Kũheana Ũteithio Hĩndĩ ya Icanjama 2023—“Nĩ Tweyoneire Wendo wa Jehova”

Bibilia yarathĩte atĩ “rũrĩrĩ nĩ rũgookĩrĩra rũrĩrĩ rũrĩa rũngĩ” na nĩ gũgaakorũo na icanjama hĩndĩ ya “ithirĩro rĩa mũtabarĩre wa maũndũ.” (Mathayo 24:3, 7) Nĩ twĩyoneire ciugo icio cia ũrathi ikĩhinga mwaka-inĩ wa ũtungata wa 2023.a No o na gũkoretwo na mbaara na icanjama cia ndũire thĩinĩ wa mabũrũri hakuhĩ 100, Aira a Jehova nĩ makoretwo makĩĩgerekania na Jehova harĩ kuonania wendo. Na njĩra ĩrĩkũ?

Mwaka-inĩ wa ũtungata wa 2023, aarĩ na ariũ a Ithe witũ maahutirio nĩ icanjama makĩria ma 200, imwe cia ndũire na ingĩ cia kũrehwo nĩ andũ. Honge iria njĩtĩkĩrĩku kĩĩwatho iria ihũthagĩrũo nĩ Aira a Jehova ciahũthĩrire makĩria ma dolab milioni ikũmi kuuma harĩ mĩhothi ya wĩra wa thĩ yothe gũteithĩrĩria hĩndĩ ya icanjama. Makĩria ma ũguo, aarĩ na ariũ a Ithe witũ aingĩ nĩ mahũthĩrĩte mbeca ciao gũteithĩrĩria arĩa marĩ na ũbataro kũrĩa maikaraga. Reke tuone ũrĩa mĩhothi yaku yahũthĩrirũo gũteithĩrĩria arĩa maagũmĩirũo nĩ icanjama igĩrĩ cia ndũire harĩ icanjama nyingĩ iria ciagũmĩire aarĩ na ariũ a Ithe witũ.

“Wendo wa ma Ti Iroto”

Icigo imwe cia Nigeria nĩ kũgĩaga na mĩiyũro maita maingĩ. No mũiyũro ũrĩa wagĩire kuo Oktomba 2022, nĩguo warĩ mũũru biũ harĩ mĩiyũro ĩrĩa yanakorũo bũrũri-inĩ ũcio kwa ihinda rĩa mĩaka ikũmi. Gĩcigo kĩa makĩria ma ĩka 1,670,432 nĩ gĩathũkangirio, na andũ makĩria ma milioni igĩrĩ makĩbatara kuuma mĩciĩ-inĩ yao. Wabici ya rũhonge ya Nigeria nĩ yathuurire o na ihenya Kamĩtĩ cia Gũteithĩrĩria Hĩndĩ ya Icanjama nĩguo wĩra wa kũheana ũteithio ũbangwo na aarĩ na ariũ a Ithe witũ maheo ũteithio wa kĩĩroho.

Ũrĩa Aarĩ na Ariũ a Ithe Witũ Maahutirio

• Ahunjia 7,505 nĩ maabatarire gũthaama kwao

• Mĩciĩ 860 nĩ yathũkangirio kana ĩkĩanangwo biũ

• Nyũmba cia Ũthamaki 90 na nyũmba ĩmwe ya kĩgomano nĩ ciaiyũrire maĩ

Ũrĩa Mĩhothi Yahũthĩrirũo

Dola makĩria ma 250,000 nĩ ciahũthĩrirũo mawĩra-inĩ ta maya ma kũheana ũteithio:

• Kũgũra irio ta mũcere, mboco, na indo ingĩ ta noodles

• Kũgũra indo cia nyũmba ta miuto na neti cia rwagĩ

• Gũcokereria kana gwaka rĩngĩ mĩciĩ ĩrĩa yathũkangĩtio

Ariũ a Ithe witũ maatigĩrĩire atĩa atĩ mĩhothi nĩ yahũthĩrũo wega? Ũndũ ũmwe meekaga, nĩ kũbaara o nyũmba wega nĩguo mone kana nĩ yabataraga gũcokererio. Mangĩonire nyũmba yabataraga gwakwo rĩngĩ, yaakagwo na njĩra hũthũ iria ihũthĩkaga gĩcigo-inĩ kĩu.

Aarĩ na ariũ a Ithe witũ arĩa maamũkĩrire ũteithio nĩ maakenire mũno. Mwarĩ wa Ithe witũ ũmwe aaugire ũũ: “Mũiyũro ũcio nĩ waharaganirie ũtũũro witũ tondũ mĩgũnda itũ nĩ yathũkangirio na tũgĩtigwo tũtarĩ na mĩciĩ. Nĩ twaiguire twahoorera rĩrĩa aarĩ na ariũ a Ithe witũ mookire o mũthenya ũcio gũtũteithia na gũtũcarĩria kũndũ kwega gwa gũikara. Nĩ twakenire mũno rĩrĩa twamũkĩrire irio kuuma wabici ya rũhonge. Nĩ twahutirio mũno nĩ kuona ciugo cia Johana 13:34,35 ikĩhinga ũtũũro-inĩ witũ. . . . Wendo wa ma ti iroto. Niĩ na famĩlĩ yakwa yothe, nĩ tũracokeria ariũ a Ithe witũ ngatho nyingĩ cia kuuma ngoro nĩ gũka gũtũhe ũteithio hĩndĩ ĩrĩa twaũbataraga.”

Andũ angĩ thĩinĩ wa itũũra nĩ meeyoneire wĩra witũ wa kũheana ũteithio. Cibũ ũmwe wa itũũra rĩa Sabagreia, kuuma taũni ya Bayelsa, aaugire ũũ: “Nĩ kũrĩ mathondeka maingĩ na ndini nyingĩ thĩinĩ wa thĩ, no no Aira a Jehova marĩ meka ũndũ ta ũyũ. . . . Ithondeka rĩanyu nĩ rĩmwe rĩa mathondeka marĩa mega biũ thĩinĩ wa thĩ.”

“Nĩ Tweyoneire Wendo wa Jehova”

Mweri-inĩ wa Februarĩ 2023, mĩaki makĩria ma 400, nĩ yarehire mwanangĩko mũnene mũno bũrũri-inĩ wa Chile. Gĩcigo kĩa ĩka makĩria ma 430,000, o hamwe na indo ta thitima, barabara, na nyũmba nĩ ciathũkangirio. Andũ ta 8,000 nĩ maabatarire gũthama. Ihinda inini thutha wa gĩcanjama kĩu, wabici ya rũhonge nĩ yambĩrĩirie kũbanga wĩra wa kũheana ũteithio.

Ũrĩa Aarĩ na Ariũ a Ithe Witũ Maahutirio

• Ahunjia 222 nĩ maabatarire gũthama

• Mĩciĩ 20 nĩ yathũkangirio

Ũrĩa Mĩhothi Yahũthĩrirũo

Dola makĩria ma 200,000 nĩ ciahũthĩrirũo mawĩra-inĩ maya ma kũheana ũteithio:

• Kũgũra irio na maĩ

• Kũgũra betũrũ, indo cia gwĩka ũtheru, na ndawa

• Gwaka rĩngĩ mĩciĩ ĩrĩa yathũkangĩtio

Famĩlĩ ĩmwe nĩ yamakire mũno nĩ kuona atĩ indo ciao ciothe nĩ ciathũkangire, nginya mũciĩ wao na biacara yao. Maatigirũo matarĩ na njĩra ya kũhingia mabataro mao. Thikũ cigana ũna thutha wa ũndũ ũcio gwĩkĩka, nĩ maaiguaga ũũru mũno marora harĩa nyũmba yao yarĩ. No rĩrĩa moonire nyũmba yao yambĩrĩria gwakwo rĩngĩ, nĩ maambĩrĩirie kũigua magĩcokwo nĩ thayũ. Nĩ maahotire kũhiũrania na ũndũ ũcio nĩ kuona ũrĩa erutĩri maamacayagĩra na makamonia wendo. Famĩlĩ ĩyo nĩ yahutirio mũno, nginya ĩkĩĩrutĩra kũnyitanĩra na erutĩri acio gwaka rĩngĩ mũciĩ wa mũrũ wa Ithe witũ ũngĩ.

Aarĩ na ariũ a Ithe witũ aingĩ nĩ maakenirio mũno nĩ wĩra ũcio wa kũheana ũteithio. Mũrũ wa Ithe witũ ũmwe aaugire ũũ: “Mũbango wa Jehova wa Kamĩtĩ cia Gũteithĩrĩria Hĩndĩ ya Icanjama nĩ wa mwanya mũno. Mũthenya ũyũ ũngĩ thutha wa gĩcanjama gwĩkĩka, nĩ mookire kũheana indo cia mũthingi. Nĩ twĩkĩragwo ngoro twathoma ũhoro wa wĩra wa kũheana ũteithio kũndũ kũngĩ thĩinĩ wa thĩ. No rĩrĩa ũndũ ũcio wahaanĩka harĩ we, mũndũ nĩ ahutagio mũno. Mũndũ aiguaga arĩ na ngatho o na makĩria harĩ ithondeka rĩa Jehova; akaigua arĩ na ngatho nĩ ũndũ wa ũrĩa ariũ a Ithe witũ megerekanagia na Jehova; ũrĩa merutanagĩria gũtigĩrĩra nĩ tuona indo iria tũrabatara, na magatũteithia gũtũũria wĩtĩkio mũrũmu na mawoni mega. Nĩ tweyoneire wendo wa Jehova.”

O ũrĩa tũrakuhĩrĩria mũthia wa mũtabarĩre ũyũ, icanjama igũthiĩ o na mbere kuongerereka. (Luka 21:10, 11) O na kũrĩ ũguo, Mũthamaki witũ ũrĩ wendo, Jesu Kristo, nĩ arahũthĩra kĩũngano gĩa Gĩkristiano gũtuonia atĩ arĩ hamwe na ithuĩ “mĩthenya yothe nginya ithirĩro rĩa mũtabarĩre wa maũndũ.” (Mathayo 28:20) Mĩhothi yaku ya kwĩyendera harĩ wĩra wa thĩ yothe, ĩrĩa ũrutaga kũgerera donate.jw.org na njĩra ingĩ, o hamwe na mahinda na hinya waku, cionanagia atĩ nĩ ũranyita mbaru Ũthamaki wa Ngai na Mũthamaki witũ ũrĩ wendo. Nĩ ngatho mũno nĩ gũthiĩ na mbere kuonania ũtaana.