Hihi nĩ Kũrĩ Thirikari Nũmu Ĩngĩathana Gũkũ Thĩ?—Bibilia Yugaga Atĩa?

Thirikari kũndũ guothe thĩinĩ wa thĩ irĩ na moritũ maingĩ. O na thĩinĩ wa mabũrũri marĩa mangĩoneka marũmĩte wega, thirikari nĩ ihutagio na njĩra njũru nĩ maũndũ ma ungumania, maumĩrĩro ma ithuurano gũkorũo makuhanĩrĩirie mũno, ngayũkano cia gĩũteti, na ngũĩ iria ciumanaga na mĩrũrũngano.

Bibilia yonanagia atĩ nĩ kũrĩ thirikari ĩmwe ĩkoragwo ĩrĩ nũmu wega. No kũhoteke wanaigua ũhoro wayo. Nĩ thirikari ĩrĩa Jesu aagwetire ihoya-inĩ rĩa mwathani.

• “Nĩ ũndũ ũcio, hoyagai na njĩra ĩno: ‘Ithe witũ ũrĩ igũrũ, rĩĩtwa rĩaku nĩ rĩtherio. Ũthamaki waku nĩ ũũke. Wendi waku nĩ wĩkwo gũkũ thĩ o ta kũu igũrũ.’”—Mathayo 6:9, 10.

Bibilia yugaga atĩa igũrũ rĩgiĩ Ũthamaki ũcio?

Ũthamaki ũcio nĩ thirikari nũmu

Ũthamaki ũcio wathanaga kuuma kũrĩa igũrũ.

• Jesu eetire thirikari ĩyo “Ũthamaki wa igũrũ.” (Mathayo 4:17; 5:3, 10, 19, 20) Nĩkĩo aaugire ũũ: “Ũthamaki wakwa ti wa thĩ ĩno.”—Johana 18:36.

Ũthamaki ũcio ũgaathana ithenya rĩa thirikari cia andũ.

• Bibilia yugaga ũũ: “Ũthamaki ũcio . . . nĩ ũkaamemenda na ũniine mothamaki macio mothe [ma andũ], na noguo wiki ũgaatũũra wĩhandĩte tene na tene.”—Danieli 2:44.

Ũthamaki ũcio, ũrĩa Jesu Kristo agaakorũo arĩ Mũthamaki waguo ndũrĩ hĩndĩ ũkaanangwo.

• Bibilia yugaga ũũ: “Wathani wake nĩ wathani wa tene na tene na ndũgaathira, naguo ũthamaki wake ndũkaaniinwo.”—Danieli 7:13, 14.

Ũthamaki ũcio nĩ ũkaarehe thayũ na ũgitĩri thĩinĩ wa thĩ.

• Bibilia yugaga ũũ: “O mũndũ agaatũũraga na thaayũ mĩgũndainĩ yake ya mĩthabibũ na ya mĩkũyũ, na gũtirĩ mũndũ ũgaatũma etigĩre.”—Mika 4:4., The Holy Bible in Gĩkũyũ Language.

Wĩrute Makĩria igũrũ rĩgiĩ Ũthamaki ũcio

Rĩrĩa Jesu aarĩ gũkũ thĩ, aahũthĩrire mahinda make maingĩ kũhunjia “ũhoro ũrĩa mwega wa Ũthamaki.” (Mathayo 9:35) Ningĩ nĩ eeranĩire ũũ:

• “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.”—Mathayo 24:14.

Ũmũthĩ, ũhoro ũrĩa mwega wa Ũthamaki nĩ ũrahunjio thĩinĩ wa mabũrũri makĩria ma 240. Nĩ tũrakũũria wĩrute makĩria igũrũ rĩgiĩ thirikari ĩyo, na ũrĩa ũngĩgunĩka kuumana na wathani wayo.

Wĩrorere video ya Ũthamaki wa Ngai nĩ Kĩĩ?