Kĩama Kĩrĩa Gĩtongoragia kĩa Aira a Jehova nĩ Kĩĩ?

Kĩama Kĩrĩa Gĩtongoragia nĩ gakundi kanini ka Akristiano agimaru kĩĩroho arĩa maheaga Aira a Jehova ũtongoria ũrĩa magĩrĩire kũrũmĩrĩra. Marutaga mawĩra maya merĩ:

• Gũtongoria wĩra wa kũhaarĩria morutani ma Bibilia kũgerera mabuku, mĩcemanio, na cukuru cia Aira a Jehova.—Luka 12:42.

• Kũrũgamĩrĩra wĩra wa Aira a Jehova thĩinĩ wa thĩ yothe na njĩra ya kũheana ũtongoria wĩra-inĩ wa kũhunjia na ũrĩa mĩhothi yagĩrĩire kũhũthĩrũo.

Kĩama Kĩrĩa Gĩtongoragia kĩrũmagĩrĩra kĩonereria kĩa “atũmwo na athuri” arĩa maakoragwo Jerusalemu karine-inĩ ya mbere, arĩa maatuaga matua ma bata megiĩ kĩũngano gĩothe gĩa Gĩkristiano. (Atũmwo 15:2) O ta athuri acio ehokeku a karine ya mbere, amemba a Kĩama Kĩrĩa Gĩtongoragia tio anene aitũ. Marũmagĩrĩra ũtaaro wa Bibilia, na nĩ maririkanaga atĩ Jehova Ngai athuurĩte Jesu Kristo akorũo arĩ we Mũtwe wa kĩũngano.—1 Akorintho 11:3; Aefeso 5:23.

Nĩa makoragwo thĩinĩ wa Kĩama Kĩrĩa Gĩtongoragia?

Amemba a Kĩama Kĩrĩa Gĩtongoragia nĩ Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Matungataga wabici-inĩ nene ya Aira a Jehova ĩrĩa ĩkoragwo Warwick, New York, Amerika (US).

Kĩama Kĩrĩa Gĩtongoragia kĩrutaga wĩra atĩa?

Kĩama Kĩrĩa Gĩtongoragia gĩkoragwo na kamĩtĩ ithathatũ cia kũrũgamĩrĩra maũndũ matiganĩte ma wĩra witũ. O mũmemba wa Kĩama Kĩrĩa Gĩtongoragia arutithanagia wĩra na kamĩtĩ ĩmwe kana makĩria harĩ kamĩtĩ icio ithathatũ.

• Kamĩtĩ ya Atabarĩri: Kamĩtĩ ĩno ĩrũgamagĩrĩra maũndũ ma kĩĩwatho, na ĩkaheana ũtongoria rĩrĩa kwaumĩra maũndũ ta ithingithia na mĩiyũro, rĩrĩa Aira a Jehova mokĩrĩrũo nĩ ũndũ wa wĩtĩkio wao, na rĩrĩa kwagĩa na maũndũ mangĩ ma hinahi marahutia Aira a Jehova.

• Kamĩtĩ ya Erutĩri: Ĩrũgamagĩrĩra maũndũ ma arĩa matungataga famĩlĩ-inĩ cia Betheli.

• Kamĩtĩ ya Ũcabi: Ĩrũgamagĩrĩra wĩra wa gũcaba mabuku maitũ na kũmatwara kũndũ gũtiganĩte, na wĩra wa gwaka kũrĩa tũthathayagĩria, wabici cia ũtaũri, na wabici cia honge.

• Kamĩtĩ ya Ũtungata: Ĩrũgamagĩrĩra wĩra wa kũhunjia ‘ũhoro mwega wa Ũthamaki.’—Mathayo 24:14.

• Kamĩtĩ ya Ũrutani: Ĩrũgamagĩrĩra wĩra wa kũhaarĩria maũndũ ma kĩĩroho marĩa marutanagwo mĩcemanio-inĩ itũ, cukuru-inĩ citũ, na thĩinĩ wa video na tabarĩra cia gũthikĩrĩria.

• Kamĩtĩ ya Wandĩki: Ĩrũgamagĩrĩra wĩra wa kũhaarĩria ũhoro ũrĩa ũcabagwo mabuku-inĩ maitũ na ũrĩa wĩkĩragwo thĩinĩ wa website itũ, na ĩkarũgamĩrĩra wĩra wa ũtaũri.

Makĩria ma gũkorũo atĩ Kĩama Kĩrĩa Gĩtongoragia nĩ kĩrutaga wĩra kũgerera kamĩtĩ icio, amemba a kĩama kĩu nĩ macemanagia o kiumia nĩguo marĩrĩrie mabataro ma Aira a Jehova thĩinĩ wa thĩ yothe. Nĩguo amemba acio maiguithanĩrie matua-inĩ matiganĩte hĩndĩ ya mĩcemanio ĩyo, nĩ mathuthuragia ũrĩa Maandĩko maugĩte, na magetĩkĩra gũtongorio nĩ roho mũtheru wa Ngai.—Atũmwo 15:25.

Nĩa mateithagĩrĩria Kĩama Kĩrĩa Gĩtongoragia?

Nĩ Akristiano ehokeku arĩa matungataga thĩinĩ wa kamĩtĩ itiganĩte cia Kĩama Kĩrĩa Gĩtongoragia. (1 Akorintho 4:2) Makoragwo na ũhoti na ũmenyeru wa kũruta wĩra kamĩtĩ-inĩ iria marutithanagia wĩra nacio, na nĩ makoragwo ho hĩndĩ ya mĩcemanio ya o kiumia ya kamĩtĩ icio. O na gũtuĩka o matituaga matua, nĩ maheanaga ũtaaro wa bata na mageka ũthuthuria wĩgiĩ maũndũ matiganĩte, magatigĩrĩra atĩ matua marĩa matuo nĩ kamĩtĩ icio nĩ mararũmĩrĩrũo, na magaikara makĩroraga ũrĩa matua macio mararutithio wĩra na maumĩrĩra mamo. Ningĩ nĩ matũmagwo nĩ Kĩama Kĩrĩa Gĩtongoragia gũthiĩ gũceerera aarĩ na ariũ a Ithe witũ icigo-inĩ itiganĩte thĩinĩ wa thĩ kana makaheo mĩeke ya kũrutana hĩndĩ ya mĩcemanio ya o mwaka kana hĩndĩ ya kũrĩka gwa Cukuru ya Gileadi.