ITHOMO RĨA 30
Endwa Aku Arĩa Makuĩte No Macoke Muoyo!
Gĩkuũ nĩ gĩtũmaga tũcakae na tũgĩe na kĩeha mũno. Nĩkĩo Bibilia ĩtaga gĩkuũ thũ. (1 Akorintho 15:26) Thĩinĩ wa ithomo rĩa 27 nĩ werutire atĩ Jehova nĩ arĩtooria thũ ĩyo. No gũgaathiĩ atĩa harĩ andũ arĩa makuĩte? Thĩinĩ wa ithomo rĩrĩ, nĩ ũkwĩruta makĩria ũhoro wĩgiĩ kĩĩranĩro kĩngĩ Jehova atwĩrĩire gĩa gũgaacokia muoyo andũ bilioni nyingĩ nĩguo makenere ũtũũro tene na tene. Jehova nĩ akaamariũkia! Hihi ũndũ ta ũcio no ũhoteke? Hihi makaariũkio matũũre igũrũ kana gũkũ thĩ?
1. Jehova eranĩire gwĩka atĩa harĩ endwa aitũ arĩa makuĩte?
Jehova nĩ eriragĩria kũriũkia andũ arĩa makuĩte. Ayubu aarĩ na ma atĩ Ngai ndangĩariganĩirũo nĩwe akua. Eerire Ngai ũũ: “Nĩ ũgeetana, na niĩ nĩ ngaagwĩtĩka [ndĩ mbĩrĩra-inĩ].”—Thoma Ayubu 14:13-15.
2. Tũmenyaga atĩa atĩ andũ arĩa makuĩte no mariũkio?
Rĩrĩa Jesu aarĩ gũkũ thĩ, Ngai nĩ aamũheire hinya wa kũriũkia andũ. Jesu nĩ aariũkirie kairĩtu ka mĩaka 12 na mũriũ wa mũtumia wa ndigwa. (Mariko 5:41, 42; Luka 7:12-15) Thutha ũcio Lazaro, ũrĩa warĩ mũrata wa Jesu nĩ aakuire. O na gũtuĩka Lazaro aaniinĩte thikũ inya kuuma akua, Jesu nĩ aamũriũkirie. Thutha wa Jesu kũhoya Ngai, aanĩrĩire na mũgambo mũnene arorete mbĩrĩra-inĩ akiuga: “Lazaro, uma!” Nake “mũndũ ũcio warĩ mũkuũ akiuma” arĩ muoyo. (Johana 11:43, 44) Ta hũũra mbica ũrĩa andũ a famĩlĩ ya Lazaro o hamwe na arata ao maakenire!
3. Kũrĩ na kĩĩrĩgĩrĩro kĩrĩkũ harĩ endwa aku arĩa makuĩte?
Bibilia ĩranĩire ũũ: “Nĩ gũkaariũkio andũ.” (Atũmwo 24:15) Andũ arĩa maariũkirio nĩ Jesu matiathiĩte igũrũ. (Johana 3:13) Jesu aamariũkirie akĩmacokia muoyo o gũkũ thĩ, na nĩ maakenire nĩ ũndũ ũcio. Ũndũ ũmwe na ũcio, ica ikuhĩ Jesu nĩ arĩriũkia andũ bilioni nyingĩ nĩguo makenere ũtũũro tene na tene thĩinĩ wa Paradiso gũkũ thĩ. Ooigire atĩ arĩa othe makoragwo kĩririkano-inĩ kĩa Ngai nĩ makaariũkio, o na angĩkorũo gũtirĩ mũndũ ũririkanaga atĩ nĩ maatũũraga.—Johana 5:28, 29.
THUTHURIA MAKĨRIA
Reke tũthuthurie tuone ũira kuuma Bibilia-inĩ atĩ andũ arĩa makuĩte no mariũkio, na nĩ makaariũkio. Thutha ũcio twĩrute ũrĩa kĩĩranĩro kĩa andũ kũriũkio kĩngĩkũũmĩrĩria na gĩkũhe kĩĩrĩgĩrĩro.
4. Jesu nĩ oonanirie atĩ no ahote kũriũkia andũ arĩa makuĩte
Wĩrute makĩria ũhoro wĩgiĩ ũrĩa Jesu eekĩire mũratawe Lazaro. Thomai Johana 11:14, 38-44, mũcoke mwarĩrĩrie ciũria ici:
Tũmenyaga atĩa atĩ nĩ ma Lazaro nĩ aakuĩte?—Rora mũhari wa 39.
Korũo Lazaro nĩ aathiĩte igũrũ-rĩ, hihi nĩ ũkuona ta Jesu angĩamũcokirie muoyo gũkũ thĩ?
5. Nĩ gũkaariũkio andũ aingĩ!
Thomai Thaburi 37:29, mũcoke mwarĩrĩrie kĩũria gĩkĩ:
Andũ bilioni nyingĩ arĩa makaariũkio magaatũũra kũ?
Jesu nĩ akaariũkia andũ angĩ aingĩ, to arĩa maathathayagia Jehova. Thomai Atũmwo 24:15, mũcoke mwarĩrĩrie kĩũria gĩkĩ:
Ũrerirĩria gũkoona ũ ariũkĩtio?
Ta wĩcirie ũndũ ũyũ: Jesu no ahote kũriũkia mũndũ na njĩra hũthũ o ta ũrĩa mũciari angĩhota gũũkĩria mwana wake ũrĩ toro
6. Kĩĩranĩro kĩa andũ kũriũkio no gĩkũũmĩrĩrie na gĩkũhe kĩĩrĩgĩrĩro
Rũgano rwa Bibilia rwa kairĩtu ka Jairo nĩ rũmĩrĩirie andũ aingĩ arĩa makoragwo na kĩeha gĩa gũkuĩrũo na rũkamekĩra hinya. Thomai rũgano rũu rwa ma thĩinĩ wa Luka 8:40-42, 49-56.
Jesu atanariũkia kairĩtu ka Jairo eerire ithe wa kairĩtu kau ũũ: “Ndũgetigĩre, no gĩa na wĩtĩkio.” (Rora mũhari wa 50.) Kĩĩrĩgĩrĩro kĩa andũ kũriũkio kĩngĩgũteithia atĩa . . .
rĩrĩa wakuĩrũo nĩ mũndũ wendete?
rĩrĩa muoyo waku ũrĩ ũgwati-inĩ?
Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
Kĩĩrĩgĩrĩro kĩa andũ kũriũkio kĩũmĩrĩirie aciari a Phelicity atĩa na gĩkamekĩra hinya?
ANDŨ AMWE MOIGAGA: “Nĩ hinya gwĩtĩkia atĩ andũ nĩ makaariũkio matũũre rĩngĩ.”
Wee ũngiuga atĩa?
Nĩ rĩandĩko rĩrĩkũ ũngĩhũthĩra kuonia mũndũ atĩ andũ nĩ makaariũkio?
ŨRĨA TWERUTA
Bibilia ĩranĩire atĩ andũ bilioni nyingĩ arĩa makuĩte nĩ makaariũkio. Jehova nĩ endaga magaatũũra rĩngĩ na nĩ aheete Jesu hinya wa gũkaamariũkia.
Ciũria cia gũcokera
Jehova na Jesu maiguaga atĩa igũrũ rĩgiĩ kũriũkia andũ arĩa makuĩte?
Andũ bilioni nyingĩ arĩa makaariũkio magaatũũra igũrũ kana gũkũ thĩ? Ũngĩcokia ũguo nĩkĩ?
Nĩ kĩĩ kĩratũma ũkorũo na ma atĩ endwa aku arĩa makuĩte no mariũkio?
RIKĨRA
Thoma wone maũndũ ũngĩka nĩguo ũhote kũhiũrania na kĩeha gĩa gũkuĩrũo.
Hihi motaaro ma Bibilia no mateithie mũndũ ũrĩ na kĩeha gĩa gũkuĩrũo?
Ciana ingĩhota atĩa kũhiũrania na kĩeha gĩa gũkuĩrũo nĩ mũndũ ciendete?
Hihi nĩ kũrĩ andũ makaariũkio mathiĩ igũrũ? Nĩa matakariũkio?