Jesu Na Ithe Nĩ Kĩndũ Kĩmwe Na Njĩra Ĩrĩkũ?

Jesu okĩte Jerusalemu nĩ ũndũ wa Gĩathĩ gĩa Kwamũrũo rĩngĩ kwa hekarũ (kana, Hanukkah). Mĩaka ta 100 na kĩndũ mĩhĩtũku, mũthamaki ũmwe wa Siria nĩ aakire kĩgongona igũrũ rĩa kĩgongona kĩrĩa kĩnene hekarũ-inĩ ya Ngai. Thutha ũcio, ariũ a mũthĩnjĩri-Ngai ũmwe Mũyahudi magĩkũũra itũũra rĩa Jerusalemu na makĩamũrĩra Jehova hekarũ ĩyo rĩngĩ. Kuuma hĩndĩ ĩyo, o mwaka nĩ gũkoragwo na gĩkũngũĩro tarĩki 25 mweri wa Kislevu, mweri ũrĩa ũringanaga na mũthia wa mweri wa Novemba na kĩambĩrĩria kĩa Dicemba.

Nĩ hĩndĩ ya mbura na heho. Jesu nĩ gũthiĩ arathianga thĩinĩ wa hekarũ gĩthaku-inĩ kĩa Suleimani. Arĩ hau, Ayahudi makamũthiũrũrũkĩria makamũũria: “Ũgũtũiga nduma-inĩ nginya rĩ? Akorũo wee nĩwe Kristo-rĩ, tũhe ũhoro gĩtaũ.” (Johana 10:​22-24) Jesu hihi ekũmacokeria atĩa? Akameera: “Nĩ ndĩmwĩrĩte, no mũtiretĩkia.” Jesu ndarĩ ameera ĩmwe kwa ĩmwe atĩ nĩwe Kristo ta ũrĩa eerire mũtumia Mũsamaria gĩthima-inĩ. (Johana 4:​25, 26) O na kũrĩ ũguo, nĩ aaguũririe we nĩwe ũ rĩrĩa oigire: “O na Iburahimu atanaciarũo, ndaarĩ o kuo.”​—Johana 8:58.

Jesu arenda andũ memenyere o ene atĩ nĩwe Kristo, na njĩra ya kũringithania maũndũ marĩa areka na ũrĩa kwarathĩtwo Kristo angĩgeka. Nĩkĩo eeraga arutwo ake matikeere mũndũ atĩ nĩwe Mesia. No rĩu akeera Ayahudi acio marĩ na ũũru mũingĩ ũũ atekũmahitha: ‘Maũndũ marĩa njĩkaga na rĩĩtwa rĩa Awa, nĩ marutaga ũira igũrũ rĩakwa. No mũtiĩtĩkagia.’​—Johana 10:​25, 26.

Hihi magaga gwĩtĩkia atĩ Jesu nĩwe Kristo nĩkĩ? Jesu akoiga: “Mwagaga gwĩtĩkia tondũ inyuĩ mũtirĩ ngʼondu ciakwa. Ngʼondu ciakwa ithikagĩrĩria mũgambo wakwa, na nĩ ndĩciũĩ, nacio nĩ cinũmagĩrĩra. Nĩ ndĩciheaga muoyo wa tene na tene, na gũtirĩ hĩndĩ ikaaninwo o rĩ o rĩ, na gũtirĩ mũndũ ũgaacihuria kuuma guoko-inĩ gwakwa. Arĩa heetwo nĩ Awa nĩ a bata gũkĩra kĩndũ kĩngĩ o gĩothe.” Jesu agacoka akameera ũrĩa arĩ na ũkuruhanu wa hakuhĩ hamwe na Ithe akoiga: “Niĩ na Awa tũrĩ kĩndũ kĩmwe.” (Johana 10:​26-30) Jesu ndarenda kuuga atĩ we na Ithe nĩ mwĩrĩ ũmwe, tondũ we arĩ gũkũ thĩ na Ithe arĩ kũrĩa igũrũ. Handũ ha ũguo, nĩ kĩndũ kĩmwe na njĩra ya atĩ makoragwo na muoroto ũmwe marĩ na ũrũmwe.

Ciugo icio cia Jesu ikarakaria Ayahudi mũno nginya makoya mahiga rĩngĩ mamũhũũre akue. No Jesu akaaga gwĩtigĩra. Akameera: “Nĩ ndĩmuonetie maũndũ maingĩ mega kuuma kũrĩ Awa. Nĩ ũndũ ũrĩkũ wa mo ũratũma mũhũũre na mahiga?” Nao makamwĩra: “Tũtirakũhũũra tondũ wa ũndũ mwega, no nĩ tondũ wa kũruma Ngai; nĩ gũkorũo . . . nĩ ũretua ngai.” (Johana 10:​31-33) Hihi maroiga ũguo nĩkĩ na Jesu ndarĩ oiga atĩ we nĩ ngai?

Jesu aroiga e na ũhoti ũrĩa Ayahudi acio metĩkĩtie wagĩrĩirũo gũkorũo na Ngai tu. Kwa ngerekano, ũhoro-inĩ wĩgiĩ “ngʼondu” oigire ũũ: “Nĩ ndĩciheaga muoyo wa tene na tene” ũndũ ũrĩa mũndũ wa gũkũ thĩ atangĩhota gwĩka. (Johana 10:28) Ayahudi acio marariganĩrũo atĩ Jesu akorũo ameera atĩ ekaga maũndũ akĩhũthĩra hinya ũrĩa aheetwo nĩ Ithe.

Jesu akamoria ũũ akĩregana na thitango ĩyo yao ya maheeni: “Na githĩ thĩinĩ wa Watho wanyu [Thaburi 82:6] gũtiandĩkĩtwo atĩ, ‘Ngai oigire: “Inyuĩ mũrĩ ngai”’? Angĩkorũo arĩa maamenereirio nĩ kiugo kĩa Ngai aameetire ‘ngai-rĩ,’ . . . nĩ kĩĩ kĩragĩtũma mũnjĩre o niĩ Awa aatheririe na akĩndũma gũkũ thĩ atĩ, ‘Nĩ waruma Ngai,’ tondũ atĩ nĩ ndoiga, ‘Ndĩ Mũrũ wa Ngai’?”​—Johana 10:​34-36.

Ũrĩa kũrĩ nĩ atĩ Maandĩko nĩ metaga nginya acirithania arĩa matarũmagĩrĩra kĩhooto “ngai.” Kwoguo-rĩ, nĩ kĩĩ kĩragĩtũma Ayahudi acio marute Jesu mahĩtia tondũ wa kuuga, “Ndĩ Mũrũ wa Ngai”? Akagweta ũndũ ũngĩtũma metĩkie akoiga: “Angĩkorũo maũndũ marĩa ndĩreka ti ma Awa, mũtikanjĩtĩkie. No angĩkorũo nĩmo ndĩreka, o na mwaga kũnjĩtĩkia, ĩtĩkiai maũndũ macio, nĩguo mũmenye na mũthiĩ na mbere kũmenya atĩ Awa arĩ na ũiguano hamwe na niĩ na niĩ ndĩ na ũiguano hamwe na Awa.”​—Johana 10:​37, 38.

Maigua ũguo, Ayahudi acio makageria kũnyita Jesu, no o rĩngĩ akora agathiĩ. Akoima Jerusalemu akaringa mũrĩmo ũrĩa ũngĩ wa Rũĩ rwa Jorodani gĩcigo-inĩ kĩrĩa Johana aambĩrĩirie kũbatithanĩria mĩaka ta ĩna mĩhĩtũku. No kũhoteke ti haraihu na mwena wa mũhuro wa Iria rĩa Galili.

Kĩrĩndĩ gĩgoka harĩ Jesu gĩkoiga: “Johana ndaaringire kĩama o na kĩmwe, no maũndũ marĩa mothe oigire megiĩ mũndũ ũyũ maarĩ ma ma.” (Johana 10:41) Tondũ wa ũguo, Ayahudi aingĩ magetĩkia Jesu.