Ciũria Kuuma Kũrĩ Athomi
Nĩ “rĩciria” rĩrĩkũ Jehova egwĩkĩra ngoro-inĩ cia thirikari cia thĩ ica ikuhĩ?
Rĩandĩko rĩa Kũguũrĩrio 17:16, 17 riugaga ũũ rĩkĩaria ũhoro wĩgiĩ rĩrĩa thĩna ũrĩa mũnene ũkaambĩrĩria: “Hĩa icio ikũmi wona o hamwe na nyamũ ĩyo ya gĩthaka, nĩ igaathũũra mũmaraya ũcio na imwanange na imũtige arĩ njaga, na nĩ ikaarĩa nyama ciake na imũcine biũ na mwaki. Nĩ gũkorũo Ngai nĩ ekĩrĩte ũndũ ũcio ngoro-inĩ ciao nĩguo mahingie rĩciria rĩake, mahingie rĩciria rĩao rĩmwe na njĩra ya kũhe nyamũ ĩyo ya gĩthaka ũthamaki wao.” Mabuku maitũ makoretwo makiuga atĩ “rĩciria” rĩrĩa Jehova ageekĩra ngoro-inĩ cia athamaki a thĩ nĩ rĩa kũniina ndini cia maheeni.
O na kũrĩ ũguo, nĩ tũrabatara kũgarũrĩra ũtaũku ũcio. “Rĩciria” rĩrĩa Jehova ageekĩra ngoro-inĩ cia athamaki a thĩ nĩ rĩa “kũhe nyamũ ĩyo ya gĩthaka ũthamaki wao.” Nĩgetha tũtaũkĩrũo wega nĩ ũrĩa ũndũ ũcio ũkaahinga, reke twarĩrĩrie ciũria ici irũmĩrĩire.
Nĩa magwetetwo ũrathi-inĩ ũcio? “Mũmaraya” ũrĩa ũgwetetwo ũrathi-inĩ ũcio ningĩ nĩ etĩtwo “Babuloni Ũrĩa Mũnene,” na arũgamĩrĩire ndini ciothe cia maheeni thĩinĩ wa thĩ. Nayo “nyamũ ya gĩthaka ya rangi mũtune” ĩrũgamĩrĩire ithondeka rĩa gwetha thayũ rĩrĩa rĩaambĩrĩirio mwaka wa 1919 na rĩgĩtwo Ngwatanĩro ya Mabũrũri, no rĩu rĩtagwo Ũrũmwe wa Mabũrũri. (Kũg. 17:3-5) Nacio “hĩa ikũmi” irũgamĩrĩire thirikari ciothe cia thĩ iria inyitaga mbaru nyamũ ĩyo ya gĩthaka.
Ũrata wa mũmaraya ũcio na nyamũ ĩyo ya gĩthaka ya rangi mũtune ũhaana atĩa? Mũmaraya ũcio akoretwo “aikarĩire” nyamũ ĩyo ya gĩthaka, na ũguo nĩ kuuga akoretwo akĩmĩnyita mbaru, na akageria kũmĩatha.
Hihi gũgaathiĩ atĩa harĩ mũmaraya ũcio? Nyamũ ĩyo ya gĩthaka hamwe na hĩa icio ikũmi “nĩ igaathũũra mũmaraya ũcio.” Ikaamũitũrũrĩra marakara imũtunye ũtonga wake, na iguũrie waganu wake. Na nĩ ikaahingia ituĩro rĩa Jehova rĩa kũniina mũmaraya ũcio biũ. (Kũg. 17:1; 18:8) Ũcio nĩguo ũgaakorũo ũrĩ mũthia wa ndini ciothe cia maheeni. No mbere ya ũndũ ũcio gwĩkĩka, Jehova nĩ agaatũma thirikari cia thĩ ciĩke ũndũ itarĩ cieka hĩndĩ ĩngĩ o yothe.
Nĩ ũndũ ũrĩkũ Jehova agaatũma thirikari cia thĩ ciĩke? Nĩ ageekĩra “rĩciria rĩake” ngoro-inĩ cia hĩa icio ikũmi rĩa kũhe “nyamũ ĩyo ya gĩthaka [ya rangi mũtune] hinya na wathani wao,” na nyamũ ĩyo nĩyo Ũrũmwe wa Mabũrũri. (Kũg. 17:13) No hihi ũguo nĩ kuuga atĩ thirikari cia andũ nĩcio ikeeĩra iheane hinya na wathani wacio kũrĩ nyamũ ĩyo ya gĩthaka? Aca! Ũrathi wonanagia atĩ Ngai we mwene nĩwe ũgaatũma ciĩke ũguo. (Thim. 21:1; ringithania Isaia 44:28) Na hihi thirikari ikaaneana wathani wacio o kahora? Aca! Kũroneka ũndũ ũcio ũgeekĩka o rĩmwe. Thutha wa nyamũ ĩyo ya gĩthaka kũheo wathani, nĩ ĩkaahingia ituĩro rĩa Jehova na njĩra ya kũniina mathondeka ma ndini cia maheeni kaimana.
Gũkĩrĩ ũguo-rĩ, nĩ ũndũ ũrĩkũ tũrerĩgĩrĩra ũhaanĩke? Tũtirabatara gweterera kũigua mohoro maronania atĩ thirikari irathiĩ inyitĩte Ũrũmwe wa Mabũrũri mbaru o kahora. Ĩndĩ no twĩrĩgĩrĩre atĩ Jehova ageekĩra rĩciria rĩu ngoro-inĩ cia thirikari cia thĩ o rĩmwe, na ihe nyamũ ĩyo ya gĩthaka wathani wacio. Rĩrĩa ũndũ ũcio ũgeekĩka, nĩ tũkaamenya atĩ thĩna ũrĩa mũnene ũkiriĩ kwambĩrĩria. Nĩ ũndũ ũcio-rĩ, rekei “tũikarage twĩiguĩte na tũtũũrie ũhoti witũ wa gwĩciria,” tondũ mogarũrũku macio megwĩkĩka o na ihenya ica ikuhĩ.—1 Thes. 5:6.