Aira a Jehova Metĩkĩtie Atĩa?

“Tũkwenda kũigua harĩ wee ũrĩa ũgwĩciria. Tondũ ha ũhoro wa thiritũ ĩo, nĩtũũĩ atĩ nĩĩthahagĩrĩrio kũndũ guothe.” (Atũmwo 28:22) Atongoria acio a mũingĩ a mũciĩ wa Roma wa karine ya mbere nĩmaaigire kĩonereria kĩega. O mendire kaba meiguĩre kuumanagia na kĩhumo kĩa ũhoro, gũkĩra kũigua tu kuumanagia na athahĩrĩria a na nja.

O toguo-rĩ, ũmũthĩ kaingĩ Aira a Jehova nĩmacambagio, na nĩ mahĩtia kwĩhoka atĩ no ũmenye ũhoro wa ma ũmakoniĩ kuumanagia na ihumo iria imacambagia. Nĩũndũ ũcio twĩ na gĩkeno gũgũtaarĩria mamwe ma maũndũ marĩa manene twĩtĩkĩtie.

Bibilia, Jesu Kristo, na Ngai

Nĩtwĩtĩkĩtie atĩ “ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni.” (2 Timotheo 3:16) Na o na gũtuĩka atĩ nĩkũrĩ amwe makoretwo makiuga atĩ ithuĩ ti Akristiano-rĩ, ũguo ti ma o na hanini. Nĩtwĩtĩkanagia biũ-biũ na ũira ũyũ wa mũtũmwo Petero ũkoniĩ Jesu Kristo: “Gũtirĩ rĩĩtwa rĩngĩ rĩanaheanwo gũkũ thĩ kũrĩ andũ rĩngĩagĩrĩra rĩa gũtũhonokia.”—Atũmwo 4:12.

No rĩrĩ, kuona atĩ Jesu nĩoigire atĩ we nĩ “Mũrũ wa Ngai” na atĩ ‘Ithe witũ nĩwe waandekirie,’ Aira a Jehova metĩkĩtie atĩ Ngai nĩ mũnene kũrĩ Jesu. (Johana 10:36; 6:57) Jesu we mwene nĩoimbũrire ũũ: “Ithe witũ nĩ mũnene kũrĩ niĩ.” (Johana 14:28; 8:28) Kwoguo tũtiĩtĩkĩtie atĩ Jesu nĩaiganaine na Ithe, ta ũrĩa ũrutani wa Ũtatũ uugaga. Handũ ha ũguo twĩtĩkĩtie atĩ we ombirũo nĩ Ngai na atĩ we nĩ mũnyinyi kũrĩ We.—Akolosai 1:15; 1 Akorintho 11:3.

Thĩinĩ wa rũthiomi rwa Gĩkũyũ, rĩĩtwa rĩa Ngai nĩ Jehova. Bibilia yugaga: “Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” (Thaburi 83:18) Agĩtĩkania na uuge ũcio-rĩ, Jesu nĩekĩrĩire rĩĩtwa rĩa Ngai hinya mũno, akĩruta arũmĩrĩri ake mahoyage: “Ithe witũ wĩ Igũrũ, rĩĩtwa rĩaku nĩrĩamũrũo.” Na o nake nĩaahoire kũrĩ Ngai ũũ: “Nĩnguũrĩirie andũ rĩĩtwa rĩaku arĩa waʼheire gũkũ thĩ.”—Mathayo 6:9; Johana 17:6.

Aira a Jehova metĩkĩtie atĩ maagĩrĩirũo gũkorũo matariĩ ta Jesu ũhoro-inĩ ũkoniĩ kũguũrĩria andũ arĩa angĩ rĩĩtwa na mĩoroto ya Ngai. Nĩkĩo twĩtagwo Aira a Jehova tondũ twĩgerekanagia na Jesu, “mũira ũrĩa mwĩhokeku.” (Kũguũrĩrio 1:5; 3:14) Kwagĩrĩire mũno-rĩ, Isaia 43:10 rĩĩraga andũ arĩa marũgamĩrĩire Ngai ũũ: “Inyuĩ nĩ inyuĩ aira akwa, ũguo nĩguo Jehova ekuuga, o na nĩ inyuĩ ndungata ciakwa iria ’thurĩte.”

Ũthamaki wa Ngai

Jesu nĩaarutire arũmĩrĩri ake mahoyage, “Ũthamaki waku ũũke,” na nĩaatuire Ũthamaki ũcio mũtwe wa ũrutani wake. (Mathayo 6:10; Luka 4:43) Aira a Jehova metĩkĩtie atĩ Ũthamaki ũcio nĩ thirikari kũna kũna kuuma igũrũ, na atĩ ĩgaathaga thĩ, na atĩ Jesu Kristo nĩwe ũtuĩtwo Mũthamaki wayo ũtangĩoneka. “Naguo wathani ũkagĩa ciande-inĩ ciake,” nĩguo Bibilia yugaga. “Naguo ũhoro wa ũrĩa wathani wake ũgaikara ũkĩnenehaga, o na thayũ-rĩ, ndũrĩ hingo ũkehera.”—Isaia 9:6, 7.

No rĩrĩ, Jesu Kristo towe wiki ũgaakorũo arĩ mũthamaki wa thirikari ya Ngai. Nĩagakorũo na aathani angĩ aingĩ igũrũ arĩa makagwatanĩra wathani hamwe nake. Mũtũmwo Paulo aandĩkire atĩ “tũngĩkirĩrĩria-rĩ, nĩtũgacoka gũthamaka hamwe nake.” (2 Timotheo 2:12) Bibilia yonanagia atĩ andũ arĩa mariũkagio nĩguo magaathane hamwe na Kristo igũrũ mũigana wao wĩ na gĩthimo kĩa andũ “ngiri igana rĩa ngiri mĩrongo ĩna na inya, arĩa maagũrĩtwo thĩ makaamũranio nayo.”—Kũguũrĩrio 14:1, 3.

Hatirĩ nganja atĩ thirikari o yothe no nginya ĩkorũo ĩrĩ na raiya ayo, na Aira a Jehova metĩkĩtie atĩ mbirioni nyingĩ cia andũ thengia aathani acio a igũrũ, nĩmakaamũkĩra muoyo wa tene na tene. O marigĩrĩrio-inĩ, thĩ ĩgarũrĩtwo igatuwo Paradaisi thaka-rĩ, ĩgaakorũo ĩiyũirũo nĩ raiya acio maagĩrĩire a Ũthamaki wa Ngai, othe magĩathĩkĩra wathani wa Kristo na aathani agwatanĩri hamwe nake. Kwoguo Aira a Jehova me na ma biũ atĩ thĩ ndĩrĩ hĩndĩ ĩkanaangwo na atĩ kĩĩranĩro gĩkĩ kĩa Bibilia nĩgĩkahingio: “Arĩa athingu nĩo makagaya thĩ, na gũtũũra mamĩtũũre o nginya tene.”—Thaburi 37:29; 104:5.

No Ũthamaki wa Ngai ũgoka atĩa? Nĩ na njĩra ya andũ othe gwathĩkĩra meyendeire thirikari ya Ngai? Ũtiganu na ũguo, Bibilia yonanagia wega biũ atĩ gũũka kwa Ũthamaki gũkabatarania Ngai aingĩrĩre maũndũ ma gũkũ thĩ: “Nĩguo Ngai-wa-Igũrũ akahanda ũthamaki ũrĩa ũtagacoka gũthario o rĩ, o rĩ, . . . no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”—Danieli 2:44.

Ũthamaki wa Ngai ũgoka rĩ? Kũringana na morathi ma Bibila marĩa marahingio rĩu, Aira a Jehova metĩkĩtie atĩ ũrĩũka o narua. Nĩtũgũgũkaribithia ũcũranie mamwe ma morathi marĩa meranĩire maũndũ ma “matukũ marĩa ma kũrigĩrĩria” ma mũtabarĩre ũyũ mũũru wa maũndũ. Maandĩkĩtwo thĩinĩ wa Mathayo 24:3-14; Luka 21:7-13, 25-31; na 2 Timotheo 3:1-5.

Tondũ ithuĩ ‘nĩtwendete Jehova Ngai witũ na ngoro, muoyo, meciria na hinya wothe, o na andũ a itũũra riitũ o ta ũrĩa twĩendete-rĩ,’ tũtigayũkanagio nĩ ũrũrĩrĩ, rangi wa gĩkonde, na ngathĩ mũingĩ-inĩ. (Mariko 12:30, 31) Nĩtũũĩkaine kũndũ guothe nĩũndũ wa wendani ũrĩa wonekaga gatagati-inĩ ka Akristiano ariũ a ithe witũ arĩa marĩ ndũrĩrĩ-inĩ ciothe. (Johana 13:35; 1 Johana 3:10-12) Kwoguo tũrũmagia mũrũgamo wa kwaga kwĩingĩria o na hanini ũteti-inĩ wa ndũrĩrĩ icio. Tũgeragia kwĩhanania na arutwo a tene a Jesu, arĩa we oigire ũhoro wao ũũ: “O ti a gũkũ thĩ, o ta ũguo niĩ na niĩ itarĩ wa gũkũ thĩ.” (Johana 17:16) Twĩtĩkĩtie atĩ gũikara twĩyeheranĩtie na thĩ, nĩ kuuga atĩ tũtheme mĩthiĩre mĩũru ĩrĩa ĩmenyeretwo mũno ũmũthĩ, o hamwe na kũhenania, kũiya, ngomanio cia arĩa matahikanĩtie, ũtharia, ngomanio cia arũme kwa arũme na andũ-anja kwa andũ-anja, ũhũthĩri mũũru wa thakame, ũthathayia wa mĩhianano, na maũndũ mangĩ ta macio marĩa makananie nĩ Bibilia.—1 Akorintho 6:9-11; Aefeso 5:3-5; Atũmwo 15:28, 29.

Kĩĩrĩgĩrĩro kĩa Mahinda Marĩa Mokĩte

Aira a Jehova metĩkĩtie atĩ muoyo ũyũ twĩ naguo rĩu thĩinĩ wa thĩ ĩno toguo muoyo wiki tu. Twĩtĩkĩtie atĩ Jehova aatũmire Jesu Kristo oke gũkũ thĩ aite thakame ya muoyo wake ĩtuĩke ũkũũri nĩgetha andũ magĩe na mũrũgamo wa ũthingu harĩ Ngai na maamũkĩre muoyo wa tene na tene thĩinĩ wa mũtabarĩre mwerũ wa maũndũ. O ta ũrĩa mũtũmwo ũmwe wa Jesu oigire: ‘Nĩtũrĩkĩtie gũtuwo athingu nĩ ũndũ wa thakame yake.’ (Aroma 5:9; Mathayo 20:28) Aira a Jehova marĩ na ngatho mũno harĩ Ngai na Mũrũwe nĩũndũ wa mũbango ũcio wa ũkũũri ũrĩa ũhotithagia kũgĩe na muoyo mahinda-inĩ marĩa mokĩte.

Aira a Jehova nĩ marĩ na mwĩhoko mũrũmu biũ wa muoyo wa mahinda marĩa mokĩte, mũthingi waguo nĩ kũriũkio kuuma kũrĩ akuũ rungu rũa Ũthamaki wa Ngai. Twĩtĩkĩtie, o ta ũrĩa Bibilia ĩrutanaga, atĩ rĩrĩa mũndũ aakua gũkorũo muoyo gwake gũthiraga biũ, atĩ “mũthenya o ro ũcio mathugunda make [no] magathira.” (Thaburi 146:3, 4; Ezekieli 18:4; Kohelethu 9:5) Mũthingi wa muoyo wa mahinda marĩa mokĩte wa arĩa akuũ nĩ kũririkanwo nĩ Ngai na ũndũ wa kũriũkio.—Johana 5:28, 29.

O na kũrĩ ũguo-rĩ, Aira a Jehova nĩ marĩ na mwĩhoko mũrũmu wa atĩ aingĩ arĩa marĩ muoyo ũmũthĩ nĩmakahonoka marĩ muoyo rĩrĩa Ũthamaki wa Ngai ũkanina thirikari iria irĩ kuo rĩu, na, o ta ũrĩa Nuhu na andũ a mũciĩ wake maahonokire hĩndĩ ya Kĩguũ, mathiĩ na mbere gwĩkenia na muoyo tene na tene thĩinĩ wa thĩ ĩrĩkĩtie gũtherio. (Mathayo 24:36-39; 2 Petero 3:5-7, 13) No twĩtĩkie atĩ kũhonokio kwĩhocetie harĩ kũhingia maũndũ marĩa Jehova aathanĩte o ta ũrĩa Bibilia yugaga: “Na thĩ nĩ gũthira ĩrathira . . . no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.”—1 Johana 2:17; Thaburi 37:11; Kũguũrĩrio 7:9, 13-15; 21:1-5.

Hatarĩ nganja-rĩ, gũtingĩhoteka tũtarĩrie haha mawĩtĩkio mothe ma Aira a Jehova, no nĩtũgũgũkaribithia wĩgĩĩre na ũhoro makĩria.

Tiga hakorirũo honanĩtio ũndũ ũngĩ, icunjĩ iria ikobetio irutĩtwo thĩinĩ wa The Bible in Kikuyu.

[Kohoro karatathi ka 4]

Twĩtagwo Aira a Jehova tondũ twĩgerekanagia na Jesu