Andũ Anana Kũhonoka Mũiyũro

Nuhu na famĩlĩ yake o hamwe na nyamũ nĩ maaingĩrire thĩinĩ wa thabina. Jehova aacokire akĩhinga mũrango wa thabina na gũkĩambĩrĩria kuura. Kwaurire mbura nene mũno nginya thabina ĩkĩambĩrĩria kũrera. Thutha wa ihinda, thĩ yothe ĩkĩiyũra maĩ. Andũ arĩa othe maarĩ oru nĩ maakuire, no Nuhu na famĩlĩ yake nĩ maahonokire. Ta hũũra mbica gĩkeno kĩrĩa maarĩ nakĩo tondũ wa gwathĩkĩra Jehova!

Mbura yaurire thikũ 40 ũtukũ na mũthenya, ĩgĩcoka ĩgĩkĩa. Maĩ maathiire makĩhũaga o kahora, na thutha ũcio thabina ĩkĩrũgama irĩma-inĩ. No tondũ ti kũndũ guothe kwahũĩte maĩ, Nuhu na famĩlĩ yake matingĩaumire thĩinĩ wa thabina na ihenya.

Maĩ maathiire mahũĩte biũ o kahora. Nuhu na famĩlĩ yake maaikarire thĩinĩ wa thabina makĩria ma mwaka ũmwe. Jehova aacokire akĩmeera moime thabina, na hĩndĩ ĩyo thĩ yarĩ therie tondũ andũ arĩa aganu nĩ maaniinĩtwo. Nĩ maakenire mũno nĩ ũndũ wa kũhonokio, na makĩrutĩra Jehova igongona nĩguo monanie ngatho ciao.

Jehova nĩ aakenirio mũno nĩ igongona rĩu. Nĩ eeranĩire atĩ gũtirĩ hĩndĩ ĩngĩ akaaniina indo ciothe thĩinĩ wa thĩ na maĩ. Agĩcoka akĩiga mũkũnga-mbura matu-inĩ riita rĩa mbere, ũrĩ rũũri rwa kuonania atĩ ndageka ũguo rĩngĩ. Nĩ ũrĩ wona mũkũnga-mbura?

Jehova aacokire akĩra Nuhu na famĩlĩ yake maciarane na maiyũrie thĩ.