Gĩĩko Kĩmwe kĩa Ũtugi wa Gĩkristiano

JOHN o hamwe na mami wao na aarĩ na ariũ a nyina atano, maarĩ a ndini ya Gatoreki. Matietĩkanagia na wĩtĩkio wa ithe, ũrĩa warĩ Mũira wa Jehova na wabatithĩtio mũthia-inĩ wa mĩaka ya 1950, taũni-inĩ ĩmwe nini thĩinĩ wa Gujarat bũrũri-inĩ wa India.

Mũthenya ũmwe, John nĩ aatũmirũo nĩ ithe atware marũa kũrĩ mũrũ wa Ithe witũ ũmwe. O na kũrĩ ũguo, rũcinĩ rũu atanathiĩ, nĩ eetemire kĩara ũũru mũno akĩgeria kũhingũra mũkebe ũmwe mũnene. No tondũ nĩ eendaga gwathĩkĩra ithe, akĩyoha kĩara na gatangari na agĩthiĩ gũtwara marũa.

John aakinya kũrĩa aatũmĩtwo, aakorire mũtumia wa mũrũ wa Ithe witũ ũcio, ũrĩa o nake warĩ Mũira wa Jehova na nĩwe wamũkĩrire marũa macio. Rĩrĩa aamũkagĩra marũa macio, mũtumia ũcio nĩ onire kaara ka John karĩa gaatemetwo na akĩĩrũtĩra kũmũteithia. Akĩruta gathandũkũ gake karĩa gaakoragwo na indo cia ũrigitani wa mbere, akĩmũthambia kaara na ndawa, na akĩmuoha wega. Agĩcoka akĩrugĩra John cai o akĩmũtaaragĩria maũndũ ma Bibilia na njĩra ya ũrata.

Nĩ ũndũ wa ũtugi ũrĩa John onirio, rũmena rũrĩa aarĩ naruo kwerekera Aira a Jehova rũkĩambĩrĩria gũthira, na kwoguo akĩũria mũtumia ũcio ciũria igĩrĩ ciĩgiĩ maũndũ marĩa onete marĩ ngũrani gatagatĩ ka wĩtĩkio wake na wa ithe. Aamũũririe kana Jesu nĩ Ngai na kana Akristiano nĩ magĩrĩire kũhoya Mariamu. Tondũ mũtumia ũcio nĩ eerutĩte rũthiomi rũrĩa John aaragia rwa Gujarati, nĩ aamũcokeirie ciũria icio na rũthiomi rwake akĩhũthĩra Bibilia na akĩmũhe kabuku ka “This Good News of the Kingdom.”

Thutha ũcio, John agĩthoma kabuku kau aaiguaga ta arĩ rita rĩa mbere kũmenya ma cia Bibilia. Aathire kũrĩ mũhunjia wao wa Gatoreki na akĩmũũria ciũria icio igĩrĩ. Mũhunjia ũcio aarakarire o na ihenya na akĩmũikĩria Bibilia anĩrĩire ũũ: “We ũtuĩkĩte Shaitani! Nyonia harĩa handĩkĩtwo Bibilia-inĩ atĩ Jesu ti Ngai. Nyonia harĩa yugaga atĩ ndwagĩrĩirũo gũthathaiya Mariamu! Nyonia!” John nĩ aamakire mũno nĩ mũtugo ũcio wa mũhunjia ũcio, na akĩmwĩra, “Ndigakinyithia kũgũrũ gwakwa kanitha-inĩ wa Gatoreki rĩngĩ.” Na ndacokire kuo o rĩ o rĩ!

John nĩ aambĩrĩirie kwĩruta Bibilia na Aira a Jehova, akĩĩhanda wega ũthathaiya-inĩ wa ma, na akĩambĩrĩria gũtungatĩra Jehova. Thutha wa ihinda, andũ angĩ aigana ũna a famĩlĩ yao o nao nĩ maarũmĩrĩire makinya make. Ũmũthĩ ũyũ, John no akoragwo na kĩrema kaara-inĩ ga guoko kwa ũrĩo karĩa eetemire mĩaka 60 mĩthiru. Ĩndĩ no aririkanaga gĩĩko kĩmwe kĩa ũtugi wa Gĩkristiano kĩrĩa kĩamũgucĩrĩirie ũthathaiya-inĩ wa ma.—2 Kor. 6:4, 6.