Ũhoro Mũrũngĩrĩru

NĨKĨ kĩngĩtũma Mũkristiano aheane ũhoro ũtarĩ guo? Ahota gũkorũo aracokera ũndũ aiguĩte atambĩte gũtuĩria kana nĩ wa ma. Kana akongerera ũndũ cumbĩ atekũmenya tondũ ndanataũkĩrũo wega akĩũthoma. Tũngĩbarĩrĩra biũ kũheana ndeto o ũrĩa itariĩ nginya tũmaũndũ-inĩ tũrĩa tũnini, athikĩrĩria aitũ nĩ marĩkoragwo na ũũma o na maũndũ-inĩ marĩa ma bata makĩria ma ndũmĩrĩri itũ.

Ũtungata-inĩ. Nĩ ũndũ wa kuona ta matarĩ na ũmenyo mũingĩ, aingĩ nĩ metigagĩra kwambĩrĩria kũhunjia. O na kũrĩ ũguo, thutha wa ihinda inyinyi nĩ mahotaga kũruta ũira mwega, o na marĩ na ũmenyo wa mũthingi tu wa ma cia Bibilia. Mahotaga gwĩka ũguo atĩa? Kwĩharĩria nĩkuo kũmateithagia.

Ũtanathiĩ kũhunjia, menya wega ũhoro ũrĩa ũgũthiĩ kwarĩrĩria. Geria gwĩciria ciũria iria athikĩrĩria aku mangĩũria. Caria macokio marĩ na mũthingi wa Bibilia. Gwĩka ũguo nĩ gũgũkũharĩria kũheana macokio ma ma ũtarĩ na wagagu. Hihi ũrathiĩ kũruta mũndũ Bibilia? Thoma wega ũhoro ũrĩa ũkũmũruta. Taũkĩrũo biũ nĩ mũthingi wa Kĩĩmaandĩko wa macokio ma ciũria iria icabĩtwo.

Ĩ mwene nyũmba kana mũndũ mũrutaga wĩra nake angĩkũũria kĩũria ũteharĩirie? Angĩkorũo kũrĩ na maũndũ ũtarĩ na ũũma namo, ndũkegererie. “Ngoro ya mũndũ mũthingu yambaga gwĩcũrania ũrĩa ĩgũcokia.” (Thim. 15:28) No wone ũteithio ũrĩa ũrabatara thĩinĩ wa Kutoa Sababu kwa Kutumia Maandiko kana kabuku “Maũndũ ma Kwarĩrĩria Makoniĩ Bibilia.” Angĩkorũo ndũrĩ o na kĩmwe kĩa indo icio, mwĩre nĩ ũgwĩka ũthuthuria na nĩ ũgaacoka. Angĩkorũo ũrĩa ũrakũũria kĩũria kũna arĩ na ngoro njega, nĩ egweterera ũcarie macokio marĩa magĩrĩire. Ningĩ o na no akenio mũno nĩ wĩnyihia waku.

Kũhunjia na ahunjia marĩ na ũmenyeru no gũgũteithie gũkũria ũhoti wa kũhũthĩra Kiugo kĩa Ngai ũrĩa kwagĩrĩire. Rora nĩ maandĩko marĩkũ mahũthagĩra na ũrĩa mamahũthagĩra kũruta ihooto. Ĩtĩkĩra na wĩnyihia mawoni kana motaaro o mothe marĩa megũkũhe. Apolo, mũrutwo warĩ kĩyo nĩ aagunĩkire nĩ ũteithio wa andũ angĩ. Luka oigire atĩ Apolo “aarĩ mũthomu mũno,” “akahota wega gũtaũranĩra Maandĩko” na ‘ngoro yake nĩ yahĩahĩaga’ “akĩheana ũhoro wa Jesu, akaũrutanaga atekũhĩtia.” O na kũrĩ ũguo, ndaarĩ na ũtaũku wa kũigana. Rĩrĩa Pirisila na Akula maamũiguire akĩaria, “magĩthiĩ nake kwao, makĩmũtaũrĩra ũhoro wa Njĩra ya Ngai wega makĩria.”—Atũm. 18:24-28.

‘Kũrũmia Ũhoro Ũrĩa wa Kwĩhokeka.’ Icunjĩ citũ mĩcemanio-inĩ ciagĩrĩirũo kuonania gĩtĩo kĩnene kĩrĩa kĩũngano kĩheetwo gĩa gũkorũo kĩrĩ “gĩtugĩ . . . gĩa gũtiirĩrĩra ũhoro-ũrĩa-wa-ma.” (1 Tim. 3:15) Nĩguo tũrũmie ũhoro ũrĩa wa ma, harĩ bata tũmenye wega ũrĩa maandĩko marĩa tũrenda kũhũthĩra mĩario-inĩ moigĩte. Wĩcirie ũhoro ũrĩa ũmathiũrũrũkĩirie na muoroto wamo.

Andũ mahota gũcokera maũndũ marĩa ũkuuga hĩndĩ ya mĩcemanio ya kĩũngano. Ma nĩ atĩ, “ithuothe nĩtũhĩngĩcagwo nĩ maũndũ maingĩ.” (Jak. 3:2) Ĩndĩ nĩ ũkũgunĩka ũngĩĩmenyeria kũhũthagĩra ciugo nũngĩrĩru. Ariũ a Ithe witũ aingĩ arĩa marĩ thĩinĩ wa Cukuru ya Ũtungata wa Gĩtheokrasi nĩ marĩtuĩka athuri a kĩũngano. Arĩa mehokagĩrũo wĩra ũcio nĩ merĩgagĩrĩrũo mahingie ‘maũndũ maingĩ makĩria.’ (Luk. 12:48) Mũthuri wa kĩũngano angĩheana ũtaaro ũtagĩrĩire ũngĩtũma andũ a kĩũngano maingĩre thĩinĩ wa mathĩna maritũ, no aage gwĩtĩkĩrĩka nĩ Ngai. (Mat. 12:36, 37) Nĩ ũndũ ũcio, mũrũ wa Ithe witũ wagĩrĩire gũtuĩka mũthuri wa kĩũngano, no mũhaka akorũo oĩkaine atĩ nĩ ‘arũmagia biũ ũhoro wa kwĩhokeka, ũrĩa ũringaine na ũrutani ũrĩa arutanaga.’—Tit. 1:9.

Reke mwĩcirĩrie waku ũtwaranage wega na “mohoro marĩa maagĩrĩru” marĩa marĩ thĩinĩ wa ma yothe ya Kĩĩmaandĩko. (2 Tim. 1:13) Ũndũ ũcio ndwagĩrĩirũo nĩ gũtũma ũgĩe na guoya. Hihi no gũkorũo ndũrĩkĩtie gũthoma Bibilia ĩrĩ yothe. Thiĩ na mbere na kũmĩthoma. No kwa ihinda rĩrĩ, rora ũrĩa maũndũ maya mangĩgũteithia gũthathaũrania ũhoro ũrĩa ũreciria kũhũthagĩra ũkĩrutana.

Wa mbere wĩyũrie: ‘Hihi ũhoro ũyũ nĩ ũratwarana na maũndũ marĩa ndĩrutĩte Bibilia-inĩ? Hihi ũhoro ũyũ ũkũgucĩrĩria athikĩrĩria harĩ Jehova, kana ũgũtũgĩria ũũgĩ wa gũkũ thĩ, na wĩkĩre andũ ngoro matongoragio nĩguo?’ Jesu oigire: “Ũhoro waku nĩguo ũhoro-ũrĩa-wa-ma.” (Joh. 17:17; Gũcok. 13:1-5; 1 Kor. 1:19-21) Wa kerĩ, hũthĩra biũ indo cia kwĩruta iria tũheagwo nĩ ngombo ĩrĩa ĩĩhokekete na njũgĩ. Makĩria ma gũgũteithia ũtaũkĩrũo nĩ maandĩko wega, nĩ igũgũteithia kũmahũthĩra na ũigananĩru na wĩcirio. Ũngĩhocia mĩario yaku harĩ “mohoro marĩa maagĩrĩru” na wĩhokage njĩra ya Jehova ũgĩtarĩria na ũkĩhũthĩra maandĩko, ndeto ciaku irĩkoragwo irĩ nũngĩrĩru.

Gũtuĩria Ũrũngĩrĩru wa Ũhoro. Maũndũ mekĩkĩte ica ikuhĩ, marĩa magwete kuuma kĩhumo-inĩ kĩna, na marĩa monetwo no magũteithie kũheana ngerekano na kuonania ũrĩa ũndũ ũngĩhũthĩrũo. Ũngĩkorũo na ma atĩa atĩ nĩ marũngĩrĩru? Njĩra ĩmwe nĩ kũmaatha maũndũ ta macio kĩhumo-inĩ gĩa kwĩhokeka. Tigĩrĩra atĩ ũhoro ũcio nĩguo wa ica ikuhĩ makĩria. Mũigana wa indo kana maũndũ nĩ ũgarũrũkaga; maũndũ ma gĩsayanisi nĩ mahĩtũkagwo nĩ mahinda; na o ũrĩa andũ marataũkĩrwo nĩ historĩ na thiomi cia tene, maũndũ marĩa mehocetie harĩ ũũgĩ ũcio wa tene nĩ mabataraga gũcenjio. Wĩmenyerere mũno angĩkorũo ũrenda kũhũthĩra ũhoro umĩte ngathĩti-inĩ cia mohoro, TV, redio, imĩrũ, kana Intaneti-inĩ. Thimo 14:15 ĩheanaga ũtaaro ũyũ: “Mũndũ ũtarĩ mũũgĩ etĩkagia ũndũ o wothe, ĩndĩ mũndũ mũbarĩrĩri nĩamenyagĩrĩra harĩa egũthiĩra.” Wĩyũrie ũũ: ‘Hihi kĩhumo kĩa ũhoro ũyũ nĩ kĩheanaga ndeto nũngĩrĩru? Hihi ũhoro ũyũ no wĩkĩrũo mũkonde nĩ ihumo ingĩ?’ Ũngĩkĩrĩra nganja ũrũngĩrĩru wa ũhoro mũna, ndũkaũhũthĩre.

Makĩria ma kũrora ũrũngĩrĩru wa ihumo cia ũhoro, wĩcirie wega ũrĩa wee ũrenda kũhũthĩra ũhoro ũcio. Tigĩrĩra atĩ mũhũthĩrĩre waku wa maũndũ magwete kuuma kĩhumo-inĩ kĩna na wa mũigana nĩ iratwarana na kĩhumo kĩrĩa ũhoro ũcio ũrutĩtwo thĩinĩ wakĩo. Ũgĩtĩtĩrithia ũndũ mũna, menyerera ndũkongerere cumbĩ. Harĩa harabatara kũgwetwo ciugo “andũ amwe” ndũkoige “andũ arĩa aingĩ,” harĩa harabatara ciugo “andũ aingĩ” ndũkoige “andũ othe,” na harĩa harabatara ciugo “rĩmwe na rĩmwe” ndũkoige “hingo ciothe.” Kuongerera cumbĩ maũndũ kana riboti ciĩgiĩ mũigana, ũtheremu wa ũndũ, kana ũritũ wa ũndũ nĩ kũrehaga nganja.

Angĩkorũo hĩndĩ ciothe ũrĩaragia maũndũ marũngĩrĩru ũrĩonagwo ũrĩ mũndũ ũheete ma gĩtĩo. Ũndũ ũcio nĩ ũtũmaga Aira a Jehova marĩ gĩkundi maheo gĩtĩo. Makĩria ma ũguo, nĩ gũtĩithagia “Jehova, . . . Mũrungu ũrĩa wa ma.”—Thab. 31:5.