Mabuku na Maandĩko Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata Witũ
DICEMBA 4-10
MŨTHITHŨ KUUMA KIUGO-INĨ KĨA NGAI | ZEFANIA 1–HAGAI 2
“Caria Jehova Mũthenya Wake wa Marakara Ũtanakinya”
(Zefania 2:2, 3) Wĩcokanĩrĩriei o mbere mũtanahingĩrio ituĩro, tondũ mũthenya warĩo wĩhĩkĩte o kwĩhĩka o ta arĩ mũũngũ ũkũũmbũrũo nĩ rũhuho; wĩcokanĩrĩriei mũtanakorũo nĩ marakara marĩa maakanu ma Jehova, o na mũthenya ũrĩa Jehova agakorũo amũrakarĩire ũtanamũkora. 3 Cariai Jehova, inyuĩ andũ othe arĩa ahoreri a gũkũ thĩ, o inyuĩ mũtũire mwĩkaga maũndũ maringaine na matuĩro make ma cira; wĩcarĩriei mĩthiĩre ya ũthingu, o na ya ũhoreri; hihi no kuona mũgĩkahithwo mũthenya ũcio wa marakara ma Jehova.
w01 2/15 18-19 kĩb. 5-7
Caria Jehova Mũthenya Wake wa Marakara Ũtanakinya
5 Mũndũ no eĩre ũũ: ‘Nĩ ndĩyamũrĩire Jehova, ngabatithio na rĩu ndĩ Mũira wa Jehova. Na githĩ ndikĩhingĩtie maũndũ macio mabataranagia?’ Ũrĩa kũrĩ nĩ atĩ, kwĩyamũrĩra Jehova gwiki ti kũiganu. Isiraeli rwarĩ rũrĩrĩ rweyamũrĩire Jehova, no matukũ-inĩ ma Zefania andũ a Juda matiaikaraga ta andũ meyamũrĩire Jehova. Ũndũ ũcio watũmire rũrĩrĩ rũu rũrĩkĩrĩrie na gũteanĩrio. ‘Gũcaria Jehova’ nĩ hamwe na gũkũria ũrata wa hakuhĩ hamwe nake na kũũtũũria, ũnyitanĩire na gĩcunjĩ gĩa gũkũ thĩ gĩa ithondeka rĩake. Ũndũ ũngĩ nĩ kũmenya ũrĩa Ngai onaga maũndũ na gwĩciria mawoni make. Tũcaragia Jehova rĩrĩa tũrathoma Kiugo gĩake na kinyi, tũgagĩĩcũrania, na tũkahũthĩra ũtaaro wakĩo ũtũũro-inĩ witũ. Ningĩ gũcaragia ũtongoria wa Jehova kũgerera mahoya ma kuuma ngoro na kũrũmagĩrĩra ũtongoria wa roho mũtheru, gũtũmaga ũrata witũ nake ũthiĩ ũmatĩte na tũkagĩa na wendi wa kũmũtungatĩra na ‘ngoro itũ yothe, na muoyo witũ wothe, o na hinya witũ wothe.’—Gũcokerithia Maathani 6:5; Agalatia 5:22-25; Afilipi 4:6, 7; Kũguũrĩrio 4:11.
6 Ũndũ wa kerĩ ũbataranagia ũrĩa ũgwetetwo thĩinĩ wa Zefania 2:3 nĩ ‘gũcaria ũthingu.’ Aingĩ aitũ nĩ twekire mogarũrũku manene nĩ getha twagĩrĩre kũbatithio, ĩndĩ no mũhaka tũthiĩ na mbere kũrũmia ithimi cia Ngai cia ũthingu ũtũũro-inĩ witũ wothe. Amwe a arĩa mekire mogarũrũku ta macio nĩ metĩkĩrĩtie thĩ ĩno ĩmahake gĩko. Ti ũndũ mũhũthũ gũcaria ũthingu tondũ tũthiũrũrũkĩirio nĩ andũ monaga ngomanio itaagĩrĩire, kũhenania, na mehia mangĩ ta macio marĩ maũndũ maagĩrĩru. O na kũrĩ ũguo, tũngĩkorũo na wendi mũnene wa gũkenia Jehova no tũtoorie mĩerekera ya kwenda gwĩka ta andũ arĩa marĩ thĩinĩ wa thĩ atĩ nĩguo twĩtĩkĩrĩke nĩo. Andũ a Juda nĩ maatigire gwĩtĩkĩrĩka nĩ Ngai nĩ ũndũ wa kwĩgerekania na ndũrĩrĩ ciarĩ na mĩtugo mĩũru iria ciamarigicĩirie. Handũ ha kwĩgerekania na thĩ, rekei ‘twĩgerekanagie na Ngai,’ tũgĩkũragia “ũmũndũ mwerũ ũrĩa wombirũo kũringana na wendi wa Ngai, na ũthingu wa ma na wĩhokeku.”—Aefeso 4:24; 5:1.
7 Ũndũ wa gatatũ ũrĩa ũgwetetwo thĩinĩ wa Zefania 2:3 nĩ atĩ angĩkorũo nĩ tũkwenda gũkaahithwo nĩ Jehova mũthenya wake wa marakara wakinya, no mũhaka ‘tũcarie ũhoreri.’ Twĩkoraga tũkĩruta wĩra kana tũgĩka maũndũ mangĩ gatagatĩ-inĩ ka andũ matarĩ ahoreri o na hanini. Monaga mũndũ mũhoreri ta arĩ na gathĩna na mũndũ mwĩnyihia ta arĩ na thĩna mũnene. Nĩ andũ mataiganagĩra, meyendete, matendaga kũiguithio na metĩkĩtie atĩ no mũhaka “ihooto” ciao na maũndũ marĩa mendete metĩkĩrũo gũtekũmakania gũgũthiĩ atĩa. Githĩ to ũkorũo ũrĩ ũndũ wa kĩeha tũngĩambĩrĩria kũgĩa na mĩerekera ta ĩyo yao! Rĩrĩ nĩrĩo ihinda rĩa ‘gũcaria ũhoreri.’ Na njĩra ĩrĩkũ? Na njĩra ya gwathĩkagĩra Ngai, gwĩtĩkagĩra kũrũngwo nĩwe tũrĩ na wĩnyihia na gwĩkaga kũringana na wendi wake.
Kũmaatha Maũndũ ma Bata Maandĩko-inĩ
(Zefania 1:8) Na nĩgũgakinya atĩrĩ, atĩ mũthenya wa igongona rĩu rĩa Jehova, nĩ kũherithia ngaherithia atongoria, na ariũ a mũthamaki, o na andũ othe arĩa mehumbaga nguo itarĩ cia ndũire.
w07 11/15 11 kĩb. 3
Matemo Kuuma Ibuku-inĩ rĩa Nahumu, rĩa Habakuku, na rĩa Zefania
1:8. Matukũ-inĩ ma Zefania andũ amwe nĩ “mehumbaga nguo itarĩ cia ndũire” nĩguo metĩkĩrĩke nĩ ndũrĩrĩ iria ciamathiũrũrũkĩirie. Na githĩ to ũkorũo ũtarĩ ũndũ wa ũũgĩ ndungata cia Jehova ingĩgeria kwĩhanania na andũ a gũkũ thĩ na njĩra ta icio!
(Hagai 2:9) Ningĩ riri ũrĩa nyũmba ĩno ĩkagĩa naguo nĩũkaneneha, ũingĩhe gũkĩra ũrĩa yarĩ naguo tene. Ũguo nĩguo Jehova Mũnene wa Ita ekuuga. Nakuo kũndũ gũkũ nĩkuo ngaheanagĩra thayũ; ũguo nĩguo Jehova Mũnene wa ita ekuuga.
w07 12/1 9 kĩb. 3
Matemo Kuuma Ibuku-inĩ rĩa Hagai, na rĩa Zekaria
2:9—Hekarũ ĩrĩa yaakirũo thutha yarĩ na riri mũingĩ gũkĩra ĩrĩa yaakĩtwo mbere na njĩra irĩkũ? Na njĩra ta ithatũ ũguo: mĩaka ĩrĩa hekarũ ĩyo yaikarire, ũrĩa warutanĩire thĩinĩ wayo, na arĩa maathiaga gũthathaĩria Jehova kuo. Hekarũ ĩrĩa yaakĩtwo nĩ Suleimani yaikarire mĩaka 420, kuuma mwaka wa 1027 M.K. nginya mwaka wa 607 M.K., no ĩrĩa yaakirũo thutha, na nĩyo ĩretwo “nyũmba ĩno,” yaikarire makĩria ma mĩaka 580, kuuma rĩrĩa yaarĩkire gwakwo mwaka wa 515 M.K., nginya rĩrĩa yaanangirũo mwaka-inĩ wa 70 T.K. Makĩria ma ũguo, Jesu Kristo, ũrĩa nĩwe Mesia, nĩ aarutanĩire thĩinĩ wa “nyũmba ĩno,” na andũ aingĩ nĩ maathiaga gũthathaĩria Ngai kuo gũkĩra arĩa maathiaga ĩrĩa ya mbere.—Atũmwo 2:1-11.
Ũthomi wa Bibilia
(Hagai 2:1-14) Na atĩrĩrĩ, mũthenya wa mĩrongo ĩĩrĩ na ũmwe wa mweri wa mũgwanja-rĩ, Hagai, ũcio mũnabii, agĩkinyĩrĩrũo nĩ ndũmĩrĩri ya Jehova, akĩĩrũo atĩrĩ, 2 Arĩria Zerubabeli wa Shealitieli, barũthi wa Juda, na Joshua wa Jehozadaki, mũthĩnjĩri-Ngai ũrĩa mũnene, o na andũ arĩa othe matigarĩte kuo, ũmere atĩrĩ, 3 Nĩ andũ arĩkũ matigarĩte thĩinĩ wanyu arĩa monire nyũmba ĩno yakwa rĩrĩa yarĩ na riri wayo wa mbere? Na rĩu mũrakĩmĩona ĩhaana atĩa? Githĩ rĩu mũtigũkĩmĩona atĩ ĩhaana o ta kĩndũ gĩtarĩ kĩene? 4 No rĩrĩ, Jehova ekũmwĩra ũũ: Wee Zerubabeli, wĩũmĩrĩrie! Ningĩ o nawe Joshua wa Jehozadaki, mũthĩnjĩri-Ngai ũrĩa mũnene-rĩ, wĩũmĩrĩrie! Ningĩ Jehova ekũmwĩra inyuĩ andũ a bũrũri ũyũ, Wĩũmĩrĩriei na mũrutage wĩra; tondũ niĩ ndĩ hamwe na inyuĩ. Ũguo nĩguo Jehova Mũnene wa Ita ekũmwĩra. 5 Tũũrai mũririkaine kĩrĩkanĩro kĩrĩa twarĩkanĩire na inyuĩ rĩrĩa mwoimire Misiri, o rĩrĩa Roho wakwa aatũire thĩinĩ wanyu, na mũtige gwĩtigĩra. 6 Nĩ gũkorũo Jehova Mũnene wa Ita ekũmwĩra atĩrĩ, Ndigairie hanini ndehe gĩthingithia; nĩ hanini mũno ndigairie ‘thingithie igũrũ na thĩ, na ‘thingithie iria o na thĩ nyũmũ. 7 Nĩngatũma andũ a ndũrĩrĩ ciothe magagaĩrũo nĩ thĩ, nacio indo iria ciĩriragĩrio mũno nĩ ndũrĩrĩ irehwo, nayo nyũmba ĩno yakwa ndĩmĩiyũrie riri mũingĩ. Ũguo nĩguo Jehova Mũnene wa Ita ekuuga. 8 Tondũ-rĩ, betha nĩ ciakwa, o na thahabu nĩ ciakwa o nacio. Ũguo nĩguo Jehova Mũnene wa Ita ekuuga. 9 Ningĩ riri ũrĩa nyũmba ĩno ĩkagĩa naguo nĩũkaneneha, ũingĩhe gũkĩra ũrĩa yarĩ naguo tene. Ũguo nĩguo Jehova Mũnene wa Ita ekuuga. Nakuo kũndũ gũkũ nĩkuo ngaheanagĩra thayũ; ũguo nĩguo Jehova Mũnene wa ita ekuuga. 10 Ningĩ-rĩ, mũthenya wa mĩrongo ĩĩrĩ na ĩna wa mweri wa kenda wa mwaka ũcio wa kerĩ wa gũthamaka kwa Dario-rĩ, Hagai ũcio mũnabii agĩkinyĩrĩrũo nĩ ndũmĩrĩri ya Jehova, akĩĩrũo atĩrĩ, 11 Jehova Mũnene wa Ita egũkwĩra atĩrĩ, Ta hoya athĩnjĩri-Ngai kĩrĩra, ũmorie atĩrĩ, 12 Rĩu-rĩ, mũndũ angĩkorũo akuuĩte nyama nyamũre na ruuno rũa nguo yake, naruo rũhutie mũgate, kana irio cia ngimo, kana ndibei, kana maguta, o na kana rũhutie irio o na irĩkũ-rĩ, kĩndũ kĩu gĩagĩtuĩka ta kĩrĩ kĩamũre? Nao athĩnjĩri-Ngai acio makĩmũcokeria, makiuga, Aca. 13 Ningĩ Hagai akĩmoria atĩrĩ, Ĩ mũndũ angĩkorũo e na thahu nĩ ũndũ wa kũhutia kĩimba kĩa mũndũ, na acoke ahutie kĩndũ o na kĩmwe kĩa indo icio-rĩ, kĩndũ kĩu gĩagĩtuĩka ta kĩgwatĩtio thahu? Nao athĩnjĩri-Ngai acio makĩmũcokeria, makĩmwĩra atĩrĩ, No kĩgĩe na thahu. 14 Nake Hagai akĩmacokeria ũhoro, akiuga atĩrĩ, Jehova egũkĩmwĩra atĩrĩ, Ũguo noguo andũ aya matariĩ, o na rũrĩrĩ rũrũ ruothe noguo rũtariĩ rũkĩonwo nĩ niĩ; ningĩ mawĩra mothe ma moko mao no taguo matariĩ; na ningĩ mahaki ma igongona marĩa marutagĩra hau me na thahu.
DICEMBA 11-17
MŨTHITHŨ KUUMA KIUGO-INĨ KĨA NGAI | ZEKARIA 1-8
‘Nyita Gĩcora kĩa Nguo ya Mũyahudi’
(Zekaria 8:20-22) Ningĩ Jehova Mũnene wa Ita ekuuga ũũ: O na ningĩ nĩgũgakinya atĩrĩ, atĩ gũkũ nĩgũgoka andũ a ndũrĩrĩ ingĩ, o na andũ arĩa matũũraga matũũra maingĩ; 21 nao andũ arĩa matũũraga itũũra-inĩ rĩmwe mathiĩ harĩ andũ a itũũra rĩngĩ makiugaga atĩrĩ, Nĩtũthiĩi na ihenya tũgathaithe Jehova atũtugage, na tũrongorie Jehova Mũnene wa Ita. Nao macokie atĩrĩ, Nĩguo; nĩtũgũtwarana na inyuĩ kuo. 22 Ĩĩ, ti-itherũ andũ a iruka nyingĩ, o na a ndũrĩrĩ irĩ hinya, nĩmagoka kũrongoria Jehova Mũnene wa Ita o gũkũ Jerusalemu, na mathaithe Jehova nĩguo amatugage.
“Rĩu Mwĩ Rũrĩrĩ Rũa Ngai”
14 Anabii erĩ a tene nĩ maarathĩte atĩ matukũ-inĩ marĩa ma kũrigĩrĩria andũ aingĩ nĩ mangĩgooka ũthathaiya-inĩ wa Jehova. Mũnabii Isaia aarathĩte ũũ: “Na irĩndĩ nyingĩ nĩigathiĩ kuo ikiugaga ũũ: Ũkai twambate kĩrĩma-inĩ kĩa Jehova, tũthiĩ nyũmba ya Ngai wa Jakubu, atũrute mĩthiĩre yake, na ithuĩ tũthiage na njĩra ciake; nĩ gũkorũo Zayuni nĩgũkoima ũtaarani, o naguo ũhoro wa Jehova ũhunje uumĩte Jerusalemu.” (Isa. 2:2, 3) Nake mũnabii Zekaria aarathĩte atĩ “andũ a iruka nyingĩ, o na a ndũrĩrĩ irĩ hinya, nĩmagoka kũrongoria Jehova Mũnene wa Ita o gũkũ Jerusalemu, na mathaithe Jehova nĩguo amatugage.” Aaririe ũhoro wao ta arĩ “andũ ikũmi moimĩte ndũrĩrĩ-inĩ iria ingĩ,” arĩa na njĩra ya mũhaano mangĩkanyita gĩcora kĩa nguo ya Aisiraeli a kĩĩroho, makiugaga ũũ: ‘Nĩ tũgũtwarana na inyuĩ, nĩ ũndũ nĩtũiguĩte atĩ Ngai e hamwe na inyuĩ.’—Zek. 8:20-23.
(Zekaria 8:23) Jehova Mũnene wa Ita ekuuga ũũ: Matukũ-inĩ macio nĩgũgakinya atĩrĩ, atĩ andũ ikũmi moimĩte ndũrĩrĩ-inĩ iria ingĩ, o iria irĩ mĩarĩrie yacio mwanya, nĩmakanyita gĩcora kĩa nguo ya mũndũ Mũyahudi, makiugaga atĩrĩ, Nĩtũgũtwarana nawe, nĩ ũndũ nĩtũiguĩte atĩ Ngai e hamwe na inyuĩ.
“Nĩtũgũtwarana Nawe”
4 Angĩkorũo gũtingĩhoteka kũmenya marĩĩtwa ma Aisiraeli othe a kĩĩroho-rĩ, Akristiano a ngʼondu ingĩ mangĩkĩhota atĩa ‘gũtwarana nao’? Bibilia yugaga atĩ andũ acio ikũmi ‘nĩmakanyita gĩcora kĩa nguo ya mũndũ Mũyahudi, makiugaga atĩrĩ, Nĩtũgũtwarana nawe, nĩ ũndũ nĩtũiguĩte atĩ Ngai e hamwe na inyuĩ.’ O na gũtuĩka mũhari ũcio wa Bibilia ũgwetete o Mũyahudi ũmwe, ciugo “nawe” na “hamwe na inyuĩ” ironania nĩ makĩria ma mũndũ ũmwe. Ũndũ ũcio wonanagia atĩ Mũyahudi ũcio ti mũndũ ũmwe no arũgamagĩrĩra gĩkundi kĩa Akristiano aitĩrĩrie maguta marĩ othe. Arĩa a ngʼondu ingĩ nĩ moĩ ũguo, na nĩ matungatagĩra Jehova marĩ hamwe na gĩkundi kĩu. Matirabatara kũmenya marĩĩtwa ma arĩa othe aitĩrĩrie maguta atĩ nĩguo mamarũmĩrĩre marĩ mũndũ ũmwe ũmwe. Bibilia yonanagia atĩ Jesu nĩwe Mũtongoria witũ na nĩ ũndũ ũcio tũtiagĩrĩire kũrũmĩrĩra mũndũ.—Mat. 23:10.
w09 2/15 27 kĩb. 14
“Marũmagĩrĩra Gatũrũme”
14 Jesu Kristo onaga atĩ ũteithio ũrĩa ũheagwo ariũ a Ithe nĩwe ũrateithio. (Thoma Mathayo 25:40.) Nĩ na njĩra ĩrĩkũ arĩa marĩ na kĩĩrĩgĩrĩro gĩa gũgatũũra gũkũ thĩ mangĩteithia ariũ a Ithe na Kristo? Njĩra ĩmwe nene ya kũmateithia nĩ kũnyita itemi wĩra-inĩ wa kũhunjia. (Mat. 24:14; Joh. 14:12) O ũrĩa mĩaka ĩrathiĩ, Akristiano aitĩrĩrie maguta mathiĩte manyihĩte, nao a ngʼondu ingĩ mathiĩte maingĩhĩte. Rĩrĩa arĩa marĩ na kĩĩrĩgĩrĩro gĩa gũgatũũra gũkũ thĩ manyita itemi wĩra-inĩ wa kũhunjia, hihi kũngĩhoteka marĩ ndungata cia mahinda mothe, nĩ mateithagia arĩa aitĩrĩrie maguta kũruta wĩra wa gũtua andũ arutwo. (Mat. 28:19, 20) Ningĩ tũtiagĩrĩirũo kũriganĩrũo nĩ kũmanyita mbaru kũgerera kũruta mĩhothi na njĩra itiganĩte.
Kũmaatha Maũndũ ma Bata Maandĩko-inĩ
(Zekaria 5:6-11) Na niĩ ndĩracoka ndĩramũũria atĩrĩ, Nĩ gĩtũũ kĩu? Nake aranjokeria ũhoro aroiga, Kĩu kĩroka-rĩ, nĩ mwatũ. Ningĩ aroiga atĩrĩ, Ũyũ nĩguo waganu ũrĩa wĩ bũrũri wothe. 7 Na kahinda o kau hengero yaguo ya ngocorai ĩrakĩhingũrũo, ndĩrona mũndũ-wa-nja ũikarĩte mwatũ ũcio thĩinĩ. 8 Na ningĩ aroiga atĩrĩ, Ũyũ nĩwe Nyawaganu; nake aramũikia na kũu mwatũ-inĩ ũcio thĩinĩ, aracoka araũhengera na hengero ĩo ya ngocorai. 9 Ningĩ ndĩratiira maitho rĩngĩ, ndĩracũthĩrĩria, ndĩrona atumia erĩ makiumagara, mareretio nĩ rũhuho, tondũ maarĩ na mathagu ta ma njũũ, nao maracoka maroya mwatũ ũcio maraũhira rĩera-inĩ. 10 Na niĩ ndĩracoka ndĩroria mũraika ũcio tũraaranagĩria nake atĩrĩ, Mwatũ ũcio maraũhira kũ? 11 Nake aranjokeria atĩrĩ, Maathiĩ kũmwakĩra gĩthũnũ bũrũri wa Shinaru; nakĩo gĩaakĩka-rĩ, mamũige kuo, gũtuĩke kũndũ gwake kĩũmbe.
Ũrĩa Cioneki cia Zekaria Ikũhutagia
18 O na kũrĩ ũguo, kĩoneki kĩu ningĩ nĩ kĩaririkanagia Ayahudi itemi rĩrĩa maarĩ narĩo harĩ gũtũũria ũthathaiya wao ũrĩ mũtheru. Waganu ndũngĩrekwo na ndũkarekwo ũtonye na ũtũũre andũ-inĩ a Jehova. Ũmũthĩ Jehova nĩ atũrehete thĩinĩ wa ithondeka rĩake itheru kũrĩa tũiguaga twendetwo na tũgitĩirũo nĩwe, na kwoguo tũrĩ na itemi rĩa kũrĩtũũria rĩrĩ itheru. Hihi nĩ tũtindĩkagwo kũiga “nyũmba” ĩyo itũ ĩrĩ theru? Waganu wa mũthemba o wothe ndũngĩtĩkĩrio paradiso-inĩ itũ ya kĩĩroho.
(Zekaria 6:1) Ningĩ ndĩracoka ndĩratiira maitho rĩngĩ, ndĩracũthĩrĩria ndĩrona ngari cia ita inya ikiuma gatagatĩ-inĩ ka irĩma igĩrĩ; nacio irĩma icio ciarĩ cia gĩcango.
Mbarathi na Tanji nĩ Ikũgitagĩra
7 Thĩinĩ wa Bibilia, irĩma no ikorũo ikĩrũgamĩrĩra mothamaki, kana thirikari. Irĩma iria irĩ thĩinĩ wa kĩoneki gĩa Zekaria nĩ ihaanaine na irĩma igĩrĩ iria igwetetwo nĩ mũnabii Danieli. Kĩrĩma kĩmwe kĩrũgamĩrĩire ũnene wa Jehova na wathani wake wa tene na tene. Kĩrĩma kĩu kĩngĩ kĩrũgamĩrĩire Ũthamaki wa Kĩĩmesia ũgĩtongorio nĩ Jesu. (Dan. 2:35, 45) Kuuma rĩrĩa Jesu aambĩrĩirie gwathana mwaka-inĩ wa 1914, irĩma icio cierĩ ikoretwo kuo na nĩ ikoragwo na itemi rĩa mwanya harĩ kũhingia wendi wa Ngai gũkũ thĩ.
8 Irĩma icio ithondeketwo na gĩcango nĩkĩ? Tondũ o ta thahabu, gĩcango nĩ cuma ya goro mũno. Jehova oigĩte cuma ĩyo ĩhenagia ĩhũthĩrũo gwaka hema ya gũtũnganwo na thutha-inĩ ĩhũthĩrũo hekarũ-inĩ ĩrĩa yarĩ Jerusalemu. (Tham. 27:1-3; 1 Ath. 7:13-16) Nĩ ũndũ ũcio, nĩ ũndũ mwagĩrĩru atĩ gĩcango kĩa irĩma icio igĩrĩ gĩtũririkanagia kwagĩrĩra kwa ũnene wa Jehova na Ũthamaki wa Kĩĩmesia ũrĩa ũkaarehera andũ thayũ na irathimo nyingĩ.
Ũthomi wa Bibilia
(Zekaria 8:14-23) Nĩ ũndũ Jehova Mũnene wa Ita ekuuga ũũ: O ta ũrĩa ndecirĩtie ndĩmwĩke ũũru hĩndĩ ĩrĩa maithe manyu maaʼthirĩkirie makĩngʼũrĩkia, na ngĩaga kwĩricũkwo nĩ ũndũ wa ũhoro ũcio, ũguo nĩguo Jehova Mũnene wa Ita ekuuga, 15 ningĩ no taguo matukũ maya njokete gwĩciria atĩ njĩke Jerusalemu, o na andũ a nyũmba ya Juda o nao, maũndũ mega. Tigai guoya. 16 Maũndũ marĩa mwagĩrĩirũo nĩ gwĩka nĩmo maya, atĩ mwaranagĩrie ũhoro-wa-ma o mũndũ na mũndũ ũrĩa ũngĩ, na mũhinganagĩrie matuĩro ma cira na kĩhooto, nĩguo honeke thayũ ciama-inĩ cianyu iria ciikaraga ihingo-inĩ cianyu; 17 na mũndũ o na ũrĩkũ wanyu ndakanathugundĩre mũndũ ũrĩa ũngĩ maũndũ moru na ngoro yake, na mũtikanende mĩĩhĩtwa ya ũrongo; nĩ ũndũ-rĩ, maũndũ macio mothe nĩmo ‘thũũrĩte; ũguo nĩguo Jehova ekuuga. 18 Ningĩ ndũmĩrĩri ya Jehova Mũnene wa Ita ĩkĩnginyĩrĩra, ngĩĩrũo atĩrĩ, 19 Jehova Mũnene wa Ita ekuuga ũũ: Ũhoro wa kwĩhinga kũrĩa irio mweri wa ĩna, o naguo wa kwĩhinga kũrĩa irio mweri wa ĩtano, o na ningĩ wa kwĩhinga kũrĩa irio mweri wa mũgwanja, o na wa kwĩhinga kũrĩa irio o ro ũguo mweri wa ikũmi-rĩ, mehinga macio makagarũrũka matuĩke ciathĩ cia ndũrũhĩ, na cia gĩkeno, o na cia mũcaũko wa ngoro, harĩ andũ a nyũmba ya Juda; tondũ ũcio rongoragiai ũhoro-wa-ma, o na wa thayũ. 20 Ningĩ Jehova Mũnene wa Ita ekuuga ũũ: O na ningĩ nĩgũgakinya atĩrĩ, atĩ gũkũ nĩgũgoka andũ a ndũrĩrĩ ingĩ, o na andũ arĩa matũũraga matũũra maingĩ; 21 nao andũ arĩa matũũraga itũũra-inĩ rĩmwe mathiĩ harĩ andũ a itũũra rĩngĩ makiugaga atĩrĩ, Nĩtũthiĩi na ihenya tũgathaithe Jehova atũtugage, na tũrongorie Jehova Mũnene wa Ita. Nao macokie atĩrĩ, Nĩguo; nĩtũgũtwarana na inyuĩ kuo. 22 Ĩĩ, ti-itherũ andũ a iruka nyingĩ, o na a ndũrĩrĩ irĩ hinya, nĩmagoka kũrongoria Jehova Mũnene wa Ita o gũkũ Jerusalemu, na mathaithe Jehova nĩguo amatugage. 23 Jehova Mũnene wa Ita ekuuga ũũ: Matukũ-inĩ macio nĩgũgakinya atĩrĩ, atĩ andũ ikũmi moimĩte ndũrĩrĩ-inĩ iria ingĩ, o iria irĩ mĩarĩrie yacio mwanya, nĩmakanyita gĩcora kĩa nguo ya mũndũ Mũyahudi, makiugaga atĩrĩ, Nĩtũgũtwarana nawe, nĩ ũndũ nĩtũiguĩte atĩ Ngai e hamwe na inyuĩ.
DICEMBA 18-24
MŨTHITHŨ KUUMA KIUGO-INĨ KĨA NGAI | ZEKARIA 9-14
“Tũũra ‘Mũkuru-inĩ Ũcio wa Irĩma’”
(Zekaria 14:3, 4) Hĩndĩ ĩo Jehova nĩ kuuma akoimagara arũe mbaara na ndũrĩrĩ icio, o ta ũrĩa aarũire mbaara nacio tene hĩndĩ ya mbaara. 4 Naguo mũthenya ũcio-rĩ, nĩakehanda arũgamĩte Kĩrĩma-inĩ kĩa Mĩtamaiyũ, kĩrĩa kĩngʼetheire Jerusalemu mwena wa irathĩro, nakĩo Kĩrĩma kĩu kĩa Mĩtamaiyũ gĩatũkane na gatagatĩ kuuma o mwena wa irathĩro nginya mwena wa ithũĩro, naho hau gatagatĩ-inĩ gakĩo hagĩe mũriko mũnene ma; naguo mwena ũmwe wa kĩrĩma kĩu ũmomoke ũrorete gathigathini, o naguo mwena ũrĩa ũngĩ wakĩo ũmomoke ũrorete gũthini.
Tũũra Mũkuru-inĩ wa Jehova wa Ũgitĩri
10 Kĩrĩma kĩu kĩa mũhaano gĩatũkana, mwena ũmwe ũgĩthiĩ gathigathini naguo ũcio ũngĩ gũthini-rĩ, magũrũ ma Jehova maatigirwo makinyĩte irĩma icio cierĩ. Hakĩgĩa ‘mũriko kana mũkuru mũnene mũno’ rungu rwa magũrũ ma Jehova. Mũkuru ũcio wa mũhaano ũrũgamĩrĩire ũgitĩri wa Ngai, ũrĩa ndungata cia Jehova ikoragwo naguo rungu rwa ũnene wake wa igũrũ na thĩ na Ũthamaki wa Kĩĩmesia wa Mũrũwe. Jehova egũtigĩrĩra atĩ gũtirĩ hĩndĩ ũthathaiya wa ma ũkaaniinwo. Kĩrĩma kĩu kĩa mĩtamaiyũ gĩatũkanire rĩ? Gĩatũkanire rĩrĩa Ũthamaki wa Kĩĩmesia wahandirũo Mahinda ma Ndũrĩrĩ maathira, mwaka wa 1914. Nĩ rĩ athathaiya a ma maambĩrĩirie kũũrĩra mũkuru-inĩ ũcio wa mũhaano?
(Zekaria 14:5) Na inyuĩ nĩmũkorĩra mũriko-inĩ ũcio wa irĩma ciakwa; nĩ ũndũ-rĩ, mũriko ũcio wa irĩma ciakwa ũgakinya o Azeli; ĩĩ, ti-itherũ nĩ kũũra mũkora o ta ũrĩa mworire mũkĩeherera gĩthingithia gĩa thĩ matukũ ma Uzia, mũthamaki wa Juda; nake Jehova Ngai wakwa nĩagacoka oke, marehanĩte na andũ arĩa othe atheru.
Tũũra Mũkuru-inĩ wa Jehova wa Ũgitĩri
13 Tũngĩĩgwatania na Jehova na twĩhande ũhoro-inĩ wa ma, we na Mũrũwe, Jesu Kristo, nĩ mekũhingia itemi rĩao, na Ngai ndangĩtĩkĩria mũndũ o na ũrĩkũ kana kĩndũ o na kĩrĩkũ ‘gĩtũhurie kuuma moko-inĩ Make.’ (Joh. 10:28, 29) Jehova akoragwo ehaarĩirie gũtũhe ũteithio o wothe ũrĩa tũngĩbatara nĩguo tũhote kũmwathĩkĩra arĩ Mũnene wa Igũrũ na Thĩ na tũtũũre tũrĩ raiya ehokeku a Ũthamaki wa Kĩĩmesia. Nĩ ũndũ wa bata tũtũũre mũkuru-inĩ ũcio wa ũgitĩri, tondũ nĩ tũkabatara ũgitĩri waguo makĩria hĩndĩ ya mĩnyamaro ĩrĩa mĩnene ĩkuhĩrĩirie mũno.
(Zekaria 14:6, 7) Na nĩgũgakinya atĩrĩ, mũthenya ũcio, atĩ gũtikaara wega, no gũtinde gũthimbĩte; 7 naguo nĩũgekũũrana na mĩthenya ĩrĩa ĩngĩ, naguo ũmenyeke nĩ Jehova ũrĩa ũhaana, gũtuĩke atĩ gũtirĩ mũthenya kana ũtukũ; no gũgakinya atĩrĩ, atĩ hwaĩ-inĩ wakinya nĩgũkagĩa ũtheri.
(Zekaria 14:12) Namo matũhũhũ marĩa Jehova akahũra ndũrĩrĩ ciothe iria cianahũrana ita na Jerusalemu namo-rĩ, nĩmo maya; nĩ kũrĩĩka makarĩĩka mĩĩrĩ ĩthire, marũngiĩ na magũrũ mao o ro ũguo, o namo maitho mao mahingare more, mabuthĩire o marima-inĩ mamo, o nacio nĩmĩ ciao cionje irĩĩke, ithirĩre o tũnua-inĩ twao.
(Zekaria 14:15) O na ningĩ matũhũhũ o ta macio magakorerera mbarathi, o na nyũmbũ, o na ngamĩra, o na ndigiri, o na nyamũ ciothe iria igakorũo irĩ kũndũ kũu iraaro-inĩ ciao.
Tũũra Mũkuru-inĩ wa Jehova wa Ũgitĩri
15 Hĩndĩ ya mũthenya wa Ngai wa kũrũa mbaara-rĩ, gũgaathiĩ atĩa harĩ arĩa magaakorũo nja ya ‘mũkuru ũcio mũnene’ wa ũgitĩri? Andũ acio ‘matikaarĩrũo nĩ ũtheri’ kuonania atĩ ti etĩkĩrĩku nĩ Ngai. Hĩndĩ ya mũthenya ũcio wa mbaara, ‘mbarathi, nyũmbũ, ngamĩra, ndigiri, o na nyamũ ciothe’—iria irũgamĩrĩire indo cia ndũrĩrĩ cia mbaara, itigaatigĩrĩrũo. Matharaita macio nĩ makaaninwo, maagithio bata. Ningĩ Jehova nĩ akaahũthĩra mĩrimũ na ‘mahũũra.’ O na kana mahũũra macio nĩ ma biũ kana ca, nĩ makaagithia thũ hinya. Hĩndĩ ĩyo, ‘maitho mao o na nĩmĩ ciao nĩ ikaabutha’ na njĩra ya atĩ matikaahota gũtwĩka ũũru nayo mĩario yao ya ũkararia nĩ ĩgaakirio. (Zek. 14:6, 7, 12, 15) Gũtirĩ gĩcigo gĩa thĩ gĩkaahota gwĩthema iniinana rĩu. Mbũtũ iria ikaarũa irĩ mwena wa Shaitani igaakorũo irĩ nyingĩ mũno. (Kũg. 19:19-21) ‘Nao andũ arĩa makoragithio nĩ Jehova mũthenya ũcio magakorũo magũĩte thĩ kuuma gĩturi kĩmwe kĩayo o nginya kĩrĩa kĩngĩ.’—Jer. 25:32, 33.
Kũmaatha Maũndũ ma Bata Maandĩko-inĩ
(Zekaria 12:3) Na nĩgũgakinya atĩrĩ, mũthenya ũcio, atĩ nĩngatũma Jerusalemu rĩtuĩke o ta rũaro rũa ihiga harĩ ndũrĩrĩ ciothe rũtangĩoeka; nao andũ othe arĩa makageria kũruoya nĩmakeguraria mũno; o nacio ndũrĩrĩ ciothe cia thĩ igakorũo irĩũnganĩire.
w07 12/15 22-23 kĩb. 9-10
Gũtirĩ Mũtĩ wa Mbaara Ũthondeketwo wa Gũgũũkĩrĩra Ũkaagĩrĩra Wĩra-inĩ Waguo
9 Ũrathi wa Zekaria nĩ ũtũteithagia kũmenya kĩrĩa gĩtũmaga ndũrĩrĩ ciũkĩrĩre Akristiano a ma. Zekaria 12:3 yugaga ũũ: “Na nĩgũgakinya atĩrĩ, mũthenya ũcio, atĩ nĩngatũma Jerusalemu rĩtuĩke o ta rũaro rũa ihiga harĩ ndũrĩrĩ ciothe rũtangĩoeka.” Ũrathi ũyũ ũrarĩrĩria Jerusalemu ĩrĩkũ? Ũrathi wa Zekaria wĩgiĩ Jerusalemu ũkoniĩ “Jerusalemu ya igũrũ,” ĩrĩa nĩyo Ũthamaki wa Ngai ũrĩa Akristiano aitĩrĩrie maguta metĩirũo. (Ahibirania 12:22) Mahinda-inĩ maya, no gakundi kanini ka arĩa magathana Ũthamaki-inĩ wa Kĩĩmesia gatigarĩte gũkũ thĩ. Marĩ hamwe na arĩa a “ngʼondu ingĩ” mekĩraga andũ ngoro metĩkĩre Ũthamaki wa Ngai ihinda rĩtanathira. (Johana 10:16; Kũguũrĩrio 11:15) Ndũrĩrĩ ciyũkĩtie rĩĩtana rĩu atĩa? Na Jehova ateithagia athathaiya a ma atĩa mahinda-inĩ maya? Reke tuone macokio tũgĩthiĩ na mbere gũthuthuria Zekaria mũrango wa 12. Gwĩka ũguo gũgũtũma tũkorũo na ma atĩ ‘gũtirĩ mũtĩ wa mbaara ũthondeketwo ũkaagĩrĩra wĩra-inĩ waguo’ kwerekera aitĩrĩrie maguta na arĩa manyitanagĩra nao.
10 Zekaria 12:3 yonanagia atĩ ndũrĩrĩ ‘nĩikeguraria mũno.’ Na njĩra ĩrĩkũ? Ngai oigĩte atĩ no mũhaka ũhoro ũrĩa mwega wa Ũthamaki ũhunjio. Aira a Jehova marutaga wĩra ũcio ũheanĩtwo matarĩ na itherũ. O na kũrĩ ũguo, kũhunjio kwa Ũthamaki arĩ guo tu mwĩhoko wa andũ nĩ gũtuĩkĩte “rũaro rũa ihiga . . . rũtangĩoeka” harĩ ndũrĩrĩ. Igeragia kũrweheria na njĩra ya kũingĩrĩra ahunjia a Ũthamaki, ũndũ ũrĩa ũtũmaga ‘ciĩgurarie mũno,’ igatihangio biũ. O na nĩ methũkĩirie rĩĩtwa nĩ ũndũ wa muoroto wao kũringa ihiga. Matingĩhota gũkiria athathaiya a ma, tondũ nĩ moyaga na ũritũ wĩra wa kũhunjia “ũhoro mwega wa tene na tene” wa Ũthamaki wa Ngai mũico ũtanakinya. (Kũguũrĩrio 14:6) Rĩrĩa mũthigari ũmwe wa njera bũrũri-inĩ ũmwe ũrĩ Afrika onire ũrĩa Aira a Jehova maranyarirũo oigire ũũ: ‘Kũnyarira andũ aya nĩ kũhũũra maĩ na ndĩrĩ. Matingĩkana wĩtĩkio wao. Mathiaga o na mbere kuongerereka.’
(Zekaria 12:7) O na ningĩ Jehova akaamba kũhonokia andũ arĩa matũire hema-inĩ cia Juda, nĩ getha andũ a Juda matigetĩĩrũo nĩ andũ a nyũmba ya Daudi, o na arĩa matũire Jerusalemu.
w07 12/15 25 kĩb. 13
Gũtirĩ Mũtĩ wa Mbaara Ũthondeketwo wa Gũgũũkĩrĩra Ũkaagĩrĩra Wĩra-inĩ Waguo
13 Thoma Zekaria 12:7, 8. Matukũ-inĩ ma Isiraeli ya tene, gwakoragwo na andũ maaikaraga hema-inĩ, na rĩmwe ciahũthagĩrũo nĩ arĩithi na arĩmi. Thũ ingĩokire gũtharĩkĩra itũũra rĩa Jerusalemu, arĩa maaikaraga hema-inĩ icio nĩo mangĩambire gũtharĩkĩrũo na kwoguo nĩo mangĩabatarire kwamba kũgitĩrũo. Ciugo “hema-inĩ cia Juda” ironania atĩ arĩa aitĩrĩrie maguta nĩ ta maikaraga kũndũ gũtarĩ kũirige, no ti matũũra-inĩ marĩa mairige. Marĩ kũu, matetagĩra Ũthamaki wa Kĩĩmesia matarĩ na guoya. Jehova Mũnene wa Ita “akaamba kũhonokia andũ arĩa matũire hema-inĩ cia Juda” tondũ Shaitani akoragwo erekeirie tharĩkĩro ciake harĩ o ĩmwe kwa ĩmwe.
Ũthomi wa Bibilia
(Zekaria 12:1-14) Ũyũ nĩguo ũhoro mũritũ wa Jehova ũrĩa ũkoniĩ Isiraeli. Jehova ekuuga ũũ, o we ũrĩa watambũrũkirie matu-mairũ, o na akĩhanda gĩtina kĩrĩa kĩrũmu gĩa thĩ ĩno, o na akĩũmba roho ũrĩa ũtũũragia mũndũ muoyo. 2 Atĩrĩrĩ, Jerusalemu ngarĩtua ta gĩkombe kĩa ndibei ĩrĩa ĩtũmaga andũ othe arĩa marĩrigicĩirie matũgũge, namo maũndũ macio makahingĩrio Juda hĩndĩ ĩrĩa Jerusalemu rĩgatharĩkĩrũo rĩtunyanwo. 3 Na nĩgũgakinya atĩrĩ, mũthenya ũcio, atĩ nĩngatũma Jerusalemu rĩtuĩke o ta rũaro rũa ihiga harĩ ndũrĩrĩ ciothe rũtangĩoeka; nao andũ othe arĩa makageria kũruoya nĩmakeguraria mũno; o nacio ndũrĩrĩ ciothe cia thĩ igakorũo irĩũnganĩire. 4 Ningĩ Jehova ekuuga atĩrĩ, Mũthenya ũcio ngamakia mbarathi ciothe ndĩcihahũrithie, o nao andũ arĩa mathiaga macihaicĩte ndũme magwatwo nĩ mbũgũigũ; nayo nyũmba ya Juda ndĩmĩkũũrĩre maitho, no mbarathi ciothe cia ndũrĩrĩ ndĩcitue ndumumu. 5 Nao atongoria a Juda meĩre na ngoro ciao atĩrĩ, Andũ arĩa matũũraga Jerusalemu nĩo hinya witũ, nĩ ũndũ wa Jehova Mũnene wa Ita, Ngai wao. 6 Ningĩ mũthenya ũcio-rĩ, nĩngatũma atongoria acio a Juda matuĩke o ta rũgĩo rũiyũire mwaki rũigĩtwo ngũ-inĩ thĩinĩ, o na matuĩke o ta gĩcinga kĩa mwaki gĩĩ thĩinĩ wa itĩa cia ngano; nao nĩmakarĩa ndũrĩrĩ ciothe iria imarigicĩirie na ndwere ciothe macinine, o mwena-inĩ wa guoko kwa ũrĩo, o na wa kwa ũmotho; narĩo Jerusalemu rĩtũũre rĩĩikarĩtie o handũ harĩo kĩũmbe, o kũu Jerusalemu. 7 O na ningĩ Jehova akaamba kũhonokia andũ arĩa matũire hema-inĩ cia Juda, nĩ getha andũ a Juda matigetĩĩrũo nĩ andũ a nyũmba ya Daudi, o na arĩa matũire Jerusalemu. 8 Mũthenya ũcio-rĩ, Jehova nĩakagitĩra andũ arĩa matũũraga Jerusalemu, o nake mũndũ ũrĩa mũhĩnge thĩinĩ warĩo-rĩ, agatuĩka o ta Daudi we mwene, o nayo nyũmba ya Daudi ĩtuĩke o ta Ngai, ĩgĩtuĩke ta mũraika wa Jehova ũrĩa ũmatongoragia. 9 Na nĩgũgakinya atĩrĩ, mũthenya ũcio, atĩ ndũrĩrĩ ciothe iria igokĩrĩra Jerusalemu nĩngacitua cia kũninwo. 10 O na ningĩ nĩngekĩra nyũmba ya Daudi, o na andũ arĩa matũũraga Jerusalemu, ngoro ya gũtugana, o na ya gũthaithana; nao makarora mũndũ ũrĩa maathecire, na mamũrĩrĩre o ta ũrĩa mũndũ arĩragĩra mũriũ wa mũmwe; ningĩ nĩmagethikĩra na ngoro nĩ ũndũ wake, o ta ũrĩa mũndũ ethikagĩra na ngoro nĩ ũndũ wa mwana wa irigithathi. 11 Mũthenya ũcio-rĩ, nĩgũkagĩa kĩrĩro gĩa kĩeha kĩnene mũno Jerusalemu, o ta ũrĩa kwarĩrirũo Hadadi-rimoni, o kũu kĩanda-inĩ kĩa Megidoni. 12 Na nĩgũkarĩragwo na kĩeha bũrũri wothe, o mbarĩ o mbarĩ ĩrĩrage ĩrĩ iiki; mbarĩ ya nyũmba ya Daudi ĩrĩrage ĩrĩ iiki, o na andũ-a-nja ayo marĩ oiki; nayo mbarĩ ya nyũmba ya Nathani ĩrĩ iiki, o na andũ-a-nja ayo marĩ oiki. 13 nayo mbarĩ ya nyũmba ya Lawii ĩrĩ iiki; o na andũ-a-nja ayo marĩ oiki; nayo mbarĩ ya nyũmba ya Shimei ĩrĩ iiki; o na andũ-a-nja ayo marĩ oiki; 14 o nacio mbarĩ iria ingĩ ciothe itigarĩte, o mbarĩ o mbarĩ ĩrĩ iiki, o na andũ-a-nja ayo marĩ oiki.
DICEMBA 25-31
MŨTHITHŨ KUUMA KIUGO-INĨ KĨA NGAI | MALAKI 1-4
“Hihi Kĩhiko Gĩaku nĩ Gĩkenagia Jehova?”
(Malaki 2:13, 14) Na rĩrĩ, kũrĩ ũndũ ũngĩ wa kerĩ mwĩkaga. Mũihũgagia kĩgongona kĩa Jehova na maithori manyu o mũkĩrĩraga na mũkagirĩka, tondũ rĩu nĩaregaga kwamũkĩra mahaki, na akaaga gũkenio nĩ indo iria mũmũrutagĩra. 14 Ningĩ mũũragia atĩrĩ, Hihi aregete nĩ ũndũ kĩ? Gĩtũmi nĩ ũndũ Jehova nĩwe warĩ mũira wanyu, mwĩ na mũtumia waku ũrĩa wahikirie rĩrĩa warĩ mwanake; na rĩu nĩũmũrĩĩrĩire ngʼũũrũ, ũkaaga kũhingia kĩrĩkanĩro kĩanyu nake, o na harĩa arĩ wa kĩruka kĩanyu, na mũtumia waku ũrĩa mwarĩkanĩire nake, o mũkĩĩhĩtanagĩra mĩĩhĩtwa.
jd 125-126 kĩb. 4-5
Reke Mũtũũrĩre wa Famĩlĩ Yaku Ũkenagie Ngai
4 Matukũ-inĩ ma Malaki karine-inĩ ya gatano Mbere ya Kristo, Ayahudi nĩ matiganaga na gĩkĩro kĩnene. Malaki aamerire ũũ: “Jehova nĩwe warĩ mũira wanyu, mwĩ na mũtumia waku ũrĩa wahikirie rĩrĩa warĩ mwanake; na rĩu nĩũmũrĩĩrĩire ngʼũũrũ [na rĩu ndũrĩ mwĩhokeku harĩ we.]” Nĩ ũndũ wa athuri gũkorũo matarĩ ehokeku, atumia arĩa maatigĩtwo nĩ ‘maarĩraga na maakagirĩka,’ nginya makaihũgia kĩgongona kĩa Jehova na maithori. Nao athĩnjĩri-Ngai arĩa mataarĩ ehokeku nĩ maarekagĩrĩria maũndũ macio mathiĩ na mbere!—Malaki 2:13, 14.
5 Jehova onaga atĩa muonere ũcio mũũru kwerekera kĩhiko ũrĩa warĩ kuo matukũ-inĩ ma Malaki? Malaki aandĩkire ũũ: “Jehova Ngai wa Isiraeli ekũmwĩra atĩrĩrĩ, ndigano ya mũndũ na mũtumia nĩndĩmĩthũũrĩte.” Agĩcoka akiuga atĩ Jehova ‘ndagarũrũkaga.’ (Malaki 2:16; 3:6) Eendaga kuuga atĩa? Mbere ĩyo Ngai nĩ onanĩtie atĩ ndendaga mũthuri na mũtumia matigane. (Kĩambĩrĩria 2:18, 24) Na noguo kwarĩ matukũ-inĩ ma Malaki. Na mahinda-inĩ maya noguo kũrĩ. Andũ amwe no matue itua rĩa gũtigana na ũrĩa mahikanĩtie nake atĩ tondũ tu matirakenio nĩwe. Jehova nĩ athuthuragia ngoro, na ũhinga o wothe mũndũ angĩkorũo ahithanĩtie ngoro-inĩ nĩ awonaga. (Jeremia 17:9, 10) O na mũndũ angĩgeria gũtetera ũndũ ũcio atĩa, Jehova nĩ onaga maheeni kana wara ũrĩa mũndũ athugundĩte atĩ nĩguo atige ũrĩa mahikanĩtie nake. “Gũtirĩ kĩũmbe o na kĩmwe gĩkoragwo kĩhithĩtwo maitho-inĩ make, no maũndũ mothe makoragwo marĩ njaga na marĩ maguũrie maitho-inĩ ma ũrĩa ũgaatũcirithia.”—Ahibirania 4:13.
(Malaki 2:15, 16) Gũtirĩ mũndũ o na ũmwe ũngĩeta gwĩka ũguo mwĩkĩte, angĩkorũo atigarĩtie roho wa ma thĩinĩ wake. Rĩu gũgĩtariĩ atĩa? Hihi nĩgũgĩtigarĩte mũndũ o na ũmwe wanyu ũrĩa ũtanyĩte gũciara ciana na kĩhooto, o iria igetigĩra Ngai? Tondũ ũcio wĩmenyererei maroho-inĩ manyu, nĩguo mũndũ ndakananyarare mũtumia wake ũcio aahikirie e mwanake. 16 Ningĩ Jehova Ngai wa Isiraeli ekũmwĩra atĩrĩrĩ, Ndigano ya mũndũ na mũtumia nĩndĩmĩthũũrĩte, o na ngathũũra ũhoro wa kwĩhumba ũhinya ta arĩ nguo; ũguo nĩguo Jehova Mũnene wa Ita ekuuga. Tondũ ũcio wĩmenyererei maroho-inĩ manyu, mũtigekanage maũndũ ma ũrĩa-ngʼũũrũ.
w02 5/1 18 kĩb. 19
Jehova nĩ Athũire Wagi wa Wĩhokeku
19 Ũndũ ũrĩa mwega nĩ atĩ, Malaki nĩ onanirie atĩ athuri amwe maarĩ ehokeku harĩ atumia ao. Nĩ ‘maatigarĩtie roho wa ma thĩinĩ wao.’ (Mũhari wa 15) Nĩ gĩkeno kĩnene kuona atĩ ithondeka rĩa Jehova nĩ rĩkoragwo na athuri aingĩ ta acio arĩa ‘maheaga atumia ao gĩtĩo.’ (1 Petero 3:7) Matihũraga kana makaruma atumia ao, matimatindĩkagĩrĩria ngomanio-inĩ itarĩ na gĩtĩo, na matimagagĩra gĩtĩo na njĩra ya gũthakĩra atumia angĩ kĩĩwendo kana kwĩrorera ponografĩ. Ningĩ ithondeka rĩa Jehova nĩ rĩkoragwo na atumia aingĩ ahiku arĩa makoragwo marĩ ehokeku harĩ Ngai na mawatho make. Arũme na atumia acio nĩ moĩ maũndũ marĩa Ngai athũire, na meciragia na mageka kũringana na muonere wa Ngai. Thiĩ na mbere gwĩkaga tao, ‘wathĩkagĩre Ngai arĩ we mũtongoria’ na nĩ arĩkũrathimaga na roho wake mũtheru.—Atũmwo 5:29.
Kũmaatha Maũndũ ma Bata Maandĩko-inĩ
(Malaki 1:10) Na arĩ korũo he mũndũ wanyu ũngĩmũhingĩra mĩrango, mũtigaakie mwaki kĩgongona-inĩ gĩakwa tũhũ! Niĩ-rĩ, ndikenetio nĩ inyuĩ o na atĩa, o na hatirĩ hingo ingĩamũkĩra indo iria mũndutagĩra na moko manyu. Ũguo nĩguo Jehova Mũnene wa Ita ekuuga.
w07 12/15 27 kĩb. 1
Matemo Kuuma Ibuku-inĩ rĩa Malaki
1:10. Jehova ndaakenagio nĩ magongona ma athĩnjĩri-Ngai akoroku arĩa maarĩhagia nginya gwĩka tũmaũndũ tũhũthũ ta kũhinga mĩrango kana gwakia mwaki wa kĩgongona. Na githĩ ti ũndũ wa bata mũno gũtigĩrĩra atĩ maũndũ marĩa twĩkaga ũthathaiya-inĩ witũ, arĩ hamwe na marĩa twĩkaga tũrĩ ũtungata-inĩ, tũmekaga nĩ ũndũ wa kwenda Ngai na andũ arĩa angĩ no ti ũndũ wa kwĩguna kĩĩmbeca!—Mathayo 22:37-39; 2 Akorintho 11:7.
(Malaki 3:1) Atĩrĩrĩi, nĩngũtũma mũrekio wakwa, nake aʼthondekithĩrie kĩngʼaratua gĩakwa. Nake Mwathani, ũcio mũtũire mũũragĩrĩria, nĩakaguthũka na ihenya, atonye hekarũ-inĩ yake thĩinĩ. O na ningĩ, mũrekio ũrĩa mũiguithania-wa-kĩrĩkanĩro, o we ũrĩa mũkenagio nĩwe, nĩagoka o nake. Ũguo nĩguo Jehova Mũnene wa Ita ekuuga.
“Ndĩ Hamwe na Inyuĩ Mĩthenya Yothe”
5 Mĩaka mĩingĩ mbere ya Jesu kũheana ngerekano ya ngano na thawani, Jehova nĩ eerĩte mũnabii wake Malaki arathe maũndũ marĩa maacokire kuonanio nĩ ngerekano ĩyo ya Jesu. (Thoma Malaki 3:1-4.) Johana Mũbatithania nĩwe warĩ ‘mũrekio ũrĩa wathondekire njĩra.’ (Mat. 11:10, 11) Rĩrĩa okire mwaka wa 29, ihinda rĩa gũtuĩrũo kwa rũrĩrĩ rwa Isiraeli nĩ rĩakuhĩrĩirie. Jesu nĩwe warĩ mũrekio wa kerĩ. Kĩambĩrĩria-inĩ na mũico-inĩ wa ũtungata wake gũkũ thĩ nĩ aatheririe hekarũ ĩrĩa yarĩ Jerusalemu. (Mat. 21:12, 13; Joh. 2:14-17) Kwoguo, wĩra wa Jesu wa gũtheria hekarũ nĩ woire ihinda.
6 Ũrathi wa Malaki wahingire na njĩra nene atĩa? Mbere ya 1914, C. T. Russell na arĩa maanyitanagĩra nao meekire o ta Johana Mũbatithania. Ũndũ ũmwe meekire nĩ kũguũria ma cia Bibilia. Arutwo acio a Bibilia nĩ maarutanire ma ĩgiĩ igongona rĩa ũkũũri rĩa Kristo, makĩonania atĩ ũrutani wa mwaki wa tene na tene nĩ wa maheeni, na makĩonania atĩ Mahinda ma Ndũrĩrĩ maarĩ hakuhĩ gũthira. O na kũrĩ ũguo-rĩ, no kwarĩ na ikundi nyingĩ cia kĩĩndini cieĩtaga arũmĩrĩri a Kristo. Nĩ ũndũ ũcio, kĩũria gĩkĩ kĩa bata nĩ kĩabataraga macokio: Gatagatĩ ga ikundi icio nĩ kĩrĩkũ kĩarĩ mũhaano wa ngano? Nĩguo ũndũ ũcio ũmenyeke, Jesu nĩ aambĩrĩirie gũthuthuria hekarũ ya kĩĩroho mwaka wa 1914. Wĩra ũcio wa gũthuthuria na gũtheria hekarũ nĩ woire ihinda, kuuma mwaka wa 1914 nginya kĩambĩrĩria kĩa mwaka wa 1919.
Ũthomi wa Bibilia
(Malaki 1:1-10) Ũyũ nĩguo ũhoro ũrĩa mũritũ ũrĩa Jehova aaheire Aisiraeli na kanua ka Malaki. 2 Jehova ekuuga atĩrĩ, Inyuĩ nĩndĩmwendete. No inyuĩ mũũragia atĩrĩ, Ũtwendete atĩa? Nake Jehova agacoka akamũũria atĩrĩ, Githĩ Esau ndaarĩ mũrũ wa nyina na Jakubu? No nĩ Jakubu ndendete, 3 na Esau ngamũthũũra, ngagĩtũma ngʼongo ciake ikire ihooru, narĩo igai rĩake ngarĩhe mbwe cia werũ-inĩ. 4 Na rĩrĩ, o na Aedomu mangiuga atĩrĩ, Ti-itherũ tũrĩ aite mũito, no tũtirĩ hingo tũtagacoka gwaka kũndũ kũrĩa kwanangĩkĩte-rĩ, Jehova Mũnene wa Ita ekuuga ũũ; Gwaka nĩmagaaka, no niĩ nĩ gwakũra ngaakũra; nao metwo Bũrũri wa waganu, ningĩ metwo Andũ athũgũtĩre nĩ Jehova tene na tene. 5 Na inyuĩ nĩmũkeyonera ũhoro ũcio, na muuge atĩrĩ, Jehova arotũũra atũũgĩrĩtio na kũu mbere ya mĩhaka ya Isiraeli. 6 Ningĩ Jehova Mũnene wa Ita ekũmwĩra ũũ, inyuĩ athĩnjĩri-Ngai mũmenagĩrĩria rĩĩtwa rĩakwa; Atĩrĩrĩ, githĩ mwanake ti gũtĩa atĩaga ithe, o nayo ndungata ĩgatĩa mũmĩathi? No rĩrĩ, o na ndakorũo ndĩ mũciari-rĩ, gĩtĩo gĩakwa gĩkĩrĩ ha? Ningĩ ndagĩkorũo ndĩ mwathani-rĩ, gwĩtigĩrũo gwakwa gũkĩrĩ kũrĩkũ? No inyuĩ mũũragia atĩrĩ, Tũmenereirie rĩĩtwa rĩaku atĩa? 7 Githĩ mũtindutagĩra irio irĩ thahu kĩgongona-inĩ gĩakwa? Na mũgacoka kũnjũria atĩrĩ, Tũkũgwatĩtie thahu na kĩ? Githĩ ti gũtua mũtuĩte atĩ metha ya Jehova nĩ nyararĩkũ? 8 Tondũ rĩrĩa mũndutagĩra nyamũ ndumumu ituĩke cia ihaki, muugaga Hatirĩ ũũru! o na rĩrĩa mũkũndutĩra nyamũ iria ithua, o na iria ndũaru, muugaga Hatirĩ ũũru! Mũngĩrutĩra barũthi wanyu mahaki ta macio-rĩ, aamũkenera hihi? Kana hihi aamwamũkĩra? Ũguo nĩguo Jehova Mũnene wa Ita ekũmũũria. 9 Na rĩu ndakĩmũthaitha mũthathaiye Ngai, nĩguo atũtugage. Aakĩhota atĩa kũmwĩtĩkĩra mũmũrutĩire indo ta icio? Ũguo nĩguo Jehova Mũnene wa Ita ekũũria. 10 Na arĩ korũo he mũndũ wanyu ũngĩmũhingĩra mĩrango, mũtigaakie mwaki kĩgongona-inĩ gĩakwa tũhũ! Niĩ-rĩ, ndikenetio nĩ inyuĩ o na atĩa, o na hatirĩ hingo ingĩamũkĩra indo iria mũndutagĩra na moko manyu. Ũguo nĩguo Jehova Mũnene wa Ita ekuuga.