Hihi Mathako ma Olimpiki no Marehe Ũrũmwe?—Bibilia Yugaga Atĩa?

Hĩndĩ ya mathako ma 2024 ma Olimpiki, andũ bilioni ta ithano nĩ mekwĩrorera athaki kuuma mabũrũri 206 arĩa marĩ mathako-inĩ macio. Thomas Bach, mũtongoria wa kamĩtĩ ĩrĩa ĩtabanagia mathako ma Olimpiki, augĩte ũũ: “Tũrĩ na itemi harĩ mambura maya marehaga ũrũmwe na thayũ thĩ yothe. Rekei tũkũngũĩre ũndũ ũrĩa mathako ma Olimpiki marehaga wa andũ gũikarania marĩ na thayũ na ũrũmwe, o na gũtuĩka o mũndũ nĩ ngũrani na ũrĩa ũngĩ.”

Hihi mathako ma Olimpiki no mahingie maũndũ ta macio manene? Hihi no tũhote gũkorũo na thayũ wa ma na ũrũmwe?

Hihi nĩ marehaga thayũ na ũrũmwe?

Mambura ma mwaka ũyũ ma Olimpiki marĩ na maũndũ mangĩ makĩria ma mathako. Mathako macio nĩ monanĩtie maũndũ marĩa matũmaga andũ magayũkane, ma gĩũteti na ma ũndũire. Maũndũ macio nĩ hamwe na ihooto cia andũ, gũthutũkania andũ nĩ ũndũ wa rangi wao, ndini yao, na ũhoti wao wa kĩĩmbeca.

Mathako marĩa andũ macemanĩtie kuuma mabũrũri maingĩ nĩ macanjamũraga andũ. O na kũrĩ ũguo, mambura ta macio nĩ monanagia atĩ andũ meciragia na mageka maũndũ na njĩra ĩrarehe nyamũkano, na nĩ matũmaga andũ mathiĩ na mbere kũgayũkana handũ ha kũmateithia kũgĩa na thayũ wa ma na ũrũmwe.

Bibilia nĩ yarathĩte atĩ matukũ-inĩ maya andũ nĩ mangĩgaakorũo na mĩerekera ĩngĩgaatũma ũkorũo ũrĩ ũndũ mũritũ gũkorũo na ũrũmwe. (2 Timotheo 3:1-5) Nĩguo wĩrute makĩria ũhoro wĩgiĩ ũrathi ũcio, thoma gĩcunjĩ kĩrĩ na kĩongo “Je, Biblia Ilitabiri Mitazamo na Matendo ya Watu Leo?”

Kĩĩrĩgĩrĩro gĩa kwĩhokeka gĩa thayũ na ũrũmwe

Bibilia nĩ ĩtũheaga kĩĩrĩgĩrĩro gĩa kwĩhokeka gĩa thayũ na ũrũmwe thĩinĩ wa thĩ. Ĩranĩire atĩ andũ othe nĩ magaakorũo na ũrũmwe rungu rwa thirikari ya igũrũ ĩrĩa ĩĩtĩtwo “Ũthamaki wa Ngai.”—Luka 4:43; Mathayo 6:10.

Jesu Kristo, ũrĩa nĩwe Mũthamaki wa Ũthamaki ũcio, nĩ akaarehe thayũ thĩinĩ wa thĩ yothe. Bibilia yugaga ũũ:

• “Arĩa athingu nĩ makaagaacĩra, naguo thayũ nĩ ũkaaingĩha.”—Thaburi 72:7.

• “Nĩ akaahonokia athĩni arĩa makayaga makĩhoya ũteithio . . . Nĩ akaamahonokia matige kũhinyĩrĩrio na gwĩkwo maũndũ ma ũhinya.”—Thaburi 72:12, 14.

O na ũmũthĩ, andũ milioni nyingĩ thĩinĩ wa mabũrũri 239 nĩ makoragwo na ũrũmwe nĩ ũndũ wa kũrũmĩrĩra morutani ma Jesu. Aira a Jehova thĩinĩ wa thĩ yothe nĩ merutĩte gũkorũo na thayũ. Nĩguo wone ũrĩa mahotete gwĩka ũguo, thoma ngathĩti ya Mũrangĩri ĩrĩ na kĩongo, “Ũrĩa Tũngĩtooria Rũmena.”