Ingĩĩgitĩra Atĩa Ndigathumbũrũo na Maũndũ Megiĩ Ngomanio?
Macokio ma Bibilia
Ta wĩcirie maũndũ maya ũngĩhũthĩra moimanĩte na ũũgĩ ũrĩa ũrĩ thĩinĩ wa Bibilia:
Koragwo na mĩhaka. Koragwo na ũrata na ũtĩage arĩa mũrutaga wĩra nao, ĩndĩ wĩtheme ũrata ũrĩa ũngĩtũma woneke ta ũngĩtĩkĩra maũndũ ma ngomanio.—Mathayo 10:16; Akolosai 4:6.
Wĩhumbage wega. Kwĩhumba nguo irakuonania mwĩrĩ waku no gũtũme andũ magwĩcirie ũũru. Bibilia ĩtwĩraga twĩkĩrage nguo iria “itakĩrĩtie njano, na ironania meciria mega.”—1 Timotheo 2:9.
Thuura arata na ũũgĩ. Ũngĩceera na andũ arĩa matonaga arĩ ũũru kana o na magakena magĩthakĩrũo na maũndũ ma ngomanio, no kũhoteke o nawe wĩkwo o tao.—Thimo 13:20.
Reganaga na mĩario ya ũtũrĩka. Wĩyeherere angĩkorũo ndeereti nĩ yatuĩka ya “maũndũ ma thoni, na kwaria ũrimũ kana itherũ rĩtarĩ rĩega.”—Aefeso 5:4, The Bible in Gikũyũ.
Wĩtheme maũndũ mangĩkũingĩria ũgwati-inĩ. Kwa ngerekano, wĩmenyerere mũndũ angĩkwĩra mũtigwo hanini thutha wa wĩra hatarĩ na gĩtũmi kĩega.—Thimo 22:3.
Onania mũrũgamo waku na ndũkagarũrĩre. Ũngĩthumbũrũo na maũndũ megiĩ ngomanio, ĩra ũrĩa ũragũthumbũra mĩtugo yake ndĩragũkenia. (1 Akorintho 14:9) Kwa ngerekano, no ũmwĩre: “Ũtindaga ũkĩhutia, na ũndũ ũcio ndũngenagia. Nĩ ndagũkania.” No ũmwandĩkĩre ũmũtaarĩrie ũrĩa agwĩkire, ũrĩa ũiguire, na ũrĩa ũtangĩenda acokere ũndũ ũcio rĩngĩ. Reke amenye wega atĩ mũrũgamo waku wĩhocetie harĩ maũndũ marĩa wĩrutĩte kuuma Bibilia-inĩ megiĩ mĩtugo.—1 Athesalonike 4:3-5.
Caria ũteithio. Ũrĩa ũragũthumbũra angĩthiĩ na mbere, ĩra mũrata wĩhokete, mũndũ wa famĩlĩ, kana mũndũ mũrutaga wĩra nake kana mũndũ ũrĩ na ũmenyeru wa gũteithia andũ arĩa mathumbũragwo na maũndũ ma ngomanio. (Thimo 27:9) Andũ aingĩ arĩa mathumbũragwo na maũndũ ma ngomanio nĩ mateithĩkaga mũno maahoya. O na angĩkorũo ndũrĩ wahoya, ndũkahũthie ũteithio ũrĩa ũngĩheo nĩ Jehova, “Ngai ũrĩa ũmagĩrĩria andũ maũndũ-inĩ mothe.”—2 Akorintho 1:3.
Gũthumbũrũo na maũndũ ma ngomanio gũtũmaga andũ milioni nyingĩ maigue guoya marĩ wĩra-inĩ, ĩndĩ Bibilia no ĩmateithie.