Ũthuthuria wa Matigari ma Indo cia Tene Kuonania atĩ Mũthamaki Daudi Aarĩ Kuo

Kũringana na Bibilia, Mũthamaki Daudi wa Isiraeli aatũũraga hĩndĩ ya karine ya 11 Mbere ya Mahinda Maitũ (M.M.M.) na andũ a rũciaro rwake nĩ maathanire ihinda rĩa mĩaka magana maingĩ. No andũ amwe moigaga atĩ Daudi nĩ mũndũ wa gwĩcirĩrio, atĩ ũhoro wake nĩ rũgano rwatungirũo mĩaka mĩingĩ thutha ũcio. Hihi kũna Mũthamaki Daudi aarĩ kuo?

Mwaka-inĩ wa 1993, mũthuthuria wa matigari ma indo cia tene wĩtagwo Avraham Biran hamwe na arĩa maateithanagia nake nĩ moonire gĩcunjĩ kĩa ihiga gĩcigo-inĩ kĩa Tel Dan, mwena wa rũgongo wa Isiraeli, kĩrĩa gĩcongetwo ciugo “Nyũmba ya Daudi.” Ciugo icio ciaandĩkĩtwo na ndemwa cia rũthiomi rwa tene na ciarĩ cia hĩndĩ ya karine ya kenda M.M.M. No kũhoteke kĩarĩ gĩa gĩtugĩ kĩrĩa kĩahandirũo nĩ Aaramu, makĩĩrahĩra ũhootani wao kwerekera Aisiraeli.

Gĩcunjĩ kĩmwe thĩinĩ wa Bible History Daily kiugaga ũũ: “Andũ amwe nĩ makararagia ũhoro wĩgiĩ ihiga rĩu rĩarĩ na ciugo ‘Nyũmba ya Daudi’ . . . O na kũrĩ ũguo, athomi aingĩ a Bibilia na athuthuria a matigari ma indo cia tene nĩ metĩkagĩra atĩ gĩcunjĩ kĩu kĩa ihiga kĩrĩa kĩoonekire Tel Dan nĩkĩo kĩarĩ ũira wa mbere mũrũmu atĩ Mũthamaki Daudi ũrĩa ũgwetetwo Bibilia-inĩ aarĩ kuo, na ũcio nĩ ũndũ ũmwe wa bata mũno harĩ ũthuthuria ũkoniĩ Bibilia ũrĩa wandĩkĩtwo thĩinĩ wa BAR [Biblical Archaeology Review].”