GĨCUNJĨ KĨA WĨRUTI GĨA 10
RWĨMBO NA. 31 Twaranaga na Jehova!
Wĩgerekanagie na Mwĩcirĩrie wa Jehova na wa Jesu
“Tondũ Kristo nĩ aanyamarĩkire thĩinĩ wa mwĩrĩ-rĩ, o na inyuĩ mwĩhaarĩriei mũrĩ na mwerekera o ta ũcio wa meciria.”—1 PET. 4:1.
ŨNDŨ ŨRĨA WARĨRĨIRIO
Nĩ tũkuona ũrĩa mũtũmwo Petero eerutire kuumana na mwĩcirĩrie wa Jesu na ũrĩa o na ithuĩ tũngĩĩruta.
1-2. Kwenda Jehova kũhutĩtie maũndũ marĩkũ, na Jesu oonanirie atĩa atĩ nĩ eendete Ithe na njĩra ĩyo?
“NO MŨHAKA wende Jehova Ngai waku na ngoro yaku yothe na muoyo waku wothe na hinya waku wothe na meciria maku mothe.” (Luk. 10:27) Jesu oonanirie atĩ rĩu nĩrĩo rĩarĩ rĩathani rĩrĩa inene Watho-inĩ wa Musa. Kwoguo tũbatiĩ kwenda Jehova na kĩrĩa gĩothe tũrĩ nakĩo, na ũndũ ũcio nĩ ũhutanĩtie na merirĩria maitũ, ũrĩa tũraigua ngoro-inĩ, na hinya witũ. Ningĩ nĩ ũhutanĩtie na ũrĩa tũhũthagĩra meciria maitũ. Ũrĩa kũrĩ nĩ atĩ, tũtingĩtaũkĩrũo biũ nĩ mwĩcirĩrie wothe wa Jehova. No no tũmenye mwĩcirĩrie wa Ngai na njĩra ya kwĩruta ũhoro wĩgiĩ “meciria ma Kristo,” tondũ Jesu nĩwe kĩonereria gĩkinyanĩru kĩa ũrĩa Ithe eciragia.—1 Kor. 2:16.
2 Jesu eendete Jehova na meciria make mothe. Nĩ aamenyaga ũrĩa Ngai eendaga eke, na nĩ eehotorete gwĩka ũguo o na gũtuĩka ũndũ ũcio nĩ ũngĩatũmire anyamarĩke. Tondũ Jesu aaigĩte meciria make harĩ gwĩka wendi wa Ithe, ndaarekire ũndũ o na ũmwe ũmũgirĩrĩrie kũũhingia.
3. Mũtũmwo Petero eerutire ũndũ ũrĩkũ kuumana na Jesu, na eekĩrire Akristiano arĩa angĩ ngoro meke atĩa? (1 Petero 4:1)
3 Petero na atũmwo arĩa angĩ nĩ maagĩire na mweke wa mwanya wa kũhũthĩra mahinda hamwe na Jesu na kwĩruta ũrĩa eeciragia. Rĩrĩa Petero aandĩkire marũa make ma mbere atongoretio nĩ roho, nĩ eekĩrire Akristiano ngoro makoragwo na mwerekera wa meciria o ta wa Kristo. (Thoma 1 Petero 4:1.) Kiugo kĩrĩa Petero aahũthĩrire kĩrĩa gĩtaũrĩtwo “mwĩhaarĩriei,” kĩrehaga rĩciria rĩa thigari irethagathaga na matharaita nĩguo ithiĩ mbaara-inĩ. Kwoguo Akristiano mangĩĩgerekania na mwerekera wa meciria wa Jesu, megũkorũo marĩ na itharaita rĩrĩ na hinya rĩa kũrũa na mwerekera wao wa kwĩhia na thĩ ĩno ĩratongorio nĩ Shaitani.—2 Kor. 10:3-5; Ef. 6:12.
4. Tũkwarĩrĩria maũndũ marĩkũ gĩcunjĩ-inĩ gĩkĩ?
4 Nĩ tũgũthuthuria mwĩcirĩrie wa Jesu na ũrĩa tũngĩĩgerekania naguo. Nĩ tũkuona (1) ũrĩa tũngĩĩgerekania na mwĩcirĩrie wa Jehova, (2) ũrĩa tũngĩkorũo tũrĩ enyihia, na (3) ũrĩa tũngĩgĩa na meciria mega na njĩra ya kwĩhoka Jehova kũgerera mahoya.
WĨGEREKANAGIE NA MWĨCIRĨRIE WA JEHOVA
5. Hĩndĩ ĩmwe Petero aagire atĩa kwĩgerekania na mwĩcirĩrie wa Jehova?
5 Ta wĩcirie hĩndĩ ĩmwe Petero aagire kwĩgerekania na mwĩcirĩrie wa Jehova. Jesu aakoretwo era atũmwo ake atĩ no mũhaka angĩathiire Jerusalemu, anyitwo nĩ atongoria a ndini, anyamario na oragwo. (Mat. 16:21) No kũhoteke Petero nĩ aaritũhagĩrũo gwĩtĩkia atĩ Jehova nĩ angĩarekire Jesu oragwo, tondũ nĩ aamenyaga atĩ Jesu nĩwe warĩ Mesia ũrĩa weranĩirũo ũrĩa ũngĩahonokirie andũ a Ngai. (Mat. 16:16) Kwoguo Petero agĩtwara Jesu keheri-inĩ akĩmwĩra: “Mwathani, wĩiguĩre tha; maũndũ macio gũtirĩ hĩndĩ magaagũkora.” (Mat. 16:22) Tondũ Petero ndeegerekanirie na mwĩcirĩrie wa Jehova ũndũ-inĩ ũcio, mwĩcirĩrie wake ndwatwaranaga na wa Jesu.
6. Jesu oonanirie atĩa atĩ mwĩcirĩrie wake nĩ watwaranaga na wa Jehova?
6 Mwĩcirĩrie wa Jesu watwaranaga biũ na mwĩcirĩrie wa Ithe. Nĩkĩo eerire Petero ũũ: “Coka thutha wakwa, Shaitani! Wee ũrĩ mũhĩnga harĩ niĩ, nĩ ũndũ ndũreciria meciria ma Ngai, ĩndĩ ũreciria meciria ma andũ.” (Mat. 16:23) Jesu nĩ aamenyaga atĩ nĩguo ahingie wendi wa Jehova, nĩ aabataraga kũnyamarĩka na gũkua. Nĩkĩo aareganire na ũtaaro wa Petero o na gũtuĩka no kũhoteke Petero eendaga o kũmũteithia. Ũndũ ũcio nĩ warutire Petero atĩ nĩ aabataraga gũkorũo na mwĩcirĩrie ta wa Jehova. Ũcio nĩ ũndũ wa bata o na ithuĩ tũngĩĩruta.
7. Thutha-inĩ Petero oonanirie atĩa atĩ nĩ eendaga kũgĩa na mwĩcirĩrie ta wa Jehova? (Rora mbica.)
7 Thutha-inĩ, Petero nĩ oonanirie atĩ nĩ eendaga kũgĩa na mwĩcirĩrie ta wa Jehova. Rĩrĩa ihinda rĩakinyire rĩa andũ a ndũrĩrĩ arĩa mataarĩ aruu gũtuĩka andũ a Jehova, Petero nĩ aaheirũo wĩra wa kũhunjĩria Korinelio, ũmwe wa andũ a ndũrĩrĩ arĩa maarĩ a mbere gũtuĩka Akristiano. Ayahudi nĩ meethemaga kũnyitanĩra na andũ a ndũrĩrĩ, kwoguo Petero nĩ aabataraga gũcenjia mwĩcirĩrie wake nĩguo amahunjĩrie. Rĩrĩa Petero aataũkĩirũo nĩ wendi wa Ngai wĩgiĩ andũ a ndũrĩrĩ, nĩ aagarũrĩire mawoni make. Kwoguo hĩndĩ ĩrĩa aatũmanĩirũo nĩ Korinelio, aathiire ‘ategũkararia.’ (Atũm. 10:28, 29) Akĩhunjĩria Korinelio na andũ a nyũmba yake, na makĩbatithio.—Atũm. 10:21-23, 34, 35, 44-48.
Petero akĩingĩra mũciĩ gwa Korinelio (Rora kĩbungo kĩa 7)
8. Tũngĩonania atĩa atĩ mwĩcirĩrie witũ nĩ ũratwarana na wa Jehova? (1 Petero 3:8 na kohoro ka magũrũ-inĩ)
8 Thutha wa mĩaka ĩigana ũna, Petero nĩ eekĩrire Akristiano ngoro ‘gwĩciragia marĩ na ũiguano.’ (Thoma 1 Petero 3:8 na kohoro ka magũrũ-inĩ.) Tũrĩ andũ a Jehova, no tũkorũo na uiguano wa meciria tũngĩĩgerekanagia na mwĩcirĩrie wa Jehova ũrĩa wonanĩtio Kiugo-inĩ gĩake. Kwa ngerekano, Jesu nĩ eerire arũmĩrĩri ake maigage Ũthamaki wa Ngai mbere ũtũũro-inĩ wao. (Mat. 6:33) Tũrĩ na ũndũ ũcio meciria-inĩ-rĩ, hihi twagĩrĩirũo gwĩka atĩa mũhunjia kĩũngano-inĩ angĩtua itua rĩa kũingĩra ũtungata-inĩ wa mahinda mothe? Handũ ha kũmuonia atĩ nĩ areritũhĩria ũtũũro, twagĩrĩirũo kwaria maũndũ mega megiĩ muoroto ũcio na tũmũhe ũteithio ũrĩa arabatara.
KORŨO NA WĨNYIHIA
9-10. Jesu oonanirie wĩnyihia mũnene na njĩra ĩrĩkũ?
9 Ũtukũ wa mũico Jesu atanoragwo, nĩ aarutire Petero na atũmwo arĩa angĩ ũndũ wa bata wĩgiĩ wĩnyihia. Hau kabere, Jesu nĩ aatũmĩte Petero na Johana makahaarĩrĩrie handũ nĩ ũndũ wa irio cia mũico iria angĩarĩanĩire nao atanakua. Kwahoteka makĩhaarĩrĩria nĩ maatigĩrĩire atĩ nĩ haarĩ na kĩraĩ na taurũ nĩguo ageni mathambio magũrũ mbere ya marĩte. No hihi nũũ ũngĩenyihirie athambie arĩa angĩ magũrũ?
10 Jesu atekũmaĩrĩria nĩ oonanirie wĩnyihia mũnene. Aarutire wĩra warutagwo kaingĩ nĩ ngombo, ũndũ ũrĩa wagegirie atũmwo ake mũno. Jesu aarutire nguo ciake cia igũrũ, akĩĩyoha taurũ njohero, agĩcoka agĩĩkĩra maĩ kĩraĩ-inĩ, na akĩambĩrĩria gũthambia atũmwo magũrũ. (Joh. 13:4, 5) Kwahoteka nĩ ooire ihinda gũthambia magũrũ ma atũmwo othe 12, nginya ma Judasi ũrĩa ũngĩamũkunyanĩire. O na kũrĩ ũguo, Jesu arĩ na wĩnyihia nĩ aarutire wĩra ũcio. Jesu aacokire akĩmeera ũũ: “Hihi nĩ mwataũkĩrũo nĩ ũguo ndeka? Mũnjĩtaga ‘Mũrutani’ na ‘Mwathani,’ na mũtikoragwo mũhĩtĩtie, tondũ ũguo nĩguo ndariĩ. Kwoguo, angĩkorũo niĩ Mwathani na Mũrutani wanyu nĩ ndamũthambia magũrũ-rĩ, o na inyuĩ nĩ mwagĩrĩirũo gũthambanagia magũrũ.”—Joh. 13:12-14.
Gũkorũo na wĩnyihia nĩ kũhutanĩtie na meciria maitũ ma thĩinĩ biũ
11. Petero oonanirie atĩa atĩ nĩ aakũrĩtie wĩnyihia? (1 Petero 5:5) (Ningĩ rora mbica.)
11 Petero nĩ eerutire wĩnyihia kuuma kũrĩ Jesu. Thutha wa Jesu gũcoka igũrũ, Petero nĩ aaringire kĩama akĩhonia mũndũ waciarĩtwo arĩ muonju magũrũ. (Atũm. 1:8, 9; 3:2, 6-8) Ũndũ ũcio wa kũgegania nĩ wagucĩrĩirie andũ aingĩ na magĩthiĩ harĩ we. (Atũm. 3:11) O na gũtuĩka Petero ooimĩte ũndũire-inĩ wa andũ meekĩrĩire kũgĩa igweta, we ndendire gũtũũgĩrio nĩ andũ. Handũ ha ũguo, arĩ na wĩnyihia eerekeirie rũgooco kũrĩ Jehova na Jesu akiuga ũũ: “Kũgerera rĩĩtwa [rĩa Jesu], na wĩtĩkio witũ harĩ rĩĩtwa rĩake, mũndũ ũyũ mũrona na nĩ mũmũĩ nĩ agĩa na hinya.” (Atũm. 3:12-16) Ciugo iria Petero aahũthĩrire akĩandĩkĩra Akristiano marũa megiĩ bata wa gũkũria wĩnyihia, no itũririkanie hĩndĩ ĩrĩa Jesu eehotorire taurũ njohero na agĩthambia atũmwo magũrũ.—Thoma 1 Petero 5:5 na kohoro ka magũrũ-inĩ.
Rĩrĩa Petero aaringire kĩama, eerekeirie rũgooco kũrĩ Jehova na Jesu. O na ithuĩ no tuonanie wĩnyihia na njĩra ya gwĩka maũndũ mega tũtekwĩrĩgĩrĩra kũgathĩrĩrio kana kũrĩhwo (Rora kĩbungo gĩa 11-12)
12. Tũngĩĩgerekania na Petero atĩa harĩ gũkũria ngumo ya wĩnyihia?
12 No twĩgerekanie na Petero harĩ gũkũria ngumo ya wĩnyihia. Ririkana atĩ mũndũ ndonanagia wĩnyihia kũgerera o ciugo iria arahũthĩra. Kiugo kĩrĩa Petero ahũthĩrĩte kĩa wĩnyihia kiugĩte “wĩnyihia wa meciria,” na kwoguo nĩ kĩhutanĩtie na meciria maitũ ma thĩinĩ biũ. Twĩkagĩra andũ maũndũ mega tondũ nĩ twendete Jehova na tũkenda andũ, no ti tondũ wa kwenda kũgathĩrĩrio. Kwoguo tuonanagia atĩ tũrĩ enyihia angĩkorũo nĩ tũtungatagĩra Jehova na aarĩ na ariũ a Ithe witũ tũkenete, gũtekũmakania kana kĩyo gitũ nĩ kĩronwo nĩ andũ arĩa angĩ.—Mat. 6:1-4.
KORAGWO NA “MECIRIA MEGA”
13. Gũkorũo na “meciria mega” nĩ kuuga atĩa?
13 Gũkorũo na “meciria mega” nĩ kuuga atĩa? (1 Pet. 4:7) Mũkristiano ũrĩ na meciria mega nĩ erutanagĩria gũtua matua mega mararingana na mwĩcirĩrie wa Jehova. Onaga ũrata wake na Jehova ũrĩ ũndũ ũrĩa wa bata makĩria ũtũũro-inĩ wake. Ningĩ nĩ akoragwo na mawoni maigananĩru kwĩyerekera na agataũkĩrũo atĩ ndoĩ maũndũ mothe. Na nĩ onanagia atĩ nĩ ehokete Jehova na njĩra ya kũmũhoyaga kaingĩ rĩrĩa arabatara ũtongoria.a
14. Hĩndĩ ĩmwe Petero aagire atĩa kwĩhoka Jehova?
14 Ũtukũ wa mũico Jesu atanoragwo, eerire arutwo ake ũũ: “Inyuothe nĩ mũkũhĩngĩka nĩ ũndũ wakwa ũtukũ ũyũ.” Petero aamũcokeirie ũũ arĩ na ũũma: “O na arĩa angĩ othe mangĩhĩngĩka nĩ ũndũ waku, niĩ ndirĩ hĩndĩ ingĩhĩngĩka!” Ũtukũ ũcio Jesu nĩ aaheire arutwo amwe ake ũtaaro ũyũ: “Ikarai mwĩiguĩte na mũhoe mũtegũtigithĩria.” (Mat. 26:31, 33, 41) Korũo Petero nĩ aarũmĩrĩire ũtaaro ũcio, kwahoteka nĩ angĩarĩ na ũmĩrĩru wa kuuga atĩ aarĩ mũrũmĩrĩri wa Jesu. Handũ ha ũguo, Petero nĩ aakaanire Jesu na thutha-inĩ agĩtuurũo mũno nĩ ũndũ wa gwĩka ũguo.—Mat. 26:69-75.
15. Jesu aahotire atĩa gũkorũo na meciria mega ũtukũ wa mũico atanoragwo?
15 Jesu nĩ eehokire Jehova biũ. O na gũtuĩka Jesu aarĩ mũkinyanĩru, nĩ aahoire maita maingĩ ũtukũ wa mũico atanoragwo. Ũndũ ũcio nĩ watũmire agĩe na ũmĩrĩru wa gwĩka kũringana na wendi wa Jehova. (Mat. 26:39, 42, 44; Joh. 18:4, 5) Hatarĩ nganja, Petero ndaariganĩirũo nĩ ũrĩa Jesu aahoire maita maingĩ ũtukũ ũcio wa mũico.
16. Petero oonanirie atĩa atĩ nĩ aakũrĩtie meciria mega? (1 Petero 4:7)
16 Thutha wa ihinda, Petero nĩ eerutire kwĩhoka Jehova biũ kũgerera mahoya. Thutha wa Jesu kũriũkio, nĩ eerĩire Petero na atũmwo arĩa angĩ atĩ nĩ mangĩamũkĩrire roho mũtheru nĩguo mahote kũhingia wĩra wa kũhunjia. No Jesu aameerire maikare Jerusalemu, meterere nginya rĩrĩa mangĩaheirũo roho ũcio. (Luk. 24:49; Atũm. 1:4, 5) Ihinda-inĩ rĩu o metereire hĩndĩ ĩyo ĩkinye, Petero na Akristiano arĩa angĩ “maahoyaga mategũtigithĩria.” (Atũm. 1:13, 14) Thutha-inĩ Petero akĩandĩka marũa make ma mbere, nĩ eekĩrire Akristiano ngoro makoragwo na meciria mega na mehokage Jehova kũgerera mahoya. (Thoma 1 Petero 4:7.) Petero nĩ eerutire kwĩhoka Jehova na agĩtuĩka gĩtugĩ kĩũngano-inĩ.—Gal. 2:9.
17. Tũbatiĩ gũthiĩ na mbere gwĩka atĩa gũtekũmakania ũhoti ũrĩa tũngĩkorũo naguo? (Ningĩ rora mbica.)
17 Nĩguo tũgĩe na meciria mega, no mũhaka tũhoyage Jehova kaingĩ. Nĩ tũbataraga kũhoya ũteithio wa Jehova gũtekũmakania ũhoti ũrĩa tũngĩkorũo naguo. Kwoguo nĩ tũhoyaga ũtongoria wa Jehova, makĩria rĩrĩa tũratua matua ma bata, na tũkehoka atĩ nĩ oĩ wega kĩrĩa gĩtwagĩrĩire.
Petero nĩ eerutire kwĩhoka Jehova kũgerera mahoya. O na ithuĩ no tũkorũo na meciria mega tũngĩhoyaga ũtongoria wa Jehova, makĩria rĩrĩa tũratua matua ma bata (Rora kĩbungo gĩa 17)b
18. Ũtuĩte itua rĩa gũthiĩ na mbere gwĩka atĩa?
18 Nĩ tũkenaga mũno tondũ Jehova atũũmbĩte tũrĩ na ũhoti wa kuonania ngumo ta ciake. (Kĩam. 1:26) Ma nĩ atĩ, tũtingĩhota kwĩgerekania na Jehova na njĩra nginyanĩru. (Isa. 55:9) No o ta Petero, rekei tũthiĩ na mbere kwĩgerekania na mwĩcirĩrie wa Jehova, gũkorũo na wĩnyihia, na gũkorũo na meciria mega.
RWĨMBO NA. 30 Ngai Wakwa, Mũrata Wakwa, na Baba
a Nĩguo wone ũhoro makĩria wĩgiĩ ũrĩa gũkorũo na meciria mega kana ũgima wa kĩĩroho kuugĩte, rora gĩcunjĩ kĩa “Mistari ya Biblia Yafafanuliwa” kĩrĩ na kĩongo “2 Timotheo 1:7—‘Mungu Hakutupa Roho ya Woga,’” rungu rwa “Utimamu wa akili” thĩinĩ wa jw.org/sw kana JW Library®.
b GŨTAARĨRIA MBICA: Mwarĩ wa Ithe witũ ũrahoya na ngoro arĩ raini-inĩ ya arĩa morĩtie wĩra, etereire gwĩtwo nĩ arĩa marandĩkana.