Maũndũ Moru Marathiĩ O Maingĩhĩte!

Mũtumia ũmwe wa mĩaka 35 wetagwo Smita,a na waikaraga Dhaka, Bangladesh, oĩkaine ta mũndũ mũhoreri na muuma andũ. Andũ maamũĩ ta mũtumia warĩ kĩyo na mwĩkeneri, weendete kũhunjĩria andũ ũhoro ũrĩa erutĩte wĩgiĩ Ngai. Ta wĩcirie ũrĩa famĩlĩ yao na arata mamakire na makĩnyitwo nĩ kĩeha kĩnene rĩrĩa aakuire thutha wa ndwari ya kahinda kanini!

James na mũtumia wake o nao no mahananio na Smita, maarĩ na mĩaka ta 30 ũguo, na maaikarĩte o kahinda kanini thutha wa kũhikania. Hĩndĩ ĩmwe kĩambĩrĩria-inĩ kĩa mwaka, nĩ moimire kwao taũni-inĩ ya New York magĩthiĩ gũcerera arata ao mwena wa gĩcũa-inĩ, ithũĩro rĩa bũrũri wa Amerika, no matiigana gũcoka kwao. Marĩ o kũu nĩ magĩire na aksidenti na magĩkua, ũndũ ũcio warĩ wa kĩeha mũno na nĩ watigire ithenya inene mũno harĩ endwa ao na arĩa maarutithanagia wĩra nao.

Hatarĩ nganja, maũndũ moru na mĩnyamaro irathiĩ cingĩhĩte. Mbaara ciũragaga arĩa mararũa o na arĩa matararũa. Ũhinya na wĩki-naĩ ũhutagia nginya andũ matarĩ na ũũru. Mogwati ma barabara-inĩ o hamwe na mĩrimũ, ciũragaga andũ gũtekũmakania kana nĩ itonga kana nĩ athĩni, ethĩ o na akũrũ. Icanjama cia ndũire iniinaga andũ itegũthutũkania. Rũmena naruo o hamwe na waagi wa kĩhooto itheremete kũndũ guothe. Kwahoteka o nawe wanacemania na maũndũ ta macio.

Wahota kwĩyũria ũũ:

• Nĩkĩ gĩtũmaga maũndũ moru makore andũ arĩa ega?

• Hihi Ngai nĩwe ũtũmaga maũndũ macio mekĩke?

• Icanjama ciĩrehaga o ro ũguo, kana hihi nĩ andũ matũmaga ciĩkĩke?

• Hihi Karmab nĩ ĩtũmaga andũ manyamarĩke?

• Angĩkorũo kũna nĩ kũrĩ Ngai-rĩ, agaga kũgitĩra andũ arĩa ega nĩkĩ?

• Hihi mĩnyamaro na maũndũ moru marĩa makoraga andũ nĩ magathira o rĩ?Nĩguo tuone macokio ma ciũria icio, no mũhaka twambe tũcokie ciũria ici igĩrĩ cia bata: Nĩkĩ gĩtũmaga maũndũ moru mekĩke, na hihi Ngai akoya ikinya rĩrĩkũ?