Samueli wa Mbere
6 Na rĩrĩ, Ithandũkũ+ rĩa Jehova rĩaikarire gĩcigo-inĩ kĩa Afilisti mĩeri mũgwanja. 2 Afilisti magĩta athĩnjĩri-ngai na aragũri+ makĩmoria ũũ: “Tũgwĩka atĩa na Ithandũkũ rĩa Jehova? Twĩrei ũrĩa tũngĩrĩcokia kũrĩa rĩikaraga.” 3 Nao makĩmacokeria atĩrĩ: “Angĩkorũo nĩ mũgũcokia ithandũkũ rĩa kĩrĩkanĩro kĩa Jehova Ngai wa Isiraeli, mũtikarĩcokie rĩtarĩ na igongona. Mwagĩrĩirũo gũtigĩrĩra atĩ nĩ mwamũcokeria igongona rĩa mahĩtia.+ Hĩndĩ ĩyo norĩo mũkũhonio, na nĩ mũkũmenya kĩrĩa gĩtũmĩte guoko gwake kwage kũmweherera.” 4 Nĩ ũndũ ũcio makĩũria ũũ: “Nĩ kĩĩ twagĩrĩirũo kũmũtũmĩra kĩrĩ igongona rĩa mahĩtia?” Makĩmeera: “Kũringana na mũigana wa athani a Afilisti,+ tũmai mĩhiano ĩtano ya thahabu ĩhaana mũrimũ wa kũimba* na mĩhiano ĩtano ya thahabu ĩhaana mbĩa, tondũ ihũũra o rĩmwe norĩo rĩkorete o ũmwe wanyu hamwe na athani anyu. 5 Mwagĩrĩirũo gũthondeka mĩhiano ĩhaana mũrimũ wanyu wa kũimba* na mĩhiano ĩhaana mbĩa+ iria irananga bũrũri ũyũ, na nĩ mwagĩrĩirũo gũtĩa Ngai wa Isiraeli. Hihi ahota kũhũthahũthia guoko gwake kũrĩa kũmũgũmĩire inyuĩ na ngai wanyu o na bũrũri wanyu.+ 6 Mũgũkĩũmia ngoro cianyu ta ũrĩa Misiri na Firauni moomirie ngoro ciao nĩkĩ?+ Rĩrĩa Aamokĩrĩire,+ no kũrekereria maarekereirie andũ a Isiraeli, nao magĩthiĩ.+ 7 Rĩu haarĩriai gakaari kerũ ga gũkururio na ngʼombe igĩrĩ irĩ na njaũ na itarĩ ciohererũo icoki. Mũcoke mũcioherere gakaari-inĩ kau ga gũkururio, no njaũ ciacio mũcicokie mũciĩ, kũraihu nacio. 8 Muoe Ithandũkũ rĩa Jehova mũrĩigĩrĩre gakaari-inĩ kau ga gũkururio, nacio indo icio cia thahabu mũramũtũmĩra irĩ igongona rĩa mahĩtia mũciikie gathandũkũ-inĩ na mũkaige hakuhĩ narĩo.+ Mũcoke mũrĩrekererie rĩthiĩ 9 na mwĩrorere: Rĩngĩthiĩ rĩambatĩte na barabara ĩrĩa ĩthiĩte Bethi-shemeshi,+ gĩcigo-inĩ kĩarĩo, nĩ kuonania atĩ nĩwe ũtũreheire ũũru ũyũ mũnene ũguo. No kũngĩaga gũthiĩ ũguo, nĩ tũkũmenya atĩ ti guoko gwake gũtũtharĩkĩire; no nĩ ũndũ ũtũkorete o ũguo.”
10 Arũme acio magĩka o ro ũguo. Makĩoya ngʼombe igĩrĩ ciarĩ na njaũ na magĩcioherera gakaari-inĩ ga gũkururio, nacio njaũ magĩcihingĩra kiugũ-inĩ mũciĩ. 11 Magĩcoka makĩigĩrĩra Ithandũkũ rĩa Jehova gakaari-inĩ kau ga gũkururio, hamwe na gathandũkũ karĩa kaarĩ na mĩhiano ĩyo ya thahabu ĩhaana mbĩa o hamwe na mĩhiano ĩyo yahaanaga mũrimũ wao wa kũimba.* 12 Nacio ngʼombe icio igĩthiĩ barabara-inĩ ĩrĩa ĩthiĩte Bethi-shemeshi irũngĩrĩirie.+ Ciagereire barabara-inĩ o ĩyo ĩmwe nene, igĩthiĩ ikĩanagia; itiarorire mwena wa ũrĩo kana wa ũmotho. Hĩndĩ ĩyo yothe athani a Afilisti maathiaga macirũmĩrĩire o nginya mũhaka-inĩ wa Bethi-shemeshi. 13 Andũ a Bethi-shemeshi nĩ kũgetha maagethaga ngano mũkuru-inĩ mwaraganu.* Rĩrĩa maatiirire maitho mao na makĩona Ithandũkũ rĩu, magĩkena mũno nĩ kũrĩona. 14 Gakaari kau ga gũkururio gagĩthiĩ nginya mũgũnda-inĩ wa Joshua Mũbethi-shemeshi na gakĩrũgama hakuhĩ na ihiga rĩmwe inene. Nĩ ũndũ ũcio magĩatũranga mbaũ cia gakaari kau ga gũkururio, na makĩrutĩra Jehova ngʼombe+ icio irĩ igongona rĩa njino.
15 Alawii+ makĩruta Ithandũkũ rĩa Jehova na gathandũkũ karĩa kaarĩ hamwe narĩo, karĩa kaarĩ na indo cia thahabu, magĩciigĩrĩra ihiga-inĩ rĩu inene. Na mũthenya ũcio andũ a Bethi-shemeshi+ makĩrutĩra Jehova magongona ma njino na magongona mangĩ.
16 Rĩrĩa athani arĩa atano a Afilisti moonire ũguo, magĩcoka Ekironi mũthenya o ro ũcio. 17 Na rĩrĩ, ĩno nĩyo mĩhiano ya thahabu ĩhaana mũrimũ wa kũimba* ĩrĩa yatũmirũo kũrĩ Jehova nĩ Afilisti ĩrĩ igongona rĩa mahĩtia:+ ũmwe nĩ ũndũ wa Ashidodi,+ ũmwe nĩ ũndũ wa Gaza, ũmwe nĩ ũndũ wa Ashikeloni, ũmwe nĩ ũndũ wa Gathu,+ na ũmwe nĩ ũndũ wa Ekironi.+ 18 Mũigana wa mĩhiano ĩyo ya thahabu ĩhaana mbĩa waringaine na mũigana wa matũũra mothe ma Afilisti marĩa maarĩ ma athani acio atano—matũũra marĩa maarĩ na ũgitĩri hamwe na icagi cia kũrĩa gũtaarĩ kũirigĩre.
Narĩo ihiga rĩu inene rĩrĩa maaigĩrĩire Ithandũkũ rĩa Jehova rĩkoragwo rĩrĩ ũira nginyagia ũmũthĩ mũgũnda-inĩ wa Joshua Mũbethi-shemeshi. 19 No Ngai akĩũraga arũme a Bethi-shemeshi, nĩ ũndũ wa kũrora Ithandũkũ rĩa Jehova. Ooragire arũme 50,070* gatagatĩ-inĩ ka andũ, nao andũ makĩambĩrĩria gũcakaya tondũ Jehova nĩ aamoragĩte njũragano yarĩ nene.+ 20 Nĩ ũndũ ũcio andũ a Bethi-shemeshi makĩũria atĩrĩ: “Nũũ ũkũhota kũrũgama mbere ya Jehova, Ngai ũyũ mũtheru ũũ,+ na egũthiĩ kũrĩ ũ nĩgetha atweherere?”+ 21 Magĩgĩtũma atũmwo kũrĩ aikari a Kiriathu-jearimu,+ makameere ũũ: “Afilisti nĩ macokia Ithandũkũ rĩa Jehova. Ikũrũkai mũũke mwambate narĩo.”+