Hihi Aira a Jehova nĩ Maigagĩra Andũ Mawatho Megiĩ Gũtuma Ndũgũ ya Kĩĩwendo?

Aira a Jehova metĩkĩtie atĩ motaaro na mawatho marĩa makoragwo thĩinĩ wa Bibilia no mateithie andũ gũtua matua megũkenia Ngai na mamagune o ene. (Isaia 48:17, 18) Ti ithuĩ twethondekeire motaaro na mawatho macio, no nĩ twĩrutanagĩria kũmathĩkĩra. Ta reke tuone motaaro na mawatho mamwe ma Bibilia mangĩhũthĩka rĩrĩa andũ marenda gũtuma ndũgũ ya kĩĩwendo.a

• Kĩhiko nĩ ũndũ wa gũtũũra. (Mathayo 19:6) Aira a Jehova nĩ moyaga na ũritũ ũhoro wĩgiĩ gũtuma ndũgũ ya kĩĩwendo tondũ monaga rĩrĩ ikinya rĩtongoragia mũndũ kũingĩra kĩhiko-inĩ.

• Andũ arĩa magĩrĩire gũtuma ndũgũ ya kĩĩwendo no arĩa tu makinyĩtie mĩaka ĩrĩa yagĩrĩire ya kũhikania. Bibilia yonanagia atĩ andũ ta acio magĩrĩirũo gũkorũo ‘mahĩtũkĩte ihinda rĩa wĩthĩ,’ na ũguo nĩ kuuga nĩ mahĩtũkĩte mĩaka ĩrĩa merirĩria ma ngomanio makoragwo marĩ igũrũ mũno.—1 Akorintho 7:36.

• Andũ marenda gũtuma ndũgũ ya kĩĩwendo nĩ magĩrĩirũo gũkorũo metĩkĩrĩtio nĩ Maandĩko kũhika kana kũhikania. Andũ amwe nĩ makoragwo matiganĩte kĩĩwatho, no maitho-inĩ ma Ngai matiĩtĩkĩrĩtio kũhika kana kũhikania rĩngĩ tondũ Maandĩko monanagia atĩ ũndũ ũrĩa tu wagĩrĩirũo gũtũma andũ matigane nĩ ũtharia.—Mathayo 19:9.

• Akristiano arĩa marenda kũhika kana kũhikania magĩrĩirũo gũthuura mũndũ wĩtĩkĩtie maũndũ marĩa metĩkĩtie. (1 Akorintho 7:39) Aira a Jehova mationaga ũguo arĩ kuuga tu mũndũ ũheete gĩtĩo maũndũ marĩa metĩkĩtie, no nĩ mũndũ wĩtĩkĩtie maũndũ marĩa twĩtĩkĩtie na nĩ amekaga, na akabatithio agatuĩka Mũira wa Jehova. (2 Akorintho 6:14) Kuuma tene, Ngai endaga ndungata ciake ihikanie na andũ arĩa marĩ na wĩtĩkio ta wa cio. (Kĩambĩrĩria 24:3; Malaki 2:11) Ũndũ ũcio nĩ ũkoragwo na ũguni mũno, na nginya athuthuria a mahinda maya nĩ mekĩrĩte ũhoro ũcio mũkonde.b

• Ciana nĩ ciagĩrĩirũo gwathĩkĩra aciari a cio. (Thimo 1:8; Akolosai 3:20) Kwoguo ciana iria iraikara mũciĩ gwa aciari, nĩ ciagĩrĩirũo gwathĩkĩra mawatho marĩa aciari a cio maigĩte ũhoro-inĩ wĩgiĩ gũtuma ndũgũ ya kĩĩwendo. Mawatho macio no makorũo mahutĩtie maũndũ ta mĩaka ĩrĩa mwana agĩrĩirũo gũkinyia mbere ya kwambĩrĩria ndũgũ kana maũndũ marĩa angĩtĩkĩrio gwĩka ihinda-inĩ rĩrĩa ndũgũ ĩyo ĩgũkorũo ĩgĩthiĩ na mbere.

• Aira a Jehova makĩhũthĩra ũtaaro wa Maandĩko, nĩo methuuragĩra kana nĩ mekwenda gũtuma ndũgũ na nũũ megũtuma ndũgũ nake. Ũndũ ũcio nĩ ũratwarana na ũtaaro ũyũ wa Bibilia: “O mũndũ arĩkuuaga mũrigo wake mwene.” (Agalatia 6:5) O na kũrĩ ũguo, Aira a Jehova aingĩ nĩ mahoyaga ũtaaro kuuma kũrĩ Aira a Jehova angĩ agimaru kĩĩroho arĩa mangĩmateithia gũtua itua rĩega.—Thimo 1:5.

• Maũndũ maingĩ marĩa andũ mekaga hĩndĩ ĩrĩa maramenyana makoragwo marĩ mehia maritũ. Kwa ngerekano, Bibilia ĩtwathĩte atĩ nĩ twagĩrĩirũo gwĩthema mĩtugo ya ũũra-thoni ya ngomanio. Ũndũ ũcio ndũhutĩtie o ngomanio tu, no nĩ nginya ciĩko ingĩ itarĩ theru gatagatĩ ka andũ matahikanĩtie ta kũhambatana ciĩga cia ũciari kana kũingĩra mũndũ ũrĩa ũngĩ na thutha kana kanua. (1 Akorintho 6:9-11) O na ciĩko ingĩ cia kwarahũra merirĩria ma ngomanio nĩ “maũndũ matarĩ matheru,” na itikenagia Ngai. (Agalatia 5:19-21) Ningĩ Bibilia nĩ ĩkaananĩtie kwaria “mĩario ya ũũra-thoni” ĩrĩ na maũndũ ma waganu.—Akolosai 3:8.

• Ngoro nĩ ĩheenanagia. (Jeremia 17:9) Ngoro ya mũndũ no ĩmũheenie nginya eke maũndũ marĩa atagĩrĩirũo gwĩka. Nĩ ũndũ ũcio, andũ marĩ na ndũgũ ya kĩĩwendo nĩ magĩrĩirũo gwĩthema gũkorũo marĩ oiki handũ hangĩtũma meke maũndũ matagĩrĩire. No meke ũguo na njĩra ya gũkorũo hamwe na arata angĩ ega kana gũthuura mũndũ ũngĩ ũrĩkoragwo hamwe nao. (Thimo 28:26) Akristiano arĩa mataingĩrĩte kĩhiko-inĩ ningĩ nĩ magĩrĩirũo kũririkana ũgwati wa kwambĩrĩria ndũgũ cia kĩĩwendo Intaneti-inĩ, tondũ gwĩka ũguo no gũtũme mũndũ ambĩrĩrie ndũgũ na mũndũ atoĩ wega.—Thaburi 26:4.