ANDŨ ETHĨ MORAGIA
Njagĩrĩirũo Kũhoya Nĩkĩ?
Kũringana na ũthuthuria ũmwe, gĩcunjĩ kĩa 80 harĩ 100 kĩa andũ ethĩ thĩinĩ wa Amerika nĩ mahoyaga, no harĩ acio no nuthu yao mahoyaga o mũthenya. Kwahoteka amwe ao moragia ũũ: ‘Hihi mahoya no ũndũ wa gũtũma njigue wega, kana nĩ makĩria ma ũguo?’
Mahoya nĩ kĩĩ?
Mahoya nĩ njĩra ya kwaranĩria na Mũũmbi wa indo ciothe. Ta wĩcirie ũndũ ũcio! Jehova nĩ mũtũũgĩru mũno gũkĩra andũ, no “ndarĩ haraya na o ũmwe witũ.” (Atũmwo 17:27) Bibilia ĩtwĩraga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.
Ũngĩka atĩa nĩguo ũkuhĩrĩrie Ngai?
Njĩra ĩmwe nĩ kũgerera mahoya, tondũ ũguo nĩguo ũngĩhota kwaria nake.
Njĩra ĩngĩ nĩ kwĩruta Bibilia, tondũ ũguo nĩguo “akwaragĩria.”
Njĩra ĩyo ya kwaranĩria na Ngai kũgerera mahoya na kwĩruta Bibilia no ĩgũteithie kũgĩa na ũrata wa hakuhĩ hamwe nake.
“Kwaria na Jehova, Ũrĩa ũrĩ Igũrũ Mũno, nĩ ũmwe wa mĩeke ya mwanya ĩrĩa andũ mangĩgĩa nayo.”—Jeremy.
“Gũitũrũrĩra Jehova ngoro yakwa kũgerera mahoya nĩ gũtũmaga njigue ndĩmũkuhĩrĩirie.”—Miranda.
Hihi Ngai nĩ athikagĩrĩria mahoya?
O na angĩkorũo nĩ wĩtĩkĩtie Ngai na nĩ ũmũhoyaga, no ũkorũo ũrĩ ũndũ mũritũ gwĩtĩkia atĩ nĩ athikagĩrĩria mahoya. O na kũrĩ ũguo, Bibilia ĩtaga Jehova “Mũigua wa mahoya.” (Thaburi 65:2) Nĩ ĩgwĩkĩraga ngoro ‘ũmũikagĩrie mĩtangĩko yaku yothe.’ Nĩkĩ? ‘Tondũ nĩ akũrũmbũyagia.’—1 Petero 5:7.
Ũndũ wa gwĩciria: Hihi nĩ ũcaragia mahinda ma kwaranĩria na arata aku a hakuhĩ kaingĩ? No wĩkage ũguo harĩ Ngai. Aranagĩria nake kaingĩ kũgerera mahoya, na ũkahũthagĩra rĩĩtwa rĩake, Jehova. (Thaburi 86:5-7; 88:9) Bibilia yugaga ũũ: “Hoyagai hingo ciothe.”—1 Athesalonike 5:17.
“Mahoya nĩ njĩra yakwa ya kwaranĩria na Ithe witũ wa igũrũ, na nĩ ndĩmũitũrũragĩra ngoro yakwa.”—Moises.
“Nĩ njĩraga Jehova maũndũ na njĩra ndikĩru, o ta ũrĩa ingĩra mami kana mũrata wa hakuhĩ.”—Karen.
Nĩ maũndũ ta marĩkũ ingĩhoya?
Bibilia yugaga ũũ: “Maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho.”—Afilipi 4:6.
Hihi ũguo nĩ kuuga atĩ no ũhoe igũrũ rĩgiĩ mathĩna maku? Ĩĩ! Bibilia yugaga ũũ: “Ikagĩria Jehova mũrigo waku, na nĩ arĩgũtiiragĩrĩra.”—Thaburi 55:22.
O na kũrĩ ũguo, rĩrĩa ũrahoya ndwagĩrĩirũo kũgweta o mathĩna maku. Mũirĩtu ũmwe wĩtagwo Chantelle aaugire ũũ: “Ndũngĩkorũo ũrĩ ũrata mwega angĩkorũo ndĩrahoya Jehova o andeithie tu. Nyonaga atĩ njagĩrĩirũo kwamba kũmũcokeria ngatho, na maũndũ marĩa ndĩramũcokeria ngatho nĩ ũndũ wamo magĩrĩirũo gũkorũo marĩ maingĩ.”
Ũndũ wa gwĩciria: Nĩ maũndũ marĩkũ ũkoragwo na ngatho nĩ ũndũ wamo ũtũũro-inĩ waku? Wĩcirie maũndũ matatũ ũngĩcokeria Jehova ngatho nĩ ũndũ wamo ũmũthĩ.
“O na kaũndũ kanini ta kwĩrorera ihũa ithaka no gũtũme twende gũcokeria Jehova ngatho.”—Anita.
“Wĩcũranie igũrũ rĩgiĩ kĩndũ gĩgũkenagia mũno harĩ ũũmbi kana mũhari wa Bibilia ũrĩa ũkũhutagia ngoro, ũcoke ũcokerie Jehova ngatho nĩ ũndũ wa maũndũ macio.”—Brian.