Ariũ a Ithe Witũ Erĩ Kuongererũo Kĩama-inĩ Kĩrĩa Gĩtongoragia
KŨRĨ Oktomba 5, 2024, nĩ kwanĩrĩirũo kĩmenyithia kĩa mwanya mũcemanio-inĩ wa o mwaka atĩ ariũ a Ithe witũ Jody Jedele na Jacob Rumph nĩ mamũrĩtwo gũtungata thĩinĩ wa Kĩama Kĩrĩa Gĩtongoragia kĩa Aira a Jehova. Ariũ a Ithe witũ acio eerĩ nĩ makoretwo magĩtungatĩra Jehova kwa ihinda iraihu marĩ ehokeku.
Jody Jedele na mũtumia wake, Damaris
Mũrũ wa Ithe Witũ Jedele aaciarĩirũo Missouri, Amerika (US) na akĩrererũo ũhoro-inĩ wa ma. Maaikaraga hamwe na aciari ake hakuhĩ na gĩcigo gĩtaahunjagio kaingĩ, na kwoguo akĩgĩa na mweke wa gũcemania na aarĩ na ariũ a Ithe witũ aingĩ a kuuma kũndũ gũtiganĩte arĩa mookaga kũhunjia gĩcigo kĩu. Nĩ aahutirio mũno nĩ wendo na ũrũmwe wao. Aabatithirio arĩ o tinĩnja mweri-inĩ wa Oktomba 15, 1983. Nĩ eendete ũtungata, na kwoguo thutha wa kũrĩkia cukuru ya sekondarĩ nĩ aatuĩkire painia wa hĩndĩ ciothe Septemba 1989.
Mũrũ wa Ithe Witũ Jedele na mwarĩ wa nyina marĩ anini nĩ maaceeragio Betheli nĩ aciari ao. Ũndũ ũcio nĩ wamekĩrire ngoro kwĩigĩra muoroto wa gũtungata Betheli, na nĩ maaũkinyĩire. Jedele eetirũo Betheli ya Wallkill Septemba 1990. Ambĩrĩirie na kũruta wĩra Rũhonge-inĩ rwa Ũtheru na thutha-inĩ agĩteithĩrĩria mawĩra-inĩ megiĩ ũrigitani.
Ihinda-inĩ rĩu, ciũngano cia rũthiomi rwa Kĩhispania iria ciarĩ hakuhĩ na Betheli nĩ ciarĩ na wongerereku, na kwoguo nĩ kwabataranagia ariũ a Ithe witũ a kũrũgamĩrĩra maũndũ. Nĩ ũndũ ũcio, Jedele nĩ aatuire itua rĩa kũnyitanĩra na kĩmwe gĩa cio na akĩambĩrĩria kwĩruta Kĩhispania. Ihinda inini thutha ũcio nĩ maamenyanire na mwarĩ wa Ithe witũ wĩtagwo Damaris, warĩ painia mũthiũrũrũko-inĩ ũcio. Nĩ maacokire makĩhikania, na o nake akĩambĩrĩria gũtungata Betheli.
Mwaka wa 2005 nĩ maaumire Betheli nĩguo magatungate aciari ao. Ihinda-inĩ rĩu nĩ maatuĩkire mapainia a hĩndĩ ciothe. Jedele nĩ aarutanaga Cukuru-inĩ ya Ũtungata wa Ũpainia, na agatungata Kamĩtĩ-inĩ ya Ũiguano na Thibitarĩ na Kamĩtĩ-inĩ ya Mĩako gĩcigo-inĩ kĩao.
Mwaka wa 2013, Mũrũ na Mwarĩ wa Ithe Witũ Jedele nĩ maacokire Betheli rĩngĩ nĩguo magateithĩrĩrie mwako-inĩ wa Warwick. Kuuma hĩndĩ ĩyo, nĩ makoretwo magĩteithĩrĩria wĩra nginya Patterson na Wallkill. Jedele nĩ atungatĩte Rũhonge-inĩ rwa Gũcora/Mĩako na Rũhonge-inĩ rwa Ũhoro wa Thibitarĩ. Kũrĩ Machi 2023, nĩ aamũrirũo arĩ mũteithia wa Kamĩtĩ ya Ũtungata. Eciria ũhoro wa mawĩra macio mothe anaruta aaugire: “Rĩrĩa mũndũ ambĩrĩria wĩra mwerũ, rĩmwe nĩ aiguaga agĩtigĩra. No ũndũ ũrĩa ũngĩmũteithia nĩ kwĩhoka Jehova, tondũ nĩwe ũtũhotithagia kũhingia wĩra wake.”
Jacob Rumph na mũtumia wake, Inga
Mũrũ wa Ithe Witũ Rumph aaciarĩirũo California, Amerika (US). Arĩ mũnini, nyina nĩ aatigĩte kũhunjia na gũthiĩ mĩcemanio, no nĩ eerutanagĩria kũmũruta ma cia Bibilia. Ningĩ o mwaka nĩ aaceeragĩra cũcũ wao ũrĩa warĩ mwĩhokeku harĩ Jehova. Nĩ aatũmire agĩe na wendi wa kwĩruta ũhoro wa ma, na arĩ na mĩaka 13 akĩhoya wĩruti wa Bibilia. Nĩ aabatithirio arĩ o tinĩnja Septemba 27, 1992. Ũndũ wa gĩkeno nĩ atĩ, nyina nĩ aacokereirie kĩĩroho, na ithe hamwe na ciana ciao makĩĩruta ũhoro wa ma na makĩbatithio.
Arĩ o mwĩthĩ, Mũrũ wa Ithe Witũ Rumph nĩ eeyonagĩra gĩkeno kĩrĩa mapainia maarĩ nakĩo. Kwoguo thutha wa kũrĩkia cukuru ya sekondarĩ, nĩ aambĩrĩirie ũpainia Septemba 1995. Mwaka wa 2000 nĩ aathamĩire Ecuador, kũrĩa kwarĩ na bata mũnene wa ahunjia. Arĩ kũu nĩ maamenyanire na Inga, ũrĩa warĩ painia kuuma Canada, na thutha-inĩ makĩhikania. Mahikania nĩ maathiire gũteithĩrĩria gakundi kanini ka ahunjia taũni-inĩ ĩmwe kũu Ecuador. Ũmũthĩ ũyũ, gakundi kau nĩ kĩũngano kĩrĩ na hinya.
Thutha wa ihinda, Mũrũ na Mwarĩ wa Ithe Witũ Rumph nĩ maatuĩkire mapainia a mwanya, na thutha-inĩ makĩambĩrĩria gũceerera ciũngano. Mwaka wa 2011 nĩ meetirũo kĩrathi kĩa 132 gĩa cukuru ya Gileadi. Thutha wa kũrĩkia, nĩ maatungatire mabũrũri-inĩ matiganĩte na magĩkenera mĩeke ngũrani ya ũtungata ta gũtungata Betheli, wĩra wa ũmishonarĩ, na gũceerera ciũngano. Ningĩ Rumph nĩ aarutanaga thĩinĩ wa Cukuru ya Ahunjia a Ũthamaki.
Nĩ ũndũ wa kĩngʼũki gĩa COVID-19, Mũrũ na Mwarĩ wa Ithe Witũ Rumph nĩ maacokire Amerika (US). Nĩ meetirũo Betheli ya Wallkill, na Rumph akĩmenyerio wĩra Rũhonge-inĩ rwa Ũtungata. Thutha-inĩ nĩ maacokire Betheli ya Ecuador, na Rumph akĩambĩrĩria gũtungata Kamĩtĩ-inĩ ya Wabici ya Rũhonge. Mwaka wa 2023 nĩ maathamĩire Warwick. Kũrĩ Janũarĩ 2024, Rumph nĩ aambĩrĩirie gũtungata arĩ mũteithia wa Kamĩtĩ ya Ũtungata. Ecũrania ũhoro wĩgiĩ kũrĩa anatungata aaugire, “Kĩrĩa gĩtũmaga wĩra ũrĩa mũndũ ehokeirũo ũkorũo ũrĩ wa mwanya nĩ andũ arĩa mararutithania wĩra nake, no ti kũrĩa araũrutĩra.”
Nĩ tũkenagio mũno nĩ kĩyo kĩa ariũ a Ithe witũ acio, na ‘andũ ta acio nĩ tũmatĩaga mũno.’—Afil. 2:29.