Andũ nĩ Matigĩte Kwĩhoka Ateti—Mawoni ma Bibilia nĩ Marĩkũ?

Mwaka-inĩ wa 2024, nĩ gũgũkorũo na ithuurano nyingĩ kũndũ gũtiganĩte thĩinĩ wa thĩ, na nĩguo mwaka ũrĩa ũgũkorũo na ithuurano nyingĩ mũno iria cianekwo thĩinĩ wa mwaka ũmwe. O na kũrĩ ũguo, andũ aingĩ nĩ matigĩte kwĩhoka ateti.

• Andũ aingĩ arĩa maahoirũo ũhoro a kuuma Amerika, maaugire atĩ “ateti aingĩ matongoragio nĩ itũmi cia mwĩyendo,” handũ ha gũtongorio nĩ wendi wa gũtungatĩra mũingĩ.a—Pew Research Center, Septemba 19, 2023.

Andũ aingĩ ethĩ o nao nĩ matigĩte kwĩhoka ateti.

• “Andũ ethĩ nĩ mendete gũcaria kĩhonia kĩa mathĩna, no mangĩhoywo ũhoro maugaga atĩ ateti matikoragwo na kĩhonia kĩa mathĩna mao.”—The New York Times, Janũarĩ 29, 2024.

• “Kũringana na ũthuthuria ũmwe, andũ ethĩ mehokete andũ arĩa marĩ ngumo nenda-inĩ cia ũkinyanĩria gũkĩra ũrĩa mehokete ateti.”—The Korea Times, Janũarĩ 22, 2024.

Hihi no twĩhoke ateti maagĩrie maũndũ ihinda rĩũkĩte? Nũũ tũngĩhoka?

Rora nũũ ũrehoka

Nĩ wega mũndũ kũrora nũũ arehoka. Bibilia yugaga atĩ “mũndũ ũrĩa ũtarĩ na ũũgĩ etĩkagia kiugo o gĩothe, no ũrĩa mũũgĩ nĩ ecũranagia ikinya o rĩothe.”—Thimo 14:15.

• Nĩguo wone maũndũ mangĩgũteithia gũkũũrana ũhoro wa ma nĩ ũrĩkũ na wa maheeni nĩ ũrĩkũ, thoma gĩcunjĩ kĩrĩ na kĩongo “Jilinde Dhidi ya Habari za Uwongo.”

Makĩria ma ũguo, o na ateti arĩa makoragwo marĩ ehokeku mũno na makoragwo na muoroto mwega, matingĩhota kũhingia maũndũ marĩa mothe mangĩenda kũhingia. Nĩkĩo Bibilia ĩtwĩraga ũũ:

• “Ndũkaige mwĩhoko waku harĩ anene; mũndũ-rĩ, ndangĩhota gũgũteithia.”—Thaburi 146:3, The Holy Bible in Gĩkũyũ Language.

Mũtongoria ũngĩhokeka

Bibilia nĩ ĩtaarĩirie atĩ Ngai nĩ amũrĩte mũtongoria ũrĩ na ũhoti mũnene na ũngĩhokeka biũ, na nĩwe Jesu Kristo. (Luka 1:32, 33) Jesu nĩwe Mũthamaki wa Ũthamaki wa Ngai, ũthamaki ũrĩa wathanaga ũrĩ kũrĩa igũrũ.—Mathayo 6:10.

• Wĩrute kĩrĩa kĩngĩtũma wĩhoke Jesu na ũrĩa ageeka nĩguo aniine mathĩna marĩa mothe tũcemanagia namo. Thoma gĩcunjĩ kĩrĩ na kĩongo “Nũũ Mũthamaki wa Ũthamaki wa Ngai?” na kĩrĩ na kĩongo “Ũthamaki wa Ngai Ũgeeka Maũndũ Marĩkũ?”