Hihi Aira a Jehova nĩ Maringagĩrĩria Ciana Ciao o Nacio Ituĩke Aira a Jehova?

Aira a Jehova matiĩkaga ũguo tondũ gũthathaiya Ngai nĩ itua rĩa mũndũ kĩũmbe. (Aroma 14:12) Aira a Jehova nĩ marutaga ciana ciao motaaro ma Bibilia, no cianeneha nĩcio ciĩthuuragĩra kana nĩ cikwenda gũtuĩka Aira a Jehova.—Aroma 12:2; Agalatia 6:5.

O ta aciari arĩa angĩ, aciari Aira a Jehova mendaga ciana ciao ikorũo na ũtũũro ũrĩ na gĩkeno. Marutaga ciana ciao maũndũ marĩa mangĩciteithia, magacionia kũruta wĩra, magaciruta gũkorũo na mĩtugo mĩega, na magaciruta ũhoro wĩgiĩ wĩtĩkio. Aira a Jehova metĩkĩtie atĩ Bibilia nĩ ĩteithagia andũ gũkorũo na ũtũũro mwega na kwoguo nĩ merutanagĩria kũruta ciana ciao kũhũthĩra morutani mayo na njĩra ya gũciruta Bibilia na gũkorũo hamwe nacio hĩndĩ ĩrĩa macemanĩtie nĩ ũndũ wa ũthathaiya. (Gũcokerithia Maathani 6:6, 7) Thutha-inĩ mwana aneneha no etuĩre itua kana nĩ ekwenda gũtuĩka Mũira wa Jehova ta aciari ake.

Hihi Aira a Jehova nĩ mabatithagia tũkenge?

Aca. Bibilia ndĩnyitaga mbaru ũhoro wĩgiĩ kũbatithia tũkenge. Kwa ngerekano, Bibilia yonanagia atĩ Akristiano a tene matanabatithio maambire kũigua ũhoro mwega, ‘makĩwĩtĩkĩra meyendeire,’ na makĩĩrira. (Atũmwo 2:14, 22, 38, 41) Ũndũ ũcio ũronania atĩ nĩgetha mũndũ abatithio agĩrĩirũo gũkorũo arĩ mũndũ ũrahota gũtaũkĩrũo nĩ maũndũ marĩa Bibilia ĩrutanaga, akametĩkia, na agatua itua rĩa gũtũũra kũringana na morutani macio. Hatarĩ nganja, gakenge gatingĩhota gwĩka maũndũ macio.

O ũrĩa mwana araneneha no ahote gũtua itua rĩa kũbatithio. No nĩgetha abatithio nĩ agĩrĩirũo gũkorũo akĩmenya maũndũ marĩa arĩrĩgagĩrĩrũo ahingie thutha wa kũbatithio.

Hihi Aira a Jehova nĩ matiganagĩria ciana ciao cingĩrega kũbatithio?

Aca. O na gũtuĩka mũciari no aigue ũũru mwana wake angĩrega gũkorũo arĩ Mũira wa Jehova, no athiaga na mbere kũmwenda na ndangĩmũmena nĩ ũndũ tu wa gũkorũo atĩ ti Mũira wa Jehova.

Kamwana karabatithio na njĩra ya gũtobokio maĩ-inĩ. — O mũndũ gũtekũmakania arĩ na mĩaka ĩigana nĩwe wagĩrĩirũo gwĩtuĩra itua rĩa kana nĩ ekwenda kũbatithio kana ndekwenda

Aira a Jehova mathiaga hamwe na ciana ciao kũhunjia nĩkĩ?

Tũthiaga hamwe na ciana citũ kũhunjia nĩ ũndũ wa itũmi cigana ũna.a

Bibilia yonanagia atĩ aciari nĩ magĩrĩirũo kũruta ciana ciao maũndũ ma kĩĩroho, na macirute gũthathaiya Ngai. (Aefeso 6:4) Gũthiĩ kũhunjia hamwe na ciana nĩ ũndũ wa bata harĩ gũciruta ũhoro wa Ngai, tondũ ũthathaiya ũhutĩtie nginya kwĩra andũ arĩa angĩ maũndũ marĩa wĩtĩkĩtie.—Aroma 10:9, 10; Ahibirania 13:15.
Bibilia yugaga atĩ andũ ethĩ “nĩmagooce rĩĩtwa rĩa Mwathani.” (Thaburi 148:12, 13, The Holy Bible in Gĩkũyũ Language) Njĩra ĩmwe ya bata mangĩka ũguo nayo nĩ kwĩra andũ arĩa angĩ ũhoro wĩgiĩ Ngai.b
Ciana nĩ igunĩkaga rĩrĩa ciathiĩ kũhunjia hamwe na aciari a cio. Kwa ngerekano, nĩ ciĩrutaga kwaranĩria na andũ a mĩthemba yothe, ikeruta kũiguanĩra tha, kuonania ũtugi, gĩtĩo, na kwaga mwĩyendo. Kũhunjia ningĩ nĩ gũteithagia ciana gũtaũkĩrũo wega nĩ Bibilia na kwoguo igakorũo na mũthingi mwega wa maũndũ marĩa ciĩtĩkĩtie.

Hihi Aira a Jehova nĩ manyitanagĩra ikũngũĩro-inĩ itiganĩte?

Aira a Jehova matinyitanagĩra ikũngũĩro-inĩ cia kĩndini kana ikũngũĩro ingĩ iria itakenagia Ngai.c (2 Akorintho 6:14-17; Aefeso 5:10) Kwa ngerekano, tũtikũngũyagĩra birthday kana Krismasi tondũ ikũngũĩro icio itiumanĩte na Bibilia.

O na kũrĩ ũguo, nĩ tũkenagĩra kũhũthĩra mahinda hamwe na famĩlĩ citũ na kũhe ciana citũ iheo. Handũ ha gũcemania na andũ a famĩlĩ na kũheana iheo o mahinda-inĩ mamwe tu harĩ mwaka, tũgeragia gwĩka ũguo mahinda-inĩ matiganĩte harĩ mwaka.

Aciari mareheire ciana ciao iheo ciohetwo wega. — Aciari Akristiano nĩ makenagĩra kũhe ciana ciao iheo

Andũ arĩa maarerirũo nĩ aciari Aira a Jehova maiguaga atĩa?

“Kũhunjia nĩ kwandutire gũtĩa andũ arĩa angĩ gũtekũmakania maũndũ marĩa metĩkĩtie kana ciĩko iria maranjĩkĩra. Ningĩ rĩrĩa tũrahunjia andũ nĩ matwĩraga mathĩna mao. Ũndũ ũcio nĩ ũndutĩte kwaga gwĩciria o ũhoro wakwa niĩ mwene, na handũ ha ũguo ngeciria ũrĩa andũ arĩa angĩ maraigua na ũrĩa ingĩmateithia.”—Tara.d
“Aciari akwa matianingĩrĩirie gũtuĩka Mũira wa Jehova. Hingo ciothe nĩ maandirikanagia atĩ niĩ nĩ niĩ njagĩrĩirũo gũtua itua rĩu. Hingo ciothe ingĩoririe mami kĩũria kĩgiĩ wĩtĩkio mũna wa Aira a Jehova aanjũragia, ‘Nĩ wĩkĩte ũthuthuria wa ũndũ ũcio?’ Ũndũ ũcio watũmire njĩke ũthuthuria mũingĩ mũno nginya ngĩkorũo na ma atĩ ĩno nĩ ndini yakwa, no ti ya aciari akwa.”—Ellie.
“Ndiaiguaga ta harĩ kĩndũ ndĩraga nĩ ũndũ wa kwaga kũnyitanĩra ikũngũĩro-inĩ itiganĩte. Wikendi ciothe ndakoragwo na maũndũ maingĩ bangĩte gwĩka hamwe na Aira a Jehova arĩa angĩ. Twarĩaga, tũkaina, na tũgathaaka. Andũ arĩa twathomaga nao maanjĩraga atĩ nĩ ndakenagĩra ũtũũro hamwe na arata kũmakĩra.”—Melissa.
“O na gũtuĩka nĩ ndataũkagĩrũo nĩ kĩĩ kĩagiragia tũkũngũĩre Krismasi, rĩmwe na rĩmwe nĩ ndaiguaga ta kũrĩ kĩndũ ndĩraga. Ũndũ ũrĩa wandeithagia nĩ atĩ aciari akwa matiaikaraga mũno matanyitĩte ũgeni arata akwa na andũ aitũ a famĩlĩ gwitũ mũciĩ. Nĩ ndirikanaga ũrĩa maandehagĩra iheo.”—Miguel.

a Ciana cia Aira a Jehova itithiaga kũhunjia itarĩ hamwe na mũciari kana mũndũ ũngĩ mũgima.

b Bibilia nĩ ĩgwetete ciana cigana ũna ciakenirie Ngai nĩ ũndũ wa kwĩra andũ angĩ maũndũ marĩa cietĩkĩtie.—2 Athamaki 5:1-3; Mathayo 21:15, 16; Luka 2:42, 46, 47.

c Rora gĩcunjĩ kĩrĩ na kĩongo, “Kwa Nini Mashahidi wa Yehova Hawasherehekei Sikukuu Fulani?”

d Marĩĩtwa mamwe nĩ macenjetio.