Jesu Gũthomithia Nikodemo Ũtukũ

O arĩ Jerusalemu nĩ ũndũ wa Pasaka ya mwaka wa 30, Jesu akaringa ciama ingĩ nene. Andũ aingĩ mona ũguo makamwĩtĩkia. O na Mũfarisai wĩtagwo Nikodemo wa igooti rĩrĩa inene rĩa Kĩyahudi rĩtagwo Sanhedrini akahutio ngoro. Nĩguo erute maũndũ makĩria, agaceerera Jesu ũtukũ, hihi tondũ wa gwĩtigĩra ũrĩa ekuonwo nĩ atongoria arĩa angĩ a Kĩyahudi.

Nikodemo akamwĩra: “Rabii, nĩ tũĩ atĩ wee ũrĩ mũrutani ũtũmĩtwo nĩ Ngai, nĩ gũkorũo gũtirĩ mũndũ ũngĩringa ciama iria ũringaga Ngai atarĩ hamwe nake.” Jesu akamũcokeria akamwĩra atĩ nĩgetha mũndũ aingĩre Ũthamaki-inĩ wa Ngai, no mũhaka ‘aciarũo rĩngĩ.’​—Johana 3:2, 3.

No kũngĩhoteka atĩa mũndũ aciarũo rĩngĩ? Nikodemo akoria, “[Mũndũ] no ahote kũingĩra nda ya nyina riita rĩa kerĩ nĩguo aciarũo rĩngĩ?”​—Johana 3:4.

No ũguo tiguo gũciarũo rĩngĩ kuugĩte. Jesu akamũtaarĩria akamwĩra: “Mũndũ angĩaga gũciarũo na maĩ na roho, ndangĩtonya Ũthamaki-inĩ wa Ngai.” (Johana 3:5) Jesu aaciarirũo “na maĩ na roho” rĩrĩa aabatithirio, naguo roho mũtheru ũkĩũmba igũrũ rĩake. Hĩndĩ ĩyo, mũgambo ũkiuma igũrũ ũkiuga: “Ũyũ nĩ Mũrũ wakwa, ũrĩa nyendete mũno, na nĩ ndĩmwĩtĩkĩrĩte.” (Mathayo 3:​16, 17) Na njĩra ĩyo, Ngai akĩmenyithania atĩ rĩu Jesu nĩ arĩkĩtie gũtuĩka mũriũ wake wa kĩĩroho na arĩ na kĩĩrĩgĩrĩro gĩa kũingĩra Ũthamaki-inĩ wa igũrũ. Thutha ũcio, hĩndĩ ya Pentekoste mwaka wa 33, roho mũtheru nĩ ũngĩaitĩrĩirio andũ angĩ abatithie na kwoguo maciarũo rĩngĩ marĩ ariũ a Ngai a kĩĩroho.​—Atũmwo 2:​1-4.

Nikodemo ndarataũkĩrũo nĩ maũndũ marĩa Jesu aramũruta megiĩ Ũthamaki. Nĩ ũndũ ũcio, Jesu akamũhe ũhoro makĩria wĩgiĩ itemi rĩake arĩ Mũrũ wa Ngai gũkũ thĩ. Akamwĩra: “O ta ũrĩa Musa aacuuririe nyoka werũ-inĩ, noguo Mũrũ wa mũndũ agaacuurio, nĩguo mũndũ ũrĩa wothe ũmwĩtĩkagia agĩe na muoyo wa tene na tene.”​—Johana 3:14, 15.

Hĩndĩ ĩyo ya tene, Aisiraeli arĩa maarũmagwo nĩ nyoka ciarĩ na thumu maagĩrĩirũo kũrora nyoka ĩyo ya gĩcango nĩguo mahonoke. (Ndari 21:9) No taguo andũ othe mabataraga gũkorũo na wĩtĩkio harĩ Mũrũ wa Ngai nĩguo mahonokio kuuma harĩ gĩkuũ magĩe muoyo wa tene na tene. Jesu agacoka akeera Nikodemo ũũ agĩtĩtĩrithia itemi rĩa Ngai mũbango-inĩ ũcio: “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Johana 3:16) Na njĩra ĩyo, mĩeri ĩtandatũ tu thutha wa Jesu kwambĩrĩria ũtungata wake, akonania wega atĩ nĩwe njĩra ya kũhonokia andũ.

Jesu akeera Nikodemo: “Ngai ndaatũmire Mũrũ wake thĩinĩ wa thĩ nĩguo amĩtuĩre.” Ũguo nĩ kuuga atĩ ndaatũmirũo amĩtuĩre ũũru, atuĩre andũ othe kũninwo. Handũ ha ũguo, ta ũrĩa Jesu arataarĩria, aatũmirũo “nĩguo thĩ ĩhonokio kũgerera harĩ we.”​—Johana 3:17.

Nikodemo egũkĩte kũrĩ Jesu ũtukũ nĩ ũndũ wa guoya. Kwoguo nĩ ũndũ mwega atĩ Jesu ararĩkĩrĩria ndeereti yao na kuuga ũũ: “Ũyũ nĩguo mũthingi wa ituĩro: ũtheri [na nĩguo Jesu kũgerera ũtũũro na morutani make] nĩ ũũkĩte thĩinĩ wa thĩ, no andũ nĩ mendete nduma handũ ha ũtheri, nĩ gũkorũo ciĩko ciao ciarĩ njũru. Tondũ mũndũ o wothe ũmenyerete gwĩkaga maũndũ moru nĩ athũire ũtheri na ndokaga ũtheri-inĩ, nĩguo ciĩko ciake itikaguũrio. No mũndũ o wothe wĩkaga maũndũ marĩa magĩrĩire nĩ okaga ũtheri-inĩ, nĩguo ciĩko ciake imenyeke atĩ ciĩkĩtwo kũringana na wendi wa Ngai.”​—Johana 3:​19-21.

Rĩu nĩ igũrũ rĩa Nikodemo, o ũcio Mũfarisai na mwarimũ thĩinĩ wa Isiraeli, gwĩcũrania igũrũ rĩgiĩ maũndũ marĩa aigua megiĩ itemi rĩa Jesu harĩ muoroto wa Ngai.