“Mwĩthuurĩrei . . . Nũũ Mũrĩtungatagĩra”

1. Nĩ ũndũ ũrĩkũ arĩ o mũhaka twĩke nĩguo tũkorũo na gĩkeno kĩa ma, na nĩkĩ? (Isaia 48:​17, 18)

ITHE witũ wa igũrũ nĩ atwendete mũno, na nĩ endaga tũkenere ũtũũro ihinda-inĩ rĩrĩ na ihinda rĩũkĩte. (Koh. 3:​12, 13) Aatũmbire tũrĩ na ũhoti wa mwanya wa gwĩka maũndũ matiganĩte, no ndaatũheire ũhoti wa kwĩyatha kana wa gwĩtuĩra wega na ũũru. (Koh. 8:9; Jer. 10:23) Nĩ oĩ atĩ nĩguo tũkorũo na gĩkeno kĩa ma, no nginya tũmũtungatĩre na tũtũũre kũringana na ithimi ciake.—Thoma Isaia 48:​17, 18.

2. Shaitani endaga twĩtĩkie atĩa, no Jehova ekĩte atĩa nĩguo onanie thitango ĩyo nĩ ya maheeni?

² Shaitani endaga twĩtĩkie atĩ tũtirabatara gũtungatĩra Jehova nĩguo tũkorũo na gĩkeno, na atĩ andũ no mahote kwĩyatha na njĩra njega. (Kĩam. 3:​4, 5) Nĩguo Jehova onanie atĩ thitango ĩyo yarĩ ya maheeni, nĩ etĩkĩrĩtie andũ meyathe kwa ihinda. Hatarĩ nganja nĩ tũreyonera maumĩrĩro moru ma andũ kwĩyatha. O na kũrĩ ũguo, Bibilia nĩ ĩkoragwo na cionereria nyingĩ cia arũme na atumia arĩa maarĩ na gĩkeno nĩ ũndũ wa gũtungatĩra Jehova. Kĩonereria kĩrĩa kĩega biũ nĩ kĩa Jesu. Gĩcunjĩ-inĩ gĩkĩ nĩ tũgũthuthuria kĩrĩa gĩatũmire Jesu athuure gũtungatĩra Jehova, tũcoke tuone kĩrĩa gĩtũmaga Jehova agĩrĩre gũthathaiyo. Na mũthia-inĩ, nĩ tũkwĩririkania itũmi imwe iria itũmaga tũthuure gũtungatĩra Jehova.

KĨRĨA GĨATŨMIRE JESU ATHUURE GŨTUNGATĨRA JEHOVA

3. Shaitani eerĩire Jesu ũndũ ũrĩkũ, na Jesu aatuire itua rĩrĩkũ?

³ Rĩrĩa Jesu aarĩ gũkũ thĩ, nĩ aabatarire gũtua itua rĩa nũũ egũtungatĩra. Ihinda inini thutha wake kũbatithio, Shaitani nĩ aamwĩrĩire mothamaki mothe ma thĩ, angĩekire gĩĩko kĩmwe gĩa kũmũthathaiya. Jesu aamwĩrire ũũ: “Thiĩ, Shaitani! Tondũ nĩ kwandĩke atĩrĩ: ‘Wagĩrĩirũo gũthathaiya Jehova Ngai waku, na nowe wiki wagĩrĩirũo kũrutĩra ũtungata mũtheru.’” (Mat. 4:​8-10) Nĩ kĩĩ gĩatũmire Jesu atue itua rĩu? Rekei tuone itũmi cigana ũna.

4-5. Nĩ maũndũ ta marĩkũ maatũmire Jesu athuure gũtungatĩra Jehova?

⁴ Ũndũ ũrĩa mũnene watũmire Jesu athuure gũtungatĩra Jehova nĩ tondũ nĩ akoragwo na wendo mũnene harĩ Ithe. (Joh. 14:31) Makĩria ma ũguo, Jesu atungatagĩra Jehova tondũ ũcio nĩguo ũndũ ũrĩa wagĩrĩire. (Joh. 8:​28, 29; Kũg. 4:11) Nĩ oĩ atĩ Jehova nĩwe Kĩhumo kĩa muoyo, na atĩ nĩ mwĩhokeku na nĩ mũtaana. (Thab. 33:4; 36:9; Jak. 1:17) Maũndũ mothe marĩa Jehova eeraga Jesu maarĩ ma ma, na nĩwe wamũheete kĩrĩa gĩothe aarĩ nakĩo. (Joh. 1:14) No Shaitani aarĩ ngũrani tondũ nĩwe watũmire kũgĩe na gĩkuũ. Nĩ mũheenania na atongoragio nĩ mwĩyendo na ũkoroku. (Joh. 8:44) Nĩ ũndũ wa kũmenya ũguo, gũtirĩ hĩndĩ Jesu eendire kwĩgerekania na Shaitani na njĩra ya kũremera Jehova.—Afil. 2:​5-8.

⁵ Ũndũ ũngĩ watũmire Jesu athuure gũtungatĩra Jehova nĩ atĩ nĩ eeriragĩria kuona maũndũ mega marĩa mangĩaumanire na ũtungata wake. (Ahib. 12:2) Nĩ aamenyaga atĩ angĩatũũrire arĩ mwĩhokeku nĩ angĩatheririe rĩĩtwa rĩa Ithe, na arute kĩhonia kĩa maũndũ mothe moru marĩa marehetwo nĩ Shaitani.

KĨRĨA GĨTŨMAGA JEHOVA AGĨRĨRE GŨTHATHAIYO

6-7. Andũ aingĩ ũmũthĩ magaga gũtungatĩra Jehova nĩkĩ, na nĩkĩ nowe tu wagĩrĩire gũthathaiyo?

⁶ Andũ aingĩ ũmũthĩ magaga gũtungatĩra Jehova tondũ matiũĩ ngumo cia kũgucĩrĩria iria akoragwo nacio na maũndũ mothe mega marĩa amekĩire. Ũguo nĩguo kwarĩ harĩ andũ a Athene arĩa maahunjĩirio nĩ mũtũmwo Paulo.—Atũm. 17:​19, 20, 30, 34.

⁷ Paulo eerire andũ acio a Athene atĩ Ngai ũrĩa wa ma “nĩwe ũheaga andũ othe muoyo na mĩhũmũ na indo ciothe.” Aacokire akĩmeera ũũ: “Nĩwe ũtũmaga tũkorũo muoyo, tũkahota gwĩtwara, na tũgakorũo ho.” Ngai nĩwe ‘wombire andũ a ndũrĩrĩ ciothe kuumana na mũndũ ũmwe,’ na kwoguo nowe tu wagĩrĩire gũthathaiyo.—Atũm. 17:​25, 26, 28.

8. Nĩ ũndũ ũrĩkũ Jehova athuurĩte kwaga gwĩka? Taarĩria.

⁸ Jehova arĩ na kĩhooto gĩa gũtindĩkĩrĩria andũ mamũtungatĩre tondũ nĩwe Mũũmbi na Mwathani Mũnene wa igũrũ na thĩ, no nĩ athuurĩte kwaga gwĩka ũguo. Handũ ha ũguo, nĩ atuonetie na njĩra nyingĩ atĩ arĩ kuo na atĩ nĩ atwendete mũno tũrĩ mũndũ ũmwe ũmwe. Endaga andũ aingĩ ũrĩa kwahoteka matuĩke arata ake tene na tene. (1 Tim. 2:​3, 4) Nĩkĩo Jehova atũmenyeretie kũruta andũ arĩa angĩ igũrũ rĩgiĩ mĩoroto yake na maũndũ mega marĩa ageekĩra andũ. (Mat. 10:​11-13; 28:​19, 20) Ningĩ nĩ aigĩte mũbango wa ũthathaiya kũgerera ciũngano na agatũhe athuri matũrũmbũyagia na wendo.—Atũm. 20:28.

9. Jehova onanĩtie atĩa atĩ nĩ endete andũ othe?

⁹ Jehova nĩ onanĩtie wendo wake kũgerera ũrĩa arũmbũyanagia na andũ arĩa matendaga gwĩtĩkia atĩ arĩ kuo. Ta wĩcirie ũndũ ũyũ: Kuuma o tene, andũ bilioni nyingĩ mathuuraga gũtũũra kũringana na ithimi ciao cia wega na ũũru. O na kũrĩ ũguo, Jehova nĩ amaheaga kĩrĩa marabatara nĩguo mathiĩ na mbere gũtũũra na gũkenera ũtũũro. (Mat. 5:​44, 45; Atũm. 14:​16, 17) Nĩ amahotithĩtie gũkorũo na arata mamendete, gũkorũo na famĩlĩ, na gũkenera maciaro ma wĩra wao mũritũ. (Thab. 127:3; Koh. 2:24) Maũndũ macio nĩ maronania wega atĩ Ithe witũ wa igũrũ nĩ endete andũ othe. (Tham. 34:6) Rĩu reke twĩririkanie itũmi imwe iria itũmaga tũthuure gũtungatĩra Jehova na ũrĩa atũrathimaga tweka ũguo.

KĨRĨA GĨTŨMAGA TŨTHUURE GŨTUNGATĨRA JEHOVA

10. (a) Ũndũ ũrĩa mũnene ũtũmaga tũtungatĩre Jehova nĩ ũrĩkũ? (Mathayo 22:37) (b) Ũgunĩkĩte atĩa kuumana na wohanĩri wa Jehova? (Thaburi 103:​13, 14)

¹⁰ O ta Jesu, ũndũ ũrĩa mũnene ũtũmaga tũtungatĩre Jehova nĩ tondũ nĩ tũmwendete mũno. (Thoma Mathayo 22:37.) Rĩrĩa tweruta igũrũ rĩgiĩ ngumo ciake nĩ tũiguaga tũgucĩrĩirio harĩ we. Kwa ngerekano, ta wĩcirie ũhoro wĩgiĩ wohanĩri wake. Rĩrĩa Aisiraeli maamũremagĩra, aameraga ũũ: “Garũrũkai ndamũthaitha, mũtigane na njĩra cianyu njũru.” (Jer. 18:11) Jehova nĩ aririkanaga tũrĩ andũ matarĩ akinyanĩru mombĩtwo na rũkũngũ. (Thoma Thaburi 103:​13, 14.) Na githĩ ndũtindĩkagwo kũmũtungatĩra tene na tene wecũrania ũhoro wĩgiĩ wohanĩri wake na ngumo ingĩ ciake cia kũgucĩrĩria?

11. Nĩ itũmi irĩkũ ingĩ itũmaga tũthuure gũtungatĩra Jehova?

¹¹ Ũndũ ũngĩ ũtũmaga tũtungatĩre Jehova nĩ tondũ ũcio nĩguo ũndũ ũrĩa wagĩrĩire. (Mat. 4:10) Ningĩ nĩ tũĩ atĩ ũtungata witũ nĩ ũhingagia maũndũ ma bata. Rĩrĩa twatungatĩra Jehova tũrĩ ehokeku nĩ tũtheragia rĩĩtwa rĩake, tũkonania Shaitani nĩ wa maheeni, na tũgatũma ngoro ya Jehova ĩkene. Na tũngĩthuura gũtungatĩra Jehova ihinda-inĩ rĩrĩ, nĩ tũgĩaga na kĩĩrĩgĩrĩro gĩa kũmũtungatĩra tene na tene!—Joh. 17:3.

12-13. Tũreruta atĩa kuumana na kĩonereria kĩa Jane na Pam?

¹² O na andũ ethĩ no mahote gũkũria wendo mũnene harĩ Jehova, na wendo ũcio ũthiĩ ũrũmĩte o ũrĩa maraneneha. Ũguo nĩguo gwathiire harĩ airĩtu erĩ a nyina ũmwe metagwo Jane na Pam.a Jane aarĩ na mĩaka 11 na Pam aarĩ na mĩaka 10 rĩrĩa maambĩrĩirie kwĩruta Bibilia. O na gũtuĩka aciari ao matietĩkĩrire kwĩruta Bibilia, nĩ maaheire Jane na Pam rũtha rwa kũnyitanĩra na Aira a Jehova, no makĩmeera atĩ no nginya mathiage kanitha hamwe nao mũthia-inĩ wa kiumia. Jane aaugire ũũ: “Maũndũ marĩa ndarutagwo nĩ Aira a Jehova kuuma Bibilia-inĩ nĩ maandeithagia kũregana na hatĩka cia riika ciĩgiĩ kwĩingĩrania na mĩthiĩre ĩtagĩrĩire na kũhũthĩra ndawa cia kũrebia.”

¹³ Mĩaka mĩnini thutha ũcio nĩ maatuĩkire ahunjia kĩũngano-inĩ. Thutha-inĩ nĩ maambĩrĩirie ũpainia o makĩrũmbũyagia aciari ao akũrũ. Jane ecũrania maũndũ mothe marĩa Jehova amekĩire, aaugire ũũ: “Nĩ ndĩyoneire ũrĩa Jehova arũmbũyagia arata ake na wĩhokeku, na o ta ũrĩa 2 Timotheo 2:19 yugaga, ‘Jehova nĩ oĩ arĩa marĩ ake.’” Hatarĩ nganja, hĩndĩ ciothe Jehova nĩ arũmbũyagia arĩa mathuuraga kũmwenda na kũmũtungatĩra.

14. Tũtheragia rĩĩtwa rĩa Jehova atĩa kũgerera ciugo na ciĩko citũ? (Ningĩ rora mbica.)

¹⁴ Twendaga gũtheria rĩĩtwa rĩa Jehova kuumana na maheeni marĩa marĩtio igũrũ rĩake. Kwa ngerekano, ta hũũra mbica ũrĩ na mũrata mũtugi, mũtaana, na wohanagĩra. No mũthenya ũmwe ũkaigua akĩigĩrĩrũo kĩgenyo atĩ akoragwo arĩ mũũru na ti mwĩhokeku. Ũngĩka atĩa? Hatarĩ nganja no ũmũtetere. Na njĩra o ta ĩyo, rĩrĩa Shaitani na arĩa mamũnyitaga mbaru mathũkĩria Jehova rĩĩtwa na njĩra ya kwaria maheeni mamwĩgiĩ, nĩ tũtetagĩra rĩĩtwa rĩake na njĩra ya kwaria ũhoro wa ma ũmwĩgiĩ. (Thab. 34:1; Isa. 43:10) Kũgerera ciugo na ciĩko citũ nĩ tuonanagia atĩ nĩ tũthuurĩte gũtungatĩra Jehova na ngoro yothe.

15. Mũtũmwo Paulo aagunĩkire atĩa nĩ ũndũ wa kũgarũrĩra ũtũũro wake? (Afilipi 3:​7, 8)

¹⁵ Nĩ tũgarũragĩra ũtũũro witũ twĩyendeire nĩguo twĩtĩkĩrĩke nĩ Jehova kana nĩguo twandandũre ũtungata witũ. Kwa ngerekano, mũtũmwo Paulo nĩ aatiganire na gaturũa karĩa aarĩ nako ndini-inĩ ya Kĩyahudi nĩguo arũmĩrĩre Kristo na atungatĩre Jehova. (Gal. 1:14) Nĩ ũndũ ũcio nĩ aagĩire na irathimo nyingĩ agĩtungatĩra Jehova, na akĩheo mweke wa gũgaathamaka na Kristo kũrĩa igũrũ. Ndarĩ hĩndĩ eeririre nĩ ũndũ wa itua rĩake rĩa gũtungatĩra Jehova, na o na ithuĩ gũtirĩ hĩndĩ tũkeerira.—Thoma Afilipi 3:​7, 8.

16. Nĩ ũndũ ũrĩkũ tũreruta kuumana na kĩonereria kĩa Julia? (Ningĩ rora mbica.)

¹⁶ Tũngĩigaga ũtungata wa Jehova mbere ũtũũro-inĩ witũ, Jehova nĩ egũtũrathima ihinda-inĩ rĩrĩ na ihinda-inĩ rĩũkĩte. Ta wĩcirie ngerekano ya mwarĩ wa Ithe witũ wĩtagwo Julia. Arĩ kairĩtu kanini nĩ aaingĩrĩte kwaya ya kanitha. Julia aarĩ na mũgambo mwega ũũ atĩ mũini ũmwe ũrĩ na ũmenyeru nĩ eerutĩire kũmũruta maũndũ ma ũini. Thutha wa ihinda inini Julia nĩ aatuĩkire mũini ũrĩ ngumo, na nĩ eetagwo kũndũ kũrĩ igweta nĩguo ainĩre andũ. Rĩrĩa aathomagĩra cukuru ya ũini ĩrĩ gatũ, mũrutwo ũmwe nĩ aambĩrĩirie kwaria nake ũhoro wĩgiĩ Ngai, na akĩmuonia atĩ Ngai etagwo Jehova. Ihinda inini thutha ũcio, Julia nĩ aambĩrĩirie kwĩruta Bibilia maita merĩ o kiumia. Mũthia-inĩ, nĩ aatuire itua rĩa kũiga ũtungata wa Jehova mbere ũtũũro-inĩ wake handũ ha gũthingata ũini. Ndwarĩ ũndũ mũhũthũ gũtua itua rĩu. Aaugire ũũ: “Andũ aingĩ maanjĩraga atĩ nĩ kĩheo gĩakwa ndĩrareka kĩũrĩre thĩ, no niĩ ndeendaga kũhũthĩra ũtũũro wakwa wothe gũtungatĩra Jehova.” Hihi aiguaga atĩa nĩ ũndũ wa itua rĩu aatuire makĩria ma mĩaka 30 mĩthiru? Aaugire ũũ: “Ndĩ na thayũ wa meciria, na ndĩ na ma atĩ Jehova nĩ akaahingĩria merirĩria makwa mothe ihinda rĩũkĩte.”—Thab. 145:16.

THIĨ NA MBERE GŨTUNGATĨRA JEHOVA

17. Gũkorũo atĩ mũthia wa mũtabarĩre ũyũ ũrĩ hakuhĩ kũrahutia atĩa andũ arĩa mathuurĩte gũtungatĩra Jehova na arĩa matekĩte ũguo?

¹⁷ Mũthia wa mũtabarĩre ũyũ wĩ hakuhĩ mũno. Mũtũmwo Paulo aaugire ũũ: “Nĩ gũkorũo no ‘kahinda kanini mũno’ gatigaru, nake ‘ũrĩa ũroka akinye na ndegũcererũo.’” (Ahib. 10:37) Hihi ũndũ ũcio ũratũhutia atĩa? Ihinda rĩrĩa itigaru rĩa andũ gũthuura kana nĩ megũtungatĩra Jehova nĩ inini mũno. (1 Kor. 7:29) Na angĩkorũo nĩ tũtuĩte itua rĩa gũtungatĩra Jehova, nĩ tũĩ atĩ o na gũtuĩka nĩ tũrabatara gũkirĩrĩria magerio, no gwa “kahinda kanini mũno.”

18. Jesu na Jehova mendaga twĩke atĩa?

¹⁸ Jesu eekĩrire andũ ngoro matuĩke arutwo ake na mathiĩ na mbere kũmũrũmĩrĩra. (Mat. 16:24) Kwoguo angĩkorũo nĩ tũtungatĩire Jehova kwa ihinda rĩa mĩaka mĩingĩ, rekei tũthiĩ na mbere gwĩka ũguo tũtegũkua ngoro. Tũrabatara kwĩrutanĩria mũno nĩguo tũhote gũthiĩ na mbere gũtungatĩra Jehova. O na gũtuĩka ũndũ ũcio no ũkorũo ũtarĩ mũhũthũ, no tũkorũo na ũtũũro ũrĩ na gĩkeno na ũiyũire irathimo rĩu na nginya tene na tene.—Thab. 35:27.

19. Tũreruta atĩa kuumana na kĩonereria kĩa Gene?

¹⁹ Andũ amwe monaga ta gũtungatĩra Jehova kũmagiragĩrĩria gũkenera ũtũũro. Angĩkorũo ũrĩ mũndũ mwĩthĩ-rĩ, hihi nĩ ũiguaga ta harĩ kĩndũ ũraaga ũtũũro-inĩ nĩ ũndũ wa gũtungatĩra Jehova? Mũrũ wa Ithe witũ ũmwe mwĩthĩ wĩtagwo Gene aaugire ũũ: “Ndaiguaga ta gũkorũo ndĩ Mũira wa Jehova kwanyimaga wĩyathi. Ndonaga ciana nyingĩ cia riika rĩakwa igĩkenera ũtũũro tondũ nĩ ciaheetwo wĩyathi wa gũthiĩ ikeno, gũtuma ndũgũ cia kĩĩwendo, na gũthaaka mĩthaako ya video ĩrĩ na ũhinya, no niĩ ndirĩ ũndũ ũngĩ ndeekaga tiga o gũthiĩ mĩcemanio na gũthiĩ kũhunjia.” Ũndũ ũcio wahutirie Gene atĩa? Aaugire ũũ: “Nĩ ndambĩrĩirie kwĩingĩrania na maũndũ matarĩ mega marĩa meekagwo nĩ ciana iria ingĩ na nĩ ndakeneire kwa ihinda. No ũndũ ũcio ndwandeheire gĩkeno gĩa gũtũũra. Nĩ ndaambĩrĩirie gwĩcũrania ũguni wa gwathĩkĩra motaaro ma Bibilia na ngĩtua itua rĩa gũtungatĩra Jehova na ngoro yothe. Kuuma hĩndĩ ĩyo nĩ nyonaga atĩ Jehova nĩ acokagia mahoya makwa mothe.”

20. Twagĩrĩirũo gũtua itua rĩrĩkũ?

²⁰ Mwandĩki wa Thaburi aainĩire Jehova ũũ: “Gũkena nĩ mũndũ ũrĩa wee ũthuuraga na ũkamũrehe hakuhĩ nawe nĩguo aikarage kũu nja-inĩ ciaku.” (Thab. 65:4) Rekei tũtue itua rĩa gũthiĩ na mbere gũtungatĩra Jehova o ta Joshua ũrĩa waugire ũũ: “Niĩ na andũ a nyũmba yakwa, tũrĩtungatagĩra Jehova.”—Josh. 24:15.