Maathaga Maũndũ ma Bata Ũngĩhũthĩra Kuuma Maandĩko-inĩ

Rĩrĩa tũrathoma Bibilia, no tũcaragie maũndũ ma bata na njĩra ya gwĩka ũthuthuria. No tũngĩka ũguo atĩa?

Thuthuria makĩria ngʼano cia Bibilia. Kwa ngerekano, thuthuria ũmenye nũũ waandĩkire rũgano rũu, nũũ waandĩkagĩrũo, na rwandĩkirũo rĩ. Ningĩ no ũthuthurie ũrĩa maũndũ maahaanaga ihinda-inĩ rĩu, ũrĩa gwekĩkĩte mbere ĩyo, na ũrĩa gwekĩkire thutha ũcio.

Wĩcirie nĩ maũndũ marĩkũ ũreruta na njĩra ya gũthuthuria macokio ma ciũria ta ici: ‘Hihi andũ arĩa ndĩrathoma ũhoro wao maaiguaga atĩa? Nĩ ngumo irĩkũ moonanirie? Njagĩrĩirũo kwĩgerekania na ngumo icio kana gũciĩthema nĩkĩ?’

Hũthagĩra maũndũ marĩa weruta, hihi ta rĩrĩa ũrĩ ũtungata-inĩ kana ũkĩrũmbũyania na andũ arĩa angĩ. Weka ũguo, nĩ ũrĩonanagia ũrĩ na ũtaũku, o ta ũrĩa Bibilia yugaga: “Arĩa othe marũmagĩrĩra mawatho [ma Jehova] nĩ monanagia ũtaũku mwega.”—Thab. 111:10.

• Ũndũ ũngĩka: Rora ũrĩa gĩcunjĩ kĩa Mũthithũ Kuuma Kiugo-inĩ kĩa Ngai kĩa mũcemanio wa gatagatĩ-inĩ ga kiumia gĩtũteithagia kuona ũrĩa tũngĩhũthĩra maũndũ marĩa tũreruta. Kaingĩ gĩcunjĩ kĩu nĩ gĩkoragwo na ciũria tũngĩĩyũria, maũndũ tũngĩĩcũrania igũrũ rĩamo, na mbica tũngĩthuthuria.