O Nĩa?
NĨ WENDI wa Aira a Jehova mũmenyane nao makĩria. Wahota gũkorũo ũcemanĩtie nao itũũra-inĩ kana kũrutithania wĩra nao o na kana mĩhango-inĩ ya mũthenya o mũthenya. Wahota gũkorũo ũmonete njĩra-inĩ makĩheana magathĩti kũrĩ ehĩtũkĩri. O na hihi wahota gũkorũo warĩtie nao gwaku mũrango-inĩ.
Mũno makĩria, wendi wa Aira a Jehova nĩ maũndũ maku magaacĩre. Mekwenda matuĩke aarata aku na makũmenyithie o nĩa, wĩtĩkio wao, ithondeka rĩao, na ũrĩa meciragia ũhoro wa andũ na thĩ ĩrĩa tũtũũraga. Nĩguo mahingie ũũ, nĩ magũthondekeire kabuku gaka.
Na njĩra nyingĩ Aira a Jehova no ta andũ arĩa angĩ. Makoragwo na mathĩna o ma ũndũũire, ta mbeca, mĩrimũ, na gũthuthĩka. Rĩmwe na rĩmwe nĩ mahĩtagia, tondũ ti akinyanĩru-rĩ, ũguo matirĩ na ũhoti wa kwaga kũhĩtia. No ningĩ nĩ mageragia kwĩruta kuuma kũrĩ maũndũ marĩa moonete na ningĩ makeruta Biblia na kĩo nĩguo marũnge maũndũ mao. Nĩ merutĩire gwĩka wendi wa Ngai, na makeheana kũhingia wĩrutĩri ũcio. Ikĩro-inĩ ciao ciothe macaragia ũtongoria wao kuuma Kiugo-inĩ kĩa Ngai na roho wake mũtheru.
Ũndũ wa bata mũno harĩ o nĩ atĩ wĩtĩkio wao ũkorũo uumĩte Biblia-inĩ no ti matũhũhũ-inĩ ma andũ kana morutani ma ndini. Meiguaga ta mũtũmwo Paulo rĩrĩa eyaririe atongoretio nĩ roho wa Ngai ũũ: “Ngai arotuĩka no wa ma, na mũndũ o wothe atuĩke wa maheni.” (Aroma 3:4) Ha ũhoro wa ma ĩrĩa ĩrutanagwo nĩ Biblia-rĩ, Aira metĩkĩtie na hinya njĩra ĩrĩa ya rũmĩrĩirũo nĩ andũ a Beroia rĩrĩa maiguire mũtũmwo Paulo akĩhunjia: “Nĩ gũkorũo nĩmetĩkagĩra Ũhoro meendeire na ngoro, magĩtuĩragia Maandĩko mũthenya o mũthenya, mamenye kana maũndũ macio meeranagwo nĩguo matariĩ.” (Atũmwo 17:11) Aira a Jehova metĩkĩtie atĩ morutani mothe ma ndini no mũhaka metĩkanie na igerio rĩrĩ rĩa Maandĩko matheru, kana ũrutani nĩ wao kana nĩ wa mũndũ ũngĩ. Megũkũũria na gũkũringĩrĩria wĩke ũguo rĩrĩa ũrĩtereta nao.
Kuumania na ũũ tũkuona atĩ Aira a Jehova meetĩkĩtie Biblia ĩrĩ Kiugo kĩa Ngai. Meetĩkĩtie atĩ mabuku mayo mothe 66 matongoretio nĩ roho wa Ngai na rũgano rwayo nĩ rwama. Kĩrĩa kaingĩ gĩĩtagwo Kĩrĩkanĩro Kĩerũ o magĩtaga Maandĩko ma Gĩkristiano ma Kĩngiriki,na kĩo Kĩrĩkanĩro gĩa Tene magagĩta Maandĩko ma Kĩhibirania. Metĩkanĩtie na mabuku macio merĩ, Maandĩko ma Kĩngiriki na Kĩhibirania ũrĩa mathomekaga tiga atĩ ũkorirũo nĩ mũhaano kana ngerekano. Mataũkĩirwo atĩ moorathi maingĩ ma Biblia nĩ marĩkĩtie kũhingio, mangĩ nĩmarathiĩ na mbere kũhingio, na mangĩ metereire kũhingio.
RĨĨTWA RĨAO
Atĩ Aira a Jehova? Ĩĩ ni, ũguo nĩguo meĩĩtaga. Nĩ rĩĩtwa rĩtaũrĩte, rĩkĩonania atĩ maheanaga ũira igũrũ rĩa Jehova, Ũngai wake, na matanya make. “Ngai,” “Mwathani,” na “Mũũmbi,”—ta “Presidenti,” “Mũthamaki,” na “Jenerũ,”—Nĩ marĩtwa maheetwo andũ aingĩ me riri. Ĩndĩ Jehova nĩ rĩĩtwa kĩũmbe na rĩhũthagĩrũo harĩ Ngai mwene hinya wothe na Mũũmbi wa igũrũ na thĩ. Ũũ wonanĩtio thĩinĩ wa Thaburi 83:18: “Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.”
Rĩĩtwa Jehova (kana Yahweh, ta ũrĩa Jerusalem Bible ya a Gatoreki na athomi angĩ marĩgwetaga) rĩonekaga hakuhĩ maita 7,000 thĩinĩ wa Maandĩko ma Kĩhibirania ma mbere. Biblia nyingĩ itirĩonanagia ũguo no ihũthagĩra “Ngai” kana “Mwathani” ithenya rĩa rĩo. No ningĩ, o na thĩinĩ wa Biblia icio-rĩ, mũndũ no ahote kũmenya harĩa rĩandĩko rĩa Kĩhibirania rĩa mbere rĩhũthĩrĩte rĩĩtwa Jehova tondũ thiĩnĩ wa kũndũ kũingĩ rĩandĩkĩtwo na ndemwa nene ta: NGAI, MWATHANI. Mabuku maingĩ ma kĩĩrĩu mahũthagĩra rĩĩtwa Jehova kana Yahweh. Na nĩ kĩo Biblia ya Gĩkũyũ ĩthomagwo thĩinĩ wa Isaia 42:8, “Niĩ nĩ niĩ Jehova; rĩu nĩrĩo rĩĩtwa rĩakwa.”
Rĩĩtwa rĩao rĩa maandĩko rĩrĩa Aira a Jehova mahũthagĩra rĩonekaga thĩinĩ wa Isaia 43. Hau-rĩ, thĩ yothe ĩronekana ta ithako rĩrĩ gĩcirĩro-inĩ: ngai cia ndũrĩrĩ irorio irehe aira acio monanie ũrĩa meetuaga nĩ athingu kana maigwe ũira wa mwena wa Jehova metĩkĩre nĩ wa ma. Hau Jehova areera andũ ake ũũ: “Inyuĩ nĩ inyuĩ aira akwa, ũguo nĩguo Jehova ekuuga, o na nĩ inyuĩ ndungata ciakwa iria ’thurĩte, nĩ getha mũʼmenye na mũnjĩtĩkie, na mũmenye atĩ nĩ niĩ we; mbere yakwa-rĩ gũtiarĩ Ngai ũngĩ wombĩtwo, o na ningĩ thutha wakwa gũtikagĩa ũngĩ. Niĩ o niĩ-rĩ, nĩ niĩ Jehova, na thengia o niĩ, gũtirĩ mũhonokania ũngĩ.”—Isaia 43:10, 11.
Jehova Ngai aarĩ na aira aake mĩaka ngiri nyingĩ Jesu atanaciarũo gũkũ thĩ. Thutha wa Ahibirania gĩcunjĩ kĩa 11 kũgweta amwe a andũ arĩa athingu-rĩ, Ahibirania 12:1 riugĩĩte ũũ: “HAKĨRĨ ũguo-rĩ, kũona atĩ nĩtũthiũrũrũkĩirio nĩ aira aingĩ ũũ, mahaana ta itu rĩnene, o na ithuĩ nĩtwĩaũre kĩrĩa gĩothe gĩtũritũhĩire, o na wĩhia ũrĩa ũtũrigicaga mũno, tũgĩtengʼere kĩhĩtahĩtano-inĩ kĩrĩa tũigĩirũo mbere iitũ tũkirĩrĩirie.” Jesu ogire mbere ya Pontio Pilato: “Nĩkĩo ndaciarirũo, na nĩkĩo njũkĩte gũkũ thĩ, atĩ nduĩke mũira wa ũhoro-ũrĩa-wa-ma.” Eetagwo: “Mũira ũrĩa mwĩhokeku na ũrĩa wa ma.” (Johana 18:37; Kũguũrĩrio 3:14) Jesu eerire arutwo aake ũũ: “No nĩmũrĩheo hinya, Roho Mũtheru aarĩkia gũkinya igũrũ rĩanyu: na mũtuĩke aira akwa o Jerusalemu na Judea guothe, na Samaria, o na kinya ituri ciothe cia thĩ.”—Atũmwo 1:8.
Nĩ ũndũ ũcio-rĩ, ũmũthĩ andũ 6,000,000 arĩa maraheana ũhoro ũrĩa mwega wa Ũthamaki wa Jehova kũgerera kũrĩ Kristo Jesu thĩinĩ wa mabũrũri makĩria ya 230 meiiguaga maiganĩire kwĩĩta Aira a Jehova.
[Kohoro karatathi ka 4]
Meheanĩte gwĩka wendi wa Ngai
[Kohoro karatathi ka 4]
Metĩkĩtie Biblia nĩ Kiugo kĩa Ngai
[Kohoro karatathi ka 4]
Rĩĩtwa ta ũrĩa rĩtanĩtio na ithako rĩa icirĩro
[Mbica karatathi ka 5]
Aira makĩria ya 6,000,000 thĩinĩ wa mabũrũri makĩria 230
[Mbica karatathi ka 3]
Marĩ bata nawe
[Mbica karatathi ka 5]
Rĩĩtwa rĩa Ngai na Kĩhibirania gĩa tene