Ũrĩa Ũthamaki wa Ngai Ũgeeka Igũrũ Rĩgiĩ Ũgima wa Mwĩrĩ

“Gũkorũo atĩ mũrimũ wa COVID-19 nĩ ũtigĩte kuonwo ũrĩ ũgwati wa kũrũmbũiyo na ihenya thĩinĩ wa thĩ, ti kuuga atĩ rĩu mũrimũ ũcio ti ũgwati harĩ ũgima wa mwĩrĩ wa andũ.. . . No tũkorũo na ma atĩ no kuumĩre mũthemba ũngĩ wa kĩngʼũki, na nĩ twagĩrĩirũo gũkorũo twĩhaarĩirie.”—Dr. Tedros Adhanom Ghebreyesus, mũrũgamĩrĩri mũnene wa Kĩama kĩa Ũgima wa Mwĩrĩ gĩa Thĩ, Mĩĩ 22, 2023.

Andũ aingĩ no marahiũrania na mathĩna ma mwĩrĩ na ma meciria nĩ ũndũ wa kĩngʼũki gĩa COVID-19. Hihi thirikari na ikundi cia ũgima wa mwĩrĩ nĩ igũkorũo ciĩhaarĩirie nĩ ũndũ wa kĩngʼũki kĩrĩa kĩngĩ kĩngiumĩra, na hihi no ihote gũtooria mathĩna marĩa marĩ kuo ihinda-inĩ rĩrĩ megiĩ ũgima wa mwĩrĩ?

Bibilia nĩ ĩtaarĩirie ũhoro wa thirikari ĩmwe ĩrĩa ĩkaarehera andũ ũgima mwega wa mwĩrĩ. Yugaga atĩ “Ngai wa igũrũ nĩ akaahanda ũthamaki,” kana thirikari. (Danieli 2:44) Rĩrĩa thirikari ĩyo ĩgaakorũo ĩgĩathana thĩinĩ wa thĩ, “gũtirĩ mũikari wakuo ũkoiga: ‘Ndĩ mũrwaru.’” (Isaia 33:24) Mũndũ wothe agaakorũo na ũgima mwega wa mwĩrĩ na hinya o ta wa mũndũ mwĩthĩ.—Ayubu 33:25.