GĨCUNJĨ GĨA 6
Andũ Arĩa Mahunjagia—Ahunjia Merutagĩra Meyendeire
1, 2. Nĩ wĩra ũrĩkũ mũnene warathirũo nĩ Jesu, na nĩ kĩũria kĩrĩkũ kĩa bata kĩreyumĩria?
KAINGĨ atongoria a gĩũteti nĩ meranagĩra maũndũ no makaaga kũmahingia. O na arĩa makoragwo na wendi mwega no maremwo nĩ kũhingia ciĩranĩro ciao. Ngũrani nao, Mũthamaki wa Kĩĩmesia Jesu Kristo nĩ ahingagia ciĩranĩro ciake.
2 Thutha wa Jesu gũtuĩka Mũthamaki mwaka wa 1914, nĩ eehaarĩirie kũhingia ũrathi aarathĩte mĩaka ta 1,900 mbere ĩyo. Kahinda kanini Jesu atanakua, aarathire ũũ: “Ũhoro-ũyũ-mwega wa Ũthamaki nĩũkahunjio thĩ yothe.” (Mat. 24:14) Kũhinga gwa ciugo icio kũngĩgaakorũo kũrĩ gĩcunjĩ gĩa kĩmenyithia gĩa kuonania atĩ nĩ ambĩrĩirie gwathana. No nĩ harĩ kĩũria kĩa bata kĩreyumĩria: Mũthamaki angĩkahota atĩa kũgĩa na mbũtũ ya ahunjia merutĩire matukũ-inĩ ma kũrigĩrĩria, mahinda marĩa mangĩgakorũo na andũ eendi na matarĩ na ũngai? (Mat. 24:12; 2 Tim. 3:1-5) Nĩ tũrabatara kũmenya macokio ma kĩũria kĩu tondũ ithuothe tũrĩ Akristiano a ma nĩ twagĩrĩirũo kũhunjia.
3. Nĩ ũũma ũrĩkũ Jesu aarĩ naguo, na nĩ kĩĩ gĩatũmire agĩe na ũũma ũcio?
3 Ta rora rĩngĩ ciugo icio cia ũrathi wa Jesu. Hihi ciugo ‘nĩ ũkahunjio’ nĩ ironania ũũma wa ũndũ ũcio? Hatarĩ nganja nĩ ironania! Jesu aarĩ na ma atĩ nĩ angĩagĩire na andũ a kũmũnyita mbaru matukũ-inĩ ma kũrigĩrĩria. Nĩ kĩĩ gĩatũmire agĩe na ũũma ũcio? Nĩ tondũ wa gũikarania na Ithe. (Joh. 12:45; 14:9) Atanoka gũkũ thĩ, Jesu nĩ eeyoneire ũrĩa Jehova ateekagĩrĩra nganja wĩrutĩri wa ndungata ciake. Reke tuone ũrĩa Jehova onanirie ũndũ ũcio.
“Kĩrĩndĩ Gĩaku Gĩkerehage o na Mwĩendero”
4. Nĩ wĩra ũrĩkũ Jehova oririe Aisiraeli manyite mbaru, na maaiyũkirie atĩa ũndũ ũcio?
4 Ta ririkana ũrĩa gwathiire rĩrĩa Jehova eerire Musa aake hema ĩrĩa yarũgamagĩrĩra ũthathaiya wa Ngai thĩinĩ wa Isiraeli. Akĩhũthĩra Musa, Jehova nĩ oririe andũ othe manyite mbaru wĩra ũcio. Musa aameerire ũũ: “Mũndũ o wothe ũrĩa ũkũigua ngoro yake ĩkĩenda-rĩ, nĩarehage kĩndũ gĩa kũrutĩrũo Jehova.” Moimĩrĩro maarĩ marĩkũ? Andũ maarutaga indo “rũcinĩ o rũcinĩ na ngoro ikwĩendera.” Maatwarire nyingĩ mũno nginya ‘makĩgirio gũtwara indo ingĩ’! (Tham. 35:5; 36:3, 6) Aisiraeli nĩ monanirie atĩ Jehova ndaahĩtĩtie nĩ kũmehoka.
5, 6. Kũringana na Thaburi 110:1-3, nĩ roho ũrĩkũ Jehova hamwe na Jesu meerĩgagĩrĩra kuona gatagatĩ-inĩ ka athathaiya a ma matukũ-inĩ ma kũrigĩrĩria?
5 Hihi Jehova nĩ eerĩgagĩrĩra kũgĩa na athathaiya marĩ na roho ta ũcio wa kwĩyendera matukũ-inĩ ma kũrigĩrĩria? Ĩĩ! Makĩria ma mĩaka 1,000 mbere ya Jesu gũciarũo gũkũ thĩ, Jehova nĩ aatongoririe Daudi kwandĩka igũrũ rĩgiĩ ihinda rĩrĩa Mesia angĩambĩrĩirie gwathana. (Thoma Thaburi 110:1-3.) Jesu, arĩ Mũthamaki, nĩ angĩkagĩa na thũ nyingĩ iria ingĩkamũkararia. Ĩndĩ, nĩ angĩkagĩa mbũtũ nene ya andũ maramũnyita mbaru. Matingĩkaringĩrĩrio kũmũtungatĩra. O na arĩa ethĩ gatagatĩ-inĩ kao nĩ mangĩkerutĩra meyendeire marĩ aingĩ mũno ũũ atĩ mangĩkaringithanio na ireera kana ime rĩrĩa rĩhumbagĩra thĩ rũcinĩ.a
Ahunjia a Ũthamaki a kwĩyendera nĩ aingĩ ta ime (Rora kĩbungo gĩa 5)
6 Jesu nĩ oĩ wega atĩ ũrathi ũrĩa wandĩkĩtwo thĩinĩ wa Thaburi 110 waragĩrĩria ũhoro wake. (Mat. 22:42-45) Nĩ ũndũ ũcio, aarĩ na itũmi njiganu cia kũgĩa na ma atĩ nĩ angĩkagĩa na arũmĩrĩri ehokeku arĩa mangĩerutĩire meyendeire kũhunjia ũhoro ũrĩa mwega thĩinĩ wa thĩ yothe. Hihi maũndũ marĩa mekĩkĩte monanagia atĩa? Hihi Mũthamaki nĩ ahotete kũgĩa na mbũtũ ya ahunjia marerutĩra meyendeire matukũ-inĩ maya ma kũrigĩrĩria?
“Nĩ Wĩra Wakwa Kũmenyithania Ndũmĩrĩri Ĩyo”
7. Thutha wa Jesu gũtuwo Mũthamaki-rĩ, nĩ makinya marĩkũ oire ma kũhaarĩria arũmĩrĩri ake nĩ ũndũ wa wĩra mũnene ũrĩa mangĩarutire?
7 Kahinda kanini thutha wa Jesu gũtuwo Mũthamaki, nĩ oire makinya ma kũhaarĩria arũmĩrĩri ake nĩ ũndũ wa wĩra mũnene ũrĩa mangĩarutire. O ta ũrĩa tuonire Gĩcunjĩ-inĩ gĩa 2, aarutire wĩra wa kũmathuthuria na kũmatheria kuuma mwaka wa 1914 nginya kĩambĩrĩria kĩa 1919. (Mal. 3:1-4) Ningĩ, mwaka-inĩ ũcio wa 1919, agĩcagũra ngombo ĩrĩa ĩĩhokekete nĩguo ĩtongoragie arũmĩrĩri ake. (Mat. 24:45) Kwambĩrĩria hĩndĩ ĩyo, ngombo ĩyo nĩ yambĩrĩirie kũheana irio cia kĩĩroho, kũgerera mĩario ĩrĩa yarutagwo igomano-inĩ na mabuku marĩa maacabithagia, marĩa maacokagĩra kaingĩ atĩ Mũkristiano o wothe nĩ agĩrĩirũo kũhunjia.
8-10. Igomano ciateithirie atĩa wĩra wa kũhunjia ũthereme na ihenya? Heana ngerekano. (Rora nginya ithandũkũ rĩrĩ na kĩongo, “Igomano cia Tene Iria Ciatũmire Wĩra wa Kũhunjia Ũthereme na Ihenya.”)
8 Mĩario ya igomano. Me na wendi mũnene wa kũheo ũtongoria, Arutwo a Bibilia nĩ maatũnganire taũni-inĩ ya Cedar Point, Ohio, Amerika (U.S.), kwambĩrĩria Septemba 1 nginya 8 mwaka wa 1919, nĩ ũndũ wa kĩgomano kĩao kĩa mbere kĩnene thutha wa Mbaara ya Mbere ya Thĩ. Kũrĩ mũthenya wa kerĩ, Mũrũ wa Ithe Witũ Rutherford nĩ aaheanire mĩario ĩrĩa eerire athikĩrĩria ũũ: “Wĩra ũrĩa Mũkristiano aheetwo gũkũ thĩ . . . nĩ kũmemerekia ndũmĩrĩri ya ũthamaki wa Mwathani.”
9 Mũthenya wa gatano wa kĩgomano kĩu, Mũrũ wa Ithe Witũ Rutherford nĩ aarĩkĩrĩirie na mĩario yarĩ na kĩongo “Ũhoro Kũrĩ Arutithania Wĩra,” ĩrĩa yacabithirio ngathĩti-inĩ ya Mũrangĩri rungu wa kĩongo “Kwanĩrĩra Ũthamaki.” Oigire ũũ: “Mũkristiano rĩmwe no eyũrie atĩrĩ, Muoroto wakwa wa gũkorũo gũkũ thĩ nĩ ũrĩkũ? Macokio make magĩrĩirũo gũkorũo marĩ atĩ, Mwathani nĩ andũmĩte ngatwarĩre andũ ndũmĩrĩri ya ũrĩa mangĩiguithanio na Ngai, na nĩ wĩra wakwa kũmenyithania ndũmĩrĩri ĩyo.”
10 Mĩario-inĩ ĩyo, Mũrũ wa Ithe Witũ Rutherford nĩ aamenyithanirie atĩ ngathĩti njerũ ya The Golden Age (ĩrĩa rĩu ĩĩtagwo Arahũkai!), nĩ ĩngĩacabithirio ĩrĩ ya gũteithia andũ kũmenya ũhoro wa Ũthamaki ũrĩa arĩ guo tu mwĩhoko wa andũ. Agĩcoka akĩũria nĩ andũ aigana mangĩenda gũteithĩrĩria harĩ kũheana ngathĩti ĩyo. Riboti ĩmwe ĩgiĩ kĩgomano kĩu ĩtaaragĩria ũũ: “Warĩ ũndũ wa gwĩkĩra ngoro mũno kuona ũrĩa andũ maaiyũkirie ũndũ ũcio. Arĩa othe 6,000 maarĩ kuo, makĩrũgama kuonania atĩ nĩ mehaarĩirie gwĩka ũguo.”b Hatarĩ nganja, Mũthamaki nĩ aagĩĩte na andũ meerutĩire meyendeire kũmemerekia Ũthamaki wake!
11, 12. Ngathĩti ĩmwe ya Mũrangĩri ya mwaka wa 1920 yoigire atĩa igũrũ rĩgiĩ rĩrĩa wĩra ũrĩa Jesu aarathire ũngĩkambĩrĩria?
11 Mabuku marĩa maacabithagio. Kũhĩtũkĩra ngathĩti ya Mũrangĩri, bata wa wĩra ũrĩa Jesu aarathire wa kũhunjia ũhoro mwega wa Ũthamaki nĩ wathiaga ũgĩtaaragĩrio wega makĩria. Ta wĩcirie ngerekano imwe cia mĩaka-inĩ ya 1920.
12 Nĩ ndũmĩrĩri ĩrĩkũ ĩngĩkamemerekio nĩguo ĩhingie ũrathi wa Mathayo 24:14? Wĩra ũcio ũngĩkarutwo rĩ? Ngathĩti-inĩ ya Mũrangĩri ya Julaĩ 1, 1920, gĩcunjĩ kĩarĩ na kĩongo “Ũhoro Wĩgiĩ Ũthamaki,” nĩ gĩataarĩirie ndũmĩrĩri ĩyo, gĩkiuga ũũ: “Ũhoro ũcio mwega wĩgiĩ gũthira kwa mũtabarĩre ũyũ wa maũndũ na kũhandwo kwa ũthamaki wa Mesia.” Gĩcunjĩ kĩu nĩ gĩataarĩirie rĩrĩa ndũmĩrĩri ĩyo ĩngĩkahunjio, gĩkiuga atĩrĩ, “Ndũmĩrĩri ĩno no mũhaka ĩkinyanĩrio gatagatĩ-inĩ ka ihinda rĩa mbaara ĩrĩa nene ya thĩ [Mbaara ya Mbere ya Thĩ] na ihinda rĩa ‘thĩna ũrĩa mũnene.’” Nĩ ũndũ ũcio, gĩcunjĩ kĩu gĩkiuga ũũ: “Rĩrĩ nĩrĩo ihinda . . . rĩa kũhunjia ũhoro ũyũ mwega kũrĩ arĩa meĩtaga Akristiano kũndũ guothe.”
13. Ngathĩti ĩmwe ya Mũrangĩri ya mwaka wa 1921 yekĩrire Akristiano aitĩrĩrie maguta ngoro atĩa monanie roho wa kwĩrutĩra?
13 Hihi andũ a Ngai nĩ mangĩaringĩrĩirio marute wĩra ũrĩa Jesu aarathĩte? Aca. Ngathĩti-inĩ ya Mũrangĩri ya Machi 15, 1921, gĩcunjĩ kĩarĩ na kĩongo “Gĩa na Ũcamba,” nĩ gĩekĩrire Akristiano aitĩrĩrie maguta ngoro monanie roho wa kwĩrutĩra. O mũndũ nĩ eekĩrirũo ngoro eyũrie ũũ: “Githĩ ti mweke wa mwanya ndĩhokeirũo wa kũnyitanĩra wĩra-inĩ ũyũ?” Gĩcunjĩ kĩu gĩathiire na mbere kuuga ũũ: “Twĩ na ma atĩ rĩrĩa mũkuona [ũrĩ mweke wa mwanya kũnyitanĩra wĩra-inĩ ũcio] mũkũhaana ta Jeremia, ũrĩa ngoro-inĩ yake kiugo kĩa Mwathani kĩahaanaga ‘ta mwaki ũhingĩirũo mahĩndĩ-inĩ [make],’ nginya akĩremwo kwĩgirĩrĩria kwaria ũhoro ũcio.” (Jer. 20:9) Ciugo icio nĩ cionanirie ũũma ũrĩa Jehova na Jesu makoragwo naguo harĩ arĩa manyitaga mbaru Ũthamaki marĩ ehokeku.
14, 15. Mwaka wa 1922, ngathĩti ya Mũrangĩri yekĩrire ngoro Akristiano aitĩrĩrie maguta mahunjĩrie andũ na njĩra ĩrĩkũ?
14 Hihi Akristiano a ma magĩrĩirũo gũkinyĩria andũ arĩa angĩ ndũmĩrĩri ya Ũthamaki na njĩra ĩrĩkũ? Ngathĩti-inĩ ya Mũrangĩri ya Agosti 15, 1922, gacunjĩ kanini karĩa kaarĩ na kĩongo “Ũtungata Nĩ wa Bata,” nĩ gekĩrire ngoro Akristiano aitĩrĩrie maguta gũkorũo na “kĩyo gĩa gũtwarĩra andũ mĩciĩ-inĩ kwao ndũmĩrĩri ĩrĩa yacabĩtwo makĩmeraga atĩ ũthamaki wa igũrũ nĩ ũkuhĩrĩirie.”
15 Kwambĩrĩria mwaka wa 1919, Kristo nĩ akoretwo akĩhũthĩra ngombo ĩrĩa ĩĩhokekete kuonania atĩ mweke wa mwanya ũrĩa Mũkristiano ehokeirũo gũkũ thĩ nĩ kũhunjia ũhoro wa Ũthamaki. No hihi Arutwo a Bibilia maaiyũkirie atĩa ũndũ ũcio?
“Arĩa Ehokeku nĩ Mekwĩrutĩra”
16. Amwe a arĩa maatungataga marĩ athuri maaiyũkirie atĩa ũtaaro wa atĩ andũ othe nĩ magĩrĩirũo kũhunjia?
16 Mĩaka-inĩ ya 1920 na 1930, amwe nĩ maareganire na ũtaaro wa atĩ Akristiano othe aitĩrĩrie maguta nĩ magĩrĩirũo kũhunjia. Ngathĩti ya Mũrangĩri ya Novemba 1, 1927 nĩ yataarĩirie ũndũ ũrĩa wathiaga na mbere ĩkiuga ũũ: “Nĩ kũrĩ amwe arĩa maratungata kanitha-inĩ [kĩũngano-inĩ] marĩ athuri . . . mararega gwĩkĩra Akristiano arĩa angĩ ngoro mahunjie, na o ene makarega kũnyitanĩra wĩra-inĩ ũcio. . . . Manyũrũragia ũtaaro ũcio wa gũthiĩ nyũmba kwa nyũmba kũhunjĩria andũ ũhoro wĩgiĩ Ngai, Mũthamaki na ũthamaki wake.” Gĩcunjĩ kĩu kĩoigire ũũ: “Ihinda nĩ ikinyu rĩa arĩa ehokeku gwĩthema andũ acio na kũmeera atĩ tũtikũmehokera wĩra wa gũtungata marĩ athuri rĩngĩ.”c
17, 18. Andũ aingĩ ciũngano-inĩ maamũkĩrire atĩa ũtaaro kuuma kũrĩ ngombo ĩrĩa ĩĩhokekete, na andũ milioni nyingĩ makoretwo magĩka atĩa ihinda-inĩ rĩa mĩaka 100 mĩhĩtũku?
17 Ũndũ wa gũcanjamũra nĩ atĩ, andũ aingĩ ciũngano-inĩ nĩ maamũkĩrire wega ũtongoria ũrĩa woimire kũrĩ ngombo ĩrĩa ĩĩhokekete. Monire arĩ gĩtĩo kĩnene kũhunjia ũhoro wa Ũthamaki. Ngathĩti ya Mũrangĩri ya Machi 15, 1926, yoigire ũũ: “Arĩa ehokeku nĩ mekwĩrutĩra . . . kwĩra andũ ndũmĩrĩri ĩyo.” Acio ehokeku nĩ maahingirie ũrathi ũrĩa ũrĩ thĩinĩ wa Thaburi 110:3, na makĩonania atĩ nĩ maanyitaga mbaru Mũthamaki wa Kĩĩmesia meyendeire.
18 Kwa ihinda rĩa mĩaka 100 mĩhĩtũku, andũ milioni nyingĩ nĩ merutĩire wĩra-inĩ wa kũhunjia ũhoro wa Ũthamaki meyendeire. Thĩinĩ wa icunjĩ cigana ũna iria irũmĩrĩire, nĩ tũkwarĩrĩria ũrĩa mahunjĩtie—njĩra iria mahũthĩrĩte o hamwe na indo iria mahũthĩrĩte, na moimĩrĩro marĩa makoretwo namo. No reke twambe tũthuthurie kĩrĩa gĩtũmĩte andũ milioni nyingĩ merutĩre wĩra-inĩ ũyũ wa kũhunjia Ũthamaki meyendeire, o na angĩkorũo maratũũra thĩinĩ wa thĩ ĩiyũire mwĩyendo. Tũkĩarĩrĩria gĩtũmi kĩu, nĩ wega twĩyũrie ũũ: ‘Nĩ kĩĩ gĩtũmaga hunjĩrie arĩa angĩ ũhoro mwega?’
“Ambai Mũcarie Ũthamaki”
19. Nĩ kĩĩ gĩtũmaga twathĩkĩre ũtaaro wa Jesu wa ‘gũcaragia Ũthamaki’ mbere?
19 Jesu aataarire arũmĩrĩri ake ‘macaragie Ũthamaki’ mbere. (Mat. 6:33) Nĩ kĩĩ gĩtũmaga twathĩkĩre ũtaaro ũcio? Na njĩra nguhĩ, nĩ tondũ nĩ tũmenyaga bata wa Ũthamaki, atĩ nĩguo ũgaatũma muoroto wa Ngai ũhinge. O ta ũrĩa tuonire gĩcunjĩ-inĩ kĩrĩa kĩhĩtũku, roho mũtheru nĩ ũkoretwo ũkĩguũria o kahora ma cia bata ciĩgiĩ Ũthamaki. Hĩndĩ ĩrĩa ma cia bata ciĩgiĩ Ũthamaki ciaingĩra ngoro-inĩ citũ, tũiguaga tũgĩtindĩkwo gũcaria Ũthamaki ũcio mbere.
O ta mũndũ ũrĩa wakenire nĩ ũndũ wa kuona mũthithũ ũrĩa wahithĩtwo, Akristiano nĩ makenaga mũno nĩ ũndũ wa kũmenya ma cia Ũthamaki (Rora kĩbungo kĩa 20)
20. Ngerekano ya Jesu ĩgiĩ mũthithũ ũrĩa wahithĩtwo yonanagia atĩa ũrĩa arũmĩrĩri ake mangĩkaiyũkia ũtaaro wa gũcaragia Ũthamaki mbere?
20 Jesu nĩ aamenyaga ũrĩa arũmĩrĩri ake mangĩkaiyũkia ũtaaro wa gũcaria Ũthamaki mbere. Ta wĩcirie ngerekano yake ya mũthithũ ũrĩa wahithĩtwo. (Thoma Mathayo 13:44.) Thĩinĩ wa ngerekano ĩyo, mũruti wĩra wa mũgũnda arĩ wĩra-inĩ wake wa o mũthenya nĩ onire mũthithũ ũrĩa wahithĩtwo na akĩmenya atĩ warĩ kĩndũ kĩa bata. Eekire atĩa? “Tondũ wa ũrĩa aaũkeneire, agĩthiĩ akĩendia indo ciake ciothe, akĩgũra mũgũnda ũcio.” Tũreruta atĩa kuumana na ũndũ ũcio? Hĩndĩ ĩrĩa twamenya ma cia Ũthamaki na twataũkĩrũo ũrĩa irĩ cia bata, nĩ tũrĩkenagĩra kwĩima nĩguo tũige maũndũ ma Ũthamaki mbere ũtũũro-inĩ witũ.d
21, 22. Arĩa manyitaga mbaru Ũthamaki marĩ ehokeku monanagia atĩa atĩ nĩ macaragia Ũthamaki mbere? Heana ngerekano.
21 Andũ arĩa manyitaga mbaru Ũthamaki marĩ ehokeku monanagia atĩ nĩ macaragia Ũthamaki mbere kũgerera ciugo o hamwe na ciĩko ciao. Mahũthagĩra ũtũũro wao, ũhoti wao, na indo iria marĩ nacio wĩra-inĩ wa kũhunjia. Aingĩ nĩ meimĩte na njĩra nene nĩguo maingĩre ũtungata-inĩ wa mahinda mothe. Ahunjia acio merutagĩra meyendeire nĩ meyonagĩra atĩ Jehova nĩ arathimaga arĩa macaragia Ũthamaki mbere. Reke tuone ngerekano ya ahunjia amwe a tene.
22 Avery na Lovenia Bristow maatungataga marĩ makolpota (mapainia) Amerika ya mũhuro mĩaka-inĩ ya 1920. Lovenia oigire ũũ thutha wa mĩaka mĩingĩ: “Tũrĩ na Avery nĩ tũkeneire mũno kũruta wĩra wa ũpainia tũrĩ hamwe kuuma hĩndĩ ĩyo. Nĩ kwarĩ mahinda maingĩ tũtaamenyaga kũrĩa mbeca cia kũgũra betũrũ na indo cia kũhũthĩra cingĩoimire. No hĩndĩ ciothe Jehova nĩ aatigagĩrĩra atĩ nĩ atũhingĩria mabataro maitũ. Tũtiatigire wĩra wa kũhunjia. Hĩndĩ ciothe nĩ twakoragwo na kĩrĩa tũrabatara.” Lovenia oigaga atĩ hĩndĩ ĩmwe rĩrĩa maatungataga taũni-inĩ ya Pensacola, Florida, matiarĩ na mbeca na indo ingĩ cia kũhũthĩra. Mainũka mũciĩ magĩkora mĩhuko ĩĩrĩ ĩiyũire indo o hamwe na karatathi kandĩkĩtwo ũũ: “Kuuma Kĩũngano gĩa Pensacola.” Agĩĩciria ũhoro wa mĩaka mĩingĩ ĩrĩa akoretwo ũtungata-inĩ wa mahinda mothe, Lovenia oigire ũũ: “Jehova ndarĩ atũtiganĩria. Ndaconoraga arĩa maigaga mwĩhoko wao harĩ we.”
23. Wee ũiguaga atĩa nĩ ũndũ wa ma ciĩgiĩ Ũthamaki iria ũmenyete, na ũtuĩte itua rĩrĩkũ?
23 Ũtungata witũ ndũngĩiganana tondũ maũndũ maitũ nĩ matiganĩte. O na kũrĩ ũguo, ithuothe nĩ tuonaga ũrĩ mweke wa mwanya kũhunjia ũhoro mwega na ngoro yothe. (Kol. 3:23) Tondũ nĩ tuonaga ma cia Ũthamaki iria tũmenyete irĩ cia goro mũno, nĩ twĩrutagĩra twĩyendeire kwĩima maũndũ-inĩ mothe nĩ getha tũtungate na njĩra nene o ũrĩa kũngĩhoteka. Hihi wee nĩ ũtuĩte itua ta rĩu?
24. Ũmwe wa maũndũ manene marĩa Ũthamaki ũhingĩtie matukũ-inĩ maya ma kũrigĩrĩria nĩ ũrĩkũ?
24 Ihinda rĩa mĩaka 100 mĩhĩtũku, Mũthamaki nĩ akoretwo akĩhingia ciugo cia ũrathi iria irĩ thĩinĩ wa Mathayo 24:14. Na ekĩte ũguo ategũtindĩkĩrĩria andũ. Thutha wa kuuma thĩinĩ wa thĩ ĩrĩ na mwĩyendo, arũmĩrĩri ake merutagĩra meyendeire wĩra-inĩ wa kũhunjia. Wĩra wao wa kũhunjia ũhoro mwega thĩinĩ wa thĩ yothe nĩ gĩcunjĩ gĩa kĩmenyithia gĩa kuonania atĩ Jesu nĩ arathana, na nĩ ũndũ ũmwe wa bata Ũthamaki ũhingĩtie matukũ-inĩ maya ma kũrigĩrĩria.
a Thĩinĩ wa Bibilia, ireera kana ime rĩringithanagio na ũingĩ.—Kĩam. 27:28; Mik. 5:7.
b Kabuku getagwo To Whom the Work Is Entrusted gaatarĩirie ũũ: “Wĩra wa ngathĩti ya The Golden Age nĩ gwĩka kambĩini ya nyũmba kwa nyũmba ĩgiĩ ndũmĩrĩri ya ũthamaki. . . . Makĩria ma gwĩka kambĩini, ngathĩti ya The Golden Age nĩ yagĩrĩirũo gũtigwo o mũciĩ, gũtekũmakania kana ene kuo nĩ metĩtie kana ca.” Mĩaka ĩrĩa yarũmĩrĩire thutha ũcio, ariũ a Ithe witũ nĩ meekĩragwo ngoro mere andũ mahoe ngathĩti ya The Golden Age o hamwe na Mũrangĩri. Kwambĩrĩria Februarĩ 1, 1940, andũ a Jehova nĩ meekĩrirũo ngoro maheane ngathĩti icio na marute riboti ya iria maaheanĩte.
c Hĩndĩ ĩyo, athuri a kĩũngano maacagũragwo nĩ kĩũngano. Nĩ ũndũ ũcio, kĩũngano nĩ kĩngĩaregire gũikĩria kura athuri arĩa mataanyitaga mbaru wĩra wa kũhunjia. Gĩcunjĩ gĩa 12 nĩ gĩkaarĩrĩria ũrĩa athuri maatigire gũthuurũo na njĩra ya gũikia kura makĩambĩrĩria kwamũrũo na njĩra ya kĩĩmaandĩko.
d Jesu nĩ aagwetire ũndũ ũhaanaine na ũcio thĩinĩ wa ngerekano yake ya muonjorithania ũrĩa wathiĩte gũcaria ruru ya goro mũno. Hĩndĩ ĩrĩa onire ruru ĩyo ya goro, agĩthiĩ akĩendia indo ciothe iria aarĩ nacio na akĩmĩgũra. (Mat. 13:45, 46) Ngerekano icio igĩrĩ iratuonia atĩ tũmenyaga ũhoro wa ma cia Ũthamaki kũgerera njĩra itiganĩte. Amwe maũmenyaga materĩgĩrĩire, nao angĩ makawetha. No gũtekũmakania ũrĩa twamenyire ũhoro wa ma, nĩ tũkoragwo twĩhaarĩirie kwĩima nĩguo tũige Ũthamaki mbere ũtũũro-inĩ witũ.