5 Twagĩrĩirũo Kũhoya Rĩ na Twagĩrĩirũo Kũhoera Kũ?

HATARĨ nganja nĩ wĩyoneire atĩ ndini nyingĩ nĩ ciakaga nyũmba nene cia kũhoerũo na andũ makerũo thaa iria magĩrĩirũo kũhoya. No hihi Bibilia nĩ ĩtwĩraga harĩa twagĩrĩirũo kũhoera kana mathaa marĩa twagĩrĩirũo kũhoya?

Bibilia nĩ yonanagia atĩ kũrĩ mahinda twagĩrĩirũo kũhoya. Kwa ngerekano, hĩndĩ ĩmwe Jesu nĩ aacokeirie Ngai ngatho mbere ya kũrĩanĩra na arutwo ake. (Luka 22:17) Ningĩ rĩrĩa arutwo ake maagomanaga hamwe nĩ ũndũ wa ũthathaiya, nĩ maahoyaga hamwe. Na njĩra ĩyo, maathiaga na mbere gwĩka ũndũ wekagwo thunagogi-inĩ cia Kĩyahudi na hekarũ-inĩ thĩinĩ wa Jerusalemu. Ngai eendaga hekarũ ĩkorũo ĩrĩ “nyũmba ya mahoya harĩ ndũrĩrĩ ciothe.”—Mariko 11:17.

Hĩndĩ ĩrĩa ndungata cia Ngai ciagomana na ikahoya hamwe, mahoya mao nĩ maiguagwo. Angĩkorũo nĩ maraiguithanĩria ũndũ ũrĩa mahoya, na mahoya mao nĩ maratwarana na Maandĩko, Ngai nĩ akenagio nĩmo. Mahoya macio o na no matũme Ngai eke ũndũ atekũbangĩte kũwĩka. (Ahibirania 13:18, 19) Aira a Jehova nĩ mahoyaga hingo ciothe rĩrĩa magomana gũthathaiya hamwe. Nĩ tũrakũnyita ũgeni ũthiĩ Nyũmba-inĩ ya Ũthamaki ĩrĩa ĩrĩ hakuhĩ nawe nĩguo wĩiguĩre wee mwene mahoya mao.

O na kũrĩ ũguo, Bibilia ndĩonanagia atĩ harĩ handũ harĩa twagĩrĩirũo kũhoera kana ihinda rĩrĩa twagĩrĩirũo kũhoya. Thĩinĩ wa Bibilia, nĩ tũthomaga ũhoro wĩgiĩ ndungata cia Ngai ciahoeire kũndũ gũtiganĩte o na mahinda-inĩ matiganĩte. Jesu ooigire: “Rĩrĩa ũkũhoya, thiaga rumu yaku ya thĩinĩ, na thutha wa kũhinga mũrango, ũkahoya Ithe wanyu ũrĩa ũrĩ hitho-inĩ. Nake Ithe wanyu ũrĩa wonaga arĩ hitho-inĩ nĩ arĩkũrĩhaga.”—Mathayo 6:6.

Na githĩ ũndũ ũcio ti wa gwĩkĩra ngoro? No tũhoe Ngai ũrĩa mũnene igũrũ na thĩ ihinda o rĩothe tũrĩ hitho-inĩ na tũkorũo na ma atĩ nĩ egũtũigua. Nĩkĩo Jesu aacaragia mahinda ma gũkorũo arĩ wiki kaingĩ nĩgetha ahoe. Hĩndĩ ĩmwe nĩ aahũthĩrire ũtukũ mũgima akĩhoya Ngai, kwahoteka nĩguo amũteithie gũtua itua rĩarĩ rĩa bata mũno.—Luka 6:12, 13.

Bibilia nĩ yarĩtie ũhoro wĩgiĩ athuri na atumia angĩ maahoire rĩrĩa maacemanagia na maũndũ maritũ kana makĩenda gũtua matua maritũ. Amwe maahoire manĩrĩire na angĩ makĩhoya na ngoro. Rĩmwe nĩ maahoyaga marĩ gĩkundi na rĩngĩ marĩ oiki. Ũndũ wa bata nĩ atĩ nĩ maahoire. Ngai eraga ndungata ciake ũũ: “Hoyagai hingo ciothe.” (1 Athesalonike 5:17) Hingo ciothe nĩ akoragwo ehaarĩirie gũthikĩrĩria arĩa mekaga wendi wake. Na githĩ ũcio ti ũndũ wa gwĩkĩra ngoro mũno?

O na kũrĩ ũguo, thĩinĩ wa thĩ ĩno ĩiyũire nganja, andũ aingĩ nĩ meyũragia kana nĩ harĩ bata wa kũhoya. Kwoguo mũndũ no eyũrie: ‘Hihi mahoya no mandeithie?’