Mwanake akĩĩrorera andũ magĩthiĩ Nyũmba-inĩ ya Ũthamaki

ANDŨ ETHĨ MORAGIA

Njagĩrĩirũo Gũthiĩ Mĩcemanio Nyũmba-inĩ ya Ũthamaki Nĩkĩ?

Maita merĩ o kiumia, Aira a Jehova nĩ makoragwo na mĩcemanio kũrĩa mathathayagĩria, na gwĩtagwo Nyũmba ya Ũthamaki. Nĩ maũndũ marĩkũ mekagwo kuo, na ũngĩgunĩka atĩa wathiĩ?

Nĩ maũndũ marĩkũ mekagwo Nyũmba-inĩ ya Ũthamaki?

Thĩinĩ wa Nyũmba ya Ũthamaki kũrutanagwo maũndũ maumĩte Bibilia-inĩ ma gũtũguna ũtũũro-inĩ. Mĩcemanio ĩrĩa ĩkagĩrũo kuo no ĩgũteithie:

kwĩruta ũhoro wa ma wĩgiĩ Ngai.
kũmenya gĩtũmi kĩa maũndũ marĩa marekĩka thĩinĩ wa thĩ.
gũtuĩka mũndũ mwega makĩria.
kũgĩa na arata arĩa ega biũ.

Hihi nĩ ũĩ? Kũrĩa Aira a Jehova macemanagĩria gwĩtagwo Nyũmba ya Ũthamaki tondũ ũhoro wĩgiĩ Ũthamaki wa Ngai nĩguo ũrutanagwo mũno kuo.—Mathayo 6:9, 10; 24:14; Luka 4:43.

Wagĩrĩirũo gũthiĩ kuo nĩkĩ?

Maũndũ marĩa marutanagwo nĩ megũgũteithia. Motaaro ma Bibilia marĩa marutanagwo mĩcemanio-inĩ ya Aira a Jehova nĩ megũgũteithia ‘kũgĩa na ũũgĩ.’ (Thimo 4:5) Ũguo nĩ kuuga atĩ Bibilia no ĩgũteithie gũtua matua mega ũtũũro-inĩ. Ningĩ no ĩgũteithie kuona macokio ma ciũria cia bata ũtũũro-inĩ ta:

Ciongo ici nĩ imwe cia iria ciaragĩrĩrio mĩcemanio-inĩ itũ ya mũthia wa kiumia:

Wagĩrĩirũo Gũtongorio nĩ Bibilia Nĩkĩ?
Ũngĩruta kũ Ũteithio Hĩndĩ ya Mathĩna?
Maũndũ Marĩa Ũthamaki wa Ngai Ũratwĩkĩra Ũmũthĩ.

“Nĩ kũrĩ mũrutwo tũthomaga nake wokire mĩcemanio itũ. Aaikarire hamwe na famĩlĩ itũ na tũkĩhũthĩra mabuku hamwe nake. Thutha-inĩ, aanjĩrire atĩ nĩ aakenirio mũno nĩ macokio marĩa andũ maarutire icunjĩ-inĩ cia ciũria na macokio. Ningĩ nĩ aanjĩrire atĩ kanitha yao matikoragwo na indo cia kwĩruta ta iria tũkoragwo nacio.”—Brenda.

Hihi nĩ ũĩ? Thĩinĩ wa Nyũmba ya Ũthamaki itĩ itirĩhagĩrũo, na gũtirĩ mĩhothi yũnganagio.

Nĩ ũgwĩkĩrũo ngoro wanyitanĩra na arĩa angĩ. Bibilia yugaga atĩ gĩtũmi kĩmwe kĩa Akristiano gũcemania nĩ ‘gwĩkĩrana ngoro.’ (Ahibirania 10:24, 25) Tondũ thĩ ĩno ĩiyũire andũ eyendi, kũnyitanĩra na andũ meciragia ũhoro wa Ngai na andũ arĩa angĩ handũ ha kwĩĩciria o ene no gũgwĩkĩre ngoro.

“Thutha wa gũkorũo na maũndũ maingĩ mũthenya, njiguaga nguĩte ngoro na nogete, no hĩndĩ ciothe ndathiĩ Nyũmba-inĩ ya Ũthamaki njiguaga ndekĩrũo ngoro. Ngĩinũka thutha wa mũcemanio, njiguaga ngenete na ndĩhaarĩirie kũngʼethanĩra na mũthenya ũngĩ.”—Elisa.

Hihi nĩ ũĩ? Gũkoragwo na ciũngano makĩria ma 120,000 cia Aira a Jehova thĩinĩ wa thĩ yothe, na macemanagia kũndũ makĩria ma 60,000. O mwaka, gwakagwo Nyũmba cia Ũthamaki ta 1,500 nĩ ũndũ wa wongerereku wa andũ arĩa macemanagĩria kuo.a

Ũrĩa andũ a riika rĩaku maroiga

“Rĩrĩa ndarĩ sekondarĩ, nĩ harĩ mũrutwo twathomaga nake wokire mĩcemanio maita maigana ũna, na agĩkena kuona andũ marĩ na ũkũrũ ũtiganĩte makĩĩruta Bibilia marĩ hamwe. Ica ikuhĩ ũrĩa ũnyandĩkĩte nĩ ookire, na agĩkena nĩ kuona ũrĩa tũhũthagĩra Bibilia maita maingĩ. Kuona ũrĩa aakenirio nĩ mĩcemanio gwatũmire o na niĩ ndĩmĩende o na makĩria!”—Jessica.

“Mĩcemanio nĩ ĩtũmaga ndige gwĩciria mũno ũhoro wa mĩtangĩko yakwa ya o mũthenya. Nĩ twĩrutaga ũrĩa tũngĩgĩa na ũtũũro ũrĩ na gĩkeno, ũrĩa tũngĩtuĩka andũ ega makĩria, na maũndũ mangĩ maingĩ. Hĩndĩ ciothe ndauma Nyũmba-inĩ ya Ũthamaki njiguaga njĩkĩrĩtwo ngoro na njanjamũkĩte.”—Timothy.

“Mũndũ ũmwe ndanyitĩte ũgeni mũcemanio-inĩ aaugire ũũ thutha-inĩ: ‘Ndokire nĩgetha nyone kana no ndute wĩtĩkio wanyu mahĩtia. No ndacokire kuona atĩ wĩtĩkio wakwa nĩguo warĩ na mahĩtia!’ Ningĩ nĩ aakenirio nĩ ũrĩa Aira a Jehova maarĩ na ũrata. Aaugire ũũ: ‘O na gũtuĩka rĩarĩ riita rĩa mbere gũcemania na inyuĩ, mwanyonirie wendo ta tũmenyanĩte na inyuĩ mĩaka mĩingĩ!’”—Jacob.

“Kũrĩ hĩndĩ ndĩĩraga atĩrĩ, ‘ũmũthĩ ngũinũka mũcemanio wathira o ũguo.’ No mũcemanio ũgĩthiĩ na mbere, ngatiga kũigua ũguo. Tũkĩrĩkia mũcemanio ngoragwo ngĩaria na andũ na o na ndiririkanaga kĩrĩa gĩgũtũmaga njigue ũguo. Tiga nĩ mĩcemanio, ndingĩrĩ na arata ega arĩa ndĩ nao rĩu.”—Madison.

a Nĩguo wone kũrĩa ũngĩthiĩ mĩcemanio, thiĩ thĩinĩ wa website itũ harĩ “Mĩcemanio ya Kĩũngano ya Aira a Jehova” ũcoke ũhihinye “Caria Handũ Hakuhĩ Nawe.”