Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
JULAĨ 4-10
MŨTHITHŨ KUUMA KIUGO-INĨ KĨA NGAI | 2 SAMUELI 18-19
“Barizilai Aarĩ Kĩonereria Kĩega kĩa Wĩnyihia”
w07 7/15 14 kĩb. 5
Barizilai nĩ Aamenyaga Maũndũ Marĩa Angĩhota Gwĩka na Marĩa Atangĩhota
Hatarĩ nganja, Daudi nĩ aakenetio mũno nĩ ũteithio wa Barizilai. No kuonekaga atĩ, Daudi to kwenda eendaga kuonania ngatho na njĩra ya kũmũhe mabataro make ma kĩĩmwĩrĩ. Barizilai aarĩ mũtongu na kwoguo ndaabataraga ũteithio ta ũcio. No kũhoteke Daudi eendaga athiĩ agaikarage nyũmba-inĩ ya mũthamaki nĩ ũndũ wa ngumo njega iria aarĩ nacio. Gũikaraga kuo nĩ kũngĩatũmire Barizilai agĩe na mweke wa mwanya, na akenere maũndũ mega marĩa mangĩaumanire na gũkorũo na ũrata hamwe na mũthamaki.
w07 7/15 14 kĩb. 7
Barizilai nĩ Aamenyaga Maũndũ Marĩa Angĩhota Gwĩka na Marĩa Atangĩhota
No kũhoteke gĩtũmi kĩmwe gĩa itua rĩa Barizilai nĩ atĩ aarĩ mũkũrũ na kwoguo ndangĩahotire kũhingia maũndũ maingĩ. Kwahoteka Barizilai oonaga atĩ ndangĩatũũrire ihinda iraihu. (Thaburi 90:10) Nĩ eekĩte ũrĩa angĩahotire nĩguo ateithie Daudi, no ningĩ nĩ aamenyaga atĩ kũrĩ maũndũ atangĩahotire kũhingia nĩ ũndũ wa mĩaka yake. Barizilai ndaarekire wendi wa kũgĩa ngumo na igweta ũtũme age kuona maũndũ ũrĩa maarĩ. Ngũrani na Abisalomu ũrĩa warĩ mwĩĩkĩrĩri, Barizilai aarĩ mwĩnyihia.—Thimo 11:2.
w07 7/15 15 kĩb. 1-2
Barizilai nĩ Aamenyaga Maũndũ Marĩa Angĩhota Gwĩka na Marĩa Atangĩhota
Rũgano rwa Barizilai ruonanagia bata wa gũkorũo na ũigananĩru. Tũtiagĩrĩirũo kũrega mweke mũna wa ũtungata kana gwĩthema kũũkinyĩra nĩ ũndũ wa kwenda ũtũũro mũhooreru, kana kuona ta tũtangĩhota kũhingia maũndũ marĩa marabatarania. Ngai no atũteithie kũrĩa tũnyihĩirũo tũngĩmwĩhoka atũhe hinya na ũũgĩ.—Afilipi 4:13; Jakubu 4:17; 1 Petero 4:11.
Ningĩ, nĩ twagĩrĩirũo kũmenya maũndũ marĩa tũngĩhota, na marĩa tũtangĩhota. Kwa ngerekano, Mũkristiano no akorũo na maũndũ maingĩ ma kĩĩroho ehokeirũo. Akona atĩ angĩtĩkĩra mĩeke ĩngĩ, no age gwĩka maũndũ mangĩ erĩtwo nĩ Maandĩko eke ta kũhingĩria famĩlĩ yake mabataro. Hĩndĩ ta ĩyo, no onanie wĩnyihia na ũigananĩru na njĩra ya kwaga gwĩtĩkĩra mĩeke ĩngĩ makĩria ma ĩrĩa arĩ nayo.—Afilipi 4:5; 1 Timotheo 5:8.
JULAĨ 11-17
MŨTHITHŨ KUUMA KIUGO-INĨ KĨA NGAI | 2 SAMUELI 20-21
“Jehova nĩ Ngai wa Kĩhooto”
it-1 932 kĩb. 1
Gibeoni
Kwa ihinda rĩa mĩaka mĩingĩ, Agibeoni nĩ maathiire na mbere gũkorũo kuo marĩ gĩkundi, o na gũtuĩka Mũthamaki Saulu nĩ aageretie kũmaniina. Nĩ meetereire ihinda rĩrĩa rĩagĩrĩire rĩa Jehova rĩkinye nĩguo aguũrie ũndũ ũcio ũtarĩ wa kĩhooto. Eekire ũguo kũgerera ngʼaragu ya mĩaka ĩtatũ ĩrĩa yarĩ kuo hĩndĩ ya wathani wa Daudi. Rĩrĩa Daudi aatuĩririe ũhoro harĩ Jehova na akĩmenya atĩ kwarĩ na mehia ma ũiti wa thakame, nĩ ooririe Agibeoni ũrĩa kũngĩkwo nĩgetha mehia macio mahumbĩrũo. Agibeoni maaugire atĩ matirenda “betha kana thahabu,” tondũ kũringana na Watho, gũtirĩ kĩndũ gĩa gũkũũra muoyo kĩaagĩrĩire kwamũkĩrũo nĩ ũndũ wa mũũragani. (Nda 35:30, 31) Ningĩ nĩ maamenyaga atĩ matingĩoragire mũndũ gũtaheanĩtwo watho wa gwĩka ũguo. Kwoguo rĩrĩa Daudi aamoririe ũndũ ũrĩa mangĩenda, maaugire atĩ mangĩenda kũnengerũo “ariũ” mũgwanja a Saulu. Gũkorũo atĩ mahĩtia ma ũiti wa thakame maarĩ harĩ Saulu na nyũmba yake, kũronania atĩ o na gũtuĩka Saulu nĩwe warĩ na itemi inene harĩ gĩĩko kĩu gĩa kũũragana, no kũhoteke “ariũ” ake o nao nĩ maanyitire itemi na njĩra ya ĩmwe kwa ĩmwe kana ĩtarĩ ya ĩmwe kwa ĩmwe. (2Sa 21:1-9) Kwoguo ariũ acio matiakuire nĩ ũndũ wa mehia ma ithe (Gũc 24:16) no maakuire nĩgetha kĩhooto kĩoneke, tondũ watho waugĩte atĩ “muoyo ũrĩrĩhagwo na muoyo.”—Gũc 19:21.
JULAĨ 18-24
MŨTHITHŨ KUUMA KIUGO-INĨ KĨA NGAI | 2 SAMUELI 22
“Wĩhokage Jehova Agũteithie”
w10 6/1 26 kĩb. 4-6
“Ũkoragwo Ũrĩ Mwĩhokeku”
Reke tũthuthurie ciugo cia Daudi makĩria. Kiugo gĩa Kĩhibirania kĩrĩa gĩtaũrĩtwo “ũkoragwo ũrĩ mwĩhokeku” ningĩ no gĩtaũrũo “ũkoragwo na wendo mwĩhokeku.” Mũthingi wa wĩhokeku wa ma nĩ wendo. Jehova akoragwo na wendo mwĩhokeku harĩ andũ arĩa ehokeku harĩ we.
Ningĩ wĩhokeku to ũndũ tu mũndũ aiguaga ngoro-inĩ; wonanagio na ciĩko. Jehova nĩ ekaga maũndũ wa kuonania wĩhokeku, o ta ũrĩa Daudi eeyoneire. Mahinda-inĩ marĩa Daudi aacemanirie na mathĩna maingĩ mũtũũrĩre-inĩ wake, Jehova nĩ aamwĩkĩire maũndũ na wĩhokeku akĩmũgitĩra na akĩmũtongoria, tondũ aarĩ mũthamaki mwĩhokeku. Daudi aarĩ na ngatho, na nĩ aaugire atĩ Jehova nĩwe wamũhonoketie “kuuma guoko-inĩ gwa thũ ciake ciothe.”—2 Samueli 22:1.
Ciugo cia Daudi iratũruta ũndũ ũrĩkũ? Jehova ndagarũrũkaga kana agacenjia. (Jakubu 1:17) Hĩndĩ ciothe nĩ arũmagia ithimi ciake na akonania wĩhokeku na njĩra ya kũhingia kĩĩranĩro gĩake. Thĩinĩ wa thaburi ĩngĩ Daudi aandĩkire ũũ: “Jehova ndagaatiganĩria andũ ake arĩa ehokeku.”—Thaburi 37:28.
Wĩrutanĩrie Biũ Ũtungata-inĩ
w06 8/15 21 kĩb. 7-8
Ayubu Aarĩ na Ũkirĩrĩria na Wĩkindĩru
O na gũtuĩka Akristiano aingĩ ũmũthĩ maticemanagia na mathĩna ta marĩa Ayubu aacemanirie namo, nĩ macemanagia na mathĩna ma mĩthemba ngũrani. Aingĩ nĩ manyariragwo kana magakorũo na mathĩna ma famĩlĩ. Mathĩna ma mbeca na ma mwĩrĩ no mathumbũre mũndũ mũno. Amwe manorũo nĩ mĩoyo yao nĩ ũndũ wa wĩtĩkio wao. Tũtiagĩrĩirũo gwĩciria atĩ Shaitani we mwene nĩwe kĩhumo gĩa thĩna o wothe tũngĩcemania naguo. Ũrĩa kũrĩ nĩ atĩ, mathĩna mamwe no makorũo maumanĩte na mahĩtia maitũ kana mathĩna marĩa mũndũ aciaragwo namo. (Agalatia 6:7) Ningĩ ithuothe nĩ tũcemanagia na maumĩrĩra moru ma ũkũrũ na icanjama cia ndũire. Bibilia nĩ yonanagia wega atĩ mahinda-inĩ maya, Jehova ndagitagĩra ndungata ciake kuumana na mathĩna ta macio na njĩra ya kĩama.—Kohelethu 9:11.
O na kũrĩ ũguo, Shaitani no ahũthĩre mathĩna marĩa tũcemanagia namo gũthũkia wĩtĩkio witũ. Mũtũmwo Paulo nĩ aagwetire atĩ nĩ aathĩnagio nĩ “mũigua thĩinĩ wa mwĩrĩ, mũraika wa Shaitani,” na nĩ aaikaraga ‘akĩhũũragwo rũhĩ’ nĩwe. (2 Akorintho 12:7) O na angĩkorũo thĩna ũcio warĩ wa mwĩrĩ ta kwaga kuona wega, kana ũndũ ũngĩ, Paulo nĩ aamenyaga atĩ Shaitani nĩ angĩahũthĩrire thĩna ũcio na gũkua ngoro kũrĩa kũngĩaumanire naguo kũmwagithia gĩkeno na gũtũma atiganĩrie wĩkindĩru wake. (Thimo 24:10) Ũmũthĩ, Shaitani no ahũthĩre andũ a famĩlĩ, andũ arĩa tũthomaga nao cukuru, kana thirikari iria ciathanaga na gĩthũri, kũnyarira ndungata cia Jehova na njĩra itiganĩte.
JULAĨ 25-31
MŨTHITHŨ KUUMA KIUGO-INĨ KĨA NGAI | 2 SAMUELI 23-24
“Hihi nĩ Wĩimaga Nĩguo Ũheane?”
it-1 146
Arauna
Arauna nĩ eerutĩire kũheana handũ, ngʼombe, na indo cia mbaũ nĩ ũndũ wa igongona hatarĩ marĩhi, no Daudi akiuga no nginya agũre. Rĩandĩko rĩa 2 Samueli 24:24 rĩonanagia atĩ Daudi aarĩhire cekeri 50 cia betha (dola 110 cia Amerika) nĩguo agũre kĩhuuhĩro na ngʼombe. No rĩandĩko rĩa 1 Maũndũ ma Matukũ ma Tene 21:25 rĩonanagia atĩ Daudi aarĩhire cekeri 600 cia thahabu (dola ta 77,000 cia Amerika) nĩ ũndũ wa kĩwanja kĩu. Mwandĩki wa ibuku rĩa 2 Samueli aarĩrĩirie o ũhoro wĩgiĩ kũgũra handũ ha gwaka kĩgongona na indo cia igongona rĩrĩa rĩarutirũo, kwoguo mũigana ũrĩa agwetete wa marĩhi warĩ wa indo icio tu. Nake mwandĩki wa ibuku rĩa 1 Maũndũ ma Matukũ ma Tene aarĩrĩirie ũhoro wĩgiĩ hekarũ ĩrĩa yacokire gwakwo handũ hau, na mũigana ũrĩa agwetete nĩ ũrĩa wahũthĩrirũo gwaka. (1Ma 22:1-6; 2Ma 3:1) Tondũ gĩcigo kĩa hekarũ kĩarĩ kĩnene mũno, kũroneka atĩ mũigana wa cekeri 600 cia thahabu ũkonainie na kũgũra gĩcigo kĩu kĩnene, no ti gacigo kanini karĩa kaabataranagia nĩ ũndũ wa gwaka kĩgongona kĩrĩa gĩaakĩtwo nĩ Daudi hau kabere.
Kũmaatha Maũndũ ma Bata Maandĩko-inĩ
w05 5/15 19 kĩb. 6
Matemo Kuuma Ibuku-inĩ rĩa Samueli wa Kerĩ
23:15-17. Daudi nĩ aatĩĩte mũno watho wa Ngai wĩgiĩ muoyo na thakame ũũ atĩ ihinda-inĩ rĩrĩ, nĩ aaregire gwĩka ũndũ o na ũngĩonekire ta arĩ kuuna watho ũcio. No mũhaka tũkũrie mwerekera ta ũcio harĩ mawatho mothe ma Ngai.
AGOSTI 1-7
MŨTHITHŨ KUUMA KIUGO-INĨ KĨA NGAI | 1 ATHAMAKI 1-2
“Hihi nĩ Wĩrutaga na Mahĩtia Maku?”
it-2 987 kĩb. 4
Suleimani
Rĩrĩa maaiguire mũgambo wa nyĩmbo kuuma Gihoni, handũ hataarĩ haraihu mũno, na andũ makĩanĩrĩra makiuga: “Mũthamaki Suleimani arotũũra ihinda iraya,” Adonija na arĩa maabangaga njama nake magĩtukanĩrũo, na makĩũra nĩ ũndũ wa guoya. Suleimani nĩ oonanirie ũrĩa wathani wake ũngĩakorirũo na thayũ na njĩra ya kwaga kwĩrĩhĩria hĩndĩ ĩrĩa aatuagwo mũthamaki. Suleimani angĩerĩhĩirie, no kũhoteke nĩ angĩorirũo nĩ muoyo wake. Adonija nĩ oorĩire hekarũ-inĩ gwetha mwĩgitio, no Suleimani agĩtũmana akiuga arehwo mbere yake. Eerire Adonija nĩ egũthiĩ na mbere gũtũũra tiga akorirũo harĩ ũndũ mũũru ũngĩonekire harĩ we. Agĩcoka akĩmwĩra ainũke gwake mũciĩ.—1Ath 1:41-53.
it-1 49
Adonija
O na kũrĩ ũguo, rĩrĩa Daudi aakuire, Adonija nĩ aathiire kũrĩ Bathi-sheba akĩmwĩra arie na Suleimani ithenya rĩake, amũũrie kana no amũnengere Abishagi ũrĩa warũmbũyagia Daudi atuĩke mũtumia wake. Ciugo iria Adonija aaugire atĩ “ũthamaki warĩ ũtuĩke wakwa, na andũ othe a Isiraeli meerĩgagĩrĩra nduĩke mũthamaki” cionanagia atĩ oonaga ta aatunyĩtwo kĩhooto gĩake, o na gũtuĩka nĩ aaugire atĩ guoko kwa Jehova nĩkuo gwatũmĩte ũndũ ũcio wĩkĩke. (1Ath 2:13-21) O na gũtuĩka no kũhoteke aahoire ũndũ ũcio akĩenda kũrĩhwo nĩ ũndũ wa kũũrũo nĩ ũthamaki, ihoya rĩu rĩonanagia atĩ no eeriragĩria ũnene, tondũ kũringana na ũndũire wa mahinda macio atumia na thuriya cia mũthamaki maatuĩkaga a ũrĩa waagĩrĩire gũcoka ithenya rĩake. (Ringithania 2Sa 3:7; 16:21.) Kwoguo Suleimani oonire ihoya rĩrĩa rĩahoirũo nĩ Adonija kũgerera harĩ nyina rĩrĩ njĩra ya kwĩyoera ũthamaki, na agĩathana Adonija oragwo, na akĩũragwo nĩ Benaia.—1Ath 2:22-25.
Kũmaatha Maũndũ ma Bata Maandĩko-inĩ
w05 7/1 30 kĩb. 1
Matemo Kuuma Ibuku-inĩ rĩa Athamaki wa Mbere
2:37, 41-46. Nĩ ũgwati mũno mũndũ gwĩciria atĩ no agarare mĩhaka ĩrĩa ĩigĩtwo na age kũherithio. Andũ arĩa matigaga kũrũmĩrĩra ‘njĩra ngunderu ĩrĩa ĩkinyagia andũ muoyo-inĩ’ makĩendaga, nĩ marĩonaga maumĩrĩra moru ma itua rĩu rĩao rĩũru.—Mat 7:14.
AGOSTI 8-14
MŨTHITHŨ KUUMA KIUGO-INĨ KĨA NGAI | 1 ATHAMAKI 3-4
Kũmaatha Maũndũ ma Bata Maandĩko-inĩ
w98 2/1 11 kĩb. 15
Jehova nĩ Ngai Ũhingagia Irĩkanĩro
Rĩrĩa njiarũa cia Iburahimu ciatuĩkire rũrĩrĩ irĩ rungu rwa Watho, Jehova nĩ aacirathimire kũringana na kĩĩranĩro kĩrĩa eerĩire Iburahimu. Mwaka-inĩ wa 1473 M.M.M, Joshua, ũrĩa wacokire ithenya rĩa Musa, nĩ aatongoririe Isiraeli makĩingĩra bũrũri wa Kanaani. Kũgayanio kwa bũrũri ũcio harĩ mĩhĩrĩga, nĩ kwahingirie kĩĩranĩro kĩrĩa Jehova eeranĩire atĩ nĩ angĩaheanire bũrũri ũcio kũrĩ mbeũ ya Iburahimu. Rĩrĩa Aisiraeli maarĩ ehokeku, Jehova nĩ aahingagia kĩĩranĩro gĩake gĩa kũmahe ũhootani harĩ thũ ciao. Ũndũ ũcio nĩ wahingire makĩria hĩndĩ ya wathani wa Mũthamaki Daudi. Gũkinyĩria hĩndĩ ya Suleimani mũrũ wa Daudi, ũndũ wa gatatũ wĩgiĩ kĩrĩkanĩro kĩa Iburahimu nĩ wahingire. “Juda na Isiraeli maarĩ aingĩ mũno o ta mũthanga ũrĩa ũkoragwo hakuhĩ na iria; maarĩaga na makanyua na magacanjamũka.”—1 Athamaki 4:20.
AGOSTI 15-21
MŨTHITHŨ KUUMA KIUGO-INĨ KĨA NGAI | 1 ATHAMAKI 5-6
“Maakire na Moko Mao na Magĩka Ũguo Kuuma Ngoro”
Hihi Ũrĩ Wamenya?
Mĩtarakwa ya Lebanoni yoĩkaine makĩria nĩ ũndũ wa gũikara ihinda iraihu, ũthaka wayo, mbaũ ciayo nĩ cianungaga wega, na itiarĩagwo nĩ memenyi. Kwoguo Suleimani aahũthĩrire indo iria njega biũ cia gwaka hekarũ. Ũmũthĩ, kũrĩa kwarĩ na mĩtitũ ya mĩtarakwa ĩrĩa yarĩ irĩma-inĩ cia Lebanoni, gũkoragwo na mahinga manini manyaganĩte.
it-1 424
Mũtarakwa
Tondũ mbaũ cia mĩtarakwa nĩ ciahũthĩrirũo mũno, nĩ kwabataraga aruti wĩra ngiri nyingĩ a gũtema mĩtĩ, kũmĩtwara Turo kana Sidoni gĩcũa-inĩ kĩa iria rĩa Mediterenia, kũnyitithania mĩgogo hamwe, na kũmĩtwara ĩrerete maĩ-inĩ nginya gĩcũa-inĩ, hihi kĩa Jopa. Yacokaga ĩgatwarũo Jerusalemu ĩgereirio thĩ nyũmũ. Wĩra ũcio warutirũo kũgerera kandarathi ĩrĩa yarĩ ho gatagatĩ ga Suleimani na Hiramu. (1Ath 5:6-18; 2Ma 2:3-10) Thutha-inĩ mbaũ nĩ ciathiire na mbere gũtwarũo, ũũ atĩ nĩ kũngĩerirũo atĩ Suleimani aatũmire ‘mbaũ cia mũtarakwa cingĩhe o ta mĩtĩ ya mĩkũyũ’ hĩndĩ ya wathani wake.—1Ath 10:27; ringithania Isa 9:9, 10.
it-2 1077 kĩb. 1
Hekarũ
Nĩguo wĩra ũrutwo na mũbango, Suleimani aathuurire arũme 30,000 kuuma Isiraeli, na aamatũmaga Lebanoni marĩ gĩkundi kĩa andũ 10,000 makaruta wĩra mweri ũmwe, magacoka magaikara mũciĩ mĩeri ĩĩrĩ matanathiĩ wĩra rĩngĩ. (1Ath 5:13, 14) Aathuurire andũ 70,000 kuuma harĩ arĩa maarĩ “ageni” bũrũri-inĩ magĩtuĩka andũ a moko, na andũ 80,000 a gwacũhia mahiga. (1Ath 5:15; 9:20, 21; 2Ma 2:2) Ningĩ Suleimani nĩ aathuurire arũme 550 marĩ anyabara a kũrũgamĩrĩra wĩra, na angĩ 3,300 a kũmateithĩrĩria. (1Ath 5:16; 9:22, 23) Kuonekaga atĩ 250 gatagatĩ-inĩ kao maarĩ Aisiraeli, na 3,600 maarĩ “ageni” bũrũri-inĩ wa Isiraeli.—2Ma 2:17, 18.
Kũmaatha Maũndũ ma Bata Maandĩko-inĩ
g 5/12 17, gathandũkũ
Bibilia nĩ Ibuku Rĩkoragwo na Ũrathi Mũrũngĩrĩru, Gĩcunjĩ kĩa 1
KWAGA KŨHĨTIA ŨHORO-INĨ WĨGIĨ MAHINDA
Ngerekano ĩmwe yonanagia ũrĩa Bibilia ĩtahĩtagia ũhoro-inĩ wĩgiĩ mahinda nĩ rĩandĩko rĩa 1 Athamaki 6:1, rĩrĩa rĩonanagia ihinda rĩrĩa Mũthamaki Suleimani aambĩrĩirie wĩra wa gwaka hekarũ Jerusalemu. Riugaga ũũ: “Mwaka-inĩ wa 480 [mĩaka 479] thutha wa Aisiraeli kuuma bũrũri wa Misiri, mwaka-inĩ wa kana kuuma Suleimani atuĩka mũthamaki wa Isiraeli, mweri-inĩ wa Zivu (na noguo mweri wa kerĩ), Suleimani akĩambĩrĩria gwaka nyũmba ya Jehova.”
Kũringana na ũrĩa maũndũ maarũmanĩrĩire Bibilia-inĩ, mwaka wa kana wa wathani wa Suleimani nĩ 1034 M.M.M. Kuuma mwaka ũcio, tũngĩtara mĩaka 479 tũcokete na thutha, tũngĩkinyĩrĩra mwaka wa 1513 M.M.M. mwaka ũrĩa Aisiraeli maaumire Misiri.
AGOSTI 22-28
MŨTHITHŨ KUUMA KIUGO-INĨ KĨA NGAI | 1 ATHAMAKI 7
“Ũrĩa Tũngĩĩruta Kuumana na Itugĩ Igĩrĩ”
it-1 348
Boazu, II
Gĩtugĩ kĩa mwena wa rũgongo kĩa iria igĩrĩ nene cia gĩcango ciarĩ gĩthaku-inĩ kĩa hekarũ ĩrĩa Suleimani aakire gĩetagwo Boazu, rĩĩtwa rĩrĩa hihi riugĩte “Na Hinya.” Gĩtugĩ kĩa mwena wa mũhuro gĩetagwo Jakini, rĩĩtwa rĩrĩa riugĩte “[Jehova] Arohanda Wega.” Mũndũ angĩathomire itugĩ icio igĩrĩ irĩ hamwe kuuma mwena wa ũrĩo athiĩte wa ũmotho arorete mwena wa irathĩro, angĩathomire ‘[Jehova] arohanda wega [hekarũ] na hinya.’—1Ath 7:15-21.
Kũmaatha Maũndũ ma Bata Maandĩko-inĩ
it-1 263
Gwĩthamba
Ũtheru wa kĩĩmwĩrĩ nĩ wa bata harĩ arĩa mathathayagia Jehova na njĩra ĩrĩa yagĩrĩire. Ũndũ ũcio nĩ wonekire ũhoro-inĩ wĩgiĩ mũbango wa gĩikaro kĩrĩa kĩamũre na thutha-inĩ ũtungata wa hekarũ. Rĩrĩa Haruni Mũthĩnjĩri-Ngai Ũrĩa Mũnene na ariũ ake maamũragwo, nĩ meethambire matanehumba nguo ciao nyamũre. (Tham 29:4-9; 40:12-15; Ala 8:6, 7) Nĩguo athĩnjĩri-Ngai methambe moko na magũrũ, maahũthagĩra maĩ marĩa maarĩ kĩraĩ-inĩ gĩa gĩcango kĩrĩa kĩarĩ nja ya gĩikaro kĩrĩa kĩamũre, na hĩndĩ ya hekarũ ya Suleimani maarutaga maĩ karia-inĩ ga cuma ndwekie. (Tham 30:18-21; 40:30-32; 2Ma 4:2-6) Mũthenya wa Kũhumbĩra Mehia, mũthĩnjĩri-Ngai ũrĩa mũnene eethambaga maita merĩ. (Ala 16:4, 23, 24) Arĩa maathiaga nja ya kambĩ gũtwara mbũri ya Azazeli, matigari ma nyamũ iria ciarutagwo magongona, na ngʼombe ndune ya igongona, maagĩrĩirũo gwĩthamba mwĩrĩ na mathambie nguo ciao matanacoka kambĩ-inĩ.—Ala 16:26-28; Nda 19:2-10.
AGOSTI 29–SEPTEMBA 4
MŨTHITHŨ KUUMA KIUGO-INĨ KĨA NGAI | 1 ATHAMAKI 8
“Ihoya Rĩrĩa Suleimani Aahoire Kuuma Ngoro Enyihĩtie Arĩ Mbere ya Andũ”
w09 11/15 9 kĩb. 9-10
Agagĩria Mahoya Maku Kũgerera Kwĩruta Bibilia
Nĩguo mahoya maiguo no mũhaka makorũo maumĩte ngoro-inĩ. 1 Athamaki mũrango wa 8 nĩ ĩkoragwo na mahoya ma kuuma ngoro marĩa Suleimani aahoire arĩ mbere ya irĩndĩ cia andũ arĩa moonganĩte Jerusalemu, hĩndĩ ya kwamũrũo kwa hekarũ ya Jehova mwaka wa 1026 M.M.M. Thutha wa ithandũkũ rĩa kĩrĩkanĩro kũigwo Harĩa Hatheru Mũno na Jehova agĩtũma itu rĩiyũre hekarũ-inĩ, Suleimani nĩ aagoocire Ngai.
Ũngĩthoma ihoya rĩu rĩa Suleimani, nĩ ũkuona atĩ nĩ aagwetire ngoro maita maingĩ. Aaugire atĩ Jehova nowe tu ũĩ ngoro ya mũndũ. (1 Ath. 8:38, 39) Ihoya rĩu ningĩ nĩ rĩonanagia atĩ mwĩhia ‘angĩcokerera Ngai na ngoro yake yothe’ no aiguĩrũo tha. Andũ a Ngai mangĩanyitirũo mĩgwate, Jehova nĩ angĩaiguire mathaithana mao angĩkorũo ngoro ciao nĩ ingĩakorirũo ciĩheanĩte biũ harĩ we. (1 Ath. 8:48, 58, 61) Kwoguo, hatarĩ nganja mahoya maku magĩrĩirũo kuuma ngoro.
w99 1/15 17 kĩb. 7-8
Kũhoya na Njĩra Ĩrĩa Yagĩrĩire
Rĩrĩa tũrahoya tũrĩ mbere ya andũ kana tũrĩ ithuiki, ũtaaro ũmwe wa bata wa Kĩĩmandĩko twagĩrĩirũo kũririkana nĩ atĩ mahoya maitũ nĩ magĩrĩirũo kuonania atĩ tũrĩ enyihia. (2 Maũndũ ma Matukũ ma Tene 7:13, 14) Mũthamaki Suleimani nĩ oonanirie wĩnyihia rĩrĩa aahoithirie mbere ya andũ hĩndĩ ĩrĩa hekarũ ya Jerusalemu yaamũragĩrũo Jehova. Suleimani aakoretwo arĩkia gwaka mwako ũmwe mũthaka mũno harĩ ĩrĩa yanakwo thĩinĩ wa thĩ. O na kũrĩ ũguo, nĩ oonanirie wĩnyihia rĩrĩa aahoire akiuga ũũ: “Hihi Ngai no aikare gũkũ thĩ? Atĩrĩrĩ, igũrũ, ĩni, igũrũ rĩrĩa rĩrĩ igũrũ mũno, rĩtingĩkũigana; na githĩ nyũmba ĩno njakĩte ndĩkĩrĩ nini o na makĩria!”—1 Athamaki 8:27.
O ta Suleimani, nĩ twagĩrĩirũo gũkorũo tũrĩ enyihia rĩrĩa twaheo mweke wa kũhoithia mbere ya andũ. O na gũtuĩka tũtiagĩrĩirũo kwĩyonania ta tũrĩ athingu, no tuonanie wĩnyihia kũgerera mwarĩrie witũ. Mũndũ ũrahoya enyihĩtie ndahũthagĩra ciugo cia kũgegania kana akagemereria mahoya make. Ndatũmaga andũ merekerie meciria harĩ we, no nĩ harĩ Jehova. (Mathayo 6:5) Wĩnyihia ningĩ no wonanio kũgerera maũndũ marĩa tũgwetaga mahoya-inĩ. Tũngĩhoya tũrĩ enyihia, tũtirĩhũthagĩra ciugo ironania ta tũrera Ngai no mũhaka eke maũndũ na njĩra ĩrĩa tũrenda. Handũ ha ũguo, tũrĩthaithaga Jehova eke maũndũ na njĩra ĩrĩa ĩringaine na wendi wake. Mwandĩki wa thaburi nĩ oonanirie mwerekera ũrĩa wagĩrĩire rĩrĩa aahoire akiuga ũũ: “Atĩrĩrĩ Jehova, tũrakũhoya ũtũhonokie, twagũthaitha! Tũhe ũhootani Jehova, twagũthaitha!”—Thaburi 118:25; Luka 18:9-14.
Kũmaatha Maũndũ ma Bata Maandĩko-inĩ
it-1 1060 kĩb. 4
Igũrũ
Suleimani, ũrĩa waakire hekarũ ĩrĩa yarĩ Jerusalemu aaugire, “igũrũ, ĩni, igũrũ rĩrĩa rĩrĩ igũrũ mũno” rĩtingĩigana Ngai. (1Ath 8:27) Tondũ Jehova nĩwe wombire igũrũ, nĩ mũtũũgĩru mũno kũrĩkĩra, na “rĩĩtwa rĩake riki norĩo itũũgĩru gũkĩra marĩa mangĩ mothe. Ũnene wake nĩ mũtũũgĩru gũkĩra thĩ na igũrũ.” (Thb 148:13) Jehova athimaga igũrũ na njĩra hũthũ o ta ũrĩa mũndũ angĩthima kĩndũ na njĩra ya kũigĩrĩra ciara ciake, kĩndũ kĩu gĩgakorũo kĩrĩ gatagatĩ ka mũthia wa kĩara kĩrĩa kĩnene na mũthia wa kaara karĩa kanini. (Isa 40:12) Ciugo icio cia Suleimani itironania atĩ Ngai ndakoragwo na handũ harĩa aikaraga. Ningĩ itironania akoragwo handũ o hothe na indo-inĩ ciothe. Ũndũ ũcio no woneke wega kuumana na ũrĩa Suleimani eerire Jehova aromũigua arĩ ‘kũu igũrũ, gĩikaro-inĩ gĩake,’ na ũguo nĩ kuuga igũrũ kũrĩa ciũmbe cia roho cikaraga.—1Ath 8:30, 39.
Wĩrutanĩrie Biũ Ũtungata-inĩ
km 5/10 2
Mahoya nĩ ma Bata Harĩ Ahunjia Akristiano
Tũtingĩhota kũhingia maũndũ ũtungata-inĩ tũrĩ ithuiki. Jehova nĩwe ũtũheaga hinya wa kũruta wĩra ũcio. (Afil. 4:13) Ahũthagĩra araika ake gũtũteithia kuona andũ arĩa matariĩ ta ngʼondu. (Kũg. 14:6, 7) Jehova nĩwe ũkũragia mbegũ cia ũhoro wa ma iria tũhandaga na tũgaitĩrĩria maĩ. (1 Kor. 3:6, 9) Kwoguo nĩ ũndũ wa bata mũno harĩ ahunjia Akristiano kwĩhoka Ithe witũ wa igũrũ na njĩra ya kũmũhoya!
Kũhoya nĩ Ũndũ Witũ: Nĩ twagĩrĩirũo kũhoya hĩndĩ ĩrĩa yothe tũrahunjia. (Ef. 6:18) Nĩ maũndũ ta marĩkũ tũngĩhoya? No tũhoe nĩguo tũkorũo na mwerekera mwega wĩgiĩ andũ a gĩcigo gitũ na tũgĩe na ũcamba. (Atũm. 4:29) No tũhoe Jehova atũteithie kuona andũ arĩa marĩ na ngoro njega arĩa tũngĩĩruta Bibilia nao. Mwene nyũmba angĩtũũria kĩũria, no tũhoe mahoya makuhĩ ngoro-inĩ, twĩre Jehova atũteithie tũmũcokerie na njĩra ĩrĩa yagĩrĩire. (Neh. 2:4) O na no tũhoe tũheo ũũgĩ nĩguo tũhote kũiga ũtungata mbere. (Jak. 1:5) Ningĩ Jehova nĩ akenaga rĩrĩa twamũcokeria ngatho, nĩ ũndũ wa mweke ũrĩa atũheete wa gũkorũo tũrĩ ndungata ciake.—Kol. 3:15.
Kũhoera Arĩa Angĩ: Ningĩ nĩ twagĩrĩirũo ‘kũhoyanagĩra,’ o na tũkagweta andũ arĩa angĩ mahoya-inĩ na marĩĩtwa hĩndĩ ĩrĩa kwagĩrĩire. (Jak. 5:16; Atũm. 12:5) Hihi nĩ ũremagwo kũhingia maũndũ maingĩ ũtungata-inĩ nĩ ũndũ wa gũkorũo wĩ mũrwaru? No ũhoere ahunjia arĩa angĩ arĩa marĩ na ũgima mwega wa mwĩrĩ. Ndũkanahũthie hinya wa mahoya marĩa ũngĩhoya nĩ ũndũ wao! Ningĩ nĩ wega kũhoera anene a thirikari nĩguo makorũo na mawoni mega megiĩ wĩra witũ wa kũhunjia, na nĩgetha ariũ a Ithe witũ mathiĩ na mbere “gũkorũo na ũtũũro mũhooreru na ũrĩ na thayũ.”—1 Tim. 2:1, 2.
Kũhunjia ũhoro ũrĩa mwega thĩinĩ wa thĩ yothe ti wĩra mũhũthũ. No ‘tũngĩhoyaga tũtegũtigithĩria,” no tũhote kũhingia wĩra ũcio tũgĩteithio nĩ Jehova.—Rom. 12:12.