Ũngĩruta Kũ Ũtaaro wa Kwĩhokeka Wĩgiĩ Mahinda Mokĩte?

O ta ũrĩa icunjĩ iria hĩtũku cionania, andũ nĩ mageragia gwetha ũtũũro mwega wa mahinda marĩa maroka na njĩra ya kũiga mwĩhoko wao harĩ maũndũ ta hinya ũkĩrĩte wa ndũire, gĩthomo, ũtonga, na gũtuĩka mũndũ mwega. No kwĩhoka maũndũ macio, nĩ ta gũthiĩ handũ ũkĩhũthĩra mapu ĩrĩ na mahĩtia. Hihi ũguo nĩ kuuga atĩ gũtirĩ kĩndũ kĩngĩĩhokeka kĩngĩtũteithia gũkorũo na ũtũũro mwega mahinda marĩa maroka? Aca!

ŨTAARO KUUMA HARĨ KĨHUMO GĨA KWĨHOKEKA

Rĩrĩa tũrenda gũtua matua, kaingĩ nĩ tũhoyaga ũtaaro kuuma kũrĩ mũndũ mũkũrũ na mũũgĩ gũtũkĩra. Na njĩra o ta ĩyo, nĩ kũrĩ mũndũ mũkũrũ na ũrĩ na ũũgĩ gũtũkĩra ũngĩtũhe ũtaaro wa kwĩhokeka ũrĩa ũngĩtũteithia gũkorũo na ũtũũro mwega mahinda marĩa maroka. No tũthome ũtaaro wake thĩinĩ wa ibuku rĩaambĩrĩirie kwandĩkwo mĩaka ta 3,500 mĩhĩtũku. Ibuku rĩu nĩ Bibilia.

Nĩ kĩĩ kĩngĩtũma wĩhoke Bibilia? Nĩ tondũ Mũtungi wayo nĩwe mũũgĩ mũno na wanatũũra ihinda iraihu mũno. Bibilia yugaga atĩ nĩwe “Ũrĩa Ũtũũraga Kuuma o Tene.” (Danieli 7:9; Thaburi 90:2) Nĩwe “Mũũmbi wa igũrũ, Ngai ũrĩa wa ma, Ũrĩa wombire thĩ.” (Isaia 45:18) Nĩ atwĩrĩte atĩ etagwo Jehova.—Thaburi 83:18.

Tondũ Bibilia yumanĩte na Ngai ũrĩa wombire andũ othe, ndiugaga atĩ ũndũire mũna kana rũrĩrĩ rũna nĩruo rwega gũkĩra rũrĩa rũngĩ. Ũtaaro wayo ndũhĩtũkagwo nĩ mahinda na nĩ ũteithĩtie andũ kuuma mabũrũri-inĩ mothe. Nĩ yonekaga na thiomi nyingĩ na nĩ ĩheanĩtwo kũrĩ andũ aingĩ gũkĩra ibuku rĩngĩ o rĩothe.a Ũguo nĩ kuuga atĩ andũ kũndũ guothe no mataũkĩrũo nĩyo na ĩmateithie. Maũndũ macio nĩ maratwarana na ũrĩa Bibilia yo nyene yugaga.

“Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—ATŨMWO 10:34, 35.

O ta ũrĩa mũciari ũrĩ wendo aheaga ciana ciake ũtaaro, Jehova Ngai nĩ Ithe witũ ũtwendete na nĩ atũheaga ũtaaro kũgerera Kiugo gĩake Bibilia. (2 Timotheo 3:16) No twĩhoke Kiugo gĩake tondũ nĩwe watũmbire na nĩ oĩ kĩrĩa kĩngĩtũma tũkorũo na gĩkeno.

ŨTAARO WA KWĨHOKEKA

No twĩhoke atĩ ũtaaro wa Bibilia no ũtũteithie gũgaakorũo na ũtũũro mwega mahinda marĩa maroka tondũ mĩaka ta 2,000 mĩhĩtũku, nĩ yarathĩte maũndũ mangĩgeekĩka na ũrĩa mĩtugo ya andũ ĩngĩgaakorũo ĩtariĩ, na nĩ tũrona maũndũ macio makĩhinga.

MAŨNDŨ MANGĨGEEKĨKA

“Rũrĩrĩ nĩ rũgookĩrĩra rũrĩa rũngĩ, na ũthamaki ũũkĩrĩre ũrĩa ũngĩ. Nĩ gũkaagĩa ithingithia nene, na ngʼaragu na mĩrimũ mĩũru kũndũ na kũndũ.”—LUKA 21:10, 11.

MĨTUGO YA ANDŨ

“Matukũ-inĩ ma kũrigĩrĩria nĩ gũkaagĩa mahinda ma ũgwati maritũ kũhiũrania namo. Nĩ gũkorũo andũ nĩ magaatuĩka eyendi, endi mbeca, egani, egaathi, arumi Ngai, matathĩkagĩra aciari, matarĩ ngatho, matarĩ ehokeku, matarĩ wendo ũrĩa wa ndũire, matendaga ũiguano, acambania, mategiragĩrĩria, matarĩ tha, matendete maũndũ mega, akunyanĩri, momĩtie ciongo, etĩi, mendete ikeno handũ ha kwenda Ngai.”—2 TIMOTHEO 3:1-4.

Hihi kuona ũrĩa Bibilia yarathĩte ĩtekũhĩtia mĩaka mĩingĩ mĩhĩtũku ũhoro wĩgiĩ maũndũ marĩa marekĩka ũmũthĩ-rĩ, kũngĩtũma ũkinyĩrĩre gũtua itua rĩrĩkũ? Hatarĩ nganja no wĩtĩkanie na Leung, kuuma Hong Kong, ũrĩa waugire: “Morathi ma Bibilia maandĩkirũo tene mũno. Gũtingĩahotekire mũndũ wa gũkũ thĩ ahote kũratha maũndũ macio atekũhĩtia. No mũhaka Bibilia ĩkorũo yaandĩkithirio nĩ mũndũ ũrĩ na ũhoti mũnene gũtũkĩra.”

Bibilia ĩrĩ na morathi maingĩ marĩa marĩkĩtie kũhinga.b Ũndũ ũcio nĩ wonanagia na ma atĩ Bibilia nĩ Kiugo kĩa Ngai. Jehova augĩte ũũ: “Niĩ nĩ niĩ Ngai, na gũtirĩ ũngĩ ũhaana ta niĩ. Kuuma kĩambĩrĩria nĩ menyithanagia maũndũ marĩa mageekĩka.” (Isaia 46:9, 10) Nĩ ũndũ ũcio, ũrĩ na gĩtũmi kĩega gĩa kwĩhoka maũndũ marĩa Bibilia yugĩte megiĩ mahinda marĩa maroka.

ŨTAARO ŨNGĨGŨTEITHIA RĨU NA NGINYA TENE NA TENE

Rĩrĩa wathĩkĩra ũtaaro ũrĩa ũrĩ thĩinĩ wa Maandĩko Matheru nĩ ũgunĩkaga. Reke tuone ngerekano cigana ũna.

ŨTAARO MWEGA WĨGIĨ MBECA NA WĨRA

“Nĩ kaba rũhĩ rũmwe rwa kũhurũka gũkĩra hĩ igĩrĩ cia wĩra mũritũ na gũtengʼerania na rũhuho.”—KOHELETHU 4:6.

KŨGĨA NA FAMĨLĨ ĨRĨ NA GĨKENO

“O ũmwe wanyu no mũhaka endage mũtumia wake o ta ũrĩa eyendete we mwene; nake mũtumia agĩrĩirũo kũheaga mũthuri wake gĩtĩo kĩnene.”—AEFESO 5:33.

ŨRĨA TŨNGĨIKARANIA NA ANDŨ ARĨA ANGĨ

“Eheria marakara na ũtigane na mathũgũta; ndũkarakare wĩke ũndũ mũũru.”—THABURI 37:8.

Rĩrĩa weka kũringana na ũrĩa Bibilia yugĩte, no ũgĩe na ũtũũro mwega mahinda-inĩ maya na marĩa maroka. Thĩinĩ wa Bibilia, Ngai nĩ atwĩrĩire maũndũ maya ma magegania mahinda marĩa maroka

THAYŨ NA ŨGITĨRI

“Nĩ magaakena mũno nĩ ũndũ wa kũingĩhĩrũo nĩ thayũ.”—THABURI 37:11.

MŨNDŨ WOTHE NĨ AGAKORŨO NA NYŨMBA NJEGA NA IRIO

“Nĩ magaaka nyũmba na matũũre thĩinĩ wacio, na mahande mĩgũnda ya mĩthabibũ na marĩe maciaro mayo.”—ISAIA 65:21.

GŨTIGAKORŨO NA MĨRIMŨ KANA GĨKUŨ

“Gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.”—KŨGUŨRĨRIO 21:4.

Ũrabatara gwĩka atĩa nĩguo ũgaakenera ũtũũro mwega ũguo mahinda marĩa maroka? Gĩcunjĩ kĩrĩa kĩrũmĩrĩire nĩ kĩarĩrĩirie ũhoro ũcio.

a Nĩguo wone ũhoro makĩria igũrũ rĩgiĩ ũrĩa Bibilia ĩtaũrĩtwo na ĩgakinyĩra andũ, hingũra www.jw.org/ki na ũrore rungu rwa MORUTANI MA BIBILIA > HISTORĨ & BIBILIA.

b Nĩguo wone ũhoro makĩria, rora gĩcunjĩ gĩa 9 kĩa ibuku Biblia—Neno la Mungu au la Mwanadamu? rĩrĩa rĩcabĩtwo nĩ Aira a Jehova. No rĩoneke Intaneti-inĩ thĩinĩ wa www.jw.org/sw. Rora rungu rwa MAKTABA > VITABU NA BROSHUA.