Andũ Arĩa Akũrũ nĩ a Bata Harĩ Kĩũngano
“Nĩ makaga mũno ndaririkana maũndũ marĩa ndahotaga kũhingia ndĩ mwĩthĩ. No rĩu tondũ ndĩ mũkũrũ, ndihotaga kũhingia maũndũ maingĩ.”—Connie, mĩaka 83.
No kũhoteke o nawe rĩu ndũhotaga kũhingia maũndũ maingĩ ta marĩa wahingagia tene. O na gũtuĩka nĩ ũtungatĩire Jehova ũrĩ mwĩhokeku kwa ihinda rĩa mĩaka mĩingĩ, no ũigue ũkuĩte ngoro mũno weciria ũhoro wa maũndũ marĩa ũtarahota kũhingia. Angĩkorũo ũguo nĩguo ũiguaga-rĩ, nĩ kĩĩ kĩngĩgũteithia gũkorũo na gĩkeno?
KĨRĨA JEHOVA ERĨGAGĨRĨRA KUUMA KŨRĨ WE
Ta wĩyũrie ũũ, ‘Nĩ kĩĩ Jehova erĩgagĩrĩra kuuma kũrĩ niĩ?’ No ũmĩrĩrio nĩ ciugo iria irĩ thĩinĩ wa Gũcokerithia Maathani 6:5 iria ciugaga ũũ: “No mũhaka wende Jehova Ngai waku na ngoro yaku yothe na muoyo waku wothe na hinya waku wothe.”
Mũhari ũcio ũronania atĩ Jehova erĩgagĩrĩra ũmũtungatĩre na ngoro yaku yothe, muoyo na hinya waku wothe. Kũririkanaga ũndũ ũcio no gũgũteithie kwaga kũringithanagia maũndũ marĩa ũrahingia ihinda-inĩ rĩrĩ na marĩa arĩa angĩ marahingia, kana na marĩa wahotaga kũhingia tene.
Hĩndĩ ĩrĩa warĩ na hinya mũingĩ, no kũhoteke nĩ waheaga Jehova kĩrĩa kĩega biũ kũringana na ũrĩa maũndũ maku maahanaga hĩndĩ ĩyo. No tondũ rĩu maũndũ maku nĩ macenjetie, no kũhoteke no ũrerutanĩria ũrĩa wothe ũngĩhota kũhe Jehova kĩrĩa kĩega biũ kũringana na ũrĩa maũndũ maku matariĩ rĩu. Ũngĩkoragwo na mawoni ta macio, no ũkorũo na ma biũ atĩ nĩ ũrahe Jehova kĩrĩa kĩega biũ, o ta ũrĩa wekaga tene.
Tene nĩ waheaga Jehova kĩrĩa kĩega biũ, na o na rĩu wĩ mũkũrũ nĩ ũramũhe kĩrĩa kĩega biũ
NO ŨTEITHIE ARĨA ANGĨ NA NJĨRA NENE
Handũ ha gwĩciragia ũhoro wa o maũndũ marĩa ũtangĩhota kũhingia rĩu, wĩciragie ũhoro wa mĩeke ĩrĩa ũrĩ nayo ya gũteithia arĩa angĩ. Ma nĩ atĩ, no ũhote gwĩka maũndũ mamwe ũtangĩahotire gwĩka na hau kabere. Kwa ngerekano no wĩke ũũ:
Taaragĩria arĩa angĩ maũndũ marĩa wĩyoneire ũtũũro-inĩ waku. Ta wĩcirie ciugo ici irĩ Bibilia-inĩ:
Mũthamaki Daudi: “Kũrĩ hĩndĩ ndarĩ mwĩthĩ na rĩu ndĩ mũkũrũ, no ndirĩ ndona mũndũ o na ũmwe mũthingu atiganĩirio, kana ciana ciake ikĩhoya mũgate.”—Thab. 37:25.
Joshua: “Atĩrĩrĩ, rĩu ndĩ hakuhĩ gũkua, na nĩ mũĩ wega na ngoro yanyu yothe na muoyo wanyu wothe atĩ gũtirĩ kiugo o na kĩmwe harĩ ciĩranĩro ciothe njega iria Jehova Ngai wanyu aamwĩrĩire kĩagĩte kũhinga. Ihingĩte ciothe harĩ inyuĩ. Gũtirĩ kiugo o na kĩmwe kĩagĩte kũhinga.”—Josh. 23:14.
No kũhoteke o nawe wanekĩra arĩa angĩ ngoro ũkĩhũthĩra ciugo ta icio. Ciugo icio cia Daudi na Joshua ciarĩ na ũritũ, tondũ maaciugire thutha wa gũtũũra mĩaka mĩingĩ na kwĩyonera maũndũ maingĩ ũtũũro-inĩ.
Angĩkorũo nĩ ũtungatĩire Jehova kwa ihinda iraihu, hatarĩ nganja wĩ na maũndũ wĩyoneire ũngĩtaarĩria marĩa maronania irathimo iria ciumanaga na gwĩka ũguo. Hihi no ũririkane hĩndĩ weyoneire Jehova agĩteithia ndungata ciake na njĩra ya mwanya? No ũtaarĩrie andũ arĩa angĩ ũndũ ũcio. Andũ arĩa ũrĩtaaragĩria maũndũ marĩa wĩyoneire nĩ marĩkĩragwo ngoro na o nawe ũgekĩrũo ngoro.—Rom. 1:11, 12.
Ningĩ no wĩkĩre andũ arĩa angĩ ngoro na njĩra ya kwĩrutanĩria gũthiaga mĩcemanio Nyũmba-inĩ ya Ũthamaki rĩrĩa rĩothe kwahoteka. Rĩrĩa weka ũguo nĩ mwĩkĩranaga ngoro hamwe na aarĩ na ariũ a Ithe witũ. Connie, ũrĩa ũkũgwetetwo na hau kabere aaugire ũũ: “Gũthiaga mĩcemanio Nyũmba-inĩ ya Ũthamaki nĩ kũnjĩkĩraga ngoro mũno. Wendo ũrĩa aarĩ na ariũ a Ithe witũ manyonagia nĩ ũtũmaga njigue ndĩ mũcanjamũku. Nĩ ngeragia kũmacokeria ngatho na njĩra ya kũmahe iheo. Na nĩ nduĩte itua rĩa gũthiĩ na mbere kũnyitanĩra hamwe nao maũndũ-inĩ ma kĩĩroho.”
JEHOVA NĨ AKENAGIO NĨ KĨYO GĨAKU
Bibilia nĩ ĩgwetete andũ aingĩ arĩa meendetwo nĩ Jehova o na gũtuĩka matingĩahotire kũhingia maũndũ maingĩ ũtungata-inĩ wake. Ngerekano ĩmwe nĩ ya Mũisiraeli ũmwe warĩ mũkũrũ wetagwo Simeoni, ũrĩa watũũraga mahinda marĩa Jesu aaciarirũo. Rĩrĩa Simeoni aathiĩ hekarũ-inĩ, no kũhoteke nĩ oonaga anake makĩruta mawĩra ma bata. No we hihi aarĩ na mawoni marĩkũ kwĩyerekera? No kũhoteke oonaga ũtungata wake ũrĩ mũnini maitho-inĩ ma Jehova akĩũringithania na wa anake acio. Ngũrani na ũguo, Jehova oonaga Simeoni arĩ “mũndũ mũthingu na wetigĩrĩte Ngai mũno,” na nĩ ũndũ ũcio akĩmũrathima na njĩra ya kũmũhe mweke wa mwanya wa kuona Jesu arĩ gakenge. Makĩria ma ũguo Jehova nĩ aahũthĩrire Simeoni kũmenyithania atĩ Jesu nĩwe Mesia ũrĩa weranĩirũo. (Luk. 2:25-35) Hatarĩ nganja, Jehova ndaaroraga hinya wa mwĩrĩ wa Simeoni, no ũndũ ũrĩa oonaga ũrĩ wa bata nĩ atĩ aarĩ na wĩtĩkio mũrũmu, “na roho mũtheru warĩ igũrũ rĩake.”
Jehova nĩ aarathimire Simeoni na njĩra ya kũmũhe mweke wa mwanya wa kuona Jesu arĩ gakenge na kũmenyithania atĩ Jesu nĩwe Mesia ũrĩa weranĩirũo
O nawe no ũkorũo na ma atĩ Jehova nĩ akenagio nĩ wĩhokeku waku, gũtekũmakania maũndũ marĩa ũtarahota kũhingia. Ũtungata ũrĩa wĩtĩkĩrĩkaga makĩria maitho-inĩ make, nĩ ũrĩa ũrutagwo “kũringana na kĩrĩa mũndũ arĩ nakĩo, no ti kũringana na kĩrĩa atarĩ nakĩo.”—2 Kor. 8:12.
Nĩ ũndũ ũcio, igaga meciria maku harĩ maũndũ marĩa ũngĩhota kũhingia. Kwa ngerekano no wĩcirie njĩra ĩtiganĩte cia kũhunjia iria ũngĩhota kũnyitanĩra nacio o na angĩkorũo no ihinda inini. Ningĩ no wĩkĩre aarĩ na ariũ a Ithe witũ ngoro na njĩra ya kũmahũũrĩra thimũ kana kũmatũmĩra gakandi. Ciĩko ta icio cia kuonania wendo no ihutie aarĩ na ariũ a Ithe witũ na njĩra nene, makĩria cingiumana na mũndũ tawe ũtungatĩire Jehova kwa ihinda iraya.
O na ũtekũhota kũhingia maũndũ maingĩ, no ũhote kũhe Jehova kĩrĩa kĩega biũ na ũkenere ũtungata. Thoma wone ũndũ ũmwe wonetwo gĩcigo-inĩ kĩa Afrika ya Irathĩro gathandũkũ-inĩ karĩ na kĩongo “Nĩ Aahonokirie Muoyo Wake.”
Ririkanaga atĩ wĩtĩkio na wĩhokeku ũrĩa wonanĩtie kwa ihinda rĩa mĩaka mĩingĩ no wĩkĩre andũ arĩa angĩ ngoro. Nĩ ũigĩte kĩonereria kĩega gĩa ũkirĩrĩria, na no ũkorũo na ma atĩ ‘Ngai ndagĩte ũthingu nĩguo ariganĩrũo nĩ wĩra waku, o na wendo ũrĩa woonanirie nĩ ũndũ wa rĩĩtwa rĩake na njĩra ya gũtungata o na gũthiĩ na mbere gũtungata arĩa aamũre.’—Ahib. 6:10.
WĨRUTANAGĨRIE ŨRĨA ŨNGĨHOTA
Ũthuthuria wonanagia atĩ andũ aingĩ akũrũ arĩa mahũthagĩra mahinda gũteithia arĩa angĩ nĩ makoragwo na ũgima mwegega wa mwĩrĩ na wa meciria, na magatũũra ihinda iraya.
Ũrĩa kũrĩ nĩ atĩ, gwĩkĩra andũ arĩa angĩ maũndũ mega gũtingĩniina mathĩna mothe marĩa maumanaga na ũkũrũ. No Ũthamaki wa Ngai tu ũkaahota kũniina kĩhumo gĩa ũkũrũ na gĩkuũ, na nĩkĩo kwaga gũkinyanĩra gwitũ.—Rom. 5:12.
No ihinda-inĩ rĩrĩ, ũtungata waku harĩ Jehova, ũrĩa ũhutĩtie gũteithia andũ mamũmenye, nĩ wĩkĩraga kĩĩrĩgĩrĩro gĩaku hinya na no wagagĩrie ũgima waku wa mwĩrĩ. Inyuĩ andũ akũrũ, koragwoi na ma atĩ Jehova nĩ onaga ũtungata wanyu ũrĩ wa bata, na atĩ arĩa angĩ thĩinĩ wa kĩũngano nĩ magunĩkaga mũno nĩ kĩonereria kĩanyu kĩa wĩtĩkio.