Nĩguo twĩke ũrĩa wothe tũngĩhota kũhunjia “ũhoro mwega” kũrĩ “ndũrĩrĩ ciothe na mĩhĩrĩga na thiomi na ikundi cia andũ,” tũcabaga mabuku na thiomi makĩria ma 900. (Kũguũrĩrio 14:⁠6) Tũhotaga atĩa kũruta wĩra ũcio mũritũ ũguo? Tũũrutaga tũgĩteithĩrĩrio nĩ andĩki a kuuma mabũrũri matiganĩte na gĩkundi kĩa ataũri marĩ kĩyo na othe nĩ Aira a Jehova.

Ũhoro wambaga kwandĩkwo na rũthiomi rwa Gĩthũngũ. Kĩama Kĩrĩa Gĩtongoragia nĩkĩo kĩrũgamagĩrĩra wĩra wa Rũhonge rwa Wandĩki wabici-inĩ nene ya Aira a Jehova. Rũhonge rũu nĩruo rũtabanagia wĩra wa andĩki arĩa marĩ wabici-inĩ ĩyo nene na arĩa marĩ wabici-inĩ imwe cia honge. Gũkorũo na andĩki moimĩte kũndũ gũtiganĩte nĩ gũtũhotithagia kwarĩrĩria maũndũ ma mĩthemba mĩingĩ marĩa mangĩgucĩrĩria andũ a mabũrũri maingĩ.

Ũhoro ũcio ũcokaga ũgatũmĩrũo ataũri. Thutha wa ũhoro ũrĩa mwandĩke kũrorũo na gwĩtĩkĩrĩka, ũtũmagwo na njĩra ya kompiuta kũrĩ ikundi cia ataũri thĩ yothe, arĩa maũtaũraga, na makaũrora nĩguo matigĩrĩre nĩ ũrathomeka wega na ndũrĩ mahĩtia. Nĩ mageragia mũno gũthuura “ciugo itarĩ na mahĩtia cia ũhoro wa ma” cia rũthiomi rwao, iria ingĩheana ũhoro ũcio wandĩkĩtwo na Gĩthũngũ o ũrĩa ũrĩ.​—⁠Kohelethu 12:⁠10.

Kompiuta nĩ itũmaga wĩra ũrutĩke na ihenya. Kompiuta ndĩngĩruta wĩra ũrĩa ũrutagwo nĩ andĩki na ataũri. Ĩndĩ, wĩra wao no ũrutĩke narua makĩria mangĩhũthĩra kompiuta gũcaria ciugo na gwĩka ũthuthuria. Aira a Jehova nĩ maathondekire mũtambo wĩtagwo Multilanguage Electronic Publishing System (MEPS) ũrĩa ũhotithagia ũhoro mwandĩke kũhaarĩrio na thiomi magana maingĩ, ũgekĩrũo mbica, na ũkahaarĩrio nĩguo ũcabwo.

Nĩkĩ gĩtũmaga twĩrutanĩrie kũruta wĩra ũcio wothe nginya harĩ thiomi iria ciaragio nĩ andũ ngiri nini tu? Tondũ Jehova endaga “andũ a mĩthemba yothe mahonokio na magĩe na ũmenyo wa ma wĩgiĩ ũhoro wa ma.”​—⁠1 Timotheo 2:⁠3, 4.

• Mabuku maitũ mandĩkagwo na njĩra ĩrĩkũ?

• Nĩ kĩĩ gĩtũmaga tũtaũre mabuku maitũ na thiomi nyingĩ?

Ithondeka ritũ nĩ rĩcabaga na rĩgatwarĩra andũ Bibilia na mabuku milioni nyingĩ o mwaka hatarĩ marĩhi. Nĩ twakaga Nyũmba cia Ũthamaki na wabici cia honge na tũgacimenyerera. Ningĩ nĩ tũteithagĩrĩria andũ ngiri nyingĩ arĩa marĩ ũtungata-inĩ wa Betheli na ũmishonarĩ, na tũkaheana ũteithio hĩndĩ ĩrĩa kwagĩa thĩna. Hihi wahota kwĩyũria, ‘Mbeca cia gwĩka maũndũ macio mothe ciumaga kũ?’

Tũtiĩtagia gĩcunjĩ gĩa ikũmi, tũtituanagĩra marĩhi, kana tũkahothithia. O na gũtuĩka mbeca nyingĩ nĩ ihũthĩkaga gũteithĩrĩria wĩra witũ wa kũhunjia, tũtihothithagia mbeca. Makĩria ma mĩaka igana rĩmwe mĩhĩtũku-rĩ, riuma rĩa kerĩ rĩa ngathĩti ya Watchtower rĩoigire atĩ twĩtĩkĩtie Jehova nĩwe ũtũteithagia na ‘gũtirĩ hĩndĩ tũkaahoya kana tũthaithe andũ matũteithie’ na tũtirĩ tweka ũguo!​—⁠Mathayo 10:⁠8.

Wĩra witũ ũteithagĩrĩrio nĩ mĩhothi ya kwĩyendera. Andũ aingĩ nĩ makenagio nĩ wĩra witũ wa kũrutana Bibilia na nĩ mahothaga nĩ ũndũ waguo. Aira a Jehova o ene nĩ makenagĩra kũhũthĩra mahinda, hinya, na mbeca ciao, hamwe na indo ingĩ kũhingia wendi wa Ngai thĩ yothe. (1 Maũndũ ma Matukũ ma Tene 29:⁠9) Thĩinĩ wa Nyũmba ya Ũthamaki na igomano-inĩ, nĩ gũkoragwo na mathandũkũ mangĩikio mĩhothi nĩ arĩa marenda kũhotha. Ningĩ mũndũ no arute mĩhothi kũgerera website itũ ya jw.org. Kaingĩ mbeca icio ciumaga kũrĩ andũ matarĩ atongu, o ta mũtumia wa ndigwa ũrĩa wagaathĩrĩirio nĩ Jesu, ũrĩa waikirie tũthendi twĩrĩ thĩinĩ wa ithandũkũ rĩa mĩhothi. (Luka 21:​1-4) Nĩ ũndũ ũcio mũndũ o wothe no “aigage kĩndũ” angĩhotha, “o ta ũrĩa atuĩte ngoro-inĩ yake.”​—⁠1 Akorintho 16:2; 2 Akorintho 9:⁠7.

Tũrĩ na ma atĩ Jehova nĩ egũthiĩ na mbere kũhutia ngoro cia arĩa mangĩenda ‘kũmũtĩithia na indo ciao cia goro’ magĩteithĩrĩria wĩra wa Ũthamaki, nĩguo wendi wake ũhinge.​—⁠Thimo 3:9.

• Ithondeka ritũ rĩkoragwo rĩrĩ ngũrani na ndini iria ingĩ na njĩra ĩrĩkũ?

• Mĩhothi ya kwĩyendera ĩhũthagĩrũo atĩa?

O ta ũrĩa rĩĩtwa Nyũmba ya Ũthamaki rĩonanĩtie, ũrutani wa Bibilia ũrĩa waragĩrĩrio kuo ũkoragwo ũkonainie na Ũthamaki wa Ngai, ũrĩa Jesu aaragĩrĩria mũno ũtungata-inĩ wake.​—⁠Luka 8:⁠1.

Nĩ kũndũ kwa andũ gũcemania ũthathaiya-inĩ wa ma. Kũu nĩkuo Aira a Jehova mabangagĩra wĩra wa kũhunjia gĩcigo-inĩ kĩao. (Mathayo 24:14) Nyũmba cia Ũthamaki itikoragwo ciganaine na ciakagwo na mĩakĩre ĩtiganĩte, no itikoragwo na maũndũ maingĩ, na nyingĩ ciacio ihũthagĩrũo nĩ makĩria ma kĩũngano kĩmwe. Mĩaka-inĩ ya ica ikuhĩ, nĩ twakĩte kana tũgacokereria Nyũmba cia Ũthamaki ngiri nyingĩ (mũigana wa ithano o mũthenya) nĩ ũndũ wa wongerereku wa ciũngano. Tũhotaga atĩa gwĩka ũguo?​—⁠Mathayo 19:⁠26.

Ciakagwo na mĩhothi ĩrĩa ĩcokanagĩrĩrio kuuma kũndũ na kũndũ. Mĩhothi ĩyo ĩtũmagwo kũrĩ wabici ya rũhonge nĩguo ciũngano iria ingĩbatara gwaka kana gũthondeka Nyũmba cia Ũthamaki iteithĩrĩrio na mbeca icio.

Ciakagwo nĩ erutĩri matarĩ a kũrĩhwo, moimĩte kũndũ gũtiganĩte, na marĩ na ũhoti ũtiganĩte. Mabũrũri-inĩ maingĩ, nĩ gũkoragwo na Ikundi cia Mĩako ya Nyũmba cia Ũthamaki. Ikundi cia aaki na erutĩri ithiaga kuuma kĩũngano kĩmwe nginya kĩrĩa kĩngĩ bũrũri-inĩ, o na kũrĩa kũraihĩrĩirie, igateithĩrĩrie ciũngano cia kũu gwaka Nyũmba cia Ũthamaki. Mabũrũri-inĩ mangĩ, Aira a Jehova arĩa marĩ na ũmenyeru nĩ mamũrĩtwo nĩguo marũgamĩrĩre wĩra wa mĩako na wa gũthondeka Nyũmba cia Ũthamaki gĩcigo-inĩ kĩrĩa magaĩirũo. O na gũtuĩka andũ aingĩ marĩ na ũmenyeru wa mĩako nĩ merutagĩra gũteithia mĩako-inĩ yothe, andũ aingĩ arĩa mateithagĩrĩria makoragwo marĩ a kĩũngano kĩu kĩrakĩrũo. Maũndũ macio mothe mahotekaga nĩ ũndũ wa roho wa Jehova o hamwe na wĩrutĩri wa ngoro yothe wa andũ ake.​—⁠Thaburi 127:1; Akolosai 3:⁠23.

• Kũrĩa tũthathayagĩria gwĩtagwo Nyũmba ya Ũthamaki nĩkĩ?

• Tũhotaga atĩa gwaka Nyũmba cia Ũthamaki thĩ yothe?