GĨCUNJĨ KĨA WĨRUTI KĨA 23
RWĨMBO NA. 2 Wĩtagwo Jehova
Rĩĩtwa rĩa Jehova nĩ rĩa Bata Mũno Harĩ Ithuĩ
“‘Inyuĩ nĩ inyuĩ aira akwa,’ ũguo nĩguo Jehova ekuuga.”—ISA. 43:10.
ŨNDŨ ŨRĨA WARĨRĨIRIO
Nĩ tũkuona itemi ritũ nĩ rĩrĩkũ harĩ gũtheria na gũtetera rĩĩtwa rĩa Jehova.
1-2. Tũmenyaga atĩa atĩ rĩĩtwa rĩa Jehova nĩ rĩa bata mũno harĩ Jesu?
RĨĨTWA rĩa Jehova nĩ rĩa bata mũno harĩ Jesu. Nĩwe kĩonereria kĩrĩa kĩnene harĩ kũmenyithania rĩĩtwa rĩa Ithe. Ta ũrĩa gĩcunjĩ kĩrĩa kĩhĩtũku kĩonanĩtie, Jesu nĩ eehaarĩirie gũkua nĩguo onanie atĩ rĩĩtwa rĩa Jehova nĩ itheru na njĩra ciake ciothe nĩ cia kĩhooto. (Mar. 14:36; Ahib. 10:7-9) Na thutha wa Wathani wake wa Mĩaka Ngiri, Jesu nĩ agaakorũo ehaarĩirie gũcokeria Ithe wathani wothe, nĩguo riri wothe ũcokerere Jehova. (1 Kor. 15:26-28) Ningĩ maũndũ mothe marĩa Jesu ekĩte nĩ ũndũ wa rĩĩtwa rĩa Ithe nĩ monanagia atĩ nĩ endete Jehova mũno.
2 Jesu ookire gũkũ thĩ kũmenyithania ũhoro wĩgiĩ Jehova. (Joh. 5:43; 12:13) Nĩ aamenyithirie arũmĩrĩri ake rĩĩtwa rĩa Ithe. (Joh. 17:6, 26) Aarutanaga na akaringa ciama na rĩĩtwa rĩa Ithe. (Joh. 10:25) O na nĩ aahoire Jehova agitagĩre arutwo ake “nĩ ũndũ wa rĩĩtwa [rĩake] mwene.” (Joh. 17:11) Hatarĩ nganja, rĩĩtwa rĩa Ngai rĩarĩ rĩa bata mũno harĩ Jesu. Kwoguo-rĩ, hihi mũndũ no auge nĩ Mũkristiano angĩkorũo ndoĩ rĩĩtwa rĩa Jehova kana ndarĩhũthagĩra?
3. Tũkwarĩrĩria maũndũ marĩkũ gĩcunjĩ-inĩ gĩkĩ?
3 Tũrĩ Akristiano, nĩ twĩrutanagĩria kwĩgerekania na Jesu na njĩra ya kuona rĩĩtwa rĩa Jehova rĩrĩ rĩa bata. (1 Pet. 2:21) Gĩcunjĩ-inĩ gĩkĩ, nĩ tũkuona ũrĩa rĩĩtwa rĩa Jehova rĩmenyithanagia arĩa mahunjagia “ũhoro . . . mwega wa Ũthamaki.” (Mat. 24:14) Ningĩ nĩ tũkuona ũrĩa rĩĩtwa rĩa Jehova rĩagĩrĩire gũkorũo rĩrĩ rĩa bata harĩ o ũmwe witũ.
ANDŨ “METANĨTIO NA RĨĨTWA RĨAKE”
4. (a) Nĩ wĩra ũrĩkũ Jesu aaheire arutwo ake atanacoka igũrũ? (b) Nĩ kĩũria kĩrĩkũ tũkwarĩrĩria?
4 Jesu eerire arutwo ake ũũ ihinda inini atanacoka igũrũ: “Nĩ mũkaamũkĩra hinya rĩrĩa roho mũtheru ũgooka igũrũ rĩanyu, na nĩ mũgaatuĩka aira akwa thĩinĩ wa Jerusalemu, Judea guothe, Samaria, o nginya ituri ciothe cia thĩ.” (Atũm. 1:8) Kwoguo ũhoro ũrĩa mwega ũngĩahunjirio nginya icigo-inĩ ingĩ nja wa Isiraeli. Mũthia-inĩ, andũ a ndũrĩrĩ ciothe nĩ mangĩkagĩa na mweke wa gũtuĩka arũmĩrĩri a Jesu. (Mat. 28:19, 20) No rĩrĩ, Jesu aaugire ũũ: “Nĩ mũgaatuĩka aira akwa.” Hihi arutwo acio erũ nĩ mangĩabatarire kũmenya rĩĩtwa rĩa Jehova kana mangĩarutire ũira wĩgiĩ Jesu tu? Maũndũ marĩa marĩrĩirio thĩinĩ wa Atũmwo mũrango wa 15 nĩ megũtũteithia gũcokia kĩũria kĩu.
5. Atũmwo na athuri thĩinĩ wa Jerusalemu moonanirie atĩa atĩ andũ othe nĩ mabataraga kũmenya rĩĩtwa rĩa Jehova? (Ningĩ rora mbica.)
5 Mwaka-inĩ wa 49 M.M., atũmwo na athuri thĩinĩ wa Jerusalemu nĩ maacemanirie nĩguo marĩrĩrie ũrĩa andũ a ndũrĩrĩ arĩa mataarĩ aruu maabatiĩ gwĩka nĩguo matuĩke Akristiano. Mũthia-inĩ wa ndeereti yao, Jakubu mũrũ wa nyina na Jesu aaugire ũũ: “[Petero] nĩ ataarĩria biũ ũrĩa Ngai aambĩrĩirie kwerekeria meciria make kũrĩ ndũrĩrĩ nĩguo egĩĩre na andũ kuuma kũrĩ cio metanĩtio na rĩĩtwa rĩake.” Aacokire akĩgweta ciugo ici cia mũnabii Amosi: “Nĩguo andũ arĩa matigarĩte macarie Jehova na kĩyo, marĩ hamwe na andũ a ndũrĩrĩ ciothe, arĩa metanĩtio na rĩĩtwa rĩakwa, ũguo nĩguo Jehova ekuuga.” (Atũm. 15:14-18) Kwoguo arutwo acio erũ nĩ mangĩerutire igũrũ rĩgiĩ Jehova, na makĩria ma ũguo ‘metanio na rĩĩtwa rĩake.’ Ũguo nĩ kuuga atĩ nĩ mangĩamenyithirie andũ rĩĩtwa rĩu, na nĩ mangĩamenyekire kuumana narĩo.
Mũcemanio-inĩ ũmwe wekirũo nĩ kĩama kĩrĩa gĩatongoragia karine-inĩ ya mbere, arũme acio ehokeku nĩ maataũkĩirũo atĩ Akristiano nĩ andũ metanĩtio na rĩĩtwa rĩa Ngai (Rora kĩbungo gĩa 5)
6-7. (a) Jesu ookire gũkũ thĩ nĩkĩ? (b) Nĩ ũndũ ũrĩkũ ũngĩ wa bata makĩria watũmire Jesu oke gũkũ thĩ?
6 Rĩĩtwa rĩa Jesu riugĩte “Jehova nĩ Ũhonokio,” na nĩ oonanirie atĩ nĩwe wahũthĩrirũo nĩ Jehova kũhonokia arĩa marĩ na wĩtĩkio. Jesu ookire gũkũ thĩ nĩguo arute muoyo wake ũrĩ ũkũũri. (Mat. 20:28) Kũgerera ũkũũri ũcio, nĩ aahingũrĩire andũ njĩra ya kuoherũo mehia na kũgĩa na muoyo wa tene na tene.—Joh. 3:16.
7 No hihi andũ maabataraga ũkũũri nĩkĩ? Nĩ ũndũ wa ũrĩa gwathiire mũgũnda-inĩ wa Edeni. O ta ũrĩa gĩcunjĩ kĩrĩa kĩhĩtũku kĩonanĩtie, aciari aitũ a mbere Adamu na Hawa nĩ maaremeire Jehova, na kwoguo makĩũrũo nĩ mweke wa gũtũũra tene na tene. (Kĩam. 3:6, 24) No makĩria ma kũhonokia andũ ehia, nĩ harĩ ũndũ ũngĩ wa bata mũno watũmire Jesu oke gũkũ thĩ. Shaitani nĩ aacambithĩtie Jehova. (Kĩam. 3:4, 5) Kwoguo kũhonokio kwa njiarũa cia Adamu na Hawa kwahutanĩtie na ũndũ ũngĩ mũnene wĩgiĩ gũtherio kwa rĩĩtwa rĩa Jehova. Jesu aarĩ na itemi rĩa bata harĩ gũtheria rĩĩtwa rĩa Jehova tondũ eetanĩtio na rĩĩtwa rĩu, na nĩ aahingirie na njĩra nginyanĩru wĩra wothe ũrĩa aaheetwo nĩ Jehova.
Hihi mũndũ no auge atĩ nĩ Mũkristiano angĩkorũo ndoĩ rĩĩtwa rĩa Jehova kana ndarĩhũthagĩra?
8. Arũmĩrĩri othe a Jesu mabataraga gwĩtĩkia atĩa?
8 Ayahudi na andũ a ndũrĩrĩ arĩa othe mangĩoonanirie wĩtĩkio harĩ Jesu, nĩ mangĩabatarire gwĩtĩkia atĩ Jehova nĩwe Kĩhumo kĩa ũhonokio wao. (Joh. 17:3) Na o ta Jesu, nĩ mangĩetanirio na rĩĩtwa rĩa Jehova. Ningĩ nĩ mangĩabatarire gũtaũkĩrũo nĩ bata wa gũtherio kwa rĩĩtwa rĩa Jehova. Kũhonoka kwao kwehocetie harĩ ũndũ ũcio. (Atũm. 2:21, 22) Kwoguo arũmĩrĩri othe ehokeku a Jesu, nĩ maabataraga kwĩruta igũrũ rĩake na igũrũ rĩgiĩ Jehova. Nĩkĩo Jesu aarĩkĩrĩirie ihoya rĩake rĩrĩa rĩrĩ thĩinĩ wa Johana 17 na ciugo ici: “Nĩ ndĩmamenyithĩtie rĩĩtwa rĩaku na no ngũrĩmenyithania, nĩguo wendo ũrĩa ũnyendete naguo ũkorũo thĩinĩ wao na niĩ ngorũo na ũiguano nao.”—Joh. 17:26.
“INYUĨ NĨ INYUĨ AIRA AKWA”
9. Tũngĩonania atĩa atĩ rĩĩtwa rĩa Jehova nĩ rĩa bata harĩ ithuĩ?
9 Gũkinyĩria hau, nĩ tuona wega atĩ arũmĩrĩri othe a Jesu no mũhaka matheragie rĩĩtwa rĩa Jehova. (Mat. 6:9, 10) Na no mũhaka monanie atĩ rĩĩtwa rĩu nĩ itũũgĩru gũkĩra marĩĩtwa marĩa mangĩ mothe. No hihi tũngĩka atĩa nĩguo tũtherie rĩĩtwa rĩa Jehova kuumana na maheeni marĩa Shaitani aaririe igũrũ rĩgiĩ Jehova?
10. Nĩ ciira ũrĩkũ wa mũhaano warĩrĩirio thĩinĩ wa Isaia mũrango wa 42 nginya wa 44? (Isaia 43:9; 44:7-9) (Ningĩ rora mbica.)
10 Ibuku rĩa Isaia mũrango wa 42 nginya wa 44 nĩ rĩonanĩtie ũrĩa tũngĩka nĩguo tũtherie rĩĩtwa rĩa Jehova. Mĩrango ĩyo ĩrarĩrĩria ciira wa mũhaano ũrĩa Jehova araciirithia ngai iria ingĩ, agaciĩra irute ũira wa kuonania atĩ nĩ cia ma. Ningĩ nĩ areta aira a gũtetera ngai icio, no gũtirĩ o na ũmwe ũreyumĩria.—Thoma Isaia 43:9; 44:7-9.
Nĩ tuonanagia na njĩra nyingĩ atĩ tũrĩ aira a gũtetera Jehova (Rora kĩbungo gĩa 10-11)
11. Jehova erĩte andũ ake atĩa thĩinĩ wa Isaia 43:10-12?
11 Thoma Isaia 43:10-12. Jehova erĩte andũ ake ũũ: “Inyuĩ nĩ inyuĩ aira akwa . . . na niĩ nĩ niĩ Ngai.” Jehova aramoria ũũ: “Hihi nĩ kũrĩ Ngai ũngĩ tiga niĩ?” (Isa. 44:8) Kwoguo tũrĩ na mweke wa mwanya wa gũcokia kĩũria kĩu. No tuonanie kũgerera ciugo na ciĩko citũ atĩ Jehova nowe Ngai ũrĩa wa ma, na rĩĩtwa rĩake nĩ itũũgĩru gũkĩra marĩĩtwa marĩa mangĩ mothe. Ningĩ kũgerera mũtũũrĩre witũ, nĩ tuonanagia atĩ nĩ twendete Jehova biũ kuuma ngoro na atĩ tũrĩ ehokeku harĩ we, gũtekũmakania moritũ marĩa Shaitani atũrehagĩra. Na njĩra ĩyo, nĩ tũteithagĩrĩria gũtheria rĩĩtwa rĩa Jehova.
12. Ũrathi ũrĩa ũrĩ thĩinĩ wa Isaia 40:3, 5 wahingire atĩa?
12 Rĩrĩa twatetera rĩĩtwa rĩa Jehova, tũkoragwo tũkĩĩgerekania na Jesu Kristo. Ningĩ Isaia nĩ aarathĩte atĩ nĩ harĩ mũndũ ‘ũngĩgaathondeka [kana, ‘ũngĩkaahaarĩria,’ kohoro ka magũrũ-inĩ.] njĩra ya Jehova.’ (Isa. 40:3) Hihi ũrathi ũcio wahingire atĩa? Johana Mũbatithania nĩ aahaarĩirie njĩra nĩ ũndũ wa Jesu, ũrĩa wokire na rĩĩtwa rĩa Jehova na akĩaria kũgerera rĩĩtwa rĩu. (Mat. 3:3; Mar. 1:2-4; Luk. 3:3-6) Ũrathi ũcio ningĩ nĩ waugĩte ũũ: “Riri wa Jehova nĩ ũkaaguũranĩrio.” (Isa. 40:5) Ũndũ ũcio wahingire atĩa? Rĩrĩa Jesu ookire gũkũ thĩ, nĩ oonanirie wega ũrĩa Jehova atariĩ, ũũ atĩ nĩ ta Jehova we mwene wokĩte gũkũ thĩ.—Joh. 12:45.
13. Tũngĩĩgerekania atĩa na Jesu?
13 O ta Jesu, o na ithuĩ tũrĩ aira a Jehova. Twĩtanĩtio na rĩĩtwa rĩa Jehova, na nĩ twĩraga andũ arĩa angĩ ũhoro wĩgiĩ mawĩko make ma magegania. Nĩguo tũhote gwĩka ũguo, no mũhaka ningĩ tũmenyithanagie itemi rĩa bata rĩa Jesu harĩ gũtheria rĩĩtwa rĩa Jehova. (Atũm. 1:8) Jesu nĩwe Mũira ũrĩa mũnene wa Jehova na nĩ tũrũmagĩrĩra kĩonereria gĩake. (Kũg. 1:5) No nĩ na njĩra irĩkũ ingĩ tũngĩonania nacio atĩ rĩĩtwa rĩa Jehova nĩ rĩa bata mũno harĩ ithuĩ?
RĨĨTWA RĨA JEHOVA NĨ RĨA BATA MŨNO HARĨ ITHUĨ
14. O ta ũrĩa Thaburi 105:3 yonanĩtie, tũiguaga atĩa kwerekera rĩĩtwa rĩa Jehova?
14 Nĩ twĩrahagĩra rĩĩtwa rĩa Jehova. (Thoma Thaburi 105:3.) Jehova nĩ akenaga mũno rĩrĩa twerahĩra rĩĩtwa rĩake. (Jer. 9:23, 24; 1 Kor. 1:31; 2 Kor. 10:17) Nĩ tuonaga ũrĩ mweke wa mwanya gũtĩithia rĩĩtwa rĩa Jehova na kũrĩtetera. Tũtiagĩrĩirũo gũconoka kwĩra arĩa tũrutithanagia wĩra nao, arĩa tũthomaga nao, andũ a itũũra, kana andũ angĩ atĩ tũrĩ Aira a Jehova. Shaitani endaga tũtige kwĩra arĩa angĩ ũhoro wĩgiĩ rĩĩtwa rĩa Jehova. (Jer. 11:21; Kũg. 12:17) Ũrĩa kũrĩ nĩ atĩ, Shaitani na arĩa matheremagia maheeni make, mendaga andũ mariganĩrũo nĩ rĩĩtwa rĩa Jehova. (Jer. 23:26, 27) No tondũ nĩ twendete rĩĩtwa rĩa Jehova, tũrĩgoocaga “mũthenya wothe.”—Thab. 5:11; 89:16.
15. Gũkaĩra rĩĩtwa rĩa Jehova nĩ kuuga atĩa?
15 Nĩ tũthiaga na mbere gũkaĩra rĩĩtwa rĩa Jehova. (Joel. 2:32; Rom. 10:13, 14) Gũkaĩra rĩĩtwa rĩa Jehova nĩ makĩria ma kũmenya rĩĩtwa rĩa Ngai na kũrĩhũthĩra. Nĩ kũhutĩtie kũmenya ũrĩa Ngai atariĩ, kũmwĩhoka, na gũcaria ũteithio na ũtongoria wake. (Thab. 20:7; 99:6; 116:4; 145:18) Ningĩ nĩ tũmenyithagia arĩa angĩ rĩĩtwa rĩake na ngumo ciake, na tũkamekĩra ngoro merire na magarũrũke nĩguo metĩkĩrĩke harĩ Jehova.—Isa. 12:4; Atũm. 2:21, 38.
16. Tũngĩonania atĩa atĩ Shaitani nĩ mũheenania?
16 Nĩ tũkoragwo twĩhaarĩirie kũnyamarĩka nĩ ũndũ wa rĩĩtwa rĩa Jehova. (Jak. 5:10, 11) Rĩrĩa twatũũria wĩhokeku witũ harĩ Jehova o na tũgĩcemanagia na moritũ, nĩ tuonanagia atĩ Shaitani nĩ mũheenania. Matukũ-inĩ ma Ayubu, Shaitani aaugire ũũ igũrũ rĩgiĩ arĩa othe matungatagĩra Jehova: “Mũndũ no aneane kĩrĩa gĩothe arĩ nakĩo nĩguo ahonokie muoyo wake.” (Ayub. 2:4) Nĩ ta Shaitani aaugaga atĩ andũ matungatagĩra Jehova o rĩrĩa tu maũndũ mao marĩ mega, ĩndĩ mangĩcemania na moritũ no mamũtiganĩrie. Ayubu nĩ oonanirie atĩ ciugo cia Shaitani ciarĩ cia maheeni. O na ithuĩ tũrĩ na mweke wa kuonania atĩ gũtirĩ hĩndĩ tũngĩtiganĩria Jehova, gũtekũmakania moritũ marĩa Shaitani angĩtũrehera. No tũkorũo na ma biũ atĩ Jehova nĩ arĩtũgitagĩra nĩ ũndũ wa rĩĩtwa rĩake.—Joh. 17:11.
17. Kũringana na 1 Petero 2:12, nĩ atĩa ũngĩ tũngĩka nĩguo tũrehere rĩĩtwa rĩa Jehova riri?
17 Nĩ tũtĩĩte rĩĩtwa rĩa Jehova. (Thim. 30:9; Jer. 7:8-11) Tondũ twĩtanĩtio na rĩĩtwa rĩa Jehova, mĩthiĩre itũ no ĩgoocithie rĩĩtwa rĩu kana ĩrĩcambithie. (Thoma 1 Petero 2:12.) Kwoguo nĩ twagĩrĩirũo kwĩrutanĩria biũ nĩguo tũgoocithie Jehova kũgerera ciugo na ciĩko citũ. Rĩrĩa tweka ũguo o na tũtarĩ akinyanĩru, nĩ tũrehagĩra rĩĩtwa rĩa Jehova riri.
18. Nĩ na njĩra ĩrĩkũ ĩngĩ tũngĩonania atĩ rĩĩtwa rĩa Jehova nĩ rĩa bata harĩ ithuĩ? (Ningĩ rora kohoro ka magũrũ-inĩ.)
18 Tuonaga rĩĩtwa rĩa Jehova rĩrĩ rĩa bata mũno harĩ ithuĩ gũtekũmakania ũrĩa andũ megũtuona. (Thab. 138:2) Nĩkĩ? Tondũ rĩrĩa tweka maũndũ marĩa makenagia Ngai, kaingĩ andũ no mage gũkenio nĩ ũndũ ũcio na matũthũkĩrie rĩĩtwa.a Nĩguo Jesu agoocithie rĩĩtwa rĩa Jehova, nĩ eehaarĩirie gũkua gĩkuũ gĩa thoni atuĩrĩirũo atĩ nĩ mwĩki-naĩ. “Ndaamakirio nĩ gũconorithio” na njĩra ya atĩ ndaatangĩkire mũno igũrũ rĩgiĩ ũrĩa andũ mekũmuona. (Ahib. 12:2-4) Aaigire meciria make harĩ gwĩka wendi wa Ngai.—Mat. 26:39.
19. Ũiguaga atĩa kwerekera rĩĩtwa rĩa Jehova, na nĩkĩ?
19 Nĩ twĩrahagĩra rĩĩtwa rĩa Jehova, na nĩ tuonaga arĩ gĩtĩo kĩnene gwĩtwo Aira a Jehova. Nĩ ũndũ ũcio, nĩ tũkoragwo twĩhaarĩirie kũnyũrũrio na njĩra o yothe. Rĩĩtwa rĩa Jehova nĩ rĩa bata mũno harĩ ithuĩ o na gũkĩra ũrĩa andũ matuonaga. Rekei twĩhotore gũthiĩ na mbere kũgoocithia rĩĩtwa rĩa Jehova, gũtekũmakania moritũ marĩa Shaitani egũtũrehera. Na njĩra ĩyo, nĩ tũrĩonanagia atĩ rĩĩtwa rĩa Jehova nĩ rĩa bata mũno harĩ ithuĩ, o ta ũrĩa rĩrĩ rĩa bata harĩ Jesu.
RWĨMBO NA. 10 Goocai Jehova Ngai Witũ!
a O na Ayubu nĩ aatangĩkire mũno rĩrĩa arata ake atatũ maambĩrĩirie kũmũthũkĩria rĩĩtwa. Kĩambĩrĩria-inĩ rĩrĩa oorirũo nĩ ciana ciake na indo ciake ciothe, “Ayubu ndeehirie o na kana akiuga atĩ Ngai nĩ ekĩte ũndũ o na ũmwe mũũru.” (Ayub. 1:22; 2:10) No rĩrĩa eerirũo atĩ nĩ harĩ ũndũ mũũru eekĩte, aambĩrĩirie gwĩtetera na akĩaria “mĩario ĩtarĩ mĩrũngĩrĩru.” Ayubu oonanirie atĩ rĩĩtwa rĩake nĩrĩo rĩarĩ rĩa bata mũno harĩ we, handũ ha kũgoocithia rĩĩtwa rĩa Jehova.—Ayub. 6:3; 13:4, 5; 32:2; 34:5.