FPG/The Image Bank via Getty Images
IKARAGAI MWĨHŨGĨTE!
Ateti Kũheana Mũkaana wa Hari-Magedoni—Mawoni ma Bibilia nĩ Marĩkũ?
Kũrĩ Njumatatũ rũcinĩ, Oktomba 10, 2022, Russia nĩ yahũũrire mataũni maingĩ ma Ukraine na mbomu cia gũikio arĩ njĩra ya kwĩrĩhĩria tondũ wa mũtuthũko mũnene ũrĩa watuthũkĩte thikũ igĩrĩ mbere ĩyo na ũgĩthũkangia ndaraca ya bata ĩrĩa ĩnyitithanagia Crimea na Russia. Maũndũ macio meekĩkire ihinda inini thutha wa ateti amwe kũheana mũkaana wa atĩ Hari-Magedoni ĩrĩ hakuhĩ.
“Tũtirĩ twakorũo rĩngĩ ũgwati-inĩ mũnene wa kũgĩa na Hari-Magedoni kuuma hĩndĩ ya mbaara ĩrĩa yarĩ kuo hĩndĩ ya [Mũtongoria wa Amerika John F.] Kennedy na bũrũri wa Cuba (Cuban Missile Crisis). . . . Ndigwĩciria matharaita ma niukilia no mahũthĩke na njĩra ĩtekũrigĩrĩria na Hari-Magedoni.”—Mũtongoria wa Amerika Joe Biden, Oktomba 6, 2022.
Rĩrĩa Mũtongoria wa Ukraine Volodymyr Zelensky ooririo ũhoro wĩgiĩ maumĩrĩra ma kũhũthĩra matharaita ma niukilia, aaugire ũũ: “Nĩ ndĩretĩkania atĩ ĩno nĩ Hari-Magedoni, na nĩ ũgwati harĩ thĩ yothe.”—Mohoro ma BBC, Oktomba 8, 2022.
Hihi matharaita ma niukilia mangĩhũthĩrũo no marehe Hari-Magedoni? Bibilia yugaga atĩa?
Hihi matharaita ma niukilia nĩ mekũrehe Hari-Magedoni?
Aca. Kiugo “Hari-Magedoni” kĩonekaga o riita rĩmwe tu Bibilia-inĩ thĩinĩ wa Kũguũrĩrio 16:16. Gĩtionanagia ũhoro wa mbaara gatagatĩ ka ndũrĩrĩ, no kĩonanagia mbaara gatagatĩ ka Ngai na “athamaki a thĩ yothe ĩrĩa ĩikaragwo.” (Kũguũrĩrio 16:14) Ngai akaahũthĩra mbaara ya Hari-Magedoni kũniina wathani wa andũ.—Danieli 2:44.
Nĩguo wĩrute makĩria igũrũ rĩgiĩ ũrĩa Hari-Magedoni ĩkaahutia thĩ, thoma gĩcunjĩ kĩrĩ na kĩongo Mbaara ya Hari-Magedoni nĩ Kĩĩ?
Hihi mbaara ya niukilia nĩ ĩkũniina thĩ na aikari ayo?
Aca. O na gũtuĩka atongoria a gũkũ thĩ no mahũthĩre matharaita ma niukilia ihinda rĩũkĩte, Ngai ndagetĩkĩria thĩ yanangwo. Bibilia yugaga ũũ:
“Thĩ ĩtũũraga tene na tene.”—Kohelethu 1:4.
“Andũ arĩa athingu nĩ makaagaya thĩ, na magaatũũra thĩinĩ wayo tene na tene.”—Thaburi 37:29.
O na kũrĩ ũguo, ũrathi wa Bibilia na maũndũ marĩa marekĩka thĩinĩ wa thĩ nĩ ironania atĩ ica ikuhĩ nĩ gũkũgĩa na mogarũrũku manene thĩinĩ wa thĩ. (Mathayo 24:3-7; 2 Timotheo 3:1-5) Wĩrute ũrĩa Bibilia yugaga igũrũ rĩgiĩ ihinda rĩũkĩte kũgerera mũbango witũ wa kwĩruta Bibilia hatarĩ marĩhi.