Mawoni ma Andũ Megiĩ Kũhoya
“Rĩrĩa ndahoya, njiguaga ta Ngai arĩ hakuhĩ na niĩ anyitĩte guoko na akandongoria rĩrĩa ndaigua njũrĩte njĩra.”—MARÍA.
“Mũtumia wakwa akuire thutha wa kũrwara kansa ihinda rĩa mĩaka 13. Nĩ ngũririkana ngĩhoya Ngai o mũthenya na ngaigua atĩ nĩ aathikagĩrĩria mahoya makwa na akamenya ruo rũrĩa ndĩ naruo. Nĩ ndaiguaga ndĩ na thayũ.”—RAÚL.
“Mahoya nĩ kĩheo kĩa bata mũno andũ maheetwo nĩ Ngai.”—ARNE.
María, Raúl, Arne, na andũ angĩ aingĩ, monaga mahoya marĩ kĩheo kĩa mwanya. Nĩ monaga atĩ kũgerera mahoya no maranĩrie na Ngai, mamũcokerie ngatho, na mamũhoe ũteithio. Nĩ metĩkĩtie biũ ũrĩa Bibilia yugaga igũrũ rĩgiĩ kũhoya Ngai, yugaga ũũ: “Ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga.”—1 Johana 5:14.
O na kũrĩ ũguo, andũ amwe nĩ maritũhagĩrũo gwĩtĩkia ũrĩa Bibilia yugaga igũrũ rĩgiĩ mahoya. Steve nĩ ataarĩirie mawoni marĩa aarĩ namo megiĩ mahoya. Ooigire ũũ: “Rĩrĩa ndakinyirie mĩaka 17, arata akwa atatũ nĩ maakuire nĩ ũndũ wa aksidenti. Ũmwe aakuire thutha wa ngaari kũringana, nao acio angĩ erĩ magĩkuĩra iria-inĩ.” Steve eekire atĩa? Ooigire ũũ: “Nĩ ndahoire Ngai andeithie kũmenya kĩrĩa gĩatũmire maũndũ macio mothe mahaanĩke, no ndionire macokio. Kwoguo ngĩĩra atĩrĩ, ‘Ndĩrakĩhoya nĩkĩ?’” Nĩ ũndũ wa andũ aingĩ kuona ta mahoya mao mataracokio, mationaga bata wa gũthiĩ na mbere kũhoya.
Harĩ maũndũ mangĩ matũmaga andũ mage bata wa mahoya. Andũ amwe moigaga atĩ tondũ Ngai nĩ oĩ maũndũ mothe, ũguo nĩ kuonania atĩ nĩ oĩ mabataro na mathĩna maitũ kwoguo hatirĩ bata wa kũmwĩra maũndũ macio.
Angĩ nao monaga ta Ngai atacokagia mahoya mao nĩ ũndũ wa mahĩtia meekĩte na hau kabere. Jenny ooigire ũũ: “Thĩna wakwa mũnene nĩ kwĩigua itarĩ kĩene. Harĩ maũndũ ndaneka matarĩ mega, na kwoguo njĩtĩkĩtie atĩ Ngai ndangĩnjigua.”
Ũkoragwo na mawoni marĩkũ megiĩ kũhoya? Angĩkorũo wanakorũo na nganja kana ciũria ciĩgiĩ mahoya, no wĩkĩrũo ngoro kũmenya atĩ Bibilia nĩ ĩkoragwo na macokio ma kwĩhokeka megiĩ ciũria icio. Ũhoro ũrĩa Bibilia ĩheanĩte wĩgiĩ mahoya nĩ wa kwĩhokeka,a na no ĩgũteithie kuona macokio ma ciũria ta ici:
Hihi Ngai nĩ athikagĩrĩria mahoya maitũ?
Mahoya mamwe magaga gũcokio nĩkĩ?
Tũngĩhoya atĩa nĩguo Ngai atũthikĩrĩrie?
Mahoya mangĩgũteithia atĩa?
a Bibilia nĩ ĩkoragwo na mahoya maingĩ ma ndungata cia Ngai, o hamwe na mahoya ma Jesu Kristo. Maandĩko ma Kĩhibirania, marĩa andũ aingĩ metaga Kĩrĩkanĩro Kĩrĩa Gĩkũrũ, nĩ makoragwo na mahoya makĩria ma 150.