Hihi Mbeca Nĩcio Kĩhumo kĩa Maũndũ Mothe Moru?

Macokio ma Bibilia

Aca. Bibilia ndiugaga atĩ mbeca nĩ njũru, o na ndiugaga atĩ mbeca nĩcio kĩhumo kĩa maũndũ mothe moru. Andũ aingĩ mamenyerete kuuga atĩ “mbeca nĩcio kĩhumo kĩa maũndũ mothe moru,” no ũguo tiguo Bibilia yugaga. Bibilia yugaga atĩ “kwenda mbeca nĩkĩo kĩhumo kĩa mĩthemba yothe ya ũũru.”a—1 Timotheo 6:10, Holy Bible in Gĩkũyũ, nĩ ithuĩ tũmatĩtie rangi.

Bibilia yugaga atĩa ũhoro-inĩ wĩgiĩ mbeca?

Bibilia yugaga atĩ mbeca ingĩhũthĩrũo ũrĩa kwagĩrĩire, no iteithie mũndũ na nginya no ikorũo irĩ “ũgitĩri.” (Kohelethu 7:12) Makĩria ma ũguo, Bibilia nĩ ĩgathagĩrĩria andũ arĩa monagia arĩa angĩ ũtaana, na ũtaana ũcio no ũkorũo ũrĩ wa kũheana mbeca.—Thimo 11:25.

O na kũrĩ ũguo, Bibilia nĩ ĩtwĩraga twĩmenyerere gũtua mbeca kĩndũ kĩrĩa kĩa bata ũtũũro-inĩ witũ. Yugaga ũũ: “Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio.” (Ahibirania 13:5) Ũndũ ũrĩa tũreruta nĩ atĩ, twagĩrĩirũo kũhũthĩra mbeca na njĩra njega tũtegũtengʼerania na ũtonga. Handũ ha ũguo, twagĩrĩirũo kũiganĩra na indo iria cia bata ũtũũro-inĩ ta irio, nguo, na ha gũikara.—1 Timotheo 6:8.

**Hihi Bibilia ĩtwĩraga twĩmenyerere kwenda mbeca nĩkĩ?**

Andũ arĩa akoroku matikaaheo muoyo wa tene na tene. (Aefeso 5:5) Gĩtũmi kĩmwe nĩ tondũ, ũkoroku nĩ mũthemba wa ũhoi wa mĩhianano kana ũthathaiya wa maheeni. (Akolosai 3:5) Gĩtũmi kĩngĩ nĩ atĩ, andũ arĩa akoroku kaingĩ nĩ magaga gwĩka ũrĩa kwagĩrĩire, nĩguo magĩe na kĩrĩa marenda. Thimo 28:20 yugaga ũũ: “Ũrĩa wendaga gũtonga na ihenya ndangĩtũũra atarĩ ũcuke.” Mũndũ ta ũcio o na no erirĩrie gwĩka maũndũ moru ta gũtunya andũ arĩa angĩ akĩhũthĩra maheeni, kũnyita andũ mĩgwate, o na kana kũũragana.

O na kwenda mbeca kũngĩaga gũtũma mũndũ eke maũndũ moru, no gũkorũo na moimĩrĩro mangĩ matarĩ mega. Bibilia yugaga atĩ, “arĩa makoragwo matuĩte itua rĩa gũtonga magũaga magerio-inĩ na mũtego-inĩ na merirĩria-inĩ maingĩ ma ũrimũ.”—1 Timotheo 6:9.

Ũtaaro ũrĩa ũrĩ thĩinĩ wa Bibilia wĩgiĩ mbeca ũngĩtũguna atĩa?

Tũngĩaga gwĩtĩkĩria mbeca itũme twĩke maũndũ marĩa matagĩrĩire, nĩ tũrĩĩheaga gĩtĩo, tũgetĩkĩrĩka nĩ Ngai na agatũteithia. Ngai eranĩire ũũ harĩ andũ arĩa merutanagĩria biũ gwĩka wendi wake: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Ahibirania 13:5, 6) Ningĩ nĩ eranĩire atĩ, “mũndũ mwĩhokeku nĩ arĩamũkagĩra irathimo nyingĩ.”—Thimo 28:20.

Mĩhari ya Bibilia Yarĩtie Ũhoro Wĩgiĩ Mbeca

Kohelethu 7:12: ‘Mbeca ikoragwo irĩ ũgitĩri.’

Ũguo nĩ kuuga: Mbeca ingĩhũthĩrũo ũrĩa kwagĩrĩire no ikorũo na ũguni, tondũ no itũme mũndũ akorũo na ũgitĩri na gĩkĩro kĩna.

Luka 12:15: “O na rĩrĩa mũndũ arĩ na ũingĩ, muoyo wake nduumanaga na indo iria arĩ nacio.”

Ũguo nĩ kuuga: Mbeca ticio kĩndũ kĩrĩa kĩa bata mũno ũtũũro-inĩ, na ticio igaatũma mũndũ ahonokio.

1 Timotheo 6:10: “Kwenda mbeca nĩ kĩhumo kĩa maũndũ moru ma mĩthemba yothe, na andũ amwe nĩ ũndũ wa gũthingata wendo ũcio nĩ mahĩtithĩtio makehera thĩinĩ wa wĩtĩkio na magethecanga kũndũ guothe na ruo rũingĩ.”

Ũguo nĩ kuuga: Mbeca cio nyene ti njũru. No andũ arĩa mendete mbeca, arĩa maigaga mbeca mbere ũtũũro-inĩ wao, nĩ merehagĩra mathĩna maingĩ, ta mathĩna ma kũharagana kwa famĩlĩ na mathĩna ma mwĩrĩ nĩ ũndũ wa kũruta wĩra gũkĩria gĩthimi.

Ahibirania 13:5: “Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio.”

Ũguo nĩ kuuga: Handũ ha gũtengʼerania na ũtonga, twagĩrĩirũo kũiganĩra na indo iria tũrĩ nacio.

Mathayo 19:24: “Nĩ ũndũ mũhũthũ harĩ ngamĩra gũtonyera karima ga cindano gũkĩra mũndũ mũtongu gũtonya Ũthamaki-inĩ wa Ngai.”

Ũguo nĩ kuuga: Jesu aakoretwo era mwanake ũmwe mũtongu amũrũmĩrĩre. Mwanake ũcio nĩ aaregire tondũ nĩ eendete indo ciake mũno. Jesu eendaga kũrutana atĩ nĩ twagĩrĩirũo kwĩmenyerera. Mũndũ wendete ũtonga gũkĩra ũrĩa endete Ngai no akorũo ũgwati-inĩ wa kũrũo nĩ muoyo wa tene na tene.

a Bibilia ĩngĩ yugaga “kwenda mbeca nĩ kĩhumo kĩa maũndũ moru ma mĩthemba yothe.”