Hihi Wee nĩ Wĩhaarĩirie Kũgarũrĩra?
1. Mogarũrũku thĩinĩ wa thĩ matũmaga tũbatare gwĩka atĩa?
1 Thĩinĩ wa 1 Akorintho 7:31, Bibilia ĩringithanagia thĩ ĩno na mũthaako wĩna tabarĩra na athaki maraikara magĩcenjagia. Mogarũrũku thĩinĩ wa thĩ nĩ matũmaga tũbatare gũikara tũkĩgarũragĩra njĩra ciitũ cia kũhunjia, mĩbango itũ, na ũhoro ũrĩa tũrarĩrĩria. Hihi wee nĩ wĩhaarĩirie kũgarũrĩra?
2. Nĩguo tũtwarane na ithondeka rĩa Jehova-rĩ, nĩkĩ arĩ wega twĩtĩkagĩre mogarũrũku?
2 Njĩra Ciitũ cia Kũhunjia: Hĩndĩ ciothe kĩũngano gĩa Gĩkristiano gĩkoragwo kĩĩhaarĩirie kũgarũrĩra. Rĩrĩa Jesu aatũmire arutwo ake gũthiĩ kũhunjia rĩa mbere, aamerire matigakuue irio kana mbeca mondo-inĩ ciao. (Mat. 10:9, 10) O na kũrĩ ũguo, thutha ũcio nĩ aamaheire ũtaaro ngũrani na ũcio nĩ gũkorũo nĩ mangĩacemanirie na moritũ na ningĩ tondũ nĩ mangĩathire kũhunjia icigo-inĩ ingĩ cia kũraya. (Luk. 22:36) Ihinda-inĩ rĩa mĩaka igana rĩmwe, ithondeka rĩa Jehova rĩanahũthĩra njĩra ngũrani kũhunjia ta kũgerera kandi cia kũruta ũira, tabarĩra cia redio, na ngaari cia ikeero kũringana na ũndũ ũrĩa wabataranagia. Tondũ andũ aingĩ mationekaga mĩciĩ-inĩ yao mahinda-inĩ maya, nĩ tũrekĩrũo ngoro atĩ o na tũkĩhunjagia nyũmba kwa nyũmba tũhunjie kũndũ kwa mũingĩ na rĩrĩa mweke weyumĩria. Ningĩ nĩ tũrekĩrũo ngoro tũhunjagie nyũmba kwa nyũmba hwaĩ-inĩ, angĩkorũo andũ gĩcigo-inĩ giitũ marutaga wĩra mũthenya. Hihi wee nĩ ũratwarana na ithondeka rĩa Jehova ũhoro-inĩ wĩgiĩ mogarũrũku marĩa rĩreka?—Ezek. 1:20, 21.
3. Kũgarũrĩra gũtũteithagia atĩa kũgĩa na moimĩrĩro mega makĩria gĩcigo-inĩ giitũ?
3 Ũhoro wa Kwarĩrĩria: Hihi nĩ ũndũ ũrĩkũ kahinda-inĩ gaka ũrathĩnia andũ gĩcigo-inĩ kĩanyu? Hihi nĩ ũtũũro kũritũha? Nĩ mathĩna ma famĩlĩ? Nĩ mbaara? Nĩ wega kũmenya maũndũ marĩa marathĩnia andũ mahinda-inĩ maya gĩcigo-inĩ giitũ nĩguo tũhaarĩrie ũhoro ũrĩa ũngĩmaguna. (1 Kor. 9:20-23) Rĩrĩa ene nyũmba moiga ũndũ mũna ũramathĩnia-rĩ, na githĩ ti wega kũgarũrĩra tũwarĩrĩrie handũ ha kũmacokeria igũrũ igũrũ tũgacoka tũgathiĩ na mbere kwaria ũhoro ũrĩa tũkũhaarĩirie?
4. Nĩkĩ nĩ twagĩrĩirũo kũgarũragĩra o na ihenya?
4 Ica ikuhĩ “mũtabarĩre” ũyũ wa thĩ ĩno nĩ ũgũthira, na mĩnyamaro ĩrĩa mĩnene yambĩrĩrie. “Mahinda marĩa matigarĩte nĩ maniini.” (1 Kor. 7:29, The Holy Bible in Gĩkũyũ Language) Nĩ ũndũ ũcio-rĩ, na githĩ ti ũndũ wa bata kũgarũragĩra na tũgeka ũguo narua nĩgetha tũkorũo na moimĩrĩro mega ihinda-inĩ inini rĩrĩa rĩtigarĩte!