Mabuku na Maandĩko Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
AGOSTI 5-11
MŨTHITHŨ KUUMA KIUGO-INĨ KĨA NGAI | 2 TIMOTHEO 1-4
“Ngai Ndaatũheire Roho wa Guoya”
w09 5/15 15 kĩb. 9
Andũ Ethĩ—Rekei Gũkũra Kwanyu Kuonekage
9 Nĩguo Paulo ateithie Timotheo, aacokire akĩmũririkania ũũ: “Ngai ndaatũheire roho wa guoya, no aatũheire roho wa hinya na wa wendo na wa meciria mega.” (2 Tim. 1:7) Gũkorũo na “meciria mega” kũhutanĩtie na gũkorũo na ũhoti wa gwĩciria na gũthathaũra maũndũ wega. Nĩ hamwe na ũhoti wa kũhiũrania na maũndũ ũrĩa matariĩ, no ti ũrĩa ũngĩenda makorũo mahaana. Andũ amwe ethĩ arĩa matakũrĩtie ũhoti wa gwĩciria monanagia roho wa guoya na makageria kweheria meciria mao maũndũ-inĩ marĩa maramathĩnia na njĩra ya gũkoma kana kwĩrorera TV gũkĩria gĩthimi, kũnyua njohi kana kũhũthĩra ndawa cia kũrebia, gũthiaga ndĩa-inĩ kaingĩ, kana kwĩingĩria ngomanio-inĩ itagĩrĩire. Akristiano mekĩrĩtwo ngoro “kũregana na maũndũ marĩa matakenagia Ngai, na merirĩria ma thĩ, na gũtũũra [marĩ] na meciria mega na ũthingu na wĩrutĩri Ngai mũtabarĩre-inĩ ũyũ wa maũndũ.”—Tit. 2:12.
‘Gĩa na Ũmĩrĩru na Ũgĩe na Hinya!’
7 Paulo akĩandĩkĩra Timotheo ooigire ũũ: “Ngai ndaatũheire roho wa guoya, no aatũheire roho wa hinya . . . Nĩ ũndũ ũcio, ndũgaconokagĩre ũira wĩgiĩ Mwathani.” (2 Timotheo 1:7, 8; Mariko 8:38) Thutha wa gũthoma ciugo icio, no twĩyũrie ũũ: ‘Hihi niĩ nĩ njonokagĩra wĩtĩkio wakwa, kana nĩ ngoragwo na ũmĩrĩru? Kũrĩa ndutaga wĩra (kana cukuru ĩrĩa thomagĩra-rĩ), hihi nĩ ndekaga arĩa tũkoragwo nao mamenye atĩ ndĩ Mũira wa Jehova, kana nĩ ngeragia kũhithĩrĩra ũndũ ũcio? Hihi nĩ njonokagĩra gũkorũo ndĩ ngũrani na andũ arĩa angĩ, kana nĩ ndĩrahagĩra gũkorũo ndĩ ngũrani nĩ ũndũ wa ũrata wakwa na Jehova?’ Angĩkorũo mũndũ nĩ aiguaga ategũkenio nĩ kũhunjia ũhoro mwega kana gũkorũo na mũrũgamo ngũrani na wa andũ arĩa angĩ, agĩrĩirũo kũririkana ũtaaro ũyũ Jehova aaheire Joshua: “Gĩa na ũmĩrĩru na ũgĩe na hinya.” Ndũkanariganĩrũo atĩ mawoni ma Jehova na ma Jesu Kristo nĩmo ma bata no ti mawoni ma arĩa mũrutaga wĩra nao kana arĩa mũthomaga nao.—Agalatia 1:10.
Kũmaatha Maũndũ ma Bata Maandĩko-inĩ
Gwetha Ũtonga Ũrĩa wa Ma
13 Timotheo aarĩ mũndũ warĩ na wĩtĩkio. Thutha wa Paulo gwĩta Timotheo “mũthigari mwega wa Kristo Jesu,” ongereire ũũ: “Gũtirĩ mũthigari wĩingĩragia biacara-inĩ cia ũtũũro, tondũ nĩ arenda gwĩtĩkĩrũo nĩ ũrĩa wamũtuire mũthigari.” (2 Tim. 2:3, 4) Arũmĩrĩri a Jesu ũmũthĩ, arĩa nĩ hamwe na mbũtũ ya ndungata cia mahinda mothe makĩria ma milioni ĩmwe, nĩ mahũthagĩra ũtaaro ũcio wa Paulo kũringana na ũrĩa maũndũ mao mekũmetĩkĩria. Nĩ methemaga kũhenererio nĩ andũ arĩa magaathagĩrĩria indo o hamwe na thĩ ĩrĩa ĩmathiũrũrũkĩirie na makaririkanaga ũtaaro ũyũ: “Muohori nĩ ngombo ya mũmuohoreri.” (Thim. 22:7) Gĩkeno gĩa Shaitani nĩ kuona tũkĩhũthĩra mahinda maitũ mothe na hinya witũ wothe gũtungata tũrĩ ngombo cia biacara cia thĩ ĩno yake. Matua mamwe no matũme tũtũũre tũrĩhaga mathiirĩ mĩaka mĩingĩ. Mathiirĩ marĩa moimanaga na kũgũra nyũmba nene, gĩthomo kĩa igũrũ, kũgũra ngari ya goro, kana gwĩka ũhiki mũnene no matũme tũgĩe na mathĩna manene ma kĩĩmbeca. Nĩ tuonanagia ũũgĩ rĩrĩa twahũthia ũtũũro witũ na twanyihia mathiirĩ o hamwe na mahũthĩro maitũ, nĩguo tũkorũo na wĩyathi wa gũtuĩka ngombo cia Ngai handũ ha ngombo cia biacara cia thĩ ĩno.—1 Tim. 6:10.
Andũ a Jehova ‘Nĩ Matiganaga na Maũndũ Marĩa Matarĩ ma Ũthingu’
10 Mahinda-inĩ maya, ti maita maingĩ gũkoragwo na ũregenyũki kĩũngano-inĩ. O na kũrĩ ũguo, tũngĩcemania na morutani mataratwarana na ũrutani wa Bibilia o na angĩkorũo moimĩte kĩhumo-inĩ kĩrĩkũ, twagĩrĩirũo kuoya ikinya rĩa na ihenya kũregana namo. Ti ũndũ wa ũũgĩ gũkararania na aregenyũki ĩmwe kwa ĩmwe, kwaranĩria nao intaneti-inĩ, kana na njĩra ĩngĩ o yothe. O na angĩkorũo muoroto witũ nĩ gũteithia mũndũ ta ũcio, ndeereti itũ nake ĩngĩkorũo ĩrĩ mũgarũ na ũtongoria wa Maandĩko ũrĩa twarĩrĩria. Ithenya rĩa ũguo, ithuĩ andũ a Jehova twĩthemaga biũ, na tũkaregana na ũregenyũki.
Andũ a Jehova ‘Nĩ Matiganaga na Maũndũ Marĩa Matarĩ ma Ũthingu’
3 Ta wĩcirie ũhoro wa Maandĩko marĩa Paulo aarutire ciugo iria aahũthĩrire thĩinĩ wa 2 Timotheo 2:19. Aagwetire “gĩtina kana mũthingi ũrĩa mũrũmu wa Ngai” agĩcoka akĩgweta maũndũ merĩ marĩa maandĩkĩtwo igũrũ rĩaguo. Ũndũ wa mbere nĩ atĩ, ‘Jehova nĩ amenyaga arĩa marĩ ake’ na hatarĩ nganja ciugo icio irutĩtwo thĩinĩ wa Ndari 16:5. (Rora gĩcunjĩ kĩrĩa kĩhĩtũku.) Ũndũ wa kerĩ naguo nĩ, ‘Mũndũ o wothe ũgwetaga rĩĩtwa rĩa Jehova nĩ atiganage na maũndũ marĩa matarĩ ma ũthingu.’ Andũ amwe matikoretwo magĩtaũkĩrũo wega nĩ ciugo icio. Nĩkĩ?
4 Ũrĩa Paulo aagwetire ciugo icio wonanagia ta aacirutĩte handũ hangĩ. O na kũrĩ ũguo, thĩinĩ wa Maandĩko ma Kĩhibirania hatirĩ handũ hakoragwo na ciugo iringanaga na icio cia Paulo. Gũkĩrĩ ũguo-rĩ, Paulo aaragia ũhoro wa kĩĩ rĩrĩa oigire, ‘Mũndũ o wothe ũgwetaga rĩĩtwa rĩa Jehova nĩ atiganage na maũndũ marĩa matarĩ ma ũthingu’? Kahinda kanini mbere ya kwaria ciugo icio, nĩ aagwetete ciugo iria aarutĩte thĩinĩ wa Ndari mũrango wa 16, ũrĩa waragĩrĩria ũhoro wa ũremi wa Kora. Hihi no kũhoteke atĩ o naguo ũndũ ũcio wa kerĩ nĩ ũkonainie na maũndũ marĩa meekĩkire hĩndĩ ya ũremi ũcio?
5 Bibilia yugaga atĩ ariũ a Eliabu, Dathani na Abiramu, nĩ maanyitanĩire na Kora gũtongoria harĩ kũremera Musa na Haruni. (Ndar. 16:1-5) Nĩ maagĩire Musa gĩtĩo na magĩkararia ũtongoria ũrĩa aahetwo nĩ Jehova. Aremi acio maathiire o na mbere gũikara thĩinĩ wa andũ ehokeku a Jehova, na ũcio warĩ ũgwati tondũ nĩ mangĩamathũkirie kĩĩroho. Rĩrĩa mũthenya wakinyire wa Jehova kuonania ngũrani gatagatĩ ka athathaiya ake ehokeku na aremi acio, nĩ eerire andũ ake ehokeku ũrĩa maagĩrĩirũo nĩ gwĩka.
6 Jehova eerire Musa ũũ: “Aria na kĩrĩndĩ gĩkĩ gĩothe ũkĩĩre ũũ: Ũkĩrai mwehere hau gĩikaro-inĩ gĩa Kora, na Dathani, o na Abiramu.” Musa marĩ na athuri a Isiraeli magĩcoka magĩthiĩ harĩ Dathani na Abiramu. Musa akĩĩra kĩrĩndĩ ũũ: “Ndamũthaitha mũthiĩ mwehere haha hema-inĩ cia andũ aya aaganu, na mũtikanahutie kĩndũ o na kĩmwe kĩao, nĩ getha mũtikaninanĩrio nao nĩ ũndũ wa mehia mao mothe. Tondũ ũcio magĩkĩehera makiuma mĩena-inĩ yothe ya gĩikaro kĩu gĩa Kora, na Dathani, na Abiramu.” (Ndar. 16:23-27) Na hĩndĩ o ĩyo, Jehova akĩũraga arĩa othe maamũremeire. Ĩndĩ, andũ ehokeku arĩa maareganire na maũndũ marĩa matarĩ ma ũthingu na njĩra ya kweherera aremi acio, nĩ maahonokirio.
7 Rĩrĩa Paulo aandĩkire atĩ ‘Jehova nĩ amenyaga arĩa marĩ ake’ thĩinĩ wa 2 Timotheo 2:19, aarutĩte ciugo icio thĩinĩ wa Ndari 16:5. Na rĩrĩa oigire atĩ ‘Mũndũ o wothe ũgwetaga rĩĩtwa rĩa Jehova nĩ atiganage na maũndũ marĩa matarĩ ma ũthingu,’ no kũhoteke aragia ũhoro wa maũndũ marĩa maandĩkĩtwo thĩinĩ wa Ndari 16:5, 23-27. Nĩ ũndũ ũcio, no tuuge atĩ maũndũ macio merĩ aagwetire marĩrĩirie o ũndũ ũmwe. Tũreruta atĩa kuumana na maũndũ macio merĩ? Tũreruta atĩ Jehova nĩ athomaga ngoro. Nĩ amenyaga ndungata ciake iria njĩhokeku, na akerĩgĩrĩra cikarage ciĩyeheranĩtie na andũ arĩa aganu.
AGOSTI 12-18
MŨTHITHŨ KUUMA KIUGO-INĨ KĨA NGAI | TITO 1–FILEMONA
“Amũra Athuri”
Ciũria Kuuma Kũrĩ Athomi
O na gũtuĩka Maandĩko matitaaragĩria maũndũ mothe megiĩ ũrĩa andũ maamũragwo hĩndĩ ĩyo, harĩ maũndũ mangĩtũteithia kuona ũrĩa ũndũ ũcio wekagwo. Bibilia ĩtwĩraga atĩ rĩrĩa Paulo na Baranaba maacokaga mũciĩ moimĩte rũgendo-inĩ rwao rwa mbere rwa ũmishonarĩ, maatigire ‘mathuura andũ a gũtuĩka athuri makanitha-inĩ mothe, na maahoya Ngai makĩĩgiragia kũrĩa irio, makĩmatigĩra Mwathani o we mehokete.’ (Atũm. 14:23) Mĩaka ĩigana ũna thutha ũcio, akĩandĩkĩra Tito ũrĩa maagendaga nake, aamwĩrire ũũ: ‘Gĩtũmi kĩrĩa gĩatũmire ngũtige o kũu Kirete nĩ atĩ ũtabaragĩre maũndũ marĩa maatigaire matarĩ matabarĩre, na ũthurage o itũũra athuri o ta ũrĩa ndatigire ndakwĩra.’ (Tit. 1:5) O ũndũ ũmwe na ũcio, Timotheo ũrĩa maagendaga kũndũ kũingĩ marĩ na mũtũmwo Paulo nĩ kuonekaga atĩ o nake nĩ aahetwo wĩra ũcio. (1 Tim. 5:22) Kwoguo kũroneka wega atĩ andũ maamũragwo nĩ arori arĩa maagendaga, no ti atũmwo na athuri arĩa maaikaraga Jerusalemu.
Gĩkĩrũmĩrĩra kĩonereria kĩu kĩrĩ thĩinĩ wa Bibilia, Kĩama Kĩrĩa Gĩtongoragia kĩa Aira a Jehova nĩ kĩonete arĩ wega kũgarũrĩra ũrĩa athuri na ateithia a ũtungata makoretwo makĩamũrũo. Kwambĩrĩria Septemba 1, 2014, mũtaratara ũrĩa ũrĩrũmagĩrĩrũo harĩ kũmaamũra nĩ ũyũ: Mũrori wa mũthiũrũrũko nĩ arĩroraga na ũbarĩrĩru ũhoro wĩgiĩ arĩa athuri marenda maamũrũo thĩinĩ wa mũthiũrũrũko wake. Rĩrĩa athiĩ gũceerera ciũngano, nĩ arĩgeragia kũmenya andũ acio na akarutithania wĩra nao ũtungata-inĩ kũngĩhoteka. Thutha wa kwarĩrĩria hamwe na ciama cia athuri ũhoro wĩgiĩ arĩa mekwamũrũo, ũrĩkoragwo ũrĩ wĩra wa mũrori wa mũthiũrũrũko kwamũra athuri na ateithia a ũtungata ciũngano-inĩ iria irĩ thĩinĩ wa mũthiũrũrũko wake. Na njĩra ĩyo, mũbango ũcio ũrĩkoragwo ũtariĩ hakuhĩ o ta ũrĩa gwekagwo hĩndĩ ya karine ya mbere.
Nĩa makoragwo na itemi mũbango-inĩ ũcio wa kwamũra? Hingo ciothe wĩra wa kũhe andũ a nyũmba ya Mwathani irio ũkoragwo ũrĩ wa “ngombo ĩrĩa ĩĩhokekete na njũgĩ.” (Mat. 24:45-47) Wĩra ũcio ũhutĩtie gũthuthuria Maandĩko kũgerera ũteithio wa roho mũtheru, nĩguo ĩheane ũtongoria wa Kĩĩmandĩko ũrĩa wagĩrĩire kũrũmĩrĩrũo nĩ kĩũngano gĩa thĩ yothe. Ningĩ ngombo ĩrĩa ĩĩhokekete nĩyo yamũraga arori othe a mũthiũrũrũko na arĩa makoragwo thĩinĩ wa Kamĩtĩ ya Wabici ya Rũhonge. Nayo wabici o yothe ya rũhonge ĩgateithĩrĩria harĩ kuonania ũrĩa ũtongoria wa ngombo ĩrĩa ĩĩhokekete ũngĩhũthĩrũo. Kĩama o gĩothe gĩa athuri kĩagĩrĩirũo nĩ gũthuthuria biũ ariũ a Ithe witũ arĩa kĩrenda maamũrũo thĩinĩ wa kĩũngano kĩa Ngai, nĩguo gĩtigĩrĩre atĩ nĩ magĩrĩire kũringana na Maandĩko. Nake mũrori wa mũthiũrũrũko ehokeirũo wĩra mũritũ wa gũthuthuria wega na njĩra ya mahoya igũrũ rĩgiĩ ũhoro ũrĩa ahetwo nĩ athuri a kĩũngano wĩgiĩ mũndũ ũrĩa marenda amũrũo, agacoka akaamũra arĩa magĩrĩire.
Kũmaatha Maũndũ ma Bata Maandĩko-inĩ
w89 5/15 31 kĩb. 5
Ciũria Kuuma Kũrĩ Athomi
Hatarĩ nganja Paulo ti gwĩtĩkanĩria eetĩkanagĩria na mũthutũkanio ũrĩa warĩ kuo wa kĩĩndũrĩrĩ kwerekera andũ a Kirete. No tũkorũo na ma na ũndũ ũcio tondũ Paulo nĩ aamenyaga atĩ thĩinĩ wa Kirete nĩ kwarĩ na Akristiano ega arĩa Ngai aaitĩrĩirie maguta kũgerera roho wake na magetĩkĩrĩka harĩ we. (Atũmwo 2:5, 11, 33) Kwarĩ na Akristiano a kũigana gũthondeka ciũngano “thĩinĩ wa itũũra rĩmwe nginya rĩrĩa rĩngĩ.” O na gũtuĩka Akristiano acio matiarĩ akinyanĩru, no tũkorũo na ma atĩ matiarĩ aheenania kana andũ akoroku matendaga kũruta wĩra, tondũ korũo nĩguo maatariĩ matingĩathire na mbere gwĩtĩkĩrĩka harĩ Jehova. (Afilipi 3:18, 19; Kũguũrĩrio 21:8) Na o ta ũrĩa tuonaga ũmũthĩ thĩinĩ wa ndũrĩrĩ ciothe, no kũhoteke thĩinĩ wa Kirete kwarĩ na andũ maarĩ na ngoro njega, arĩa maakoragwo mehaarĩirie gwĩtĩkĩra ndũmĩrĩri ĩrĩa yahunjagio nĩ Akristiano na nĩ maaiguaga ũũru mona andũ marĩ na mĩtugo mĩũru arĩa maamathiũrũrũkĩirie.—Ezekieli 9:4; Atũmwo 13:48.
w08 10/15 31 kĩb. 4
Matemo Kuuma Ibuku rĩa Tito, Filemona, na Ahibirania
15, 16—Nĩ kĩĩ gĩatũmire Paulo age kwĩra Filemona arekererie Onesimo akorũo na wĩyathi? Paulo ndeendaga kweheria meciria make wĩra-inĩ ũrĩa aahetwo wa ‘kũhunjia ũhoro wĩgiĩ Ũthamaki wa Ngai na kũrutana ũhoro wĩgiĩ Mwathani Jesu Kristo.’ Kwoguo nĩkĩo aathuurire kwaga kwĩingĩrania na maũndũ megiĩ mĩtũũrĩre ya andũ, ta ũhoro wĩgiĩ ũkombo.—Atũmwo 28:31.
AGOSTI 19-25
MŨTHITHŨ KUUMA KIUGO-INĨ KĨA NGAI | AHIBIRANIA 1–3
“Endaga Ũthingu, na Ũthũũrage Uuni-Watho”
Goocai Kristo, Mũthamaki ũrĩ Riri!
8 Jehova aatuire Mũriũ wake Mũthamaki wa Ũthamaki wa Kĩĩmesia kũrĩa igũrũ mwaka wa 1914. Tondũ “mũthĩgi” ũrĩa Jesu ‘athamakaga naguo nĩ mũthĩgi ũrĩ ũgerereri-rĩ,’ tũrĩ na ma biũ atĩ hingo ciothe wathani wake nĩ wa kĩhooto na ũthingu. Ningĩ wathani wake nĩ mwagĩrĩru tondũ Ngai nĩwe ‘gĩtĩ gĩake kĩa Ũthamaki.’ Ũguo nĩ kuga atĩ Jehova nĩwe ũmũtuĩte Mũthamaki. Makĩria ma ũguo, gĩtĩ gĩa Ũthamaki kĩa Jesu nĩ gĩa gũtũũra “tene na tene.” Na githĩ ti gĩtĩo kĩnene gũtungatĩra Jehova rungu rwa Mũthamaki ta ũcio ũrĩ hinya ũrĩa wamũrĩtwo nĩ Ngai?
Goocai Kristo, Mũthamaki ũrĩ Riri!
7 Thoma Thaburi 45:6, 7. Tondũ Jesu nĩ eendete mũno ũthingu na agathũũra ũndũ o wothe ũrĩa ũngĩacambithirie Ithe-rĩ, Jehova nĩ aamũitĩrĩirie maguta akĩmũtua Mũthamaki wa Ũthamaki wa Kĩĩmesia. Jesu aaitĩrĩirio “maguta ma gĩkeno” gũkĩra arĩa a “riika” rĩake, nĩo athamaki a Juda a kuuma nyũmba-inĩ ya Daudi. Na njĩra irĩkũ? Ũndũ wa mbere nĩ atĩ, Jehova we mwene nĩwe wamũitĩrĩirie maguta. Makĩria ma ũguo, Jehova aamũitĩrĩirie maguta atuĩke Mũthamaki na Mũthĩnjĩri-Ngai Ũrĩa Mũnene. (Thab. 2:2; Ahib. 5:5, 6) Jesu ndaamũrirũo na njĩra ya gũitĩrĩrio maguta ta marĩa maaitagĩrĩrio athamaki a Isiraeli, ĩndĩ aitĩrĩirio roho mũtheru. Ningĩ arathamaka kuuma igũrũ no ti gũkũ thĩ.
Kũmaatha Maũndũ ma Bata Maandĩko-inĩ
it-1 1185 kĩb. 1
Mũhianĩre
Hihi Jesu akoretwo ahaanaine na Ithe na gĩkĩro kĩmwe mahinda-inĩ mothe?
Mũrũ wa Ngai wa irigithathi, o we wacokire gwĩtwo Jesu, akoragwo arĩ mũhianĩre wa Ithe. (2Ko 4:4) O ta ũrĩa tũĩ no mũhaka gũkorũo Mũrũwe ũcio nĩwe Ngai aaragĩria rĩrĩa ooigire, “Nĩ tũũmbe mũndũ na mũhianĩre witũ,” kũhaanana kũu kwa Mũriũ na Ithe, o we Mũũmbi, kwambĩrĩirie rĩrĩa Mũriũ oombirũo. (Kĩa 1:26; Joh 1:1-3; Kol 1:15, 16) Rĩrĩa aarĩ gũkũ thĩ arĩ mũndũ mũkinyanĩru, nĩ oonanirie ngumo na ũmũndũ wa Ithe o ũrĩa wothe angĩahotire arĩ mũndũ, na kwoguo nĩ angĩoigire atĩ, “mũndũ o wothe ũnyonete nĩ onete Awa o nake.” (Joh 14:9; 5:17, 19, 30, 36; 8:28, 38, 42) O na kũrĩ ũguo, kũhaanana kũu nĩ kwagaacĩrithirio makĩria hĩndĩ ĩrĩa Jesu aariũkirio akĩheo muoyo wa roho na akĩheo “wathani wothe kũrĩa igũrũ o na gũkũ thĩ” nĩ Ithe, Jehova Ngai. (1Pe 3:18; Mat 28:18) Tondũ Ngai nĩ aatũũgĩririe Jesu “akĩmũnenehia makĩria,” Mũrũ ũcio wa Ngai rĩu nĩ angĩahotire kuonania riri wa Ithe na gĩkĩro kĩnene makĩria gũkĩra ũrĩa oonanagia rĩrĩa aatũũraga igũrũ atanoka gũkũ thĩ. (Afi 2:9; Ahi 2:9) Rĩu Jesu nĩ “mũhianĩre mũkinyanĩru wa ũrĩa Ngai atariĩ.”—Ahi 1:2-4.
it-1 1063 kĩb. 7
Igũrũ
Ciugo iria irĩ thĩinĩ wa Thaburi 102:25, 26 ikoragwo ikĩaria ũhoro wĩgiĩ Jehova Ngai, no mũtũmwo Paulo nĩ aacigwetire akĩaria igũrũ rĩgiĩ Jesu Kristo. Eekire ũguo tondũ Mũrũ wa mũmwe wa Ngai nĩwe Ngai aahũthĩrire arĩ Mũruti Wĩra wake harĩ kũũmba igũrũ na thĩ. Paulo onanĩtie atĩ mũriũ atũũraga tene na tene ngũrani na indo iria ciũmbĩtwo, iria Ngai angĩenda, ‘angĩcikũnja o ta kabuuti’ na acieherie.—Ahi 1:1, 2, 8, 10-12.
AGOSTI 26–SEPTEMBA 1
MŨTHITHŨ KUUMA KIUGO-INĨ KĨA NGAI | AHIBIRANIA 4–6
“Ĩka Ũrĩa Wothe Ũngĩhota Ũingĩre Kĩhurũko-inĩ kĩa Ngai”
Kĩhurũko Kĩa Ngai nĩ Kĩĩ?
3 Kũrĩ na maũndũ merĩ maratũma tuuge atĩ mũthenya wa mũgwanja no waathiaga na mbere hĩndĩ ya karne ya mbere Mahinda Maitũ (M.M.) Wa mbere-rĩ, ta wĩcirie ũhoro wa ciugo cia Jesu kwerekera aregani arĩa maamũrutaga mahĩtia nĩ ũndũ wa kũhonania mũthenya wa Thabatũ, ũndũ ũrĩa maatuaga atĩ nĩ wĩra. Mwathani aamerire ũũ: “Awa nginya rĩu atũire o arutaga wĩra, o na niĩ nĩndutaga.” (Joh. 5:16, 17, nĩ ithuĩ tũinamĩtie ndemwa icio.) Eendaga kuuga atĩa? Maathitangaga Jesu nĩ ũndũ wa kũruta wĩra mũthenya wa Thabatũ. Macokio make atĩ “Awa nginya rĩu atũire o arutaga wĩra,” nĩ maacokirie thitango ĩyo. Na njĩra ĩngĩ, Jesu nĩ ta eeraga athitangi ake ũũ: ‘Niĩ hamwe na Awa tũrutaga wĩra wa mũthemba ũmwe. Tondũ Awa akoretwo akĩruta wĩra hĩndĩ ya Thabatũ yake ya mĩaka ngiri nyingĩ-rĩ, na o na rĩu no araruta-rĩ, o na niĩ no ndute wĩra mũthenya wa Thabatũ.’ Kwoguo, Jesu onanirie atĩ mũthenya ũrĩa mũnene wa mũgwanja wa Thabatũ ya kĩhurũko kĩa Ngai no wathiaga na mbere hĩndĩ ĩrĩa aarĩ gũkũ thĩ.
4 Ũndũ wa kerĩ nĩ ũrĩa ũgwetetwo nĩ mũtũmwo Paulo. Agĩcokera Kĩambĩrĩria 2:2 ũhoro-inĩ wĩgiĩ kĩhurũko kĩa Ngai-rĩ, Paulo atongoretio nĩ roho aandĩkire ũũ: “Tondũ ithuĩ twĩtĩkĩtie-rĩ, nĩ ithuĩ tũtonyaga kĩhurũko-inĩ kĩu.” (Ahib. 4:3, 4, 6, 9, nĩ ithuĩ tũinamĩtie ndemwa icio.) Kwoguo mũthenya wa mũgwanja no waathiaga na mbere hĩndĩ ya Paulo. Mũthenya ũcio wa kĩhurũko ũngĩathire na mbere ihinda rĩngĩ rĩigana atĩa?
5 Nĩguo tũcokie kĩũria kĩu, no mũhaka tũririkane muoroto wa mũthenya ũcio wa mũgwanja. Kĩambĩrĩria 2:3 ĩtaaragĩria muoroto ũcio ũũ: “Mũthenya ũcio wa mũgwanja-rĩ, Ngai akĩũrathima, akĩwamũra.” Mũthenya ũcio ‘ũgĩtuwo mwamũre’—ũgĩtherio, kana ũkĩamũrũo nĩ Jehova—nĩguo ahingie muoroto wake. Muoroto ũcio nĩ gũtũma thĩ ĩtũũragwo nĩ andũ athĩki arĩa marĩmĩramataga na maramatage indo iria ciothe ombĩte. (Kĩam. 1:28) Jehova Ngai na Jesu Kristo, “mwathani wa . . . thabatũ,” makoretwo ‘makĩruta wĩra nginya ũmũthĩ’ nĩguo mahingie muoroto ũcio. (Mat. 12:8) Mũthenya wa Ngai wa kĩhurũko ũgũthiĩ na mbere nginya hĩndĩ ĩrĩa muoroto waguo ũgaakinyanĩra, mũthia-inĩ wa Wathani wa Mĩaka Ngiri wa Kristo.
Kĩhurũko Kĩa Ngai nĩ Kĩĩ?
6 Adamu na Hawa nĩ maatarĩirio muoroto wa Ngai wega, ĩndĩ matiigana kũũnyita mbaru. Ma nĩ atĩ, Adamu na Hawa nĩo maarĩ andũ a mbere kũrema. Kuuma hĩndĩ ĩyo nĩ gũkoretwo na andũ milioni nyingĩ aremi. O na rũrĩrĩ rũamũre rwa Ngai, rwa Isiraeli, nĩ rwaremire. Nake Paulo nĩ aaheire Akristiano a tene mũkaana atĩ o na amwe ao nĩ mangĩaremire o ta Aisiraeli a tene. Aandĩkire ũũ: “Nĩ ũndũ ũcio nĩtwĩrutanagĩrie na kĩyo tũgatonye kĩhurũko-inĩ kĩu, nĩ getha mũndũ o na ũrĩkũ ndakae kũgũa nĩ ũndũ wa kũrema ta ũguo andũ acio maaremire.” (Ahib. 4:11) Ta rora wone atĩ Paulo akuruhithanĩtie ũremi na kwaga gũtonya kĩhurũko-inĩ kĩa Ngai. Ũndũ ũcio ũratũruta atĩa? Tũngĩremera muoroto wa Ngai na njĩra ĩmwe kana ĩrĩa ĩngĩ-rĩ, na githĩ to tũingĩre ũgwati-inĩ wa kwaga gũtonya kĩhurũko-inĩ kĩa Ngai? Hatarĩ nganja, macokio ma kĩũria kĩu nĩ ma bata mũno harĩ ithuĩ na nĩ tũkũmarĩrĩria makĩria. Gũkinyĩria hau, rekei, tuone nĩ maũndũ marĩkũ tũngĩĩruta makĩria megiĩ gũtonya kĩhurũko-inĩ kĩa Ngai tũkĩarĩrĩria kĩonereria kĩũru kĩa Aisiraeli.
Kĩhurũko Kĩa Ngai nĩ Kĩĩ?
16 Ũmũthĩ gũtirĩ Mũkristiano ũngiuga atĩ no mũhaka arũmĩrĩre maũndũ mamwe ma Watho wa Musa nĩguo akaahonokio. Atongoretio nĩ roho Paulo eerire Aefeso ũũ atekũhithĩrĩra: “Nĩ ũndũ-rĩ, nĩ Wega wa Ngai watũmire mũhonokio nĩ ũndũ wa gwĩtĩkia; naguo ũndũ ũcio ndwoimanire na inyuĩ inyuene: no kũheo mwaheirũo nĩ Ngai: na ndwakiumanire na mawĩra marĩa mwanaruta, nĩ getha mũndũ o wothe ndakanegooce.” (Ef. 2:8, 9) Gũkĩrĩ ũguo-rĩ, Akristiano marabatara gwĩka atĩa nĩguo matonye kĩhurũko-inĩ kĩa Ngai? Jehova aamũrire mũthenya wa mũgwanja—mũthenya wa kĩhurũko gĩake—nĩguo ahingie na njĩra ngaacĩru muoroto wake wĩgiĩ thĩ. No tũtonye kĩhurũko-inĩ kĩa Jehova—kana tũkorũo hamwe nake kĩhurũko-inĩ gĩake—na njĩra ya gwathĩkĩra maũndũ marĩa atwĩraga twĩke kũringana na muoroto wake o ũrĩa arathiĩ agĩtũguũragĩria kũgerera ithondeka rĩake.
17 No tũngĩhũthia mootaro marĩa moimĩte thĩinĩ wa Bibilia marĩa tũheagwo nĩ ngombo ĩrĩa ĩĩhokekete na njũgĩ, na twamũre kũrũmĩrĩra mbuguĩro iitũ ene, tũngĩkorũo tũkĩregana na muoroto wa Ngai, ũrĩa ũrathiĩ na mbere kũguũrio. Ũndũ ũcio no ũtũme ũkuruhanu mwega ũrĩa tũrĩ naguo hamwe na Jehova ũthũke. Gĩcunjĩ-inĩ kĩrĩa gĩkũrũmĩrĩra, nĩ tũkaarĩrĩria maũndũ marĩa mangĩthũkia andũ a Ngai na twarĩrĩrie ũrĩa matua maitũ ma gwathĩka kana kwaga gwathĩka, mangĩonania kana kũna nĩ tũingĩrĩte kĩhurũko-inĩ kĩa Ngai.
Kũmaatha Maũndũ ma Bata Maandĩko-inĩ
Ciũria Kuuma Kũrĩ Athomi
“Kiugo kĩa Ngai” kĩrĩa “kĩrĩ muoyo na nĩ kĩrĩ hinya” kĩgwetetwo thĩinĩ wa Ahibirania 4:12 nĩ kĩĩ?
▪ Mĩhari ĩrĩa ĩthiũrũrũkĩirie yonanagia atĩ mũtũmwo Paulo aaragia ũhoro wĩgiĩ ndũmĩrĩri ya Ngai, kana muoroto wake, ta ũrĩa tũngĩthoma Bibilia-inĩ.
Rĩandĩko rĩa Ahibirania 4:12 nĩ rĩhũthagĩrũo kaingĩ mabuku-inĩ maitũ kuonania atĩ Bibilia nĩ ĩcenjagia mĩtũũrĩre ya andũ, na ti mahĩtia kũrĩhũthĩra na njĩra ĩyo. No nĩ wega kũrĩrora na njĩra njariĩ. Paulo eekĩraga ngoro Akristiano Ahibirania meke maũndũ kũringana na mĩoroto ya Ngai. Mĩingĩ yayo nĩ yaandĩkĩtwo maandĩko-inĩ matheru. Paulo nĩ aahũthĩrire ngerekano ya Aisiraeli arĩa maakũũrĩtwo kuuma Misiri. Nĩ meerĩgagĩrĩra kũingĩra thĩinĩ wa bũrũri wa kĩĩranĩro ũrĩa warĩ na “bũthi wa iria na ũũkĩ,” kũrĩa mangĩagĩire na kĩhurũko kĩa ma.—Tham. 3:8; Gũcok. 12:9, 10.
Ũcio nĩguo warĩ muoroto wa Ngai. No o na kũrĩ ũguo, Aisiraeli nĩ moomirie ngoro ciao na makĩaga wĩtĩkio, na kwoguo aingĩ matiaingĩrire kĩhurũko-inĩ kĩu. (Ndar. 14:30; Josh. 14:6-10) Paulo ongereire atĩ “kĩĩranĩro gĩa gũtonya kĩhurũko-inĩ [kĩa Ngai] kĩrĩ o ho.” (Ahib. 3:16-19; 4:1) “Kĩĩranĩro” kĩu nĩ gĩcunjĩ kĩa muoroto wa Ngai. O na ithuĩ no twĩrute na twĩke maũndũ kũringana na muoroto ũcio o ta Akristiano Ahibirania. Nĩguo atĩtĩrithie atĩ kĩĩranĩro kĩu kĩehocetie Maandĩko-inĩ, Paulo nĩ aagwetire ciugo imwe cia Kĩambĩrĩria 2:2 na Thaburi 95:11.
Nĩ twagĩrĩirũo gũkena nĩ kũmenya atĩ “kĩĩranĩro gĩa gũtonya kĩhurũko-inĩ [kĩa Ngai] kĩrĩ o ho.” Nĩ twĩtĩkagia atĩ kĩĩrĩgĩrĩro gĩa gũtonya kĩhurũko-inĩ kĩa Ngai nĩ gĩkaahinga, na nĩ tuoete makinya ma kũingĩra thĩinĩ wakĩo. Tũtiĩkĩte ũguo na njĩra ya kũrũmĩrĩra Watho wa Musa kana o gwĩka ciĩko njega atĩ nĩguo twĩtĩkĩrĩke nĩ Jehova. Handũ ha ũguo, nĩ tũnyitanĩire na muoroto wa Ngai na nĩ tũthiaga na mbere gwĩka ũguo tũrĩ na wĩtĩkio. Ningĩ ta ũrĩa tũkuonete kĩambĩrĩria-inĩ, andũ ngiri nyingĩ thĩinĩ wa thĩ nĩ mambĩrĩirie kwĩruta Bibilia na makamenya muoroto wa Ngai. Aingĩ ao nĩ macenjetie mĩtũũrĩre yao, makagĩa na wĩtĩkio, na makabatithio. Gũcenjia kũu nĩ ũira mũiganu atĩ “kiugo kĩa Ngai kĩrĩ muoyo na nĩ kĩrĩ hinya.” Muoroto wa Ngai ta ũrĩa wonanĩtio thĩinĩ wa Bibilia nĩ ũhutĩtie ũtũũro witũ na no ũgũthiĩ na mbere gũkorũo na hinya mũtũũrĩre-inĩ witũ.
it-1 1139 kĩb. 2
Kĩĩrĩgĩrĩro
Kĩĩrĩgĩrĩro kĩu kĩa muoyo wa tene na tene o hamwe na kwaga kũbutha harĩ arĩa ‘manyitanagĩra harĩ rĩĩtana rĩa gũthiĩ igũrũ’ (Ahi 3:1) gĩkoragwo kĩrĩ na mũthingi mũrũmu na nĩ gĩa kwĩhokeka. Gĩkoragwo kĩĩhocetie harĩ maũndũ merĩ marĩa gũtangĩhoteka Ngai aheenanie, nĩmo kĩĩranĩro gĩake na mwĩhĩtwa wake, kĩĩrĩgĩrĩro kĩrĩa gĩkaahinga nĩ ũndũ wa Kristo, ũrĩa rĩu ũrĩ na muoyo ũtangĩkua kũrĩa igũrũ. Nĩkĩo kĩĩrĩgĩrĩro kĩu kĩragwo nĩ “nanga ya muoyo, [na] nĩ kĩa ma na nĩ kĩrũmu, na gĩtonyaga nginya thĩinĩ wa gĩtaama [ta ũrĩa mũthĩnjĩri-Ngai mũnene aaingĩraga Harĩa Hatheru Mũno Mũthenya wa Kũhumbĩra Mehia], o hau ũcio wathiire mbere aatonyire nĩ ũndũ witũ, na nĩwe Jesu, o we ũtuĩkĩte mũthĩnjĩri-Ngai mũnene tene na tene o ta ũrĩa Melikisedeki aatariĩ.”—Ahi 6:17-20.