Kũheana Ũteithio Mwaka wa 2022—Ũrĩa Ariũ a Ithe Witũ Moonanirie Wendo

Bibilia nĩ yarathĩte atĩ matukũ-inĩ maitũ nĩ kũngĩkagĩa mbaara, ithingithia, mĩrimũ mĩũru, na maũndũ mangĩ “ma kũmakania.” (Luka 21:10, 11) Ũrathi ũcio nĩ wathiire na mbere kũhinga mwaka wa ũtungata wa 2022.a Kwa ngerekano, mbaara ya Ukraine nĩ yathiire na mbere, na ĩkĩhutia ũtũũro wa andũ milioni nyingĩ. Andũ aingĩ thĩinĩ wa thĩ no maahiũranagia na maumĩrĩro ma mũrimũ wa COVID-19. Ningĩ andũ aingĩ nĩ maahutirio nĩ icanjama cia ndũire, ta ithingithia bũrũri-inĩ wa Haiti na ihuhũkanio nene thĩinĩ wa Central America, Philippines, na mwena wa mũhuro wa Afrika. Aira a Jehova maateithirie atĩa arĩa maahutirio nĩ maũndũ macio?

Mwaka wa ũtungata wa 2022, ithondeka nĩ rĩaheanire ũteithio kũrĩ arĩa maahutirio nĩ icanjama ta 200! Twahũthĩrire hakuhĩ dola milioni 12 wĩra-inĩ wa kũheana ũteithio.b Rora wone ũrĩa mĩhothi yahũthĩrirũo gũteithia arĩa maagũmĩirũo nĩ icanjama igĩrĩ.

Ithingithia Bũrũri-inĩ wa Haiti

Kũrĩ Agosti 14, 2021, nĩ kwagĩire gĩthingithia kĩnene mwena wa mũhuro wa Haiti. Ũndũ wa kĩeha nĩ atĩ, Aira a Jehova atatũ nĩ maakuire—aarĩ a Ithe witũ erĩ na mũrũ wa Ithe witũ ũmwe. Arĩa maahonokire maatigirũo makĩhiũrania na ruo rwa ngoro na mathĩna ma kĩĩmwĩrĩ marĩa maarehirũo nĩ gĩthingithia kĩu. Mũrũ wa Ithe witũ ũmwe wĩtagwo Stephane aaugire ũũ: “Andũ aingĩ nĩ maakuire taũni-inĩ itũ ũũ atĩ gwakoragwo na mathiko maigana ũna o wiki ihinda rĩa makĩria ma mĩeri ĩĩrĩ.” Mũrũ wa Ithe witũ ũngĩ wĩtagwo Éliézer aaugire ũũ: “Aira a Jehova aingĩ matiarĩ na gwa gũikara, nguo, iratũ, na indo ingĩ cia mũthingi. Kwa ihinda rĩa mĩeri mĩingĩ, andũ aingĩ maaikaraga na guoya nĩ ũndũ wa ithingithia nyingĩ nini iria ciarũmanĩrĩire.”

Ithondeka nĩ rĩoire ikinya na ihenya kũheana ũteithio. Wabici ya rũhonge ya Haiti nĩ yaheanire makĩria ma kilo 53,000 cia irio, o hamwe na hema cia gũikara, hema cia kũgita, miuto, na indo cia gwĩkĩra thimũ mwaki. Hamwe na ũguo, mwaka wa ũtungata wa 2022, makĩria ma mĩciĩ 100 nĩ yaakirũo rĩngĩ kana ĩgĩcokererio. Kwahũthĩrirũo dola makĩria ma milioni ĩmwe wĩra-inĩ wa kũheana ũteithio.

Aarĩ na ariũ a Ithe witũ nĩ maakenire mũno na magĩcokia ngatho. Lorette aaugire ũũ: “Gĩthingithia nĩ gĩathũkirie nyũmba itũ biũ hamwe na biacara itũ. Tũtiarĩ na kĩndũ gĩa kũrĩa. No ithondeka rĩa Jehova nĩ rĩatũteithirie, rĩgĩtũhe kĩrĩa gĩothe twabataraga.” Micheline aaugire ũũ: “Gĩthingithia nĩ gĩathũkirie nyũmba ĩrĩa twaikaraga na ariũ akwa erĩ. Ndiamenyaga ũrĩa ngwĩka o tiga kũhoya, na Jehova nĩ aacokirie mahoya makwa kũgerera ithondeka rĩake. Rĩu twĩ na nyũmba njega ya gũikara. Nĩ nduĩte itua rĩa gwĩka ũrĩa wothe ingĩhota nĩguo nyonie Jehova ngatho ciakwa.”

Anene a thirikari nĩ moonire wĩra ũrĩa twarutire wa kũheana ũteithio. Mũrũgamĩrĩri wa taũni ya L’Asile aaugire ũũ: “Nĩ ndĩramũcokeria ngatho nĩ ũndũ wa ũrĩa muokire kũheana ũteithio na ihenya. Ningĩ no nyende kũmũgaathĩrĩria nĩ ũndũ wa ũrĩa mũrĩ na gĩtĩo kĩnene harĩ anene a thirikari. Nĩ ndakena kũmenya atĩ bata wanyu ti mbeca, no mũrenda gũteithia andũ. Wendo nĩguo ũmũtindĩkaga gwĩka ũrĩa mũreka.”

Kĩhuhũkanio Kĩnene kĩa Ana Kũgũmĩra Malawi na Mozambique

Kũrĩ Janũarĩ 24, 2022, Kĩhuhũkanio Kĩnene kĩa Ana nĩ kĩagũmĩire bũrũri wa Mozambique gĩgĩcoka gĩgĩthiĩ mwena wa ithũĩro gĩkĩingĩra Malawi. Kĩhuhũkanio kĩu kĩarehire mbura nene na huho ciarĩ na hinya ciathiaga na thibindi ya kilomita 100 harĩ ithaa. Nĩ gĩathũkangirie waya cia thitima, ndaraca, na gĩgĩtũma kũgĩe mũiyũro mũnene.

Kĩhuhũkanio kĩu nĩ kĩahutirie Aira a Jehova makĩria ma 30,000 bũrũri-inĩ wa Malawi na Mozambique. Mũrũ wa Ithe witũ ũmwe wĩtagwo Charles, ũrĩa warutaga wĩra wa kũheana ũteithio, aaugire ũũ: “Rĩrĩa ndonire ariũ a Ithe witũ makĩnyamarĩka na morĩtwo nĩ indo ciao, nĩ ndaiguire kĩeha na ngĩũrũo nĩ hinya.” Gũthũkia mũno, irio nini iria maarĩ nacio na iria ciarĩ mĩgũnda-inĩ nĩ ciakuuirũo nĩ maĩ. Aingĩ nĩ morirũo nĩ mĩciĩ yao. Ũndũ wa kĩeha nĩ atĩ, mũrũ wa Ithe witũ ũmwe nĩ oorirũo nĩ mũtumia wake na tũirĩtu twake twĩrĩ, arĩa maatwarirũo nĩ maĩ rĩrĩa gatarũ karĩa gaathiĩte kũmahonokia kaangʼaũkire.

Kĩarĩ kĩhuhũkanio gĩa kũmakania. Kũrĩ thaa mũgwanja cia ũtukũ taũni-inĩ ya Nchalo, Malawi, famĩlĩ ya mũrũ wa Ithe witũ Sengeredo yaiguire mũrurumo mũnene wa maĩ magĩtherera. Mũrurumo ũcio warĩ wa njũĩ igĩrĩ ciaiyũrĩte na ikauna. Mũrũ wa Ithe Witũ Sengeredo nĩ oonire arĩ wega mathiĩ maume nyũmba-inĩ ĩyo. Rĩu rĩarĩ itua rĩega tondũ thutha wa ihinda inini, mũiyũro watũmire nyũmba ĩyo ĩmomoke. Indo ciao imwe nĩ ciathũkangirio na ingĩ igĩkuuo nĩ maĩ. Maatuire itua rĩa gũthiĩ Nyũmba-inĩ ya Ũthamaki, harĩa maahũthagĩra ndagĩka 30 gũthiĩ na magũrũ kuuma kwao mũciĩ. No ihinda-inĩ rĩu, maathiire na mathaa merĩ. Nĩ maakinyire o wega, o na gũtuĩka nĩ maaihũgĩte biũ na maarĩ anogu.

Wabici cia honge cia Malawi na Mozambique nĩ ciaambĩrĩirie kũheana ũteithio o na ihenya. Nĩ cierire arori a mũthiũrũrũko na athuri a kĩũngano marore nĩ indo irĩkũ ariũ a Ithe witũ arĩa maahutĩtio maabataraga na mamekĩre ngoro. Kamĩtĩ cia Gũteithĩrĩria Hĩndĩ ya Icanjama nĩ ciaamũrirũo nĩguo irũgamĩrĩre wĩra wa kũheana ũteithio, na ikĩambĩrĩria gũteithia ariũ a Ithe witũ o na ihenya kuona irio na indo ingĩ cia o mũhaka. Makĩria ma dola 33,000 nĩ ciahũthĩrirũo kũheana ũteithio na makĩria ma dola 300,000 ikĩhũthĩrũo gũcokereria nyũmba na gwaka ingĩ.

Kamĩtĩ icio nĩ ciahũthĩrire mbeca wega, na ũndũ ũcio warĩ wa bata tondũ indo ciarĩ na goro mũno. Kwa ngerekano, mĩeri-inĩ ya mbere mũgwanja ya kũheana ũteithio, thogora wa mũtu wa mbembe bũrũri-inĩ wa Malawi woongererekire na gĩcunjĩ kĩa 70 harĩ 100. Thogora wa maguta ma ngaari o naguo nĩ woongererekire. Nĩguo mahonokie mbeca, ariũ a Ithe witũ maagũrire irio na indo cia gwaka o kũu bũrũri-inĩ na makĩgũra irĩ nyingĩ. Nĩ ũndũ ũcio magĩtinĩrio mbeca cigana ũna na magĩĩthema thogora mũnene wa ũkuui.

Wĩra ũcio wa kũheana ũteithio nĩ wahutirie aarĩ na ariũ a Ithe witũ mũno. Mũrũ wa Ithe witũ Felisberto kuuma Mozambique, aaugire ũũ: “Ndirĩ ndona ithondeka rĩngĩ rĩheanĩte indo nyingĩ ũguo: indo cia gwaka, ngaari cia gũkuua andũ na indo, irio, na ũtongoria wa wendo. Ũteithio ũcio warĩ kĩonereria kĩega kĩa wendo wa Gĩkristiano ũrĩa Jesu aagwetire thĩinĩ wa Johana 13:34, 35.” Mwarĩ wa Ithe witũ wa ndigwa wĩtagwo Ester kuuma Malawi, ũrĩa nyũmba yake yanangirũo aaugire ũũ: “Ndaarĩ na kĩeha tondũ ndiarĩ na mbeca cia gwaka nyũmba ĩngĩ. Kwoguo rĩrĩa ariũ a Ithe witũ mookire na makĩnjakĩra nyũmba ĩngĩ, ndaiguire ta ndĩ Paradiso.”

O ũrĩa tũrakuhĩrĩria kũingĩra thĩ njerũ ĩrĩa twĩrĩirũo, nĩ tũrerĩgĩrĩra kuona icanjama nyingĩ makĩria. (Mathayo 24:7, 8) O na kũrĩ ũguo, nĩ ũndũ wa mĩhothi ĩrĩa ũrutaga, twĩ na ma atĩ aarĩ na ariũ a Ithe witũ nĩ marĩamũkagĩra ũteithio ũrĩa marabatara. Njĩra cia kũruta mĩhothi nĩ itaarĩirio thĩinĩ wa donate.jw.org. Nĩ tũracokia ngatho mũno nĩ ũndũ wa ũtaana waku.