Thutha wa Joshua gũtongoria andũ a Jehova kwa ihinda iraya, nĩ aakuire arĩ na mĩaka 110. Aisiraeli nĩ maatungatagĩra Jehova ihinda rĩrĩa rĩothe Joshua aarĩ muoyo. No rĩrĩa aakuire, makĩambĩrĩria gũthathaiya ngai cia mĩhianano o ta ũrĩa Akanaani meekaga. Tondũ nĩ maatigire kũrũmĩrĩra ciugo cia Joshua, Jehova nĩ aarekereirie mũthamaki wa Kanaani wetagwo Jabini amaritũhĩrie ũtũũro. Aisiraeli nĩ maakaĩire Jehova amateithie. Nĩ ũndũ ũcio Jehova akĩmahe mũtongoria ũngĩ wetagwo Baraki, ũrĩa ũngĩamateithirie gũcokerera Jehova.

Debora, ũrĩa warĩ mũnabii, nĩ aatũmanĩire Baraki athiĩ kũrĩ we nĩguo amũhe ndũmĩrĩri ya Jehova. Eerire Baraki ũũ: ‘Oya arũme 10,000 mũthiĩ mũgacemanie na thigari cia Jabini Rũũĩ-inĩ rwa Kishoni. Wathiĩ nĩ ũkũhoota Sisera, mũnene wa thigari cia Jabini.’ Nake Baraki akĩra Debora: “Nĩ ngũthiĩ angĩkorũo nĩ tũgũthiĩ nawe.” Debora akĩmwĩra ũũ: ‘Nĩ tũgũthiĩ nawe. No ũmenye atĩ tiwe ũkũũraga Sisera. Jehova augĩte atĩ Sisera ekũũragwo nĩ mũtumia.’

Baraki na thigari ciake o hamwe na Debora nĩ maathiire Kĩrĩma-inĩ gĩa Taboru nĩguo makehaarĩrie nĩ ũndũ wa mbaara. Rĩrĩa Sisera aaiguire ũhoro ũcio, nĩ aacokanĩrĩirie thigari ciake o hamwe na ngaari cia mbaara magĩthiĩ Rũũĩ-inĩ rwa Kishoni. Debora eerire Baraki ũũ: ‘Ũmũthĩ nĩguo mũthenya ũrĩa Jehova egũkũhe ũhootani.’ Baraki na thigari ciake 10,000 magĩikũrũka kĩrĩma-inĩ nĩguo magacemanie na thigari nyingĩ mũno cia Sisera.

Thutha ũcio Jehova agĩtũma Rũũĩ rwa Kishoni rũihũre mũno nginya rũkiuna. Ũndũ ũcio ũgĩtũma ngaari cia mbaara cia Sisera iremerere ndoro-inĩ. Sisera akiuma ngaari-inĩ yake na akĩũra na magũrũ. Baraki na thigari ciake makĩũraga thigari ciothe cia Sisera, no Sisera nĩ oorire. Aathiire kwĩhitha hema-inĩ ya mũtumia wetagwo Jaeli. Mũtumia ũcio aamũheire iria agĩcoka akĩmũhumbĩra na mũrengeti, na tondũ Sisera aarĩ mũnogu agĩkoma. Thutha ũcio, Jaeli agĩthiĩ aceemete, akĩmũthecerera mũcumarĩ wa hema kĩongo na agĩkua.

Baraki nĩ aathiire gũcaria Sisera. Jaeli akiuma hema-inĩ yake na akĩmwĩra: ‘Ũka nguonie mũndũ ũrĩa ũracaria.’ Baraki aingĩra, aakorire Sisera akomete hau arĩ mũkuũ. Baraki na Debora makĩgooca Jehova na rwĩmbo nĩ ũndũ wa gũteithia Aisiraeli matoorie thũ ciao. Aisiraeli maatũũrire na thayũ mĩaka 40 ĩrĩa yarũmĩrĩire.

Hĩndĩ ĩmwe kwarĩ na ngʼaragu Isiraeli, mũtumia ũmwe wetagwo Naomi marĩ na mũthuri wake na anake ao erĩ nĩ maathamĩire Moabi. Mũthuri wa Naomi nĩ aacokire agĩkua. Nao anake acio ao nĩ maahikirie airĩtu erĩ kuuma bũrũri wa Moabi arĩa meetagwo Ruthu na Oripa. Ũndũ wa kĩeha nĩ atĩ anake acio o nao nĩ maacokire magĩkua.

Rĩrĩa Naomi aaiguire atĩ ngʼaragu nĩ yathirĩte Isiraeli, agĩciria acoke mũciĩ. Ruthu na Oripa nĩ maambĩrĩirie thabarĩ hamwe nake, no marĩ njĩra-inĩ Naomi akĩmeera ũũ: ‘Mũraarĩ atumia ega harĩ niĩ na harĩ ariũ akwa. Ndĩrenda mũthiĩ mũkahike rĩngĩ. Cokai kwanyu Moabi.’ Nao atumia acio makĩmwĩra ũũ: ‘Nĩ tũkwendete! Tũtingĩenda gũgũtiga.’ No Naomi aaikarire akĩmeeraga macoke kwao. Mũthia-inĩ, Oripa agĩcoka, no Ruthu ndeetĩkĩrire gũcoka. Naomi eerire Ruthu ũũ: ‘Oripa nĩ acoka kũrĩ andũ ake na kũrĩ ngai ciake. Cokania nake, ũcoke mũciĩ kwa mami wanyu.’ No Ruthu akĩmwĩra ũũ: ‘Ndigũgũtiga! Andũ anyu megũtuĩka andũ aitũ, nake Ngai waku atuĩke Ngai wakwa.’ Ũgwĩciria Naomi aaiguire atĩa rĩrĩa Ruthu aamwĩrire ũguo?

Ruthu na Naomi maakinyire Isiraeli rĩrĩa cairi yagethagwo. Mũthenya ũmwe, Ruthu nĩ aathiire kũhaara cairi kwa mũndũ wetagwo Boazu ũrĩa warĩ mũriũ wa Rahabu. Boazu nĩ aaiguire atĩ Ruthu aarĩ Mũmoabi watũũranĩtie na Naomi arĩ mwĩhokeku. Nĩ ũndũ ũcio, akĩra aruti ake a wĩra matigie cairi nyingaingĩ nĩguo Ruthu one ya kũhaara.

Hwaĩ-inĩ ũcio, Naomi nĩ ooririe Ruthu ũũ: ‘Ũmũthĩ uuma kũruta wĩra kũ?’ Nake Ruthu akĩmwĩra: ‘Ngũrutaga wĩra kwa mũndũ wĩtagwo Boazu.’ Naomi akĩmwĩra ũũ: ‘Boazu nĩ wa famĩlĩ citũ. Thiĩ na mbere kũruta wĩra gwake hamwe na airĩtu arĩa angĩ. Kũu kũrĩ na ũgitĩri.’

Ruthu nĩ aathiire na mbere kũruta wĩra kwa Boazu nginya rĩrĩa wĩra wa kũgetha wathirire. Boazu nĩ oonire atĩ Ruthu nĩ aarutaga wĩra na kĩyo na aarĩ mũtumia mwega. Matukũ-inĩ macio, mũthuri angĩakuire atagĩte kaana ga kahĩĩ, mũtumia wake nĩ aahikagio nĩ mũndũ ũmwe wa famĩlĩ ciao. Nĩ ũndũ ũcio Boazu nĩ aahikirie Ruthu na makĩgĩa mwana wetagwo Obedi, ũrĩa wacokire gũtuĩka gukawe wa Mũthamaki Daudi. Arata a Naomi nĩ maakenire mũno. Maamwĩrire ũũ: ‘Jehova aambire gũkũhe Ruthu ũrĩa ũkoretwo arĩ mwega mũno harĩ we, na rĩu nĩ wagĩa na kaana ga gũgwĩta cũcũ. Jehova arogoocwo.’