Nĩ Kĩĩ Gĩtũmaga Maũndũ ma Ũteti Marehe Ngayũkano?—Mawoni ma Bibilia nĩ Marĩkũ?

Mabũrũri matiganĩte thĩinĩ wa thĩ, nĩ makoragwo na ngayũkano ciumanĩte na ũteti. Kũringana na ũthuthuria wekirũo nĩ kĩama kĩa Pew Research Center mwaka wa 2022, “gĩcunjĩ kĩa 65 harĩ 100 kĩa andũ agima mabũrũri-inĩ 19 marĩa ũthuthuria ũcio wekirũo, kĩaugire atĩ andũ arĩa manyitaga mbaru ciama itiganĩte cia ũteti bũrũri-inĩ wao nĩ makoragwo na ngarari nyingĩ na ngayũkano.”

Hihi nĩ wonete atĩ ngayũkano cia gĩũteti irathiĩ ciongererekete kũrĩa ũikaraga? Hihi gĩtũmi nĩ kĩĩ? No kũgĩe na kĩhonia? Rora wone ũrĩa Bibilia yugaga.

Mĩerekera ĩrĩa ĩtũmaga kũgĩe ngayũkano

Bibilia nĩ yarathĩte atĩ matukũ maya maitũ marĩa ĩtaga ‘matukũ ma kũrigĩrĩria,’ nĩ kũngĩgaakorũo na andũ marĩ na mĩerekera ĩratũma ũkorũo ũrĩ ũndũ mũritũ kũgĩa na ũrũmwe.

• “Matukũ-inĩ ma kũrigĩrĩria nĩ gũkaagĩa mahinda ma ũgwati maritũ kũhiũrania namo. Nĩ gũkorũo andũ nĩ magaatuĩka eyendi, . . . matendaga ũiguano.”—2 Timotheo 3:1-3.

O na gũtuĩka andũ aingĩ nĩ merutanagĩria gũteithĩrĩria thirikari irute wĩra na njĩra njega, kĩyo kĩao gĩtigaacagĩra. Nĩ ũndũ wa andũ gũkorũo na mawoni ngũrani, matihotaga kũrutithania wĩra hamwe nĩguo maniine mathĩna. Ũndũ ũcio wonanagia atĩ ũrĩa Bibilia yaugĩte tene nĩ ũhoro wa ma.

• “Mũndũ akoretwo agĩatha mũndũ agatũmaga one o maũndũ moru.”—Kohelethu 8:9.

No Bibilia yonanagia atĩ kĩhonia nĩ thirikari ĩratongorio nĩ mũndũ ũngĩhota kweheria mathĩna mothe marĩa andũ macemanagia namo ũmũthĩ.

Mũtongoria ũrĩa wagĩrĩire na ũrũmbũyagia andũ

Bibilia yonanagia atĩ mũtongoria ũrĩa ũrĩ na ngumo cia mwanya ũrĩa ũngĩagĩrĩra biũ nĩ Jesu Kristo. Jesu arĩ na ũhoti, wathani, na wendi wa kũrehera andũ othe ũrũmwe na thayũ.

• “Matukũ-inĩ make arĩa athingu nĩ makaagaacĩra, naguo thayũ nĩ ũkaaingĩha.”—Thaburi 72:7.

• “Ndũrĩrĩ ciothe nĩ ikaamũtungatĩra.”—Thaburi 72:11.

Jesu nĩwe mũtongoria ũrĩa wagĩrĩire tondũ nĩ arũmbũyagia andũ na nĩ endaga kũmateithia, na makĩria arĩa mekĩtwo maũndũ matarĩ ma kĩhooto.

• “Nĩ akaahonokia athĩni arĩa makayaga makĩhoya ũteithio, o na mũndũ ũrĩa ũtarĩ hinya hamwe na ũrĩa wothe ũtarĩ na wa kũmũteithia. Andũ arĩa matarĩ hinya na arĩa athĩni nĩ akaamaiguĩra tha, na nĩ akaahonokia mĩoyo ya arĩa athĩni. Nĩ akaamahonokia matige kũhinyĩrĩrio na gwĩkwo maũndũ ma ũhinya.”—Thaburi 72:12-14.

Wĩrute ũhoro makĩria wĩgiĩ Ũthamaki wa Ngai, thirikari ya igũrũ ĩrĩa ĩtongoragio nĩ Jesu. Rora wone ũrĩa ũngĩgunĩka kuumana na wathani waguo na ũrĩa ũngĩũnyita mbaru.

• Wĩrorere video ĩrĩ na kĩongo Ũthamaki wa Ngai nĩ Kĩĩ?

• Thoma gĩcunjĩ kĩrĩ na kĩongo “Ũthamaki wa Ngai—Thirikari Ĩtarĩ Ungumania.”