Nũũ Ũngĩhoka?—Bibilia Yugaga Atĩa?

Andũ nĩ makuaga ngoro rĩrĩa andũ arĩa magĩrĩirũo gũkorũo marĩ ehokeku monania atĩ matingĩĩhokwo. Andũ aingĩ nĩ matigĩte kwĩhoka . . .

• atongoria a gĩũteti arĩa mekaga ũrĩa wothe mangĩhota kwĩguna o ene handũ ha kũrũmbũiya mũingĩ.

• nyũmba cia mohoro iria iheanaga ũhoro na njĩra ya gũthutũkania na ĩtarĩ nũngĩrĩru.

• athomi a sayansi arĩa matekaga maũndũ mangĩteithia mũingĩ.

• atongoria a ndini arĩa meingĩragia mũno maũndũ-inĩ ma gĩũteti handũ ha kũrũgamĩrĩra Ngai.

Ti ũũru andũ kũrora nũũ marehoka. Bibilia ĩtũheete ũtaaro ũyũ:

•  “Ndũkaige mwĩhoko waku harĩ anene; mũndũ-rĩ, ndangĩhota gũgũteithia.”—Thaburi 146:3, The Holy Bible in Gĩkũyũ Language.

Mũndũ ũngĩhoka

 Bibilia nĩ yonanagia atĩ nĩ harĩ mũndũ ũngĩhoka. Mũndũ ũcio nĩ Jesu Kristo. Makĩria ma Jesu gũkorũo arĩ mũndũ mwega watũũraga mĩaka mĩingĩ mĩhĩtũku, Ngai nĩ aamwamũrire nĩguo ‘agaathana arĩ Mũthamaki tene na tene, na Ũthamaki wake ndũgaakorũo na mũthia.’ (Luka 1:32, 33) Jesu nĩ Mũthamaki wa Ũthamaki wa Ngai, na Ũthamaki ũcio rĩu nĩ ũrathana ũrĩ kũrĩa igũrũ.—Mathayo 6:10.

• Nĩguo wĩrute makĩria kĩrĩa kĩngĩtũma wĩhoke Jesu, thoma gĩcunjĩ kĩrĩ na kĩongo “Nũũ Mũthamaki wa Ũthamaki wa Ngai?” na “Ũthamaki wa Ngai Ũgeeka Maũndũ Marĩkũ?”