Kũrĩa Kũrĩ na Ũingĩ nĩ Gũteithagĩrĩria Kũrĩa Kũrĩ na Ũnyihu

Aira a Jehova nĩ marutaga wĩra wa gũteithia andũ kĩĩroho na kĩĩmwĩrĩ mabũrũri-inĩ makĩria ma 200. Ĩndĩ no mabũrũri 35 tu harĩ macio, mahotaga kũrũgamĩrĩra mabataro mao. Ĩ mabataro ma mabũrũri marĩa matarĩ ũhoti mahingagio atĩa?

Kĩama Kĩrĩa Gĩtongoragia kĩa Aira a Jehova nĩ kĩroraga mabataro ma kĩĩroho o hamwe na wĩra wa Aira a Jehova thĩinĩ wa thĩ yothe. Mbeca nĩ ibangagĩrũo na ikahũthĩrũo ũrĩa kwagĩrĩire. Wabici ya rũhonge ĩngĩkorũo na mbeca nyingĩ gũkĩra iria ĩrabatara nĩguo ĩhingie mabataro ma kũrĩa ĩrũgamagĩrĩra, nĩ ĩneanaga mbeca iria itigaraga kũrĩ mabũrũri marĩa matarĩ ũhoti mũnene wa kĩĩmbeca. Mũbango ũcio nĩ ũhaanaine na ũrĩa Akristiano a tene meekaga, arĩa maateithanagia “na njĩra ya kũiganania” maũndũ. (2 Akorintho 8:14) Tondũ o maarĩ na indo nyingĩ, maacihũthagĩra gũteithia Akristiano angĩ arĩa maanyihĩirũo.

Hihi ariũ a Ithe witũ arĩa mamũkagĩra ũteithio kuuma mabũrũri mangĩ maiguaga atĩa? Bũrũri-inĩ wa Tanzania, kũrĩa makĩria ma nuthu ya andũ a kũu mahũthagĩra mbeca itakĩrĩte ciringi 200 harĩ mũthenya, mbeca iria ciaheanirũo nĩ ciahũthĩrirũo gũcokereria Nyũmba ya Ũthamaki ĩrĩa ĩhũthagĩrũo nĩ Kĩũngano kĩa Mafinga. Kĩũngano kĩu kĩaandĩkire gĩkiuga: “Kuuma rĩrĩa nyũmba itũ yacokereirio, andũ aingĩ nĩ mokaga mĩcemanio-inĩ. Nĩ tũcokagĩria ithondeka rĩa Jehova ngatho mũno o hamwe na aarĩ na ariũ a Ithe witũ thĩinĩ wa thĩ yothe nĩ ũndũ wa ũtana wao, tondũ rĩu nĩ tũkoragwo na handũ hega ha gũthathaĩria.”

Aarĩ na ariũ a Ithe witũ amwe kuuma Sri Lanka nĩ magĩĩte na ũnyihu wa irio nĩ ũndũ wa mũrimũ wa COVID-19. Imara Fernando na kamwana gake getagwo Enosh nĩ amwe ao. No nĩ ũndũ wa mĩhothi kuuma mabũrũri mangĩ, nĩ mamũkĩrĩte ũteithio. Maathondekire kandi makĩandĩka ũũ: “Nĩ tũracokeria ngatho aarĩ na ariũ a Ithe witũ arĩa matuonetie wendo mahinda maya maritũ. Nĩ tũkenaga mũno gũkorũo thĩinĩ wa famĩlĩ ĩno, na nĩ tũhoyaga Jehova ateithie aarĩ na ariũ a Ithe witũ othe matukũ-inĩ maya ma kũrigĩrĩria.”

Gũtekũmakania kũrĩa aarĩ na ariũ a Ithe witũ marĩ, nĩ mahothaga kĩrĩa me nakĩo. Kwa ngerekano, Enosh aathondekire gathandũkũ kanini ga gũikagia mũhothi nĩguo o nake ahotage gũteithagia andũ arĩa matarĩ na ũhoti. Guadalupe Álvarez o nake akoragwo na mawoni o ta macio. Aikaraga bũrũri-inĩ wa Mexico, kũrĩa andũ aingĩ matakoragwo na mbeca nyingĩ. O na kũrĩ ũguo, nĩ arutaga mũhothi wa kĩrĩa angĩhota. Aandĩkire ũũ: “Nĩ njokagĩria Jehova ngatho nĩ ũndũ wa wega wake na wendo wake mwĩhokeku. Nĩ njũĩ atĩ mũhothi wakwa nĩ ũkuonganĩrĩrio na wa andũ arĩa angĩ na nĩ ũgũteithia aarĩ na ariũ a Ithe witũ.”

Wabici cia honge iria itũmaga mbeca kũrĩa kũrĩ na ũbataro nĩ ikenaga nĩ ũndũ wa gwĩka ũguo. Anthony Carvalho ũrĩa ũtungataga Kamĩtĩ-inĩ ya Wabici ya Rũhonge ya Brazil aaugire ũũ: “Kwa ihinda rĩa mĩaka mĩingĩ, wĩra witũ nĩ wabataraga ũteithio wa kĩĩmbeca kuuma mabũrũri-inĩ mangĩ. Nĩ ũndũ wa ũteithio ũrĩa twaheagwo, nĩ tuonire wongerereku mũnene. No rĩu nĩ tũrĩ na ũhoti wa kĩĩmbeca na nĩ tũhotaga gũteithia andũ angĩ. Ariũ a Ithe witũ nĩ meciragia ũhoro wa wĩra wa kũhunjia thĩinĩ wa thĩ yothe, na makona ũrĩa mangĩteithia ta ũrĩa arutwo a Jesu meekaga.”

Aira a Jehova meekaga atĩa nĩguo mateithie aarĩ na ariũ a Ithe wao arĩa marĩ na ũbataro? Matitũmaga mbeca kũrĩ wabici cia honge iria irĩ na ũbataro, handũ ha ũguo marutaga mĩhothi yao nĩ ũndũ wa wĩra wa thĩ yothe. Mekaga ũguo na njĩra ya gũikia mĩhothi yao tũthandũkũ-inĩ tũrĩa tũkoragwo ciũngano-inĩ twandĩkĩtwo “Wĩra wa Thĩ Yothe” kana kũgerera donate.jw.org. Nĩ tũkenaga mũno nĩ ũndũ wa mĩhothi ĩyo.