwega wĩgiĩ mĩtugo.”

Ũrĩa kũrĩ: Bibilia ndĩngĩcokererio mahĩtia nĩ ũndũ wa mĩtugo mĩũru ya andũ arĩa matarũmagĩrĩra morutani mayo. Nĩ yarathĩte atĩ andũ aingĩ—nginya atongoria a ndini—arĩa maugaga atĩ marũmagĩrĩra Bibilia nĩ mangĩgakorũo na mĩtugo ĩtaratwarana na ũrĩa Bibilia ĩrutanaga. Ningĩ nĩ yugĩte atĩ andũ nĩ ‘mangĩkaanyũrũria’ morutani ma Bibilia.—2 Petero 2:1, 2.

Nĩguo wone ngerekano ĩmwe ya ũrĩa atongoria aingĩ a ndini magararĩte morutani ma Bibilia, thoma gĩcunjĩ kĩrĩ na kĩongo, “Je, Dini Ni Biashara?” thĩinĩ wa jw.org/sw.

Ũrĩa maugaga: “Andũ arĩa marũmagĩrĩra Bibilia nĩ mathutũkanagia arĩa marĩ na mĩthiĩre ngũrani na yao.”

Ũrĩa kũrĩ: Bibilia ĩtwĩkĩraga ngoro tũtĩage andũ arĩa angĩ. Nĩ ĩkaananĩtie maũndũ maya:

mũndũ kwĩyona arĩ wa bata gũkĩra arĩa angĩ.—Afilipi 2:3.
kũnyarara andũ arĩa marĩ na ithimi kana wĩtĩkio ngũrani na witũ.—1 Petero 2:17.
gũtindĩkĩrĩria andũ arĩa angĩ makorũo na mawoni ta maitũ.—Mathayo 10:14.

Bibilia yonanagia atĩ hingo ciothe Ngai arũmbũyanagia na andũ na njĩra ya ũtugi na kĩhooto, na atĩ Ngai endaga twĩgerekanie nake.—Aroma 9:14.

Nĩguo wone ũhoro makĩria, thoma gĩcunjĩ kĩrĩ na kĩongo, “Jinsi Biblia Inavyoweza Kukusaidia Kuwa Mstahimilivu” thĩinĩ wa jw.org/sw.

BIBILIA ĨHEANAGA ŨTAARO UUMĨTE KŨRĨ NGAI

Bibilia nĩ ĩtuonagia ũrĩa Jehova anarũmbũyania na andũ. Ũhoro ũrĩa ũrĩ thĩinĩ wa Bibilia nĩ ũtũteithagia gũtaũkĩrũo nĩ maũndũ marĩa Ngai onaga marĩ mega na marĩa onaga marĩ moru, kana marĩa mangĩtũguna na marĩa matangĩtũguna. (Thaburi 19:7, 11) Maũndũ marĩa twĩrutaga Bibilia-inĩ nĩ ma kwĩhokeka hingo ciothe, na nĩ matũteithagia ũtũũro-inĩ witũ wa o mũthenya gũtua matua mega megiĩ mĩtugo.

Kwa ngerekano, ta wĩcirie ũtaaro ũyũ ũrĩ thĩinĩ wa Thimo 13:20: “Mũndũ ũrĩa ũtwaranaga na andũ arĩa ogĩ nĩ arĩũhĩgaga, no mũndũ ũrĩa ũthiaga thiritũ na irimũ nĩ arĩonaga ũũru.” Ũtaaro ũcio no ũhũthĩke mahinda-inĩ maya o ta ũrĩa wahũthĩkaga mahinda-inĩ ma tene. Bibilia ĩiyũire motaaro ta macio ma bata marĩa mangĩtũteithia.—Rora gathandũkũ “Ũtaaro wa Bibilia Ndũhĩtũkagwo nĩ Mahinda.”

Ĩndĩ no wĩyũrie, ‘Ingĩkorũo na ma atĩa atĩ ũtaaro ũrĩa Bibilia ĩheanaga wĩgiĩ mĩtugo no ũhũthĩke ũmũthĩ?’ Gĩcunjĩ kĩrĩa kĩrũmĩrĩire nĩ gĩkwarĩrĩria cionereria imwe cia andũ magunĩkĩte kuumana na Bibilia.

a Jehova nĩrĩo rĩĩtwa rĩa Ngai.—Thaburi 83:18.

ŨTAARO WA BIBILIA NDŨHĨTŨKAGWO NĨ MAHINDA

O na gũtuĩka Bibilia yarĩkire kwandĩkwo hakuhĩ mĩaka 2,000 mĩhĩtũku, no ĩkoragwo na ũguni nginya ũmũthĩ. Andũ no mendaga gũkorũo na mũtũũrĩre mwega ũrĩ na gĩkeno. (Kohelethu 1:9) Ũtaaro wa Bibilia ũrĩa ũtahĩtũkagwo nĩ mahinda no ũtũteithie gũkinyĩra muoroto ũcio.

Wĩhokeku

“Twendaga gũikara tũrĩ ehokeku maũndũ-inĩ mothe.”—Ahibirania 13:18.
“Mũndũ ũrĩa ũiyaga nĩ atige kũiya rĩngĩ; handũ ha ũguo, nĩ arutage wĩra na kĩyo.”—Aefeso 4:28.

Ũrĩa Tũngĩiguithania na Arĩa Angĩ

“Mũndũ o wothe nĩ acaragie, ti maũndũ ma kwĩguna we mwene, no marĩa ma kũguna mũndũ ũrĩa ũngĩ.”—1 Akorintho 10:24.
“Thiĩi na mbere gũkiranagĩrĩria mũndũ na ũrĩa ũngĩ na kuohanagĩra mwĩyendeire.”—Akolosai 3:13.

Ũrĩa Tũngĩtua Matua

“Mũndũ ũrĩa ũtarĩ na ũũgĩ etĩkagia kiugo o gĩothe, no ũrĩa mũũgĩ nĩ ecũranagia ikinya o rĩothe.”—Thimo 14:15.
“Mũndũ mũũgĩ onaga ũgwati akehitha, no arĩa matarĩ na ũmenyeru mathiaga o na mbere magacemania na maũndũ moru.”—Thimo 22:3